La UP del Ayuntamientu de Xixón ta acabante de dar anuncia de los nuevos cursos que va ufiertar nos próximos meses, ente los que se pueden alcontrar propuestes pa deprender l’idioma asturianu o pa deprender a facer radioteatru n’asturianu.
Cursu d’asturianu
L’actividá va desenvolvese nel Centru Integráu de L’Arena del 15 de febreru al 31 de mayu dos veces per selmana: llunes y miércoles, de 19:30 a 21:00. El profesor d’esti cursu va ser Inaciu Galán, escritor, profesor, periodista, xestor cultural, realizador y cuando toca, otres coses. Trabayó en medios como la SER y dende 2007 presenta programes na TPA, como Xente de casa o Mundu Sidreru, y en RPA, Sentir Asturies o Asturies 81:21, la hora de l’autonomía. Fundó Iniciativa pol Asturianu y la revista lliteraria Formientu. En 2017 punxo en marcha Cuatro Gotes Producciones. Ye doctor pola Universidá d’Uviéu cola tesis “La llingua asturiana nel Franquismu”. Dende 2022 ye miembru de númberu de l’Academia de la Llingua Asturiana.
Nesti cursu va facese una introducción a la llingua asturiana dende’l nivel más básicu, apurriendo conteníos gramaticales, vocabulariu, ortografía, exercicios pa trabayar la oralidá y conteníos culturales complementarios. El cursu quier sirvir mesmo p’aquelles persones que tienen l’asturianu como llingua familiar y quieran afondar na alfabetización, como pa persones que partiendo de cero quieren averase y garrar les primeres capacidaes comunicatives nel idioma, mesmo pero escrito que de forma oral.
Cursu de radioteatru n’asturianu
L’actividá va desenvolvese nel Centru Integráu de L’Arena del 15 de febreru al 8 de mayu dos veces per selmana: llunes y miércoles, de 17:30 a 19:00. El profesor d’esti cursu va ser Sergio Buelga, monitor d’ociu y tiempu llibre, d’aniamación sociocultural y d’educación ambiental, desempeñándose nestes xeres dende l’añiu 2000. Dende xunu de 2020 lleva la marca La Buelga, Animación y Cultura, especializándose n’actividaes de cultura tradicional asturiana y artes escéniques, vehiculaes n’idioma asturianu. Amás, ye l’actual direutor escénicu de la Compañía Asturiana de Comedies, grupu onde actúa dende’l 2004. Estrenó varies pieces de microteatru, sainetes y diálogos, amás de delles obres de llarga duración: La máquina de retratar (2016), Les fiestes de guardar (2017), El faru (2019) y ¡Milagru! (2022). La so propuesta Los tus amigos nun t’olviden convirtióse nel curtiumetraxe Menos llobos, d’Adolfo Camilo Díaz.
Pa matriculase nesti cursu hai que tener conocimientos previos. Esti cursu va poder tener variaciones d’horariu en dalgunes sesiones pa facer salíes. El radioteatru ye un xéneru dramáticu qu’amiesta les téuniques de les llectures dramatizaes coles ferramientes de la radiodifusión. Entama a primeros del sieglu XX, cuando la radio ye’l principal mediu de comunicación de mases, como un mediu d’apurrir espacios afayadizos pa un públicu que reclama conteníos culturales y d’entretenimientu. N’Asturies, tal fechu prodúzse mui llueu, cola incorporación a la emisora EAJ-34 d’un grupu artísticu procedente de delles compañíes de Teatru Popular Asturianu y consolidaráse con figures de la importancia de Juan José Plans. Anguaño, el radioteatru yá nun depende tanto de les emisores radiofóniques al xeneralizase un formatu más democráticu d’asoleyamientu, el podcast dixital, que permite fórmules más personales y particulares d’espresión dramática. Nesti taller analizaránse les diferentes formes históriques del xéneru, parando en la realización de los testos, la direición escénica y les téuniques d’interpretación, locución y grabación de conteníos dramáticos. La finalidá ye ufrir un conocimientu xeneral del xéneru dramáticu denomináu radioteatru, empobinándolu a la realización de podcast.
