Xixón al día

Categoría: Sociedá

  • Afayaos 24 esoplanetes nuevos

    Afayaos 24 esoplanetes nuevos

    Personal investigador del Institutu de Ciencies y Tecnoloxíes Espaciales d’Asturies (ICTEA) de la Universidá d’Uviéu afayó 24 nuevos esoplanetes nun estudiu espublizáu apocayá na Royal Astronomical Society de la Universidá de Oxford. El trabayu encóntase nel métodu de tránsitu; esto ye, un métodu basáu en midir les minúscules variaciones de la lluz emitida por una estrella cuando un planeta pasa per delantre d’ella dende la nuesa perspectiva. Pa ello, l’ICTEA desenvolvió una serie de técniques que permitieron automatizar el procesu de busca de señales planetaries nos datos recoyíos pol telescopiu espacial Kepler de la NASA.

    Los planetes de la investigación presenten propiedaes bien diverses, ente les que destaca la esistencia de Tierres calientes con periodos orbitales de namás 1 día y que reciben la radiación de la so estrella solamente por una de les sos cares, planetes gaseosos del tamañu de Neptunu orbitando a la so estrella 10 vegaes más abargana que Mercuriu del Sol, etc. L’estudiu d’estes propiedaes contribúi a una meyor comprensión de les arquitectures posibles de los sistemes planetarios nel universu, lo mesmo que de los procesos qu’intervienen na so formación. El personal investigador destaca que 5 de los planetes detectaos asitiénse na zona d’habitabilidá de les sos respectives estrelles; esto ye, atópense a una distancia de la so estrella tal que pue esistir agua llíquido na superficie del planeta. Estos planetes son un oxetivu preferente pal estudiu d’atmósferes planetaries, que va ser posible realizar de manera eficiente nun futuru próximu.

  • Salú confirma un centenar de nuevos casos de coronavirus

    Salú confirma un centenar de nuevos casos de coronavirus

    La Conseyería de Salú confirmó un centenar de casos positivos pola covid-19 diagnosticaos esti miércoles. Tolos afectaos, sacante trés que fueron hospitalizaos, tán asintomáticos o presenten síntomes leves y permanecen aisllaos na so casa. Los epidemiólogos siguen coles investigaciones pa determinar la vinculación de tolos casos detectaos. Amás, cuatro persones que fueren diagnosticaes en díes anteriores fueron ingresaes nel hospital. Nun se rexistraron nuevos ingresos en UCI nin fallecimientos por coronavirus.

    El Serviciu de Salú del Principáu d’Asturies (Sespa) realizó esti miércoles 3.640 pruebes PCR. La tasa de positividad foi del 2,74%. El Serviciu de Vixilancia Epidemiolóxica constata una incidencia acumulada más alta que la media d’Asturies nos trés conceyos del valle del Nalón que tán n’alerta naranxa. La media d’incidencia acumulada na última selmana asítiase en 58,4 per cien mil habitantes. Esta cifra multiplícase por ocho en Llaviana y por dos en Llangréu y Samartín del Rei Aurelio.

    La declaración d’alerta naranxa dexa intensificar les midíes la vixilancianestes zones pa frenar la trasmisión del virus. El Gobiernu asturianu encamienta nestos conceyos la cancelación o aplazamientu d’actividaes que nun sían imprescindibles. Tamién s’aconseya a la ciudadanía llindar los alcuentros sociales fuera del grupu de convivencia estable y les xuntes a un máximu de seis persones. Per otra parte, prohíbese’l consumu en barra nos establecimientos d’hostelería, restauración y terraces. Amás, nes meses o agrupaciones de meses acútase el so usu a un máximu de seis persones.

