Xixón al día

Categoría: Educación

  • ADAE denuncia’l mal procesu de matriculación del alumnáu de les llingües propies d’Asturies

    ADAE denuncia’l mal procesu de matriculación del alumnáu de les llingües propies d’Asturies

    L’Asociación de Docentes d’Asturianu y Eonaviego/gallego-asturiano) amosó’l descontentu énte tres aspectos qu’afecten a la matriculación del alumnáu de les dos llingües propies d’Asturies y al so desenvolvimientu normal nes aules y, énte elles, soliciten a la Conseyería d’Educación que tome midíes nes cuestiones plantegaes «p’alcanzar una educación más diversa, respetuosa, xusta y garante de la llegalidá vixente».

    El nome de l’asignatura de la llingua falada nel Eo-Navia

    Nes fueyes de matriculación de dellos centros d’educación Primaria y Secundaria y nel documentu de matrícula del CEPA d’A Veiga l’asignatura apaez como Llingua Asturiana y Lliteratura, poro, nun cuenta con un nome que reflexe la realidá nos documentos oficiales, argumenten. «Ello pue confundir al alumnáu y a les families y supón una invisivilización d’esti idioma. Tamién en SAUCE figura como Llingua Asturiana y Lliteratura, colo que’l profesoráu d’eonaviego pon les notes del alumnáu de eonaviego baxo’l nome d’una
    asignatura que nun s’enseña na zona. Trátase d’un error ensin sentíu, yá que les bolses de profesoráu de dambes asignatures son independientes y tienen un códigu y un nome propiu diferenciaos.» añade l’asociación.

    El currículu de l’asignatura d’eonaviego

    El profesoráu d’eonaviego nun cuenta con un currículu pa enseñar la propia asignatura, colo que fai lo que pue adaptando’l currículu de l’asignatura de Llingua Asturiana y Lliteratura, un documentu que, por tar fechu pa otru idioma, nun s’axusta a les necesidaes de l’asignatura impartida nel Eo-Navia.

    Uniformidá nos formularios de matrícula y concesión de vacantes

    ADAE tamién solicita que dende la Conseyería d’Edudación se manden formularios de matrícula comunes a tolos centros educativos, especialmente a los CEPA (Centros d’Educación de Persones Adultes) nos que s’enseñen dambos idiomes. «Hai casos nos que dalgunos centros usen modelos onde nun se mencionen les asignatures optatives, dalgo que ye crucial pa que l’alumnáu pueda tomar decisiones informaes. Dende dellos CEPA comuníquennos que’l nome de les asignatures cursaes namás se reflexa en documentos internos que dalgunos centros son reticentes a amosar, lo que xenera una falta de tresparencia y claridá», declaren.

    Amás, quixeron destacar la situación del CEPA d’A Veiga, dende onde nos comuniquen que la Conseyería d’Educación nun concede profesor/a d’eonaviego pola so pecualiaridá organizativa. Nesti centru acumúlense les hores de cada asignatura y danse siguíes, polo qu’argumenten que “nun van mandar docente pa tan poques hores”. Entendemos que’l profesoráu del centru da la docencia d’una asignatura y cuando la termina da les clases d’otres asignatures que tien asignaes o desempeña otros trabayos que tien qu’asumir, nun pasa mano sobre mano’l restu del cursu. Tamos otra vuelta énte un tratu diferenciáu al profesoráu d’eonaviego y énte l’incumplimientu de la sentencia del Tribunal Supremu del añu 2012 que blinda’l drechu de cualesquier persona a cursar l’asignatura ensin que medien criterios organizativos o económicos pa rechazar la so matrícula nin la petición d’una vacante per parte d’un centru.

  • La Universidá d’Uviéu empecipia l’esplegue d’una rede sísmica somarina frente a la mariña de Galicia y Asturies

    La Universidá d’Uviéu empecipia l’esplegue d’una rede sísmica somarina frente a la mariña de Galicia y Asturies

    Investigadores del Departamentu de Xeoloxía de la Universidá d’Uviéu, acompañaos de científicos de la Universidá de Lisboa y de siete miembros de la Unidá Técnica Marina del Conseyu Cimeru d’Investigaciones Científiques (CSIC), zarparon a finales de la pasada selmana del puertu de Vigo a bordu del buque oceanográficu Sarmiento de Gamboa pa asitiar nel fondu marín, a más de 4.500 metros de fondura, una decena de sismógrafos somarinos (técnicamente denominaos OBS).

