L’Ayuntamientu de Xixón concedió’l premiu Xixón Ciudá Defensora de los Derechos Humanos al grupu de muyeres del pueblu indíxena Embera Dóbida de Colombia.
Reconoz d’esta miente el papel de les muyeres integrantes de l’Asociación d’Autoridaes Indíxenes Ancestrales del baxu Atrato (ASOAIBA) na defensa de la so identidá territorial y de los sos recursos naturales énte la presencia d’actores armaos qu’amenacien el desenvolvimientu de la vida cotidiana de la población y de la so actividá de autoconsumu venceyada al sector primariu. Nesi sentíu, la comunidá creó la guardia indíxena Urania (‘’formiga’’ en llingua nativa) como autodefensa y 68 muyeres formen parte d’esta organización desarmada, por ello, esti galardón tamién pon en valor la so capacidá pa exercer funciones de lideralgu y fortalecer la so riqueza económico y cultural al traviés de la organización colectiva.
Cabo señalar que’l territoriu colombianu de Embera Dóbida ta asitiáu ente los ríos Cacaria y Salaquí, onde la presencia de compañíes mineres y madereres y l’introducción de cultivos ilícitos alterien les condiciones medioambientales y el mediu natural de la comunidá.
La candidatura del grupu de muyeres del pueblu indíxena de Embera Dóbida pa la primer edición del galardón Xixón Ciudá Defensora de los Derechos Humanos foi presentada por SUATEA. Foi escoyida por consensu del xuráu, presidíu pola concejala de Cooperación al Desenvolvimientu Carmen Saras Blanco, y formáu por representantes de les asociaciones Remar Candás, Pueblu y Dignidá, Solidaridá Médica y Sol de Paz Pachakuti; del Conceyu de la Mocedá, del Conseyu de Muyeres de Xixón/Xixón, de la Federación Vecinal Urbana y de l’Axencia Asturiana de Cooperación al Desenvolvimientu del Principáu d’Asturies; según poles persones integrantes del Conseyu Sectorial pa la Cooperación y la Solidaridá nel conceyu de Xixón/Xixón.
Amás de la galardonada, inscribiéronse les candidatures ‘Programa Asturianu d’Atención a Víctimes de la Violencia en Colombia’ y l’Asociación ACOES pol so llabor educativa y de promoción de la salú en moces ensin recursos y otros grupos vulnerables n’Honduras.