  • Salú amplía l’alerta naranxa a Llangréu y Samartín del Rei Aurelio

    Salú amplía l’alerta naranxa a Llangréu y Samartín del Rei Aurelio

    La Conseyería de Salú amplió la situación d’alerta naranxa nel valle del Nalón a los conceyos de Samartín del Rei Aurelio y Llangréu. El Gobiernu asturianu yá aplicó esta midida en Llaviana‘l 18 de setiembre. El conseyeru de Salú, Pablo Fernández Muñiz, anunció esta decisión al términu de la xunta del Comité de Siguimientu de la Nueva Normalidá, presidida por Adrián Barbón. Fernández Muñiz esplicó qu’esta midida adóptase al detectase en dambos conceyos una incidencia mayor de casos que la media.

    L’alerta naranxa ye una llamada a les instituciones locales, sectores socioeconómicos y a la ciudadanía pa que estremen les midíes de control. Nun implica restricciones, pero intensifica les acciones de protección, vixilancia y seguridá na zona. Amás d’esta declaración, l’Executivu rexonal establez midíes de prevención específiques. Estes midíes adicionales de prevención, contención y coordinación publicáronse nel Boletín Oficial del Principáu d’Asturies (Bopa).

    El Gobiernu asturianu encamienta la cancelación o aplazamientu nestos conceyos d’actividaes que nun sían imprescindibles hasta qu’ameyore la situación epidemiolóxica. Amás aconséyase a la ciudadanía que llinde los alcuentros sociales fuera del grupu de convivencia estable y que se llinde les xuntes a un máximu de seis persones. Per otra parte, prohíbese’l consumu en barra nos establecimientos d’hostelería, restauración y terraces. Amás nes meses o agrupaciones de meses acútase’l so usu a un máximu de seis persones.

    Nuevos biltos

    La Conseyería de Salú comunicó esti miércoles al Ministeriu de Sanidá siete nuevos biltos con un centenar de casos positivos y 153 contactos estrechos entá en siguimientu. N’actualidá, esisten quince biltos activos n’Asturies con una afectación total de 220 positivos y 472 persones que tán inda en siguimientu venceyaos a estos casos.

    El Serviciu de Vixilancia Epidemiolóxica confirmó amás 80 positivos por coronavirus diagnosticaos esti martes. Tolos afectaos tán asintomáticos o presenten síntomes leves de la enfermedá y permanecen aisllaos na so casa. Esti martes, dos persones diagnosticaes en díes previos fueron treslladaes a la UCI. Ayeri nun se rexistraron fallecimientos pola Covid. El Serviciu de Salú del Principáu d’Asturies (Sespa) realizó mientres esti martes 3.233 pruebes PCR. La tasa de positividad asitióse nel 2,47%.

  • Biltu en Llaviana: 25 persones afectaes

    Biltu en Llaviana: 25 persones afectaes

    La Conseyería de Salú detectó un biltu en Llaviana qu’afecta a 25 persones. El so orixe son dos adolescentes rellacionaos ente sí qu’arimaron a miembros de la so redolada familiar y social. Hasta’l momentu nun s’identificó tresmisión comuñal rellacionada con nengún establecimientu d’ociu o restauración. La edá de los afectaos, que son asintomáticos o refieren sintomatoloxía leve, ta ente los 14 y los 68 años. A toos indicóse-yos aislamientu domiciliariu. Coles mesmes, a los contactos estrechos realizóse-yos la PCR y yá tán en cuarentena.

    El director xeneral de Salú Pública, Rafael Cofiñu, asegura que «los venceyos epidemiolóxicos ente les distintes persones del biltu tán claramente delimitaos». El Serviciu de Vixilancia Epidemiolóxica sigui realizando l’estudiu de los contactos estrechos y monitorizando la evolución del biltu p’adoptar, nel so casu, midíes especiales al igual que se fixo n’otres zones del Principáu. En Llaviana, ente’l 8 y 15 de setiembre, detectáronse 31 casos, de los que 25 tán rellacionaos con esti biltu.