    Estos equipos van allugar na mariña cantábrica frente a les mariñes de Galicia y Asturies coles mires de detectar mientres seis meses los terremotos con epicentru no fondero marín que s’anicien nesti sector. Dende va décades conozse la esistencia d’una importante sismicidá frente a les mariñes lucenses y del occidente asturianu que la so distribución y característiques planteguen entá munches incógnites pa la comunidá científica.

    L’equipu d’investigación de la Universidá d’Uviéu ta lideráu por Gabriela Fernández-Viejo, directora del Departamentu de Xeoloxía d’esta Universidá ya investigadora principal del Proyectu ASTRACAN.

    El trabayu de los y les investigadores a bordu del Sarmiento de Gamboa va enllargase hasta’l próximu 7 de payares, periodu nel qu’amás d’esplegar los sismógrafos somarinos, van adquirise más de 700 km de datos batimétricos y de sísmica pasiva d’altu resolvimientu que van dexar caracterizar el sosuelu marín. Coles mesmes, van tomase amueses de piedra del llechu marín en distintos puntos.

    Esta campaña marina complementóse cola instalación en tierra y a lo llargo de la mariña d’otros 10 sismógrafos que, xunto colos marinos, van apurrir una pervalible información pa caracterizar con precisión l’actividá sísmica d’una amplia zona del noroeste peninsular.

  • Alicia Flórez, de la Universidá d’Uviéu, algama’l premiu nacional ‘Xóvenes inxenieros por un mundu meyor’

    Alicia Flórez, de la Universidá d’Uviéu, algama’l premiu nacional ‘Xóvenes inxenieros por un mundu meyor’

    Alicia Flórez Berdasco, inxeniera ya investigadora de la Universidá d’Uviéu, recibió en Madrid el primer premiu del concursu «Xóvenes inxenieros/es por un mundu meyor», qu’apurre l’Institutu de la Inxeniería d’España (IIE). La primer edición d’esti galardón nacional reconoció la so contribución a facilitar la vida de les persones con discapacidá visual cola aplicación de nueves tecnoloxíes, al traviés d’un proyectu tituláu Diseñu d’antenes pa un sistema radar d’ayuda al desplazamientu autónomu de persones con discapacidá visual.

    El primer premiu del certame, patrocináu pola Fundación Mutualidá de la Inxeniería, ta dotáu con 1.250 euros. El certame dirixióse a mozos inxenieros ya inxenieres de tol país que, de manera individual o nel equipu, desenvolvieren proyectos ente los años 2022 y 2024 con potencial pa contribuyir a un mundu meyor. Los criterios d’evaluación incluyíen l’impactu n’árees clave como la meyora social, la innovación, la sostenibilidá ambiental, el tresformamientu dixital o’l emprendimientu.

    Alicia Flórez Berdasco amosóse “mui agradecida” pola reconocencia, que recoyó apocayá nun eventu celebráu en Madrid, nel que pudo conocer proyectos d’otros compañeros y compañeres d’oficiu y “compartir idees”. “Ye mui gratificante que’l trabayu y l’esfuerzu invertíos seyan reconocíos d’esta manera. Esti llogru refuerza la mio motivación pa siguir desenvolviéndome y siguir buscando formes d’ameyorar la calidá de vida de les persones al traviés de la innovación”, espresó la investigadora.

  • La Universidá d’Uviéu va cuntar con una cátedra sobre la cultura minera

    La Universidá d’Uviéu va cuntar con una cátedra sobre la cultura minera

    La Conseyería de Cultura, Política Llingüística y Deporte impulsa la creación d’una cátedra dedicada a la cultura minera na Universidá d’Uviéu. L’anunciu fíxolu la conseyera del ramu, Vanessa Gutiérrez, na so intervención na inauguración del Festival d’Arquitectura, Cultura y Territoriu ECOS que tuvo llugar nel Pozu Sotón. Esti eventu ye’l primeru d’arte efímeru que se lleva a cabu dafechu n’entornos vinculaos al patrimoniu industrial d’Asturies, empieza güei hasta’l 13 d’ochobre.

