Xixón al día

Categoría: Asturies

  • Cultura va entregar esta seronda pela primer vez la marca Alfaya, que reconoz les empreses qu’integren l’asturianu na so actividá

    Cultura va entregar esta seronda pela primer vez la marca Alfaya, que reconoz les empreses qu’integren l’asturianu na so actividá

    La conseyera de Cultura, Política Llingüística y Deporte, Vanessa Gutiérrez, comunicó esta mañana que’l sellu Alfaya va ponese en marcha esti mesmu añu, na seronda. Gutiérrez realizó l’anunciu nuna xunta con representantes de l’Asociación d’Empreses y Profesionales pol Asturianu. El distintivu Alfaya ye una iniciativa de la conseyería destinada a reconocer y visibilizar el compromisu del texíu empresarial coles llingües propies del territoriu: l’asturianu y l’eonaviegu.

    La marca Alfaya, creada pol Decretu 21/2023, de 16 de marzu, de la Conseyería de Facienda, naz cola mira de fomentar l’usu social de les llingües propies nel ámbitu económicu y reconocer públicamente aquelles empreses qu’integren bones práctiques llingüístiques na so actividá diaria.

    Na xunta, tratáronse los planes pa la implementación de la marca, que va suponer establecer 3 niveles de reconocencia a les empreses:

    • Nivel inicial, d’accesu fácil, faciendo una solicitú d’adhesión.
    • Nivel intermediu, que reflexa un compromisu activu col usu de la llingua.
    • Nivel d’escelencia, acutáu p’aquelles entidaes que demuestren una implicación destacada y sostenida nel tiempu.

    La marca va poder solicitase tol añu, pero la so concesión va formalizase nun actu institucional anual. Amás, va habilitase un espaciu específicu na web del Principáu y va publicase un catálogu d’empreses reconocíes.

    Alfaya va entrar en funcionamientu esta seronda, en collaboración cola asociación mentada, que mostró un compromisu firme cola iniciativa. Con esta midida, el Gobiernu d’Asturies avanza nel so apueste pola normalización llingüística y por una comunidá que valora y promueve la so diversidá cultural tamién dende l’ámbitu empresarial.

  • Valnalón distingue una propuesta de güertu ecolóxicu col premiu al Meyor Proyectu Empresarial

    Valnalón distingue una propuesta de güertu ecolóxicu col premiu al Meyor Proyectu Empresarial

    Un proyectu pa desenvolver un güertu ecolóxicu foi’l galardonáu col Premiu a la Meyor Propuesta Empresarial del semilleru de proyectos de Valnalón. El conseyeru de Ciencia, Industria y Empléu, Borja Sánchez, apurrió les distinciones d’esta XXIII edición, na que destacó’l papel crucial del emprendimientu nel crecimientu del texíu económicu.

    Nel certame participaron 152 proyectos, de los que nueve llegaron a la final. Los escoyíos centráronse en sectores como agricultura, moda y complementos, turismu alternativu, arte, repostería y eventos audiovisuales.

    El premiu al Meyor Proyectu Empresarial recayó en Manuel López, por Ecohuerta Vital, una iniciativa destacada pol xuráu pola so viabilidá económica, el so raigañu col ámbitu rural y el compromisu col territoriu. El galardón al Afitamientu Empresarial, qu’estrema a les empreses nel crecimientu de los sos proyectos, foi pa Yolanda Basante, por Novalreeves, una iniciativa de diseñu de moda destacáu pola so creatividá y capacidá pa reorientar la so actividá nuevos nichos de mercáu.

    La reconocencia a la Empresa Comprometida con Valnalón foi pa Bango Racing Cars, mientres que’l de la Meyor Presentación de Proyectu Empresarial concedióse a The Paper Conservation Lab, un taller de restauración y caltenimientu d’obres d’arte en papel desenvueltu por Alicia García.

