Xixón al día

Etiqueta: Ana González

  • Xixón va tar presente nel Congresu Européu de Gobiernos Locales

    Xixón va tar presente nel Congresu Européu de Gobiernos Locales

    L’alcaldesa de Xixón, Ana González Rodríguez, participa como ponente nel 8º Congresu Européu de Gobiernos Locales qu’entama’l Foru Económicu y l’Institutu d’Estudios del Este en Polonia.

    La ciudá de Mikolajki va ser mientres dos díes sede de más de 120 alderiques so la temática «Nueva Solidaridá na Nueva Era», y cuenta con más de 2.000 autoridaes y representantes d’organizaciones de toa Europa, principalmente de los países del Este, destacando la presencia d’autoridaes d’Ucraína y d’alcaldes y alcaldeses de Bélxica, Italia, Austria, Alemaña y Noruega, ente otros.

    González Rodríguez ye la única representante de ciudaes españoles y va tomar parte esta tarde na mesa redonda «El sistema educativu a nivel local y comuñal, ¿cómo ameyorar la calidá de la educación?». Va Tener una intervención especial sobre la Implantación de polítiques d’igualdá a nivel local por cuenta de la celebración del Día Internacional de la Muyer.

    Cabo señalar que’l Congresu Européu de Gobiernos Locales ye una plataforma d’intercambiu y d’alcuentru d’autoridaes locales y rexonales, representantes de gobiernos centrales, ONGs y empreses.

    Consagróse como unu de los eventos de referencia y alderique sobre problemátiques locales a nivel européu. Esta octava edición en concretu, foi definida como’l «Davos Polacu» per dellos medios de comunicación como The Economist o Forbes acorde al nivel de les ponencies, les persones asistentes y les conclusiones que se llograron n’anteriores alcuentros.

  • «Va haber branu, pero nun va ser el branu de siempre»

    «Va haber branu, pero nun va ser el branu de siempre»

    Xixón cuntará con programación festiva esti branu, pero nun se paecerá al d’otros años. L’andanciu de coronavirus, que caltién confinada en casa a la población de tol país, ta echando per tierra la programación festiva prevista pol Conceyu. Delles comisiones de festexos de la ciudá, como les de Castiello y Xove, anunciaron yá hai días la cancelación de les sos fiestes. Esti llunes foi’l turnu del equipu de gobiernu de la ciudá.

    L’alcaldesa de Xixón dio les primeres pistes sobre la programación festiva del branu na ciudá. Nun mensaxe en videu difundíu nes redes sociales, Ana González quixo dexar claro que «va haber branu, pero nun va ser el branu de siempre». L’equipu de gobiernu de la ciudá trabaya nel diseñu d’una programación festiva adaptada a l’actual situación de crisis sanitaria pol andanciu de Covid-19.

    González Rodríguez aseguró que’l branu de 2020 va tar marcáu pol procesu de «desescalada» y anticipó que va celebrase la nueche de San Xuan, pero non de la mesma manera. Tamién se caltién la fecha del 14 d’agostu como «la noche más importante pa Xixón. «Tamos trabayando n’otros formatos que nos permitan repartir los actos en distintos escenarios pola ciudad», detalló. El Conceyu nun escarta, incluso, recurrir al «formatu d’autocine» pa entamar dellos actos.

    Lo que sí queda fuera del programa de festexos pa esti añu ye’l festival aéreu. L’eventu, qu’esti añu celebraría la so XV edición, ye unu de los actos más multitudinarios de la ciudá. «Ye una actividá que reunía a unes doscientes mil persones nel Muru y nun podemos facer eso».

     

  • La Policía Local pieslla 20 bares en Xixón

    La Policía Local pieslla 20 bares en Xixón

    Los axentes de la Policía Local de Xixón propunxo yá para sanción a más d’una ventena de locales d’hostelería que se negaben a pesllar les sos puertes. Les sanciones parten de los 3.000 euros. El Gobiernu asturianu alcordó ayeri’l pieslle de tolos bares y restoranes del país como midida pa frenar l’andanciu de coronavirus n’Asturies. Tolos efectivos de la Policía Local atópense patrullando les cais de la ciudá pa garantizar el cumplimientu del pidimientu de nun salir a la cai. L’alcaldesa de Xixón, Ana González, llama a la ciudadanía a quedase en casa. «La meyor manera de frenar l’andada del coronavirus ye quedanos toos en casa”, señaló.

    El Conceyu de Xixón decidió esta mañana la gratuidá del serviciu d’autobuses urbanos. La frecuencia de les llínees va amenorgase al 40% a partir del llunes. Asina, daráse prioridá a les zones onde s’alluguen centros de trabayu, como l’Hospital de Cabueñes y los polígonos. Mientres esti fin de selmana, los servicios d’EMTUSA son los mínimos correspondientes a un domingu. La entrada y salida de los autobuses va realizase poles puertes traseres y van dexase llibres los asientos de les zones más cercanes al conductor para caltener la distancia de seguridá. Los autobuses van detenese, por defectu, en toles paraes, pa que de esta forma nun sía necesariu solicitala. Los autobuses van desinfestase a diariu.

