Xixón al día

Etiqueta: Cimavilla

  • Claudio Alvargonzález y el Tránsitu de les Ballenes van ser piatonales dende’l llunes

    Claudio Alvargonzález y el Tránsitu de les Ballenes van ser piatonales dende’l llunes

    La piatonalización de la cai Claudio Alvargonzález y Tránsitu de les Ballenes va empezar a aplicase’l llunes. El diseñu final, qu’implica la reordenación de los accesos y el tráficu en dos calles del barriu de Cimavilla, incorpora dalgunes de les demandes de les Asociación Vecinal Gigia. Nesti sentíu, va permitise la salida de vehículos de residentes pol Tránsitu de les Ballenes únicamente de llunes a vienres sacante ente les seis de la tarde y les dos de la madrugada. Nun se va permitir ente eses hores nin los fines de selmana y festivos, cuando se preve mayor arribación de persones nos meses de branu. Asina mesmo, la velocidá máxima va ser de 20 quilómetros per hora. El control d’accesu va realizase al traviés del sistema de cámares yá esistente.

    D’esta miente, el Conceyu de Xixón garantiza la seguridá piatonal al empar que caltién una salida del barriu pa residentes nel horariu de mayor movilidá motorizada, concentrada nes primeres hores de la mañana especialmente. La midida, anunciada hai delles selmanes va caltenese, polo menos, hasta’l 30 de setiembre. A partir d’esa fecha va ser evaluada p’analizar la so posible continuidá nel tiempu.

    La Conceyalía de Mediu Ambiente y Movilidá comprometióse colos vecinos a enllantar otres midíes complementaries qu’ameyoren la movilidá nel barriu. Asina, el Conceyu va establecer que Cimavilla sía Zona de Prioridá Residencial y va habilitar aparcamientu esclusivu pa residentes, posibilidaes que se recueyen na nueva Ordenanza Municipal de Movilidá anguaño a alderique en Comisión. Tamién se va llindar l’horariu de carga y descarga. Coles mesmes van revisase les tarxetes de residentes, permisos nocherniegos y VAOS. Amás, va habilitase la salida en dos direcciones nel aparcamientu de la cai Emilio Muñiz ‘El Negru’ y van instalase paneles informativos sobro la so ocupación nes dos entraes al barriu.

  • L’Estáu d’Alarma retrasa dos meses el fin de les obres de Tabacalera

    L’Estáu d’Alarma retrasa dos meses el fin de les obres de Tabacalera

    La Xunta de Gobiernu, axuntada esta mañana de forma telemática, dio lluz verde a l’ampliación del plazu d’execución de les obres de l’Antigua Fábrica de Tabacos de Cimavilla. Foi la empresa axudicataria, UTE Tabacalera, la que lo solicitó’l pasáu 15 d’abril. La finalización d’estos trabayos taba prevista pa esta fecha, magar que nun foi posible por mor de l’actual crisis sanitaria. Esta situación alterió’l ritmu de los trabayos por cuenta de la adopción de nueves midíes de seguridá y dificultó l’abastecimientu de suministros de materiales y maquinaria.

    Les obres tamién se vieron afectaes pol cese de les actividaes non esenciales dende’l 30 de marzu al 9 d’abril y la esistencia de ciertos trabayos n’antigua Vicaría pendientes d’aprobación pola Conseyería de Cultura. La Xunta de Gobiernu entiende que l’ampliación del plazu d’execución «ta xustificada». D’esta manera, el plazu va ampliase por 2 meses y 15 díes, afitando la fecha de finalización de la obra’l 13 de xunetu de 2020.

    La Xunta de Gobiernu aprobó, amás, una partida de 80.565,67 euros pa la supresión de barreres arquitectóniques en cuatro comunidaes de vecinos. En dos de los edificios va sovencionase la instalación d’un ascensor. Nos otros dos casos el presupuestu va destinase a baxar l’ascensor a cota de cai. Amás, aceptóse’l desistimiento de la subvención nominativa de Expoacción Organización Solidaria pal proyectu Vacaciones en paz 2020. La entidá presentó un escritu onde esplicaba qu’esti proyectu nun va poder llevase a cabu na so totalidá debíu les midíes del estáu d’alarma.

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • Tornen les visites guiaes n’asturianu col ciclu XixónTours

    Tornen les visites guiaes n’asturianu col ciclu XixónTours

    Tornen les visites guiaes n’asturianu de XixónTours. Tres l’ésitu de la iniciativa esti iviernu, la plataforma d’información sobre ociu y turismu VerAsturies y Cuatro Gotes Producciones retomen esti branu’l ciclu de visites guiaes temátiques n’asturianu. XixónTours ye una iniciativa pa dar a conocer Xixón a los propios habitantes del conceyu y a los asturianos en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu. 