    Definición de biltu

    Salú recuerda que nel ámbitu comuñal defínese un biltu cuando hai trés o más persones arimaes. Nos centros residenciales de mayores declárase al detectar unu o más casos, tanto en residentes como en trabayadores. La definición de biltu val pa dimensionar una situación concreta na que ye necesariu establecer midíes específiques de vixilancia. Tanto nos positivos aisllaos como nestos focos realízase siempres l’estudiu de contactos estrechos. Amás, les autoridaes sanitaries pueden considerar necesariu’l desenvolvimientu d’estudios más amplios. Ye nestes situaciones especiales nes que decide realizase, amás del estudiu de contactos estrechos, un analís estendíu a la vecería qu’allegó al establecimientu nun períodu determináu.

  • Asturies rexistra 80 nuevos casos de coronavirus

    Asturies rexistra 80 nuevos casos de coronavirus

    Asturies sumo esti miércoles 80 nuevos casos positivos de coronavirus, de los que 34 son muyeres y 46 homes. La edá media de les persones afectaes ye de 43 años. Per otru llau, la comunidá algamó nesti día’l númberu máximu de pruebes PCR realizaes per día dende l’entamu de la pandemia: 3.690 nuna sola xornada. Les persones afectaes tienen síntomes leves o son asintomátiques y tán n’aislamientu nes sos cases, sacante una d’elles, que foi hospitalizada. Produciéronse otros trés nuevos ingresos hospitalarios amás d’un ingresu na UCI que se correspuenden con casos diagnosticaos en díes previos. Aparte, Salú confirmó’l fallecimientu d’un varón de 86 años ensin relación con nengún centru residencial sociosanitariu.

    El Serviciu de Vixilancia Epidemiolóxica identificó contactos estrechos de casos yá conocíos y sigue col analís pa establecer el venceyu del restu d’andaes. Esti serviciu actualiza los datos sobro la pandemia de manera siguida. Esto supon que les cifres acumulaes dende l’entamu sufran variaciones, independientemente de los casos notificaos diariamente al ministeriu. Asina, n’ocasiones pueden incorporase andaes confirmaes de feches anteriores a la de notificación, o esaniciar duplicaos.

    La Dirección Xeneral de Salú Pública ye l’autoridá competente pa realizar un llamamientu públicu pa realizar pruebes PCR. Estos llamamientos sirven pa realizar estudios ampliaos que complementen la investigación de los contactos estrechos cuando se considera qu’esisten criterios epidemiolóxicos qu’aconseyen la so execución pa detectar asintomáticos y evitar una posible trasmisión comuñal.

  • Xixón conmemora’l Día de la Ruta Vía de la Plata con delles actividaes

    Xixón conmemora’l Día de la Ruta Vía de la Plata con delles actividaes

    Xixón programa delles actividaes pa conmemorar el Día de la Ruta Vía de la Plata, que coincide col aniversariu de la nacencia del emperador Traianus.

    Esti vienres, 18 de setiembre, va celebrase’l Día de la Ruta Vía de la Plata. Escomencipia un mes con eventos y actividaes a esgaya nos pueblos y ciudaes de la Ruta Vía de la Plata pa conmemorar una fecha simbólica: la nacencia de Marcus Ulpius Traianus, primer emperador nacíu fuera de la Península Itálica

    Xixón xúnese asina a la iniciativa con delles actividaes, entamaes pola estaya de Turismu de Divertia y la Fundación Municipal de Cultura, que dan valor al trazáu de la Ruta al so pasu pel conceyu y el pasáu romanu de la ciudá.

    Ente les actividaes van tar la ceebración d’un percorríu peles músiques del mundu, con un conciertu del grupu “Quilombo Bacano” nel Muséu de la Villa Romana de Veranes. L’actividá va celebrase’l 18 de setiembre de 2020 a les 20 hores, siendo una actividá de baldre, pero habiendo d’acutar plaza nel teléfonu 985 18 51 29.

