Xixón al día

Categoría: Asturies

  • Les tarifes de los servicios de taxi van xubir esti añu’l 3,71% n’Uviéu y Avilés

    Les tarifes de los servicios de taxi van xubir esti añu’l 3,71% n’Uviéu y Avilés

    El Conseyu de Gobiernu aprobó güei los precios del serviciu de taxis d’Uviéu y Avilés pa 2025, que incluyen una xubida media del 3,71%.

    L’actualización del coste respuende a una petición de los dos ayuntamientos, consensuada coles asociaciones profesionales, y cuenta col informe favorable de la Comisión de Precios d’Asturies.

    De esti mou, la baxada de bandera n’horariu diurnu va pasar de 2,09 a 2,17 euros, mientres que’l kilómetru recorríu fíxase en 1,18 euros, la hora d’espera en 28,95 y la carrera mínima, en 5,09.

    L’actualización de los precios incluye tamién nueves tarifes pa los horarios nocturnos, los díes festivos y les xornaes de Nuechebona y Nuechevieya. A mou d’exemplu, la carrera mínima en festivos y horariu nocturnu va ser de 6,37 euros.

  • Iniciativa pol Asturianu recupera los grupos de conversación n’asturianu

    Iniciativa pol Asturianu recupera los grupos de conversación n’asturianu

    Iniciativa pol Asturianu recupera los grupos informales de conversación n’asturianu en collaboración col Conseyu de la Mocedá de Xixón (CMX). La responsable de la cuenta educativa ‘Cosines de Clas’ va ser la encargada de la dinamización del grupu. La participación ye de baldre.

    Con esta convocatoria preténdese abrir un espaciu pa toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu y nel que nun importa’l nivel d’usu o conocencia del idioma. Los grupos informales de conversación son una iniciativa del CMX col envís de que la xente pierda’l mieu a falar n’otros idiomes como’l francés, l’inglés y l’alemán. Resulta, entós, perinteresante usar estos espacios como sitios seguros onde l’asturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia, na cai, nel supermercáu o colos collacios.

    La cita va repetise tolos sábados a les diez de la mañana de manera telemática, al traviés de la plataforma Zoom. Pa facilitar el trabayu pa la organización y la comunicación, les persones interesaes han rellenar un formulariu na páxina web d’Iniciativa pol Asturianu. La primer sesión va celebrase’l sábadu 22 de febreru.

  • Cultura va festexar esti vienres el Día de la Llingua Materna con una programación especial per toa Asturies

    Cultura va festexar esti vienres el Día de la Llingua Materna con una programación especial per toa Asturies

    21 de febreru, con un programa d’actividaes ampliu que va desenvolvese per conceyos de tola xeografía asturiana, dende Ribeseya hasta Tapia.

    El departamentu qu’encabeza Vanessa Gutiérrez coordina esta iniciativa, que tamién incluye eventos impulsaos pola Rede de Normalización Llingüística y la Conseyería d’Educación, y que tien por oxetu promover l’usu y la conocencia del asturianu y del eonaviegu.

    L’axenda incluye espectáculos teatrales, talleres, documentales, esposiciones y cuntacuentos dirixíos a públicu de toles edaes. Amás, va reforzase la difusión de material didáctico na plataforma Educastur pa fomentar el deprendimientu y l’usu de les llingües propies d’Asturies nel ámbitu educativu.

    La programación incluye tamién una ufierta variada d’actividaes pal públicu infantil, como cuntacuentos en centros educativos de dellos llugares y talleres creativos, como ún de cianotipia nel conceyu de Cabranes.