    Sobre la cátedra nueva, Vanessa Gutiérrez defendió la creación de manera que «la máxima institución académica asturiana s’encargue del estudiu, análisis y difusión de la cultura minera». Una cultura vinculada al patrimoniu industrial del nuestru territoriu, afondó la conseyera, que «ye fundamental pa conocer el pásau y presente d’Asturies y construir el so futuru».

    Asina mesmo, Gutiérrez destacó la collaboración cola Universidá d’Uviéu y el sindicatu mineru SOMA-FITAG-UGT, instituciones coles que mantuvo una reunión esta mesma selmana p’abordar la creación de la cátedra de la cultura minera.

    L’apoyu a la conservación, recuperación, difusión y valorización del patrimoniu cultural asturianu ye una prioridá pa la Conseyería de Cultura. Esti compromisu demostróse, ente otres acciones, col aumentu de la cuantía del presupuestu destinada a esta área, que s’incrementó nun 75 por cientu dende l’añu 2019.

  • Casi cien mil estudiantes anicien güei n’Asturies el cursu

    Casi cien mil estudiantes anicien güei n’Asturies el cursu

    Un total de 99.906 estudiantes d’Infantil, Primaria, Secundaria (ESO) y Bachilleratu –un 1,6% menos que va un añu- empecipiaron güei n’Asturies el nuevu cursu escolar, nel que s’implanta’l descensu progresivu de la ratio a 23 per aula y la tarifa unificada a 4,5 euros del preciu de los comedores escolares dependientes de l’alministración.

    Infantil y Primaria cunten con 56.263 alumnos y alumnes. En númberos absolutos, son 1.541 menos que l’añu pasáu, lo que supón un descensu del 2,6%. Ye un porcentaxe menor que’l rexistráu nos dos últimos dos cursos, cuando s’asitió inclusive percima del 3%.

    Na rede pública contabilícense 39.951 matrícules y les 16.312 restantes, na privada-concertada. Xixón ye’l conceyu con más estudiantes n’Infantil y Primaria, con 14.963; siguíu per Uviéu, con 13.389, y Avilés, con 4.938.

    La matrícula de Secundaria y Bachilleratu xube a 43.643 estudiantes, lo que supón un llixeru descensu del 0,29% respectu al cursu anterior. Na enseñanza pública rexistráronse 33.363 matriculaciones, mientres que les 10.280 restantes correspuenden a la privada-concertada. Xixón ye tamién el conceyu con más estudiantes nestes etapes, con 12.059; siguíu por Uviéu, con 10.341, y Avilés, con 3.963.

    Per otru llau, el xueves pasáu abríen les sos puertes los primeros centros autonómicos de 0 a 3 años, de la rede de Les Escuelines/As Escolías. En concretu, inauguráronse Los Esguinos, de Trevías (Valdés); As Paxarías, de Bual; Los Pequeníos, de Villayón; Los Indianinos, de Colombres (Ribadeva), y La Brañona, de Panes (Valle Baxu de Peñamellera). En total, sumen 53 neños y neñes matriculaos. Esta cifra podría aumentase nes próximes selmanes, yá que tienen places disponibles que podríen cubrir.

  • Educación inaugura con 53 alumnos les cinco primeres escuelines/escolías

    Educación inaugura con 53 alumnos les cinco primeres escuelines/escolías

    El Gobiernu d’Asturies inauguró güei los cinco primeros centros de 0 a 3 años de la rede autonómica, pública y gratuita de Les Escuelines/As Escolías, que van empezar con un total de 53 neños y neñes matriculaos. La conseyera d’Educación, Lydia Espina, visitó esta mañana los trés que tán allugaes na zona occidental, xunto coles directores xenerales de Centros, Rede 0-3 y Enseñances Profesionales, Cristina Blanco, y d’Infraestructures y Tecnoloxíes Educatives, Julio Vallaure.

    En concretu, percorrieron los centros Los Esguinos, de Trevías (Valdés); As Paxarías, de Bual, y Los Pequeníos, de Villayón. Les otres dos escuelines qu’abrieron güei les sos puertes son Los Indianinos, de Colombres (Ribadeva), y La Brañona, de Panes (Valle Baxu de Peñamellera), a les que la conseyera va mover en próximes feches.

    Colombres ye la escuelina con más menores matriculaos, con 15 neños y neñes; siguíu de Trevías, con 13; Bual, con 11; Panes, con 10, y Villayón, con 4. Eses cifres podríen ampliase mientres el presente cursu, yá que toos estos centros tienen entá places llibres. La escuelina ribadense dispón de dos unidaes y 31 places, mientres que les otres cuatro consten d’una unidá y 18 places.

