Xixón al día

Categoría: Sociedá

  • Les ventes de sidra con denominación marquen récor históricu

    Les ventes de sidra con denominación marquen récor históricu

    La sidra con denominación d’orixe sigue batiendo récord. La venta de botelles cola ‘etiquetina’ de la DOP Sidra d’Asturies aumentaron un 27% al respective de 2018. En concretu, l’añu pasáu apurriéronse un total de 4.791.000 contraetiquetes, frente a les 3.765.000 del añu anterior. Les ventes de sidra natural esplumosa tamién medró un 14% nun añu, algamando la cifra de 174.000 contraetiquetes. Nuna nota de prensa, la DOP Sidra d’Asturies destaca «el creciente interés del consumidor pola sidra con denominación».

    Mientres la campaña de 2019, destináronse 7.783.515 de quilos de mazana asturiana a ellaborar sidra con denominación. Los llitros potencialmente certificables fueron cercanos a los 6.000.000. Especialmente positivos son los resultados de ventes fuera d’Asturies. La sidra natural tradicional con denominación yá se vende nun 11% nel restu d’España y un 2% a nivel internacional.

    «Les resultancies son bien bones. Aprosimao trece de cada cien botelles de sidra natural tien la garantía calidable y orixe qu’otorga’l Conseyu Regulador, y tán ellaboraes puramente con mazana asturiana con tolo qu’esto trai para los interess económicos rexonales. Esta ye la auténtica Sidra d’Asturies», asegura Daniel Ruiz, xerente del Conseyu Regulador Sidra d’Asturies.

    El Conseyu Regulador de la DOP Sidra d’Asturies ta formáu por 33 llagares y 353 cosecheros que disponen de 948 hectareas destinaes a la producción de 76 variedaes de mazana. La DOP Sidra d’Asturies puede atopase nel mercáu en trés variedaes distintes: la sidra natural d’echar, la sidra natural de nueva espresión (penerada) que sirve en copa ensin necesidá de ser echada; y la sidra natural esplumosa. Esta tercer variedá demuestra que la tradición nun ta reñida cola innovación, llogrando que d’un productu tradicional llógrese unu muncho más sofisticáu.

  • El Sol, como nunca lu vieres enantes

    El Sol, como nunca lu vieres enantes

    Les primeres imaxes del Telescopiu Solar Daniel K. Inouye, que tien la National Science Foundation (NSF) de EE UU en Hawái, son les de mayor resolvimientu consiguíes hasta agora. Los sos detalles ensin precedentes de la superficie de la estrella van dexar una nueva era de la ciencia solar y un saltu alantre na comprensión del sol y los sos impactos nel nuesu planeta.

    Les semeyes amuesen un patrón de plasma ‘ferviendo’, con estructures en forma de célules, del tamañu d’España, que son la firma de movimientos violentos que tresporten el calor dende l’interior del Sol hasta la so superficie. Esi plasma solar caliente álzase nos centros brillosos de les célules, esfrezse, y depués fúndese en forma de víes escures nun procesu conocíu como conveición.

    Una aproximamientu al clima espacial

    Según la NSF, «el Sol ye un ‘reactor nuclear xigantescu’ que quema unos cinco millones de tonelaes de combustible d’hidróxenu cada segundu». Toa esa enerxía irradia al espaciu y fai posible la vida na Tierra. Esta actividá solar, conocida como clima espacial, puede afectar a los sistemes na Tierra.

    Na década de 1950, los científicos afayaron qu’esiste un vientu solar que sopla dende esta gran estrella hasta los cantos del sistema solar y que vivimos dientro de la so atmosfera. Les potentes erupciones magnétiques que dacuando se producen na nuesa estrella pueden afectar el tresporte aéreu, atayar les comunicaciones per satélite y baltar les redes eléctriques, causando apagones y desactivar el GPS.

    «Güei podemos predicir si va llover prácticamente en cualesquier parte del mundu con muncha precisión, pero’l clima espacial nun ta nesi puntu inda», esplica Matt Mountain, presidente de l’Asociación d’Universidaes para la Investigación n’Astronomía (EE XX). «Precisamos captar la física subxacente detrás del clima espacial y esto empieza sol Sol, que ye lo que va estudiar el telescopiu solar nes próximes décades», añede.

    Nesti contestu, entender les característiques de los campos magnéticos del Sol resulta fundamental. Les observaciones del telescopiu solar Inouy, que puede llograr imaxes de rexones d’hasta 38,000 km d’anchu, va dexar midilos y caracterizalos con más detalle, determinando les causes de l’actividá solar potencialmente dañible.