  • Les compañíes É Vero Teatro, Covenant Producciones, Nun Tris y Higiénico Papel, finalistes del IX Premiu Nel Amaro de Teatru Profesional en llingua asturiana

    Les compañíes É Vero Teatro, Covenant Producciones, Nun Tris y Higiénico Papel, finalistes del IX Premiu Nel Amaro de Teatru Profesional en llingua asturiana

    La novena edición del Premiu Nel Amaro de Teatru Profesional n’asturianu convocáu pola Conseyería de Cultura, Política Llingüística y Deporte yá tien finalistes. Les obres presentaes poles compañíes É Vero Teatro, Covenant Producciones, Nun Tris y Higiénico Papel son les cuatro que pasaron a la final d’esti gallardón y, polo tanto, les que se van exhibir los cuatro primeros vienres d’ochobre nel Teatru Filarmónica d’Uviéu, con entrada llibre y gratuita hasta enllenar aforu.

    Esti gallardón, con una dotación económica de 6.000 euros, tien como oxetivu ayudar a la profesionalización de la industria cultural asturiana, sobre manera del sector de les artes escéniques, premiando la meyor obra en llingua asturiana o eonaviegu d’alcuerdu con criterios de calidá escénica, lliteraria y llingüística.

    El xuráu encargáu de valorar los montaxes presentaos y facer la selección de los cuatro finalistes d’esta edición tuvo presidíu pol director xeneral d’Acción Cultural y Normalización Llingüística, Antón García. Como vocales, participaron l’actriz y filóloga María Cotiello, la profesora y autora teatral Azucena Álvarez, l’escritor y profesor Xuan Santori, l’escritor y director Sergio Buelga, y l’actriz y crítica teatral Eva Vallines.

    Les propuestes de les compañíes asturianes finalistes nesta edición del Premio Nel Amaro son estes:

    • Al rodiu l’horru, d’É Vero Teatro.
    • Tía Miseria, de Covenant Producciones.
    • Vuelu d’andarines / Viaxe d’andolías, de Producciones Nun Tris.
    • 1001. Una odisea nel desiertu, d’Higiénico Papel Teatro.

    Depués d’esta primer fase, va facese’l IX Festival Nel Amaro de Teatru Profesional en Llingua Asturiana, que se va celebrar nel Teatru Filarmónica d’Uviéu tolos vienres del mes d’ochobre. Amás de les cuatro pieces teatrales finalistes, súmase a esti festival la obra ganadora na edición del 2024, Perendi, de La Compañía del Alba.

    Nel festival mentáu va decidise la obra teatral vencedora que, amás de la dotación económica del premiu, va integrase nel circuitu Autores nel Camín del programa Asturies, Cultura en Rede.

    El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu. Nel Amaro foi amás l’autor al que se dedicó la edición de la Selmana de les Lletres Asturianes nel 2021.

  • L’ampliación del Centru TIC de L’Entregu va cuntar col primer ordenador cuánticu fabricáu n’España

    L’ampliación del Centru TIC de L’Entregu va cuntar col primer ordenador cuánticu fabricáu n’España

    El Gobiernu del Principáu reorientó l’ampliación del Centru TIC de L’Entregu p’asegurar que la inversión prevista pueda executase dientro de los plazos previstos, evitar la perda de fondos europeos y atraer proyectos científico-tecnolóxicos estratéxicos, asitiaos a la vanguardia de la ciencia española. Esta actuación va dexar dotar al Centru d’Investigación en Nanomateriales y Nanotecnología (CINN) d’un espaciu afayadizu pa construyir el primer ordenador cuánticu del país -el restu de los qu’hai n’España fueron adquiríos fuera- y atraer una inversión de siete millones del Gobiernu d’España.

    L’actuación contempla una inversión de 1.806.286 euros pa la construcción d’un nuevu equipamientu que va ampliar les instalaciones del Centru d’Investigación en Nanomateriales y Nanotecnología (CINN). Esti espaciu va tar dotáu de la infraestructura y tecnoloxía necesaria p’allugar un proyectu pioneru en física cuántica: un simulador y un ordenador cuánticu basáu n’átomos de Rydberg.