    Les visites guiaes n’asturianu de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente. Les visites d’esta segunda edición del ciclu XixónTours diseñáronles espertos nes cuestiones trataes en caúna de les temátiques de les mesmes, como Arantza Margolles, Daniel García de la Cuesta ya Inaciu Galán. Nesta ocasión van volver a facese trés rutes temátiques: 

    Xixón mete mieu. Vienres 14, 21 y 28 a les 22 hores.

    Una ruta que va averar a los visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes. Una visita n’horariu nocherniegu pa conocer los sitios más escuros, terroríficos y misteriosos de la hestoria de Xixón. 

    Escritores n’asturianu en Xixón. Sábadu 22 a les 12 hores.

    Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, el conventu de Cimavilla, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Una visita onde lliteratura y hestoria xúntase pa dar a conocer la ciudá.

    Muyeres na hestoria de Xixón. Sábadu 8, 15 y 29 a les 12 hores.

    La muyer, tapecida siempres na hestoria, apruz nesta visita guiada per Xixón. Una visita a la ciudá onde se falará de muyeres importantes na hestoria de la ciudá. Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González… Too ensin escaecer a los colectivos de muyeres anónimes que tanto marcaron el carácter d’esta villa, como les cigarreres y les pescaderes, nin les tradiciones como la de les comadres. Falaráse del papel de la muyer na sociedá, dende la falta de visibilidá hasta llegar a cuntar con alcaldeses. 

    Les visites tienen un costu de 6 euros pal públicu xeneral y 3 euros pa menores de 18 años. Ye obligatorio inscribise na páxina web verasturies.com a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu redaccion@verasturies.com

    El proyectu xestiónalu VerAsturies.com, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.

  • Visita guiada pel Xixón lliterariu

    Visita guiada pel Xixón lliterariu

    Nueva visita guiada solidaria pela ciudá. Turismu Xixón entama un percorríu pel cascu hestóricu de la mano d’escritores qu’escoyeron el barriu como escenariu pa les sos noveles. Atravesando les places más típiques de Cimavilla, dende la plaza’l Marqués, pasando pela Plaza Mayor, la Tabacalera o la Plazuela Xovellanos, vamos escubrir aspeutos del Xixón de la so dómina que van aidanos a comprender un poco más la nuesa hestoria. Los rellatos de Pachín de Melás, José Fernández Barcia, Manuel Vega y Joaquín Alonso Bonet, ente otros, van acompañanos nun paséu nel que Xixón va ser la protagonista auténtica.

    ‘Xixón lliterariu’ ye la propuesta pa esti mes de xunu que forma parte del ciclu de visites guiaes solidaries que Xixón Turismu entama a lo llargo de 2019. Nesti casu, tolo recaudao va detinase al programa de sofitu a la infancia, adolescencia y families en riesgu de dixebra y pobreza n’ España, xestionáu por Ayuda en Acción.

    La visita va realizase tolos sábados del mes (1, 8, 15, 22 y 29 de xunu) a les 12:00h y tien un coste de 5 euros. El puntu d’alcuentru va ser la oficina d’Infoxixón (Fomento). La visita tien una duración aproximada de 2 hores. Ye preciso inscribise previamente llamando al 985 341 771 o escribiendo al corréu lletrónicu: infogijon@gijon.info

  • Visita guiada solidaria pel Xixón Industrial

    Visita guiada solidaria pel Xixón Industrial

    Conocer la hestoria industrial de Xixón y, al mesmu tiempu, collaborar col Centro de Iniciativas, Solidaridad y Empleo (CISE). Ye la propuesta pa mayu que forma parte del ciclu de visites guiaes solidaries que Xixón Turismu entama esti añu.

    La visita empecipia en Fomentu, llugar que sirvió como puertu pesqueru, carboneru ya industrial. El percorríu sigue per Cimavilla y l’antigua Fábrica de Tabacos. Darréu, visítase la Casa Natal de Xovellanos, la plaza Mayor, Campu Valdés y la Escalerona, zona d’espardimientu y de balnearios a finales del XIX. La visita termina na Ciudadela Celestino Solar, ún de los pocos exemplos de vivienda obrera que se caltuvo hasta los nuesos díes y que sirve pa conocer les condiciones de vida de les families obreres de finales del XIX y principios del XX.

    La visita va realizase los díes 18 y 26 de mayu a les doce de la mañana y y va costar cinco euros. El puntu d’alcuentru ye la oficina d’Infoxixón en Fomentu. La duración aproximada de la visita ye de dos hores. Ye preciso inscribise llamando al teléfonu 985 341 771 o escribiendo un corréu lletrónicu a infogijon@gijon.info. Tolo recaudao nes visites va dase al Centro de Iniciativas, Solidaridad y Empleo (CISE).