La Conseyería de Salú va enllargar hasta la fin de selmana l’alerta por fríu de nivel 1 (riesgu baxu) énte les estimaciones de l’Axencia Estatal de Meteoroloxía (Aemet), qu’anuncia temperatures d’hasta -1,7 graos pal vienres n’Uviéu, localidá de referencia. Les previsiones indiquen que les mínimes van superar los umbrales que pueden suponer un riesgu pa la salú de la población especialmente vulnerable, por casu, les persones ensin llar, les que sufren probeza o tienen baxu estatus económicu, les mayores de 65 años y les muyeres gestantes.
Esti nivel d’alerta actívase por segunda vegada anguaño’l pasáu llunes, al baxar les mínimes hasta -2 graos. La midida persigue menguar la morbilidá y les muertes acomuñaes al fríu y ponse en marcha cuando mientres dos díes consecutivos o más se algamaron temperatures mínimes y non habituales que podríen provocar una medría de la mortalidá.
La Dirección Xeneral de Salú Pública monitoriza a diariu les temperatures y les previsiones y vixila la posible medría de mortalidá por una situación meteorolóxica adversa.
Encamientos a la población
Les autoridaes sanitaries inciden na necesidá de curiar a la población más vulnerable al fríu, esto ye, les persones ensin llar y les que sufren probeza o baxu estatus económicu. Otros grupos de riesgu son les persones mayores de 65 años, les muyeres xestantes, los recién nacíos y llactantes, la población con movilidá amenorgada, les desnutríes con escosamientu físicu, los casos d’intoxicación etílica, les que trabayen al campu y les que practiquen deportes al campu en zones fríes.
Tamién aconseyen a la ciudadanía una alimentación variada, qu’incluya diariamente fruta, y qu’inxera líquidos, sobre manera agua y bébores calientes, y evite’l consumu d’alcohol, yá que mengua la sensación de fríu.
Igualmente, Salú Pública realiza los siguientes encamientos sobro cómo actuar n’espacios esteriores:
- Alendar pela ñariz y non pela boca, una y bones l’aire calecer al pasar poles fueses nasales, lo que mengua’l fríu que llega a los pulmones.
- Estremar el precuru en casu de xelu nes cais. Un eleváu porcentaxe de mancadures rellacionaes col fríu tien que ver con cayíes al esnidiar sobre plaques de xelu. Si ye posible, encamiéntase utilizar calzáu antideslizante.
- Tener en cuenta que delles capes de ropa fino protexen más qu’una sola gruesa, al formar cámares d’aire aislante ente elles.
Y en los espacios interiores:
- Nel casu d’utilizar braseros o chimenea, aconséyase ventilar la estancia con frecuencia pa evitar l’acumuladura de CO2.
- Tocantes a la casa, encamiéntase ventilar siquier dos vegaes al día, mientres 15 minutos, p’asegurar la renovación del aire. Coles mesmes, suxérese apagar les estufes eléctriques y de gas mientres la nueche.