    El centru mistu d’investigación (del que formen parte CSIC, Universidá d’Uviéu y el Principáu) cuenta con una sovención estatal de siete millones, dientro de la Estratexa de Tecnoloxíes Cuántiques d’España, y va dexar asitiar a Asturies como un referente nacional en tecnoloxíes habilitadoras de la computación cuántica.

    La reforma del proyectu del Centru TIC respuende a la necesidá d’afaer l’ampliación del centru a criterios de viabilidá. Primeramente, se previera una inversión de 10,4 millones con cargos a fondos mineros, pero la llicitación quedó erma.

    “Tres el revés que supunxo que la llicitación quedara erma, polo afecho de los plazos d’execución de los fondos, optóse por una reformulación del proyectu pa facelo viable y que, amás, nos dexe agospiar nel Valle del Nalón un proyectu únicu en forma de simulador cuánticu”, esplicó’l conseyeru.

    Sánchez sorrayó qu’esti amenorgamientu presupuestariu nun va suponer la perda de fondos nin p’Asturies nin pa les comarques mineres. Los 8 millones lliberaos van destinase a una actuación en Llangréu, na redolada del ríu Nalón, coles mires de prevenir inundaciones nuna zona próxima a l’antigua central térmica de Lada.

  • 6.159 votantes llamaos a votar nes eleiciones agraries del 17 de xunetu

    6.159 votantes llamaos a votar nes eleiciones agraries del 17 de xunetu

    La Conseyería de Mediu Rural y Política Agraria, al traviés de la xunta electoral tres la consulta pa la midida de la representatividá de les organizaciones agraries d’Asturies, aprobó’l censu definitivu pa los comicios del próximu 17 de xunetu, que suma 6.159 electores: 5.391 persones físiques y 768 persones xurídiques

    La xunta electoral aprobó’l censu definitivu n’almitiendo parte de les solicitúes de cambéu presentaes ya incorporar a dos persones xurídiques al rexistru. Nel procesu presentáronse 25 allegamientos al censu. La xunta electoral almitió’l cambéu de 15 solicitúes presentaes y refugó otres 10 propuestes.

    El gobiernu tamién va atender el pidimientu de les organizaciones agraries que se presenten a estos comicios pa facilitar el censu coles direcciones de los y les electores. Les cinco organizaciones son: Asaja, COAG, UCA, URA y Usaga.

    Les meses electorales van establecer nes 37 Oficines pal Mediu Rural, que la conseyería tien distribuyíes por tola comunidá. D’esta miente, na xunta de la xunta electoral tamién se sortearon les meses electorales, que van tar compuestes por un presidente y dos vocales. Les persones escoyíes van recibir una comunicación nos próximos díes. La xunta electoral tamién aprobó’l modelu de la papeleta electoral y alcordó la so alquisición, lo mesmo que de los sobres.

  • La Universidá d’Uviéu supera per primer vegada los 200 grupos d’investigación acreditaos

    La Universidá d’Uviéu supera per primer vegada los 200 grupos d’investigación acreditaos

    La Universidá d’Uviéu superó, per primer vegada, los 200 grupos d’investigación acreditaos. La institución académica consolidó asina un enclín a l’alza que vien rexistrándose nos postreros quince años. El númberu de grupos d’investigación reconocíos pasó de los apenes 18 en 2010 a los 203 de 2024. Solo mientres el pasáu añu constituyéronse 19 grupos tres superar los trámites esixíos pola axencia acreditadora.