  • Asina se prepara Asturies énte posibles casos de coronavirus

    Asina se prepara Asturies énte posibles casos de coronavirus

    Asturies prepárase ente posibles contaxos de coronavirus. La Dirección Xeneral de Salú Pública y el Serviciu de Salú distribuyeron la selmana pasada en toles árees sanitaries el protocolu d’actuación énte posibles casos d’infección pol nuevu coronavirus 2019-nCoV. El protocolu caltiense n’actualización continua. Los profesionales del sistema sanitariu asturianu yá cunten col protocolu. Tamién les xerencies de les ocho árees sanitaries y les direcciones d’hospitales, enfermería y atención sanitaria. Tolos casos sospechosos van derivase al Hospital Universitariu Central d’Asturies (HUCA).

    Dende’l Principáu tán siguiéndose les pautes del Ministeriu, que se van revisando de forma continua y adáptense a la realidá asturiana pa poder adoptar les midíes que seyan necesaries. La sospecha d’un casu va realizase en base a criterios clínicos y epidemiolóxicos. Anguaño nun existe un tratamientu específicu pal nuevu coronavirus. El tratamientu sintomáticu del mesmu va depender de la situación clínica.

    El Gobiernu asturianu ta en contactu permanente col Ministeriu de Sanidá y el restu de comunidaes autónomes pa facer un siguimientu de la situación. L’autoridá sanitaria recuerda qu’hai una serie de midíes preventives que son de gran utilidá. Encamienta una correcta hixene de manes, evitar el contactu estrechu con persones que presenten signos d’afección respiratoria y cubrir la boca y la ñariz con pañuelos desechables al tusir o espirriar.

  • L’andanciu de gripe empieza a menguar

    L’andanciu de gripe empieza a menguar

    La incidencia del gripe empezó a menguar na cuarta selmana del añu hasta algamar una tasa de 485,8 casos por cien mil habitantes. La situación considérase d’intensidá media. L’amenorgamientu de la onda epidémica produzse por igual en toles edaes, sacante nel grupu de 5 a 14 años, nel qu’aumenta llixeramente. El virus gripal predominante ye l’A, con más del 95% de los casos.

    Al respective de los ingresos, el HUCA, como hospital centinela d’Asturies, rexistró hasta esta selmana 237 ingresos por esta causa, de los cualos 86 fueron graves. Nel conxuntu de la comunidá, les hospitalizaciones fueron 729. La mayor parte de los ingresos y nes afectaciones más acusaes presentaben dalgún factor de riesgu y nun taben vacunaos. Tocantes a los casos graves, la incidencia aumenta nes dos últimes selmanes y vien acomuñada al picu de la onda epidémica que ta percima de la temporada del añu pasáu, pero de forma asemeyada a les de 2016-2017 y 2017-2018.

    Los datos nacionales reflexen una incidencia en fase d’ascensu, pero con ciertu enclín a la estabilización. La intensidá ye media y nótase un ascensu significativu de les tases d’incidencia nos grupos de 5 a14 años y de 15 a 64, permaneciendo estables nel restu de los grupos d’edá. Asturies, xunto con Andalucía, Canaries, Castiella La Mancha, Estremadura y Madrid tán n’intensidá media d’espardimientu, ente que Melilla, La Rioxa y Navarra tán n’alta.

    Vacunación y encamientos

    Na cuarta selmana de xineru los asturianos siguen vacunándose y yá son 544 persones más les que se protexen contra’l gripe. Por edaes, cinco son neños, 271 adultos menores de 65 años, 268 superen los 65 y otros 60 son muyeres embarazaes. No que va de campaña vacunáronse 206.832 persones, que suponen 4173 más al respective de la campaña del añu pasáu.

    La llavadura frecuente de manos con agua y xabón ye una de les midíes más eficaces para evitar les andaes de gripe. Les autoridaes sanitaries encamienten caltener una bona ventilación de los espacios zarraos. En casu de tusir o espirriar tienen d’utilizase pañuelos de papel d’un solu usu pa tapar la boca y la ñariz, o bien el buecu del coldu para evitar contaminar les manes. Coles mesmes, suxúrese llimpiar con frecuencia les superficies que se toquen coles manes como los pomos de les puertes, interruptores etc. Los síntomes del gripe son malestar xeneral, una fiebre alta súbita y tos, que se trata con antitérmicos. Los antibióticos nun curen el gripe.

