Categoría: Asturies

Cuatro persones resultaron afectaes, una con quemadures y tres por inhalación de fumu, na quema d’una residencia de mayores en La Barganiza, en Siero.

Según los datos facilitaos pol Serviciu d’Atención Médica Urxente (SAMU) la víctima de mayor gravedá ye un varón de 73 años que foi evacuáu con quemadures y pronósticu grave, pendiente de más pruebes y hasta nueva valoración médica, al Hospital Universitariu Central d’Asturies (HUCA), n’Uviéu. Foi atendíu pol equipu médicu de la UVI-móvil d’Uviéu.

Al HUCA tamién fueron evacuaos por inhalación de fumu otru tres varones, dos d’ellos, de 67 y 59 años, tamién residentes de la instalación. Fueron treslladaos na ambulancia de soporte vital básicu de Posada de Llanera que se movió al llugar col equipu d’Atención Primaria de Llugones y n’una ambulancia convencional.

El fueu xamuscó l’habitación onde s’anició la quema y el fumu tamién afectó a la d’al llau. Eses dos habitaciones son les úniques que quedaron fuera d´usu. El restu de los residentes fueron reasitiaos nes instalaciones en dándose por estinguida la quema, ventiláu´l llugar y revisáu colos detectores que toles habitaciones quedaren llibres non yá de fumu, sinón de gases tóxicos.

Na residencia había un total de 132 persones, en dos módulos y nel afectáu pola quema confinóse en zona segura a unos 40 residentes mientres los bomberos apagaben el fueu y rastrexaben el llugar p’asegurase de que nun había más afectaos.

El Centru de Coordinación d’Emerxencies del 112-Asturies recibió l’avisu a les 01.43 hores. Na llamada indicaben qu’empecipiara una quema na habitación d’un residente. Había cuarenta persones na planta. Tán sacándolos del llugar.

La Sala 112 del SEPA activó a efectivos de Bomberos del Serviciu d’Emerxencies del Principáu d’Asturies (SEPA) con base nos parques de La Morgal, Samartín del Rei Aureliu y Villaviciosa anque los postreros nun llegaron a intervenir, habiendo llegao al incidente los efectivos de La Morgal que dieron por controlaáu´l fueu. Tamién se movilizó a dos xefes de zona y a un xefe supervisor.

Cuando los primeros efectivos de bomberos llegaron a la residencia comprobaron que´l fueu taba prácticamente estintu. Dos trabayadores habíen apagao les llapes con dos estintores, amás de rescatar al home que s’atopaba na habitación. Tamién evacuaron a parte de los residentes a una zona segura.

Los bomberos confinaron a parte de los residentes nes sos habitaciones y el restu, unos 40, fueron evacuaos a una zona segura. Amás rastrexáronse toles habitaciones para verificar que nun hubiera más afectaos. N´apagaes les llapaes, desescombrao y ventilao tamién, comprobóse col detector que toles instalaciones tuvieren llibres de fumu y gases.

L’incidente, amás d’a los bomberos y al SAMU, comunicóse a la Guardia Civil qu’unvió, según informaron al 112, siete patrulles. Tamién tuvo avisu la Policía Local de Siero, que mandó axentes a la zona.

Rematada la intervención, a les 03.18 hores, Bomberos del SEPA retiró del llugar para tornar a la so base onde llegaron a les 03.53 hores.

El Principáu promociona énte la Organización del Tratáu del Atlánticu Norte (OTAN) el so modelu de desenvolvimientu tecnolóxicu na industria de la defensa coles mires de que pequeñes y medianes empreses puedan participar nel programa Diana (Defence Innovation Accelerator for the North Atlantic) de l’Alianza Atlántica, un acelerador de la innovación con aplicaciones en seguridá y defensa. El conseyeru de Ciencia, Industria y Empléu, Borja Sánchez, aconceyó col director del programa, Tom Dallas Mcsoerly, pa informa-y sobre les iniciatives que se desenvuelven na comunidá y afrontar posibles víes de collaboración.

Dallas Mcsoerly escoyó Asturies, la única comunidá que visita de forma oficial, pol interés qu’espierta como modelu de collaboración públicu-privada y pol potencial de les sos empreses innovadores amestaes al sector de defensa.

El programa Diana ta centráu n’acelerar la tresferencia de conocencia dende les empreses a la sociedá. “Ta mui enfocáu en daqué que nos interesa n’Asturies: les tecnoloxíes duales, esto ye, que tienen un usu pa la industria de defensa y pa la sociedá civil, que ye onde nos asitiemos va yá unos años col hub de defensa”, esplicó’l titular de Ciencia.

El conseyeru esplicó al representante de la OTAN les capacidaes de les compañíes asturianes nesti sector y l’interés por siguir ampliando’l desenvolvimientu de tecnoloxíes duales. “Representen una gran oportunidá dientro d’esta fola de reindustrialización que tamos viviendo n’Asturies y que va tener un efectu tractor na industria de la defensa y, sobre manera, na parte de tecnoloxíes duales acomuñaes a la producción actual o a la futura”, precisó.