    Dalgunes de les actividaes más destacaes son estes:

    • El 21 de febreru, a les 10:30 hores, el Teatru Toreno de Cangas del Narcea va acoyer la representación de Calcetos, un espectáculu con David Varela y Ana Morán. Amás, na Casa la Cultura va presentase la campaña Asina los chamamos eiquí, sobre los nomes autóctonos de la flora y fauna asturianes.
    • A les 12:00 hores, van publicase n’Educastur recursos dixitales diseñaos pa toles etapes educatives.
    • Pela tarde, a les 18:30 hores, l’Atenéu Obreru de Villaviciosa va ser l’escenariu de la entrega del VIII Premiu de Rellatos Curtios Xosé Caveda y Nava.
    • El 22 de febreru, nel Auditoriu Municipal de Tapia, va proyectase’l documental NÍA (Nosoutras Ideamos Arte): Muyeres, tradición y novas ruralidades, seguido d’un concerto del trío Toyemerendas, dambos n’eonaviegu.
    • Los díes 23 y 24 va ponese la función Formigues, en llingua asturiana, d’Elektra Fiktion, nel Teatru de la Llaboral de Xixón.

    Cultura y tradición na programación

    El Día de la Llingua Materna tamién va cuntar con iniciatives pa poner en valor el patrimoniu cultural y artísticu. Nel Centru d’Arte Tito Bustillo, en Ribeseya, va poder visitase hasta’l 30 de marzu la esposición La imaxe, lo tapecío, de Pablo Casanueva.

    Con esti programa, Cultura quier sorrayar el compromisu del Gobiernu d’Asturies cola protección y promoción de les llingües propies apostando pola so normalización nos ámbitos educativu, cultural y social.

  • Les Vegues, Lluanco y Salinas, consideraes zones tensionaes pol arriendu de la vivienda

    Les Vegues, Lluanco y Salinas, consideraes zones tensionaes pol arriendu de la vivienda

    La conseyería d’Ordenación del Territoriu, Urbanismu, Vivienda y Derechos Ciudadanos detectó que les localidaes de Les Vegues (Corvera), Lluanco (Gozón) y Salinas (Castrillón) cumplen con dalgún de los criterios pa poder ser consideraes como zones tensionaes pol preciu de los arriendos. El conseyeru Ovidio Zapico treslladó-yos estes conclusiones de los informes ellaboraos y nos que se tuvo en cuenta’l preciu de los arriendos, mesmo que la renta media de los llares a los alcaldes d’estos conceyos afectaos.

    Nos trés casos, la tensión de los precios débese al costu de la vivienda n’arriendu. Los informes ellaboraos pola conseyería identificaron que’l costu d’arrendar una casa nestes localidaes en relación colos ingresos de los llares supera’l 30%, lo que significa qu’una parte relevante de los ingresos de los residentes destínase al pagu de la renta. Esi porcentaxe xustifica por sí mesmu que la zona pueda ser declarada como tensionada. Los estudios realizáronse por aciu la prospección del mercáu y la comparanza de datos de diverses fontes, tanto públiques como privaes.

  • Los cartelos de la AS-369 en Maeza incumplen la toponimia oficial de Salas, denuncia Iniciativa pol Asturianu

    Los cartelos de la AS-369 en Maeza incumplen la toponimia oficial de Salas, denuncia Iniciativa pol Asturianu

    La señalética informativa de la carretera autonómica AS-369 de la parroquia de Maeza, en Salas, incumplen la toponimia oficial del conceyu, denuncia Iniciativa pol Asturianu. Na cartelería d’angüaño apaez la forma deturpada ‘Malleza’, fechu pol que dellos vecinos contactaron con Iniciativa pol Asturianu pa treslladar la vulneración de la toponimia oficial. La organización de reivindicación llingüística presentó un escritu ante la Conseyería de Fomentu, Cooperación Llocal y Prevención de Quemes requiriendo’l cambéu de la señalética pa dar cumplimientu a la Llei d’Usu y al Decretu de toponimia salense.

    Nel so rexistru, l’asociación recuerda al departamentu del conseyeru Alejandro Calvo que la Llei d’Usu y Promoción del Asturianu establez que los topónimos van tener la denominación oficial na so forma tradicional. El Conseyu de Gobiernu del Principáu d’Asturies aprobó’l decretu d’oficialización de la toponimia del conceyu de Salas en setiembre de 2021, siendo únicamente oficial la forma tradicional ‘Maeza’.