  • Lliberada la cría de foca recoyida na sablera d’Arañón

    Lliberada la cría de foca recoyida na sablera d’Arañón

    L’exemplar de foca cardosa recoyiu en payares pola Guardería del Mediu Natural na playa d’Arañón, n’Avilés, soltóse cerca d’esta zona, a 17 milles de la costa asturiana. Personal de les direcciones xenerales del Mediu Natural y de Pesca Marítima trabayaron de forma conxunta nel operativu. La lliberación realizóse desque algamó los 25,2 quilos y en verificando que la so capacidá de nalar y pescar yera bona.

    La cría de foca cardosa pasó dos meses nel Centru de Recuperación de la Fauna Montesa del Principáu. Cuando llegó, pesaba 14,6 quilos y presentaba delles firíes de poca consideranza. L’atención centróse sobre manera n’alimentala amañosamente. La Guardería del Mediu Natural recoyó l’añu pasáu dos foques de característiques asemeyaes, colo que son yá trés los exemplares atendíos nel últimu añu y lliberaos depués de la so recuperación.

    La collaboración ciudadana ye de gran importancia na atención a los varamientos d’animales marinos y de la fauna montesa en xeneral. Énte una situación asina, tien que se poner el casu en conocencia de los servicios d’emerxencies. Aconséyase nun s’averar al animal, nin tocalu, nin da-y alimentos.

  • Asturies reivindícase en Fitur como la capital quesera

    Asturies reivindícase en Fitur como la capital quesera

    El quesu foi protagonista esti fin de selmana nel estand d’Asturies en Fitur. La rexón va convertise nel 2020 na capital quesera del mundu. La directora xeneral de Desenvolvimientu Rural y Industries Agraries, Begoña López, presentó nel espaciu l’Asturies Paraísu Natural International Cheese Festival. El certame de quesos más importante del mundu va celebrase n’Uviéu del 4 y al 7 de payares.

    El festival acueye como actu central la 33 edición de los World Cheese Awards. El concursu otorga’l premiu al meyor quesu del mundu. Ta previsto que participen más de 3.000 quesos y 300 xueces internacionales encargaos d’escoyer los meyores. Ente les actividaes previstes destaca la celebración del primer congresu científicu del quesu, la participación de restauradores de sonadía o la creación d’un espaciu de fusión de gastronomía y de comedia abiertu al públicu llamáu Gastro Cheese Comedy. Amás, van entamase degustaciones, esperiencies y prebes onde los Alimentos del paraísu van ser los protagonistes.

    El certame, qu’incluye tamién una exhibición de productos, va atrayer a Asturies a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu. Begoña López destacó que la cita va impulsar la proyección internacional d’Asturies, xunto a los quesos y la industria agroalimentaria rexonal. Tamién valoró la oportunidá que s’abre pa pa dar a conocer los productos que formen parte de la marca Alimentos del paraísu, vinculaos al territoriu y a parámetros de sostenibilidá, elementos diferenciadores que-yos dan un valor añedíu y son cada vez más apreciaos nun mercáu global.

  • L’andanciu de gripe algama una intensidá alta

    L’andanciu de gripe algama una intensidá alta

    L’andanciu del gripe siguió aumentando na tercer selmana del añu hasta algamar una tasa de 623 casos por cien mil habitantes, lo que supón un nivel d’intensidá altu. La medría de los contaxos produzse sobre manera nos menores de 5 años y na mocedá, y caltiénse ente’l restu de la población. La presión asistencial n’Atención Primaria y Urxencies caltiénse estable y tiende a baxar nesta selmana.

    El virus gripal predominante sigue siendo l’A (nH1N1), anque tamién circulen de manera relevante del virus respiratoriu sincitial. L’HUCA rexistró hasta esta tercer selmana del añu 161 ingresos por gripe, de los que 55 foron graves. La estimación pal conxuntu d’Asturies xubió a 495 hospitalizaciones. Los más de los ingresos y casos graves presentaben dalgún factor de riesgu, y yeren mayores de 50 años. Los datos nacionales reflexen que’l gripe espardióse per tol país, sacante en Cantabria y Andalucía, onde’l nivel d’espardimientu ye local. Asturies, Navarra y La Rioxa son les úniques comunidaes onde la intensidá de la epidemia ye alta.

  • ¿Cómo evitar contaxase de gripe?