Esti pasáu llunes 28 d’abril, el gobiernu asturianu publicó nel Boletín Oficial del Principáu d’Asturies (BOPA) una resolución pola que s’aprueba’l plan añal pa matar 53 llobos. El Fondo pa la Protección del Llobu Ibéricu (www.fondolobo.org) anuncia a la lluz d’esta resolución que va empecipiar cuantes acciones llegales y alministratives seyan necesaries pa valtar esta resolución que resalva les evidencies científiques que señalen la situación d’estrema vulnerabilidá del llobu ibéricu y que, de perfacese, van convertir Asturies na punta de llanza d’una política agresiva y irracional contra la biodiversidá y los derechos de los animales.

D’esta manera, nes próximes hores, los coordinadores del Fondu pa la Protección del Llobu Ibéricu van axuntase col asesor xurídicu del proyectu, Jaime Doreste, conocíu abogáu ambientalista con un ampliu percorríu n’asesoramientu y asistencia xurídica en vía alministrativa, contenciosa alministrativa y penal en materies rellacionaes cola defensa y
caltenimientu del mediu ambiente y el territoriu, y qu’encabezó la demanda del primer litixu climáticu n’España.

La selmana pasada’l Fondu pa la Protección del Llobu Ibéricu yá presentara un recursu d’alzada contra la resolución del gobiernu de Cantabria qu’aprobaba la matanza de 41 llobos, que les sos execuciones yá dieron empieza la pasada selmana. Sicasí, esta vía, la del recursu d’alzada, foi tarazada pol gobiernu asturianu yá que la resolución escosa la vía alministrativa dexando solo l’alternativa d’anteponer un recursu contenciosu-alministrativu nel plazu de dos meses nel Tribunal Cimeru de Xusticia del Principáu d’Asturies. Dende’l Fondo pa la Protección del Llobu Ibéricu denunciamos qu’esto ye una clara estratexa abusiva per parte del gobiernu pa coartar el derechu de la ciudadanía a oponese a esta resolución, yá que llinda les opciones ciudadanes de recurrir y oponese llegalmente a la matanza innecesaria y brutal d’una especie en peligru.

Nos próximos díes el Fondu Llobu va facer públicu un análisis más pormenorizáu de les
numberoses falacias en que se sofita esta resolución que salió ayeri publicada nel BOPA.

La Conseyería d’Educación publicó güei la llista provisional de persones almitíes pal concursu-oposición de reposición de profesoráu de Secundaria y otros cuerpos docentes, formada por 7.980 aspirantes, lo que representa’l 97% de los solicitantes. El llistáu puede consultase nel Boletín Oficial del Principáu (Bopa) y nel portal Educastur.

La convocatoria componse de 770 places partíes en 51 especialidaes. Del total d’almisiones, el 91% correspuéndese col cuerpu de Secundaria (7.276). Síguen-y el profesoráu especialista en sectores singulares de Formación Profesional –que s’ufierta per primer vegada nunes oposiciones–, con 491 almisiones; les Escueles Oficiales d’Idiomes, con 125, y Música y Artes Escéniques, con 88.

Les especialidaes con mayor númberu d’almisiones son Xeografía y Hestoria (749), Bioloxía y Xeoloxía (539), Matemátiques (537) ya Inglés (511).

El resolvimientu establez un periodu de diez díes arteros, a cuntar a partir de mañana, para iguar los defectos que provocaren la esclusión. En munchos casos, deber a un pagu incorrectu de la tasa. Darréu, va publicase un nuevu resolvimientu colos llistaos definitivos.

La prueba escrita (B) va desenvolvese’l 21 de xunu, mientres que la parte práctica ta programada pal 28 del mesmu mes. La conseyería estableció 37 sedes repartíes ente los conceyos de Xixón, Uviéu, Avilés, Siero, Llangréu, Mieres, Llanera, Colunga, Llaviana, Villaviciosa, Noreña, Gozón, Ayer y Castrillón.

Tamién se nomaron 133 tribunales que van tar integraos por cinco funcionarios de carrera n’activu (una presidencia y cuatro vocalíes). Amás, escoyéronse cuatro vocales suplentes per tribunal.

Samartín del Rei Aurelio va ser l’escenariu de la novena edición de la Feria Nacional pa la Repoblación de la España Rural, Presura 2025, que se va celebrar del 3 al 5 d’ochobre. Esti eventu, el mayor a nivel estatal dedicáu a la revitalización del mediu rural, va tener llugar nel pozu Sotón, un espaciu emblemáticu «que simboliza’l tresformamientu y el futuru, reforzando’l compromisu del Principáu col impulsu demográficu dende una perspectiva moderna, creativa ya inclusiva».

La feria va llevar el títulu de Renacencia rural y va axuntar mientres trés díes a instituciones, emprendedores, entidaes sociales y ciudadanía nun completu programa d’actividaes que va combinar espacios d’alderique, propuestes culturales, proyectos d’innovación y oportunidaes d’emprendimientu.

Asina, tán previstes nueve meses redondes que van afrontar temes clave pal futuru de los territorios rurales, dende la implicación xuvenil hasta la innovación tecnolóxica, pasando pola economía social, la cultura, la ciencia, el papel de les muyeres retornaes y la sostenibilidá de los pueblos costeros.   Amás, va celebrase’l concursu d’emprendimientu Hueco Starter, que va otorgar un premiu al meyor proyectu desenvueltu nel mediu rural asturianu.