    Las escolías de Bual y Villayón comparten directora, al igual que les de Panes y Colombres por una cuestión de proximidá xeográfica. La de Trevías va tener la so propia directora. En cuanto al restu del personal, la Dirección Xeneral d’Empléu Públicu contrató a doce técniques d’educación infantil (TEI) pa estos cinco centros autonómicos de 0 a 3 años. En Colombres van trabayar cuatro educadores y nos otros cuatro, dos en cada unu.

    Estos cinco que se ponen en marcha construyéronse con cargu a les subvenciones de fondos europeos del Mecanismu de Recuperación y Resiliencia (MRR) otorgaes pola Alministración del pa crear nueves places de 0 a 3 años, concedíes nel exerciciu 2023. En total recibieron ayudes por importe de 640.000 euros.

    “Güei ye un día para dar les gracies a muncha xente porque ponemos en marcha la rede pública, autonómica y gratuites de Les Escuelines/As Escolías. Detrás hai meses d’intensu trabayu de tola conseyería y de los conceyos. Güei facemos realidá un proyectu empezamos a suañar fai menos d’un añu”, señaló la conseyera.

    Lydia Espina recordó la tramitación alministrativa esplegada, dende la nueva llei al decretu de funcionamientu, el procedimientu d’almisión, l’espediente de creación de centros, la xestión de les subvenciones MRR o les xuntes informatives colos conceyos implicaos. “Tamos construyendo una rede que va redundar na calidá del nuesu sistema educativu ensin dala dulda”, añedió.

    Apertura progresiva

    En cuanto al restu de escuelines/escolías que componen la primer fase de la rede autonómica, dirán inaugurándose a midida que se vaigan concluyendo les obres. Ta previsto que n’ochobre puedan abrir otros cuatro centros: La Veiga, de Sotu (Sotu’l Barcu); La Cuevona d´Avín, de Benia (Onís); Os Ferreiríos, de Santalla (Santalla d’Ozcos), y Os Esguín, de Santiso d’Abres.

    Per otru llau, la conseyera convocó ayeri a una xunta, per primer vegada conxunta, de toles direcciones de les escueles de 0 a 3 que dependen del gobiernu d’Asturies y de los conceyos. L’oxetivu yera presentar el proyectu, el decretu y la tramitación de la llei, que va dexar la integración de les municipales na nueva rede d’Asturies, a partir del próximu añu.

    El gobiernu d’Asturies estableció un procedimientu d’almisión únicu, colos mesmos criterios, baremos y calendariu tanto pa les escueles de 0 a 3 años municipales como pa les autonómiques, que tendrán de convivir hasta que se produza la integración nuna única rede. La única diferencia foi’l llugar de presentación de los documentos y de publicación de les llistes.

    Tamién el calendariu lectivu de 0 a 3 años ye común. Amás d’estes cinco escueles autonómiques, güei dio empiezu l’actividá nes 76 escueles municipales qu’inda xestionen los conceyos y que van tener la oportunidá d’integrase na rede una vegada que la Xunta Xeneral d’Asturies apruebe la llei correspondiente, que ta en fase de tramitación.

  • 50.000 euros pa impulsar la carrera investigadora ente los estudiantes de máster universitariu

    50.000 euros pa impulsar la carrera investigadora ente los estudiantes de máster universitariu

    El Gobiernu d’Asturies quier promover la carrera investigadora ente estudiantes de máster universitariu y aumentar el personal dedicáu a la I+D+i n’Asturies. Pa ello, la Conseyería de Ciencia, Empreses, Formación y Empléu va financiar con 50.000 euros una ventena de beques p’alumnáu que collabore con un grupu d’investigación y realice un proyectu venceyáu a los sos estudios de máster y enmarcáu na Estratexa d’Especialización Intelixente.

    El Boletín Oficial del Principáu (Bopa) publica güei la convocatoria incluyida nel nuevu calendariu d’ayudes d’I+D+i y que xestiona l’Axencia Sekuens coles mires de promover les vocaciones científiques en toles árees de conocencia. Anguaño, la cuantía destinada al programa medra en 10.000 euros sobre la primer edición de 2022.