    Irene Díaz, vicerrectora d’Investigación de la Universidá d’Uviéu, sorraya que’l crecimientu calteníu nel númberu de grupos d’investigación pon de manifiestu la solidez y dinamismu del ecosistema científicu de la institución, consolidada como’l principal motor de la I+D+I n’Asturies. “La creación de casi una ventena de nuevos grupos nel últimu añu non solo reflexa’l compromisu y el talentu del nuesu personal investigador, sinón que tamién ye una evidencia clara de que les polítiques de sofitu a la investigación tán dando los sos frutos”, afirma. Díaz incide en que superar el procesu d’evaluación pa crear un grupu o pa reevaluar un grupu esistente nun ye trivial: trátase d’un procedimientu rigorosu, qu’esixe cumplir con criterios d’excelencia científica, actividá siguida, impactu, collaboración y proyección. “Que tantos grupos superaren esta evaluación tan esixente demuestra que se ta trabayando bien, con visión estratéxica y ambición científica”, añede.

    A manera d’exemplu, dalgunos de los grupos que llograron evaluase positivamente l’añu pasáu afronten temátiques tan variaes como la inxeniería geomática, la tecnoloxía y sostenibilidá na construcción con aceru y formigón, los estudios árabo-románicos, la salú mental, el derechu internacional públicu, la diversidá y caltenimientu animal o la salú y el mediu ambiente.

  • Iniciativa pol Asturianu ve decepcionante’l mandatu-marcu pa la RTPA y pide un apueste firme poles llingües propies

    Iniciativa pol Asturianu ve decepcionante’l mandatu-marcu pa la RTPA y pide un apueste firme poles llingües propies

    Iniciativa pol Asturianu califica de decepcionante la propuesta d’articuláu pal mandatu-marcu de la Radiotelevisión del Principáu d’Asturies (RTPA) y considera que d’aprobase va condergar a les llingües propies a una presencia probetaya nos medios públicos de comunicación. La entidá llamenta que la cuestión llingüística quede nun papel totalmente secundariu qu’afíta que’l serviciu públicu audiovisual autonómicu ye en castellanu. El documentu nun reconoz al asturianu y l’eonaviego como llingües vehiculares, lo que va arrequexar la so presencia na parrilla a programes sueltos como hasta agora.

    Angüaño la programación n’asturianu ye mínima, con repeticiones constantes y ensin apenes conteníos nuevos. Nel casu del eonaviego ye directamente inesistente. L’asociación insiste en que les llingües propies han ser un pegoyu fundamental de la radiotelevisión pública asturiana polo que ve incomprensible que la cuestión llingüística quede arrequexada ente los oxetivos xenerales marcaos. «Resulta sorprendente que la mesma Xunta Xeneral que va una selmana votó de forma mayoritaria a favor de la oficialidá faiga de menos les llingües propies nel mandatu-marcu de la RTPA. Ye’l momentu de valorar el potencial normalizador de los medios públicos y d’apostar por una presencia digna de dambos idiomes na so programación», apunten dende Iniciativa pol Asturianu.

    Asinamesmo, la entidá recuerda que la Llei d’Usu ampara l’apueste pol idioma nos medios públicos. Nel so artículu 13, la normativa avala que «nes emisiones de radio y televisión y nos demás medios de comunicación con presencia actual o futura de la Administración autonómica, ésta velará por una presencia adecuada del asturianu».

    Iniciativa pol Asturianu echa en falta que’l mandatu-marcu nun faiga referencia a la discriminación llingüística y propón una redacción nueva pal artículu 10 del documentu, qu’afite l’usu del asturianu y l’eonaviego como «llingües vehiculares». L’asociación recuerda que yá fizo llegar les sos propuestes a los grupos parlamentarios de la Xunta Xeneral nel mes de payares, coincidiendo cola celebración del Día Mundial de la Televisión. Ente los plantegamientos de la entidá inclúinse la de convertir la Radio del Principáu d’Asturies (RPA) nuna emisora 100% n’asturianu, incentivar la publicidá nes llingües propies y la emisión d’informativos diarios n’asturianu cola mesma duración que los que s’emiten en castellán.

    La organización considera que ye fundamental cuntar con una ufierta moderna y atractiva, con especial atención a la reciella, pa dar sentíu a los medios públicos como motor pa la tresmisión xeneracional.