    Quilombo Bacano ye una formación asturiana atípica integrada por músicos de formación clásica. Dende una perspeutiva anovadora, combinen el repertoriu que trabayaren dende acuyá n’orquestes y formaciones camerístiques con otru más averáu a la música popular. Xéneros como’l jazz, el funk, el blues o la música lloatina. El so repertoriu xira al rodiu de trés propuestes que combinen davezu nos sos conciertos: El Quilombo Latino, el Quilombo In Blue y l’Ars Clazzica.

    Amás, dende’l 18 de setiembre hasta’l 18 d’ochobre, los que realicen la visita virtual a la Villa Romana de Veranes (https://www.gijon.es/es/turismo/tours-virtuales) y se rexistren al terminar la visita van participar nel sortéu de dellos premios venceyaos cola ciudá de Xixón: productos gastronómicos, actividaes na ciudá pa dos persones y muncho más.

  • La Universidá d’Uviéu ufre 48 cursos nel so programa de la Casa de les Llingües

    La Universidá d’Uviéu ufre 48 cursos nel so programa de la Casa de les Llingües

    A lo llargo del cursu académicu 2020-2021, La Casa de les Llingües de la Universidá d’Uviéu va ufiertar 48 cursos en 14 llingües: asturianu, alemán, árabe, catalán, chinu, francés, griegu modernu, hebréu, inglés, italianu, xaponés, llingua de señes española, portugués y rusu. Los cursos pueden ser impartíos por unu o dellos y delles profesores, toos ellos especialistes en caúna de les llingües.

    Va haber cursos nos llares del Centru de Servicios Universitarios d’Avilés, del Campus de Xixón y del Campus d’El Milán n’Uviéu.

    La duración de los cursos ye de 75 hores (cursos de llunes-miércoles: dende’l 14 d’ochobre de 2020 hasta mediaos de mayu de 2021; cursos de martes-xueves: dende’l 13 d’ochobre de 2020 hasta principios de mayu de 2021), sacantes el númberu de fiestes llocales y de centru implique una pequeña ampliación hasta cumplir les 75 hores. Cada grupu recibe dos sesiones selmanales de 85 minutos de duración (llunes y miércoles / martes y xueves). El númberu máximu d’alumnos en cada grupu ye de 25. La edá mínima para matriculase d’estos cursos ye de 17 años.

    Según espliquen dende la Universidá «va reparase rigorosamente nel cumplimientu del protocolu sanitariu establecíu pa la modalidá presencial de docencia na Universidá d’Uviéu: separtación de seguridá sanitaria ente l’alumnáu dientro de les aules, usu de mázcaros, ventilación intensa de les aules ente clases, empléu de xel hidroalcohólico a disposición de los usuarios de La Casa de les Llingües, y demás midíes que puedan establecese poles autoridaes competentes».

    El plazu ordinariu de matrícula, que ta abiertu a cualesquier persona, venceyada o non a la institución, ye del 1 al 30 de setiembre, y darréu va abrise un plazu estraordinariu del 8 al 15 d’ochobre. Tola información sobre los Cursos Xenerales de Llingües (horarios, calendarios académicos, procedimientu de matrícula, etc.) pue consultase na páxina de la universidá asturiana.

  • Asturies suma 65 nuevos casos de coronavirus

    Asturies suma 65 nuevos casos de coronavirus

    La Conseyería de Salú comunicó esti miércoles al Ministeriu de Sanidá 65 positivos por coronavirus diagnosticaos esti martes, ente los que s’atopen contactos estrechos d’otros yá conocíos. El Serviciu de Vixilancia Epidemiolóxica sigui estudiando’l restu de casos pa establecer el venceyu epidemiolóxicu. Una persona precisó hospitalización, ente que’l restu de los nuevos afectaos tán asintomáticos o presenten sintomatoloxía leve y permanecen n’aislamientu nes sos cases. Nun hubo nengún fallecimientu nes postreres 24 hores.