    Los centros municipales ciérrense definitivamente. L’atención ciudadana y el rexistru va realizase namás per vía telefónica y telemática, sacante n’Antigua Pescadería Municipal, onde se va riquir cita previa telefónica. Tamién se suspendieron los servicios d’arriendu de bicicletes y patinetes, que yá empezaron a retirase de les cais.

     

  • L’alcaldesa desmiente que Xixón vaya celebrar ‘bautizos civiles’

    L’alcaldesa desmiente que Xixón vaya celebrar ‘bautizos civiles’

    L’alcaldesa de Xixón refugó esti martes la posibilidá de que la Casa Conceyu celebre los nomaos bautismos civiles. En declaraciones a los medios de comunicación, Ana González aseguró nun tener intención d’incluyir la celebración de ceremonies d’otorgamientu de carta de la ciudadanía nel Reglamentu de Llaicidá. «Esta propuesta nun sal en nengún documentu del PSOE nin d’IX nin hai nenguna propuesta conxunta», aseguró.

    Ana González refirióse d’esta manera a les informaciones publicaes pol diariu El Comercio sobre la ellaboración d’un Reglamentu de Llaicidá. Esta normativa, incluyía nel pactu de gobiernu ente PSOE ya Izquierda Xunida, inspiraríase na regulación de Rivas Vaciamadrid, que contempla la celebración de bautismos civiles.

    «El desendolcu de la llaicidá na ciudá nun significa tomar ritos relixosos de modo civil. Nun falamos d’eso», esplicó l’alcaldesa. La primera edil espresó’l «másimu respetu» a caúna de les confesiones relixoses, pero aseguró qu’esta regulación quier «separtar les creencies personales de la sociedá civil».

  • El Sporting entama’l caltenimientu d’El Molinón col pintau de les puertes

    El Sporting entama’l caltenimientu d’El Molinón col pintau de les puertes

    El Sporting va empezar les obres de caltenimientu del estadiu d’El Molinón col pintau de les puertes. Ye ún de los alcuerdos algamaos nel conceyu ente l’alcaldesa de Xixón, Ana González, y el conceyal de Deporte, José Ramón Tuero, col presidente y el vicepresidente del club, Javier Fernández y Javier Martínez, respectivamente. Nel alcuentru, falaron ente otres cuestiones, del caltenimientu y del estáu del estadiu.

    Per parte del club informóse al Conceyu de la detección de problemes estructurales nel estadiu, desque la obra foi apurrida pola concesionaria, en 2012. La entidá comprometióse a redactar un informe pa que seya analizáu pol Conceyu y tomar les midíes oportunes. A lo último, el Conceyu treslladó a la directiva del Sporting el so prestu pol cambéu na política de fichaxes, recuperando xugadores de la cantera.

  • Aurelio Martín asumirá Movilidá y Mediu Ambiente

    Aurelio Martín asumirá Movilidá y Mediu Ambiente

    Aurelio Martín va asumir les competencies de Movilidá y Mediu Ambiente. El representante de Xixón por la izquierda va asumir esta nueva conceyalía dempués d’algamar un alcuerdu de gobiernu col PSOE. L’alcuerdu tien de ser ratificáu’l 26 de xunetu en votación presencial n’agrupación llocal d’Izquierda Xunida.

    El documentu alcordáu contempla que l’edil de la coalición formada por Izquierda Xunda ya IAS asuma la responsabilidá en materia de preservación del mediu ambiente, urbanu y rural, protección de la naturaleza y recuperación de la zona costera. D’esta manera, Martín responsabilizaráse de la finalización del Plan de Xestión de Borrafes del conceyu. L’edil tamién va asumir les cuestiones venceyaes a la planificación y la xestión de la movilidá. Amás, incorporaráse como vicepresidente d’Emtusa y la Empresa Mista de Tráficu y presidente del Centru de Tresportes.

  • L’alcaldesa de Xixón xúbese’l sueldu

    L’alcaldesa de Xixón xúbese’l sueldu

    El sueldu de l’alcaldesa de Xixón va xubir hasta los 67.529 euros. L’incrementu de les retribuciones previstu pol nuevu equipu de gobiernu tamién va beneficiar a los conceyales lliberaos, que van pasar a ingresar 6.600 euros más que na pasada llexislatura. Ye la propuesta de la nueva responsable de Facienda, Marina Pineda. De salir alantre, el sueldu de la primer edil va medrar hasta los 67.529 euros, 2.584 euros más de los 64.945 qu’ingresaba Carmen Moriyón.