    ¿Cómo evitar contaxase de gripe?

    L’andanciu del gripe algamó esta selmana n’Asturies un nivel d’intensidá altu. La llavadura frecuente de manes con agua y xabón ye una de les midíes más eficaces pa evitar los contaxos. Les autoridaes sanitaries aconseyen amás tener una bona ventilación de los espacios zarraos. En casu de tusir y espirriar tienen que s’usar pañuelos de papel d’un usu namás pa tapar la boca y la ñariz, o bien el buecu del coldu pa evitar contaminar les manes.

    Amás, suxérse llimpiar con frecuencia les superficies que se toquen coles manes como los pomos de les puertes, interruptores, etc. Los síntomes del gripe son malestar xeneral, una fiebre alta súbita y tos, que se trata con antitérmicos. Los antibióticos nun curen el gripe.

    Na tercer selmana de xineru vacunáronse otres 1.375 persones, de les que 675 son mayores de 65 años y 47, muyeres embaranzaes. Nesta temporada, protexéronse del gripe 206.287 asturianos, 5.855 persones más que na mesma selmana de la campaña del 2018. Los centros de salú van siguir alministrando la profilaxis a les persones de riesgu que lo soliciten esti mes.

  • Estudien posibles casos de paperes n’adolescentes de dos institutos

    Estudien posibles casos de paperes n’adolescentes de dos institutos

    La Conseyería de Salú ta estudiando posibles casos de paperes ente los alumnos de bachilleratu de dos escueles, amás de n’otros centros educativos del área sanitaria IV. El Serviciu de Vixilancia Epidemiolóxica recibió esti mes la notificación médica de trés casos, que correspuenden a varones de les árees VIII (Nalón), V (Xixón) y IV (Uviéu). Esti postreru ye una sospecha clínica ensin confirmación pol llaboratoriu d’un alumnu de 17 años del Colexu Internacional Meres, en Siero. Aparte, nes últimes selmanes el Llaboratoriu de Microbioloxía del HUCA recibió delles muestres que resultaron negatives.

    El mes pasáu notificáronse siete casos con edaes ente los 12 y 74 años. En total, nel 2019 rexistráronse 53 casos n’Asturies, de los que 9 yeren adolescentes de 15 a 19 años d’edá. Nesti sieglu hubo trés brotos epidémicos de paperes, nel 2002, 2007 y 2012-13. Nesti últimu periodu confirmáronse 2.900 contaxos.

    La inmunización de les paperes, incluyida nel calendariu vacunal infantil dende 1982, forma parte de la llamada triple vírica (sarampión, parotiditis y rubeola). Alminístrase a los 12 meses con un recuerdu a los 3 años d’edá. Esta profilaxis foi quién a menguar nun 86 % la incidencia d’esta enfermedá que cursa fiebre y inflamación d’una o delles glándules salivales parótides.

  • Asturies necesita sangre de los grupos 0- a A-

    Asturies necesita sangre de los grupos 0- a A-

    Asturies necesita sangre de los grupos 0- y A-. El Centru Comunitariu de Sangre y Texíos d’Asturies ta acabante de facer un llamáu al traviés de les redes sociales nes qu’alerta de la escasez de reserves. L’organismu encamienta a tolos donantes d’estos grupos a allegase a un centru de donación. La epidemia de gripe ta enllenando les urxencies de los hospitales y la necesidá de sangre medra.

    Les persones interesaes pueden contribuyir nel puntu fixu de donación asitiáu na cai Donato Argüelles, 20. Esti centru permanez abiertu los llunes y miércoles n’horariu de 16 a 21 hores y los vienres de 10 a 20 hores. Tamién puede donase nel hospital de la Cruz Roja (C/. Uría nº 37) los llunes, miércoles y vienres de 11 a 14 hores. Amás, podrá contribuyise averándose a la unidá móvil de donación, qu’el xueves y el vienres de la selmana que vien va tar na cai Manuel R. Álvarez, en La Calzada.

    El Centru Comunitariu de Sangre y Texíos cunta con otros dos puntos fixos de donación n’Asturies: n’Uviéu, na cai Emilio Rodríguez Vigil, s/n (de llunes a vienres de 8 a 21 hores y sábados de 8 a 14 hores); y n’Avilés, na plaza Santiago López, 1 (martes de 16 a 21 hores). Tola información actualizada de los puntos fixos de donación de sangre y la ubicación de les unidaes móviles puede consultase na páxina web www.donasturias.org.