  • Convócase la primer Escuela de Formadores en Coeducación pa liderar el tresformamientu educativu con perspectiva de xéneru

    El Gobiernu d’Asturies va celebrar en xunetu la primer Escuela de Formadores en Coeducación, una iniciativa pionera que busca formar a profesionales capaces de liderar procesos de sensibilización y tresformamientu educativu dende la perspectiva de xéneru. Concebida como un espaciu de capacitación intensiva, va dexar a les participantes adquirir ferramientes teóriques y práctiques pa instruyir dempués a docentes y axentes educativos nesta materia.

    La formación va impartir del 7 al 11 de xunetu, en modalidá presencial y n’horariu de 9:00 a 15:00 hores, nel Centru de Crisis pa Víctimes d’Agresiones Sexuales d’Uviéu. A lo llargo de trenta hores, les participantes van adquirir conocencies especializaes sobre igualdá, feminismu, lexislación, diagnósticu del sexismu nos centros educativos, oratoria, comunicación y usu de tecnoloxíes especializaes nesti ámbitu.

    L’equipu docente ta compuestu por cuatro reconocíes espertes nesti sector: Emma González, Marian Moreno, Carmen Ruíz Repullo y Laura Viñuela, quien van afontar cuestiones clave pa empoderar a futures formadores y acompañales na so preparación pa falar en públicu, estructurar presentaciones eficaces, utilizar ferramientes dixitales y responder con solvencia énte situaciones de resistencia o negación del feminismu.

    Diríxese a docentes, profesionales del ámbitu educativu y persones interesaes na formación n’igualdá. Hai 40 places disponibles, que se van axudicar por orde d’inscripción. Les persones interesaes pueden inscribise al traviés del siguiente formulariu https://forms.office.com/y/T8rZhMUc5y

  • Nicolás Bartolomé, subdirector xeneral nuevu de Política Llingüística

    Nicolás Bartolomé, subdirector xeneral nuevu de Política Llingüística

    La Conseyería de Cultura, Política Llingüística y Deporte del Principáu d’Asturies resolvió’l nomamientu de Nicolás Bartolomé Pérez como nuevu subdirector xeneral de Política Llingüística, en superando’l procesu de llibre designación convocáu per aciu de resolución y conforme a los principios de méritu, capacidá y idoneidá establecíos na normativa n’usu.

    La resolución de nomamientu, firmada pola conseyera de Cultura, Política Llingüística y Deporte, Vanessa Gutiérrez, de quien va depender Bartolomé orgánicamente, va publicase nel Boletín Oficial del Principáu d’Asturies (BOPA) nos próximos díes, una vez remataos los trámites alministrativos previstos na convocatoria.

    Nicolás Bartolomé Pérez ye llicenciáu en Derechu y cunta con más de 25 años d’esperiencia profesional nel ámbitu xurídicu, lo que-y dexó desenvolver competencies clave en lideralgu, xestión d’equipos, negociación y asesoramientu institucional. La so trayectoria ta marcada por un compromisu firme cola defensa de los derechos llingüísticos y la promoción de les llingües propies d’Asturies.

    Ente les sos principales méritos destaquen l’autoría del llibru Derechu llingüísticu del Principáu d’Asturies: normativa y xurisprudencia, la coautoría del Manual de llinguaxe alministrativu en llingua asturiana, la so responsabilidá dende 2006 de la Crónica llexislativa d’Asturies, l’asesoramientu xurídicu a l’Academia de la Llingua Asturiana na reforma de los sos estatutos, l’asistencia lletrada a entidaes públiques y privaes en materia de derechos llingüísticos, amás d’acreitar un dominiu altu del idioma asturianu, tanto faláu como escritu, per aciu de certificación oficial de nivel C1, y tener un fondu conocimientu del corpus normativu européu, estatal y autonómicu en materia de llingües minoritaries.