    La entidá reforzó la so reclamación recordando tamién que l’anuncia del mesmu decretu nel Boletín Oficial del Principáu d’Asturies insta na so disposición adicional única que “a partir de la entrada en vigor del presente decretu, les Alministraciones Públiques adecuarán de manera progresiva, d’alcuerdu coles sos disponibilidaes presupuestaries y, en tou casu, al momentu de la so renovación, les rotulaciones en víes públiques y carreteres, asina como de mapes y planos oficiales a les formas toponímiques establecíes nel presente decretu”.

  • Cuideiru, nueva zona tensionada polos arriendos

    Cuideiru, nueva zona tensionada polos arriendos

    La Conseyería d’Ordenación del Territoriu, Urbanismu, Vivienda y Derechos Ciudadanos detectó que’l conceyu de Cuideiru puede considerase como zona tensionada debíu al pesu del costu de los arriendos sobre los ingresos medios. Asina-y lo treslladó’l conseyeru Ovidio Zapico al alcalde d’esti conceyu, Carlos Valle. La xunta sirvió p’analizar l’informe ellaboráu pola conseyería sobre’l conceyu.

    Nel casu de Cuideiru, identificóse que la carga del costu del arriendu en relación colos ingresos medios de les cases supera’l 30%. Esto significa qu’una parte significativa de los ingresos de los residentes destínenlo al pagu del arriendu, lo que xustifica la declaración d’esta zona como tensionada. L’estudiu realizóse por aciu la prospección del mercáu d’arriendu y la comparanza de datos de diverses fontes públiques y privaes.

  • Completar la rede de saneamientu de San Esteban va llevar una inversión de 670.000€

    Completar la rede de saneamientu de San Esteban va llevar una inversión de 670.000€

    La Conseyería de Transición Ecolóxica, Industria y Desenvolvimientu Económicu va invertir cerca de 670.000 euros pa rematar la rede de saneamientu de San Esteban, en Muros de Nalón, y tratar les agües residuales nuna zona que va dende’l puertu hasta l’área próxima al espigón.

    Nieves Roqueñí, conseyera de Transición Ecolóxica, presentó esta mañana’l proyectu en Muros de Nalón xuntu col alcalde, Celestino Novo, y miembros del equipu de gobiernu municipal. «Ye un proyectu importante para esti conceyu y nuna zona sensible como la del baxu Nalón, porque vamos acometer l’últimu tramu del saneamientu que quedaba pendiente en San Esteban, dende’l puertu hasta la zona de les piscines y del restorán que ta cerca del espigón», destacó la conseyera.

    La inversión contempla la puesta en serviciu de dellos bombeos simultáneos pa conducir a la rede y tratar na depuradora del baxu Nalón les agües residuales de les viviendes del Paséu Marítimu, de les piscines, d’un restorán y de la futura área d’autocaravanes. Por cuenta de que la zona d’actuación ye dafechu llana y que les distancies ente los puntos d’arramáu y la rede son elevaos, la conexón col colector plantegóse por aciu bombeos en serie.

  • Transición Ecolóxica deniega l’autorización pa construyir un parque eólicu nos conceyos de Valdés y Cuideiru

    Transición Ecolóxica deniega l’autorización pa construyir un parque eólicu nos conceyos de Valdés y Cuideiru

    La Conseyería de Transición Ecolóxica, Industria y Desenvolvimientu Económicu tornó la solicitú d’autorización alministrativa previa y de construcción del parque eólicu denomináu Palanques, allugáu en Cuideiru y Valdés, archivando toles actuaciones. El proyectu cunta con una declaración d’impactu ambiental (DIA) desfavorable por cuenta de los impactos negativos sobre la población, el paisaxe, los bienes del patrimoniu cultural y diversu especies protexíes de avifauna y quirópteros (esperteyos).

    Per otru llau, la conseyería sí dio lluz verde a l’autorización alministrativa previa pa la instalación d’un parque eólicu, denomináu Escorpio, nos conceyos de Vilanova d’Ozcos y Eilao, con una potencia instalada de 30 MW. Esta instalación va alcontrase na sierra de Pumarín, ente’l Pico de Murias y el Pico do Chao, que va incluyir la instalación de seis aeroxeneradores de 5 MW de potencia en Vilanova d’Ozcos, mientres que la llinia y la subestación d’evacuación van escurrir per Eilao.