    Les llinies que van primar na selección de les persones beneficiaries van ser les rellacionaes cola innovación en productos de la cadena agroalimentaria; l’afianzamientu de l’actividá del mediu rural; la calidá asistencial al serviciu de la ciudadanía y l’avieyamientu; la investigación biomédica y sanitaria; la xestión d’activos naturales y culturales d’Asturies y la innovación turística. Tamién se van priorizar proyectos rellacionaos cola transición enerxética n’Asturies, la industria circular, la competitividá industrial, la fabricación intelixente y la intelixencia artificial

    Van ser cuatro ayudes per cada área de conocencia a les que van poder aportar estudiantes matriculaos nun máster oficial na Universidá d’Uviéu. El plazu pa presentar les solicitúes remata’l 10 d’ochobre.

  • L’Institutu Cervantes de Nueva York llanza per primer vez un cursu d’asturianu

    L’Institutu Cervantes de Nueva York llanza per primer vez un cursu d’asturianu

    La llingua asturiana forma parte per primer vez de la programación del Institutu Cervantes de Nueva York. Col títulu Introduction to Asturian Language and Culture, la institución pública española presente en 45 países va llevar la enseñanza de la llingua asturiana hasta’l corazón de La Gran Mazana al traviés de los sos cursos de seronda.

    La presencia de la formación d’asturianu en Nueva York ye frutu de la collaboración ente la Conseyería de Cultura, Política Llingüística y Deporte del Principáu d’Asturies y l’Institutu Cervantes. Nesti sentíu, los pidimientos del Gobiernu d’Asturies fueron atendíos pol organismu públicu y, como resultáu, les clases de la llingua asturiana nos centros internacionales van ser una realidá, nesti casu, nel distritu de Manhattan.

    L’equipu docente del Cervantes neoyorquín preparó un programa formativu distribuyíu en seis sesiones lectives presenciales que se van impartir los vienres que van dende’l 25 d’ochobre hasta’l 6 d’avientu. D’esta forma, el cursu va permitir al alumnáu familiarizase col asturianu, averase a la so historia y conocer delles de les particularidaes de la cultura asturiana. Al traviés de la lliteratura, la música y una variedá de documentos audiovisuales, los participantes van conocer los principios básicos de la estructura sintáctica, léxica y fonética de la llingua propia del Principáu. Amás, a la fin del cursu, van ser a lleer testos curtios nesta llingua y participar en conversaciones básiques n’asturianu.

    La escritora, traductora, crítica lliteraria y profesora Paquita Suárez Coalla va ser la encargada de dirixir la docencia del asturianu en Nueva York. L’autora de llibros en castellán y asturianu lleva años comprometida coles llingües propies d’Asturies y anguaño desempéñase como profesora d’español y lliteratura nel Departamentu de Llingües Modernes del Borough of Manhattan Community College (CUNY).

  • Les cinco primeres Escuelines abren el xueves viniente

    Les cinco primeres Escuelines abren el xueves viniente

    El xueves viniente van inaugurase los cinco primeros centros de la rede pública y autonómica de Les Escuelines/As Escolías, en coincidencia col entamu del cursu escolar y la implantación de la matrícula gratuita pa tol alumnáu de 0 a 3 años. El presupuestu autonómicu destina esti exerciciu 31,15 millones pa poner en marcha esti proyectu educativu, pioneru n’España.

    Les cinco escuelines/escolías que se van estrenar el xueves son Los Indianinos, de Colombres (Ribadeva); La Brañona, de Panes (Valle Baxu de Peñamellera); Los Esguinos, de Trevías (Valdés); As Paxarías, de Bual y Los Pequeníos, de Villayón. La escuelina rivadense dispón de dos unidaes y 31 places, ente que les otres cuatro consten d’una unidá y 18 places.

    Por proximidá xeográfica, les escuelines de Panes y Colombres van compartir dirección, mesmo que les de Bual y Villayón. La de Trevías va tener la so propia directora. Eses trés places axudicáronse na primer convocatoria d’interinos, celebrada’l pasáu llunes.

    Amás, la Dirección Xeneral d’Empléu Públicu contrató yá a doce técniques d’educación infantil (TEI) pa estos cinco centros. En Colombres van trabayar cuatro educadores, al disponer de dos unidaes, y nes otres cuatro escuelines/escolías, dos.