    La Subdirección Xeneral de Política Llingüística, creada pel Decretu 25/2024, tien como misión principal promover, desenvolver y evaluar les polítiques públiques nel ámbitu de la llingua asturiana y l’eonaviegu. Ente les sos funciones inclúyense proponer midíes normatives pa la normalización llingüística y establecer mecanismos de cooperación con otres alministraciones y instituciones.

    Nesti sentíu, ún de los oxetivos estratéxicos ye l’actualización y desenvolvimientu normativu en materia llingüística. Pa ello, plantégase como oxetivu específicu l’análisis de la normativa vixente col fin de proponer la so actualización, asina como l’estudiu y ellaboración de disposiciones nueves que favorezan la normalización del usu del asturianu y del eonaviegu. Esta xera va implicar revisar tanto la normativa autonómica como aquella d’ámbitu estatal, européu y municipal qu’incida directa o indirectamente na política llingüística.

    Otru oxetivu clave ye la consecución d’estructures coordinaes, eficientes y eficaces. Nesti casu, búscase coordinar y analizar les estructures necesaries pa implementar una política llingüística tresversal en tola Alministración. La coordinación constante ente departamentos y organismos va ser esencial pa garantizar la eficacia de les midíes adoptaes.

    Tocantes a l’adecuación y actualización del sistema d’ayudes y acciones de política llingüística, propónse analizar el sistema actual y ellaborar propuestes de meyora que dexen ampliar l’algame y la efectividá de les ayudes esistentes, asina como diseñar llinies nueves d’actuación tovía non implementaes. Esta revisión va tomar toles árees de gobiernu con implicación na política llingüística.

    A lo último, contémplase la ellaboración d’una estratexa integral de política, normalización y dinamización llingüística, col propósitu d’incrementar la valoración social de les llingües propies d’Asturies. Esta estratexa va diseñase de forma participativa y tresversal, implicando a tolos actores y institucionales relevantes.

  • Mediu Rural inaugura la nueva cubierta de la rula de pescadores de Cuideiru

    Mediu Rural inaugura la nueva cubierta de la rula de pescadores de Cuideiru

    El conseyeru de Mediu Rural y Política Agraria, Marcelino Marcos, inauguró güei la nueva cubierta de la rula de pescadores de Cuideiru, na que s’invirtieron 191.202 euros, Les obres consistieron nel aislamientu térmicu y acústicu del edificiu, lo que facilita la puya de pexe y bloquia el ruiu esterior énte condiciones meteorolóxiques adverses.

    La sustitución de l’anterior estructura llevóse a cabu per aciu una baltadera controlada, lo que dexó caltener intactos los muros de formigón perimetrales y dos de les pilastres compartíes cola edificación colindante. Amás, construyéronse seis nueves pilastres metáliques pal arranque de les nueves columnes.

    La nueva cubierta, de tipu industrial, cuenta con paneles aislantes d’aceru de 80 centímetros d’espesura. Pela so parte, l’almacen norte y sur cubriéronse con una nueva cubrición y cerráronse perimetralmente con malla metálica. Tamién s’anovó la instalación eléctrica y instaláronse nueves lluminaries.

    Les obres de renovación de la cubierta sufragáronse en parte con recursos del Fondu Européu Marítimu de Pesca y Acuicultura (Fempa), que cubrió’l 70% de costu de l’actuación.

    Mientres la visita, el conseyeru anunció que la Conseyería yá empecipió la tramitación pa instalar una nueva fábrica de xelu, con un presupuestu que va rondar los 200.000 euros. Esta infraestructura va ser clave pa garantizar el suministru continuu de xelu a la flota pesquera y va ameyorar les condiciones de caltenimientu del pexe dende la so captura hasta la so primer venta. Esta actuación va completar les meyores realizaes nel puertu pesqueru de Cuideiru, a les qu’amás de la cubierta, hai que sumar la instalación l’añu pasáu d’una moderna grúa pa la carga y descarga de pexe a pie de muelle, que supunxo una inversión de 45.980 euros.