    El Serviciu de Salú del Principáu (Sespa) recuerda que la Dirección Xeneral de Salú Pública ye l’autoridá sanitaria con competencia pa realizar un llamamientu públicu rellacionáu con pruebes PCR. Estos llamamientos sirven pa la realización d’estudios ampliaos de contactos que complementen la investigación del Sistema de Vixilancia de Contactos Estrechos (SVCE) cuando se considera qu’esisten criterios epidemiolóxicos qu’aconseyen la so realización pa detectar casos asintomáticos y evitar una posible trasmisión comuñal.

    Al respective de la incidencia del virus n’Asturies, los datos van actualizándose de manera siguida, polo que les cifres acumulaes dende l’entamu de la pandemia sufren variaciones independientemente de los casos echar voz de diariamente al ministeriu. Esto debe a que n’ocasiones se pueden incorporar positivos confirmaos de feches anteriores a la so comunicación o s’esanicien doblaos.

  • Salú llevanta l’alerta naranxa declarada en cinco conceyos del oriente

    Salú llevanta l’alerta naranxa declarada en cinco conceyos del oriente

    La Conseyería de Salú comunicó a los alcaldes de Parres, Cangues, Ribeseya, Llanes y Cabrales el fin de l’alerta naranxa declarada nestos cinco conceyos. Salú declaró l’alerta naranxa fai 14 díes; en concretu, el 26 d’agostu. Pasáu esti períodu, que coincide con un ciclu d’incubación del coronavirus, revisóse la situación epidemiolóxica, según la esistencia y control de puntos calientes” na zona. En constatando que la situación ye contenida, les autoridaes sanitaries decidieron suspender l’alerta, pero caltener una vixilancia estrecha nos cinco conceyos. Para ello, la comisión de siguimientu integrada polos conceyos, la Federación Asturiana de Conceyos, la Conseyería de Salú y la Delegación del Gobiernu— va axuntase semanalmente para siguir evaluando la situación mientres siquier otros 14 díes.

  • Asturies apuesta por llindar el númberu de locales de xuegu

    Asturies apuesta por llindar el númberu de locales de xuegu

    El Gobiernu asturianu apuesta pa llindar el númberu de locales de xuegu nel futuru decretu que va regular el sector. La conseyera de Facienda, Ana Cárcaba, presidió la selmana pasada la xunta de constitución del Conseyu del Xuegu. L’órganu ta formáu poles alministraciones autonómica y local, el colectivu de ludópates, el sector empresarial, sindicatos, el Conseyu de la Mocedá y asociaciones de consumidores y usuarios. Esta ye la primer vegada que s’axunta’l Conseyu del Xuegu na presente llexislatura, dempués d’anovar a los sos miembros tres les últimes elecciones.

    Mientres l’alcuentru, Ana Cárcaba presentó’l borrador de decretu que va regular l’actividá de xuegu y apuestes. L’anteproyectu yá foi sometíu a información pública. En pasando pol Conseyu del Xuegu, va ser analizáu pol Conseyu Consultivu pa, finalmente, ser aprobáu en Conseyu de Gobiernu.

    El futuru decretu establez, ente otres midíes, que’l númberu d’establecimientos anguaño operativos sía’l máximu dexáu. La conseyera recordó qu’Asturies ye una de les comunidaes autónomes con menor ufierta de xuegu. La comunidá cunta con 1 casinu, 6 bingos, 28 salones de xuegu y 9 locales d’apuestes. Esta cifra, según recueye’l decretu, namás podría aumentar poles llicencies pindies de resolver nel ámbitu municipal solicitaes enantes del 26 de marzu de 2019. «El decretu tamién contempla que la distancia mínima ente un centru educativu y un local de xuegu y apuestes sía de 100 metros», esplicó Cárcaba.

    Dientro del orde del día del Conseyu del Xuegu, tamién s’analizaron les actuaciones llevaes a cabu nel marcu del Programa de Prevención de la Ludopatía, una iniciativa pionera n’España. Amás, diose cuenta del Plan d’Inspección en materia de xuegu lleváu a cabu pola Policía Nacional.