    El sueldu de l’alcaldesa de Xixón nun va ser l’únicu que xuba. Los ediles lliberaos tamién van ver incrementada la so asignación. De 52.073 euros brutos al añu a cerca de 58.000. Nel casu de les lliberaciones parciales, los asignaciones van pasar de los 39.000 a los 43.000 euros. Esta decisión llega depués de dos mandatos colos sueldos conxelaos. La intención agora ye que los conceyales lliberaos de cada grupu políticu vean ameyoraes les sos condiciones pa equiparase coles d’un director xeneral.

    «Supón un mui mal entamu del mandatu», llamenta Yolanda Huergo

    La propuesta de xubida de los sueldos de los conceyales va salir previsiblemente alantre al cuntar cola única oposición de Podemos-Equo. Les tres representantes de la coalición soscribieron un compromisu éticu qu’inclúi la llimitación salarial. «Supón un mui mal entamu del mandatu», aseguró Yolanda Huergo, vocera de la coalición.

    No que sí parez que va haber alcuerdu ye nel repartu de les lliberaciones. El Conceyu tien llimitaes a 18 el total de lliberaciones a repartir ente los conceyales del Plenu. El PSOE va quedase con diez d’elles, dos van corresponder a Ciudadanos como primer fuercia de la oposición, el restu de grupos van quedar con una caún.

  • L’asamblea d’IX afita’l ‘sí’ a la investidura d’Ana González

    L’asamblea d’IX afita’l ‘sí’ a la investidura d’Ana González

    L’asamblea d’Izquierda Xunida (IX) afitó na tarde del xueves el sí de la coalición a la investidura d’Ana González. El conceyu, que cuntó cola presencia de 97 persones acreditaes, sofitó por unanimidá la propuesta. D’esta manera, Aurelio Martín, l’únicu conceyal col que va cuntar la formación na Casa Conceyu, va apoyar la candidatura de la socialista Ana González a la investidura.

    La sintonía ye plena ente dambes fuercies. Esta selmana, PSOE ya IX ficieron públicu un manifiestu conxuntu nel qu’amosaben el so compromisu de trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista.

    La candidata socialista nun va algamar, salvo sorpresa d’última hora, la mayoría absoluta nel Plenu d’investidura. El sí afitáu pola asamblea d’IX nun-y da a Ana González los votos suficientes pa salir escoyida en primer votación. La socialista nun va cuntar col sofitu de les tres conceyales de Podemos-Equo. La coalición anunció esta selmana la so decisión d’astense. La candidatura lliderada por Yolanda Huergo plantegó al PSOE un decálogu de midíes sobre les que trabayar, pero «los socialistes respondieron postponiendo les conversaciones».

  • PSOE ya IX van alcordar un programa de gobiernu conxuntu

    PSOE ya IX van alcordar un programa de gobiernu conxuntu

    Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

    González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

    Ana González destaca que l’equipu de gobiernu va trabayar «dende la izquierda»

    Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

    Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.

  • Álvaro Muñiz: «Ana González va tener la oposición que Moriyón nun tuvo»

    Álvaro Muñiz: «Ana González va tener la oposición que Moriyón nun tuvo»

    Foru va llevar a cabu una una «oposición lleal» en Xixón. Álvaro Muñiz tresmitió-y a Ana González que la so formación va tener «la oposición que Carmen Moriyón nunca tuvo: rigorosa y cola mano tendida siempres al diálogu y los alcuerdos». Fízolo mientres un conceyu col Comité Negociador del PSOE de Xixón, que calificó de «cordial y constructivu».

    Muñiz añadió que «Foru, como únicu partíu que gobernó esta ciudá amás del PSOE, va liderar l’alternativa». Aseguró nun compartir «el modelu de los socialistes», pero reconoció «que ye l’escoyíu democráticamente polos xixoneses». Anunció que la formación nun va presentar candidatu a l’Alcaldía y va abstenese na investidura d’Ana González. «Ye un xestu qu’esperamos seya recibíu como una invitación a esi diálogu, esa llealtá institucional que Carmen Moriyón, por desgracia, nunca esfrutó”. Muñiz añadió, amás, que «el trespasu de poder va ser tresparente, llimpio, y sobremanera, lleal a los intereses de tola ciudá».

    Muñiz acudió al conceyu acompañáu polos tres conceyales que van representar a la formación na Casa Conceyu: Jesús Martínez Salvador, Ana Braña, y Rubén Hidalgo. Hai que recordar qu’Álvaro Muñiz renunció al acta de conceyal. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó entós. Y detalló que la so decisión taba motivada pol deséu de que’l númberu cuatro de la llista, Rubén Hidalgo, ocupara un asientu nel Plenu.