    En cuanto al restu d’escuelines/escolías que componen la primer fase de la rede, van inaugurase mientres el cursu escolar 2024-2025, a midida que vaigan rematando les obres de construcción. Ello ye que la intención de la conseyería ye que mientres el mes d’ochobre puedan inaugurase otros trés: La Veiga, de Sotu (Sotu’l Barcu); La Cuevona d’Avín, de Benia (Onís), y Os Ferreiríos, de Santalla (Santalla d’Ozcos).

    De los 31,15 millones reservaos pa Les Escuelines/As Escolías, 24,57 millones van destinase a sufragar la gratuidá total de la matrícula. D’esta forma cumple’l compromisu del presidente asturianu, Adrián Barbón, pa esti nuevu cursu escolar, ratificáu pola conseyera d’Educación, Lydia Espina. Los 6,68 millones restantes van emplegase en poner en marcha esta rede autonómica.

    La gratuidá total remata un procesu de bonificación progresiva de les matrícules del primer ciclu d’Infantil en función de les rentes de les families. El presupuestu autonómicu de 2023 yá incluyía una partida de 21,3 millones pa eximir del pagu a families con rentes inferiores a los 42.000 euros, lo qu’estendió la gratuidá al 75% de los usuarios.

  • Desconvócase la fuelga d’educación y vuelve a escena la negociación de meyores na enseñanza pública

    Desconvócase la fuelga d’educación y vuelve a escena la negociación de meyores na enseñanza pública

    El Gobiernu d’Asturies y les organizaciones sindicales alcordaron güei desconvocar la fuelga del profesoráu de los centros educativos públicos prevista pal 10 de setiembre. A cambéu, va volver a entamar la negociación del Alcuerdu pa la meyora de la enseñanza pública, cola inclusión d’una clausa pa estudiar l’amenorgamientu de la xornada del profesoráu mayor de 55 años a partir de la próxima llexislatura. La desconvocatoria decidióse mientres la segunda xunta del comité de fuelga, de casi cinco hores de duración.

    Dambes partes roblaron esta tarde un documentu nel que se comprometen a retomar les conversaciones sobre’l mentáu alcuerdu y a sometelu a votación nel senu de la Mesa Xeneral de Negociación de l’Alministración del Principáu d’Asturies. La cita va ser el próximu miércoles y la convocatoria va unviase güei mesmu, n’apenes 24 hores, cumpliendo col compromisu qu’adquiriera la conseyera colos sindicatos.

    Esk alcuerdu –qu’empezó a axustase’l pasáu 17 de xunetu- inclúi una propuesta p’amenorgar la carga lectiva del cuerpu de maestros a 23 hores selmanales. Esta midida supón la contratación de 486 nuevos docentes, a partir del cursu 2026/2027, y una dotación añal de 23,5 millones.

    Tamién contempla dos grupos de trabayu pa modificar el resolvimientu de 6 d’agostu de 2001 -que va dexar ameyorar la organización interna de los centros- y pa simplificar la xera alministrativa del profesoráu. A lo último, figura’l compromisu de camudar l’aplicación informática de xestión SAUCE, con un costu de 3 millones.

    Amás d’eses midíes, el gobiernu aceptó güei incluyir una nueva cláusula nel citáu alcuerdu. En concretu, consiste en “la creación d’un grupu de trabayu p’analizar conxuntamente coles organizaciones sindicales integrantes de la Xunta de Personal Docente non Universitariu la implantación, nel cursu 2027-2028, del amenorgamientu d’hores lectives pa los mayores de 55 años qu’empresten los sos servicios nos centros docentes públicos non universitarios dependientes de la Conseyería d’Educación”. A cambéu, los sindicatos roblaron la desconvocatoria de la fuelga.

    Otres iniciatives yá alcordaes

    Dende l’entamu de la presente llexislatura, l’Executivu aprobó yá la concesión de cuatro díes d’asuntos propios pal profesoráu, rebaxa progresiva de les ratios d’alumnáu per aula dende esti cursu, el plan d’amenorgamientu de medies xornaes o la introducción del asturianu y l’eonaviegu n’Infantil, a partir del cursu 2025/2026. Esta última midida trai la contratación d’un centenar de docentes con una inversión añal de 5 millones.

    De salir alantre la nueva propuesta de la conseyería, el gobiernu dispondría otros 26,5 millones adicionales, lo que supondría la mayor inversión educativa de la hestoria aprobada nun solu alcuerdu.