    Esti parque eólicu dispon de condicionantes ambientales y tendrá de cumplir con tolos requisitos y plazos establecíos na normativa d’aplicación, tanto ambiental como llétrica, y nel resolvimientu d’autorización alministrativa. Amás, van tener que recibir autorización alministrativa de construcción y cuntar cola conformidá urbanística de los conceyos afectaos, requisitos ensin los cualos nun va poder construyise.

  • Gobiernu d’Asturies y Ministeriu de la Presidencia firmen un conveniu p’avanzar y ampliar la dixitalización de la xusticia n’Asturies

    Gobiernu d’Asturies y Ministeriu de la Presidencia firmen un conveniu p’avanzar y ampliar la dixitalización de la xusticia n’Asturies

    El conseyeru de Facienda y Fondos Europeos, Guillermo Peláez, y el secretariu d’Estáu de Xusticia del Ministeriu de la Presidencia, Xusticia y Relaciones coles Cortes, Manuel Olmedo, roblaron esta mañana’l conveniu de collaboración pa la tresferencia de soluciones informátiques nel ámbitu de la xusticia, que va suponer la cesión a la comunidá de 50 sistemes y aplicaciones informátiques.

    L’alcuerdu, robláu n’Uviéu, va dexar siguir utilizando les aplicaciones yá apurríes pol ministeriu y sumar soluciones tecnolóxiques implementaes cola meyora del procesu de digitalización de la xusticia.

    Ente los nuevos sistemes, en procesu d’implantación o yá en funcionamientu, destaquen programes como Minerva, que sirve de soporte pa la tramitación de procedimientos xudiciales; Fortuny dixital, que da cobertoria a la xestión de la Fiscalía, o Atenea, un nuevu sistema de xestión procesal pa los órganos xudiciales que se preve empiece a funcionar este mesmu añu.

    El conveniu, suscritu na see de Presidencia, da continuidá a los roblaos en 2018, 2019 y 2023, qu’escuerren ameyorar la prestación del serviciu públicu de xusticia y la so eficiencia por aciu l’usu compartíu de soluciones tecnolóxiques.

  • El volume de contraetiquetes DOP Sidra d’Asturies sigue creciendo magar de ser un mal añu de mazana

    El volume de contraetiquetes DOP Sidra d’Asturies sigue creciendo magar de ser un mal añu de mazana

    El volume d’entrega de contraetiquetes nel añu 2024 de la Denominación d’Orixe Protexida Sidra d’Asturies cifróse en 4.626.600 precintes, lo que supón un 6% de crecimientu con respectu al 2023. El valor comercial de la sidra certificada como Sidra d’Asturies ye superior a los 6 millones d’euros.

    La marca de calidá estremada DOP Sidra d’Asturies sigue creciendo teniendo en cuenta que’l 82% de les ventes de la sidra natural tradicional efectuada pela canal hostelera. La sidra natural d’echar ye una bébora social, ye dicir de compartir. Cada vez hai una mayor aceptación del consumu de productu con denominación d’orixe, gracies al aumentu de la sensibilidá de los consumidores alredor de productos sostenibles y de cercanía, de Km 0 y de calidá, como lo ye la única sidra ellaborada con mazana asturiana.

    La mayoría de llagares coinciden en que les ventes de la sidra DOP al respective de la sidra común aumentaron considerablemente, lo que se debe ensin dulda a la promoción que se ta faciendo y a que les nueses sidres tán ganando tolos premios nos principales festivales sidreros d’Asturies.

    En sidra natural destaca’l 82 % n’hostelería, un 9% n’alimentación y caltiénense les vientes n’el mesmu llagar nel 9 %. Les vientes de sidres naturales esplumoses crecen a 91.678 llitros respecto al añu pasáu un 20% y les peneraes al 123%.

    Dende la DOP Sidra d’Asturies son optimistes pa esti presente añu tres la consecución de de la reconocencia de la cultura sidrera asturiana pola Unesco. Espérase otru crecimientu en ventes pola gran llegada de turistes y pola bona climatoloxía esperada.