La Conseyería de Cultura, Política Llingüística y Deporte del Principáu d’Asturies resolvió’l nomamientu de Nicolás Bartolomé Pérez como nuevu subdirector xeneral de Política Llingüística, en superando’l procesu de llibre designación convocáu per aciu de resolución y conforme a los principios de méritu, capacidá y idoneidá establecíos na normativa n’usu.
La resolución de nomamientu, firmada pola conseyera de Cultura, Política Llingüística y Deporte, Vanessa Gutiérrez, de quien va depender Bartolomé orgánicamente, va publicase nel Boletín Oficial del Principáu d’Asturies (BOPA) nos próximos díes, una vez remataos los trámites alministrativos previstos na convocatoria.
Nicolás Bartolomé Pérez ye llicenciáu en Derechu y cunta con más de 25 años d’esperiencia profesional nel ámbitu xurídicu, lo que-y dexó desenvolver competencies clave en lideralgu, xestión d’equipos, negociación y asesoramientu institucional. La so trayectoria ta marcada por un compromisu firme cola defensa de los derechos llingüísticos y la promoción de les llingües propies d’Asturies.
Ente les sos principales méritos destaquen l’autoría del llibru Derechu llingüísticu del Principáu d’Asturies: normativa y xurisprudencia, la coautoría del Manual de llinguaxe alministrativu en llingua asturiana, la so responsabilidá dende 2006 de la Crónica llexislativa d’Asturies, l’asesoramientu xurídicu a l’Academia de la Llingua Asturiana na reforma de los sos estatutos, l’asistencia lletrada a entidaes públiques y privaes en materia de derechos llingüísticos, amás d’acreitar un dominiu altu del idioma asturianu, tanto faláu como escritu, per aciu de certificación oficial de nivel C1, y tener un fondu conocimientu del corpus normativu européu, estatal y autonómicu en materia de llingües minoritaries.
La Subdirección Xeneral de Política Llingüística, creada pel Decretu 25/2024, tien como misión principal promover, desenvolver y evaluar les polítiques públiques nel ámbitu de la llingua asturiana y l’eonaviegu. Ente les sos funciones inclúyense proponer midíes normatives pa la normalización llingüística y establecer mecanismos de cooperación con otres alministraciones y instituciones.
Nesti sentíu, ún de los oxetivos estratéxicos ye l’actualización y desenvolvimientu normativu en materia llingüística. Pa ello, plantégase como oxetivu específicu l’análisis de la normativa vixente col fin de proponer la so actualización, asina como l’estudiu y ellaboración de disposiciones nueves que favorezan la normalización del usu del asturianu y del eonaviegu. Esta xera va implicar revisar tanto la normativa autonómica como aquella d’ámbitu estatal, européu y municipal qu’incida directa o indirectamente na política llingüística.
Otru oxetivu clave ye la consecución d’estructures coordinaes, eficientes y eficaces. Nesti casu, búscase coordinar y analizar les estructures necesaries pa implementar una política llingüística tresversal en tola Alministración. La coordinación constante ente departamentos y organismos va ser esencial pa garantizar la eficacia de les midíes adoptaes.
Tocantes a l’adecuación y actualización del sistema d’ayudes y acciones de política llingüística, propónse analizar el sistema actual y ellaborar propuestes de meyora que dexen ampliar l’algame y la efectividá de les ayudes esistentes, asina como diseñar llinies nueves d’actuación tovía non implementaes. Esta revisión va tomar toles árees de gobiernu con implicación na política llingüística.
A lo último, contémplase la ellaboración d’una estratexa integral de política, normalización y dinamización llingüística, col propósitu d’incrementar la valoración social de les llingües propies d’Asturies. Esta estratexa va diseñase de forma participativa y tresversal, implicando a tolos actores y institucionales relevantes.
