Xixón al día

Etiqueta: DOP Sidra d’Asturies

  • Xunu va ser el mes nel que se sepa si la Cultura Sidrera Asturiana ye Patrimoniu Cultural Inmaterial

    Xunu va ser el mes nel que se sepa si la Cultura Sidrera Asturiana ye Patrimoniu Cultural Inmaterial

    Cultura Sidrera Asturiana yá ye la candidatura oficial del Estáu a Patrimoniu Cultural Inmaterial. El pasu siguiente ye l’aceptación por parte de la UNESCO, depués d’una evolución formal una vegada presentáu en marzu l’informe, lo que se conocerá’l 30 de xunu, abriendo un procesu que s’allargaría hasta’l final del 2023.

    Allegría nel Gobiernu y nel mundu sidreru pola declaración por parte del Conseyu de Patrimoniu Históricu del Ministeriu de Cultura y Deporte de ‘Cultura Sidrera Asturiana’ como la candidatura oficial del Estáu. “Nun puedo más que ratificar la mio satisfaición por tolo qu’implica pal nuesu patrimoniu cultural y pa la identidá asturiana’l fechu de que se reconozan los rasgos diferenciadores de la cultura sidrera y que se promueva la so conservación y difusión”, espresó Berta Piñán.

    La conseyera de Cultura, Política Llingüística y Turismu participó nuna rueda de prensa xunto al conseyeru de Medio Rural y Cohesión Territorial, Alejandro Calvo; el direutor xeneral de Cultura y Patrimoniu, Pablo León; el presidente del Conseyu Regulador de la DOP Sidra d’Asturies, Guillermo Guisasola; y el direutor de la Cátedra de la Sidra de Asturias de la Universidad d’Uviéu, Luis Benito García. León detalló na mesma los pasos a siguir agora cola candidatura, que se va presentar énte la UNESCO enantes del 31 de marzu, “momentu nel que s’abre un periodu de 3 meses nos que va comprobar que formalmentu cumplimos con toles esixencies”, y, d’algamalo, “el 30 de xunu darála por aceptada”.

    Nesi puntu abriríase un procesu que s’allargaría hasta los dos meses últimos del 2023, cuando aconceye’l Comité Intergubernamental de Salvaguarda del Patrimoniu Inmaterial. Sicasí, podría dase la circunstancia de qu’asellargaren los plazos d’haber un importante númberu de candidatures d’otros estaos, porque la UNESCO “dende hai unos años namái evalúa 50 al añu, polo que tar ente eses 50 nun depende yá de nosotros, sinón de cuántes presenten países que tengan poques o nenguna na Llista de Patrimoniu Inmaterial”.

  • La cultura sidrera asturiana, candidata española pa la so inclusión na Llista Representativa del Patrimoniu Mundial Inmaterial de la Unesco

    La cultura sidrera asturiana, candidata española pa la so inclusión na Llista Representativa del Patrimoniu Mundial Inmaterial de la Unesco

    La cultura sidrera asturiana va ser la candidata que va presentar España en marzu de 2022 énte la ONU pa la Educación, la Ciencia y la Cultura (UNESCO) pa la so inclusión na Llista Representativa del Patrimoniu Mundial Inmaterial. El Conseyu de Patrimoniu Históricu Español tomó ayeri esta decisión, a propuesta de la Conseyería de Cultura, Política Llingüística y Turismu del Principáu, na so reunión semestral celebrada en Menorca.

    L’alcuerdu supón un pasu decisivu pa llograr el reconocimientu de la Unesco, dempués de más d’ocho años de trámites que s’aniciaron colos preparativos pa la declaración de la cultura sidrera como bien d’interés cultural inmaterial, recoyida nel decretu 64/2014, del 11 de xunetu. Dempués, el Gobiernu del Principáu constituyó un grupu de trabayu, formáu por representantes de la denominación d’orixe protexida (DOP) Sidra d’Asturies, antropólogos, historiadores y estudiosos, que s’encargó d’ellaborar el espediente técnicu analizao agora pol organismu encargáu de seleccionar les candidatures españoles a patrimoniu mundial inmaterial.

    La so inclusión contribuiría de mou decisivu a esparder el respetu por unes práctiques y tradiciones qu’otorguen sostenibilidá al mundu rural de nueso. El reconocimientu tamién ayudaría a revitalizar les actividaes agraries ligaes a la producción de la bebida y a dinamizar el sector, amás d’impulsar les actividaes turístiques y hosteleres.

    Los argumentos clave que xustificarían la inclusión de la cultura sidrera na llista de patrimoniu inmaterial son los siguientes:

    • La sidra nun ye namás un productu fundamental de la economía asturiana, sino tamién un referente simbólicu, parte consustancia de la identidá colectiva y de una cultura con personalidá propia, diferenciada de les otres zones europees productores.
    • La cultura sidrera inclúi un conxuntu de práctiques vinculaes a procesos de producción, distribución y consumu que se vienen desenvolviendo, al menos, dende l’Alta Edá Media.
    • La sidra favoreció a lo llargo del tiempu rellaciones y vínculos ente un productu de la tierra d’orixe campesín, un territoriu y una población. Desenvolviéronse conocimientos locales y desplegáronse práctiques xeneradores d’espacios de produccción y de consumu que persisten anguaño.
    • L’escanciáu, manera típica y esclusiva de servir la sidra, ye la práctica qu’aporta mayor grao de diferenciación.
    • El conxuntu de práctiques ligaes a la cultura sidrera supón un elementu identificador de lo asturiano y ún de los sos principales emblemes. Amás, estimula la formación y el refuerciu de vínculos sociales que dan pertenencia y continuidá a la comunidá.
    • La cultura de la sidra ye un exemplu de respetu ente individuos, grupos y comunidaes. Tanto nes sos maneres tradicionales como nes adaptaes a los nuevos tiempos, el consumu del caldo rexonal faese de manera comunal y favorez l’alcuentru de persones de procedencies y sectores sociales diferenciaos.
    • La sidra como símbolu y productu de la mazana llévanos a una paisaxe natural cuyo respetu forma parte de la identidá asturiana. Asína, la combinación de tradición y adaptabilidá de la cultura sidrera ta nel exe d’estratexes de desenvolvimientu sostenible.
  • La Sidra d’Asturies, protagonista na primer xornada del International Cheese Festival

    La Sidra d’Asturies, protagonista na primer xornada del International Cheese Festival

    L’International Cheese Festival, l’eventu gastronómicu col quesu como protagonista más importante a nivel internacional, púnxose de llargu esti miércoles nel Palaciu dEsposiciones y Congresos d’Uviéu. Centenares de profesionales del sector lactoquesero de tol mundu empezaron ayeri a exhibir el so productu pa deleite, non solo del xuráu del World Cheese Awards, sino tamién del restu del públicu asistente. 

    Nesta primer xornada, la sidra d’Asturies con Denominación d’Orixe Protexíu llamó l’atención tamién de los focos mediáticos.  El presidente del Conseyu Regulador, Guillermo Guisasola, participó nel brindis inaugural xunto al presidente del Gobiernu d’Asturies, Adrián Barbón; l’alcalde del Ayuntamientu d’Uviéu, Alfredo Canteli; y la directora del Institutu del Quesu, Luisa Vilegas. Un brindis que se realizó con sidra d’Asturies, maridaxe oficial del eventu. “Ye un arguyu pal Conseyo participar de forma tan activa nel International Cheese Festival. Nun podíemos faltar a una cita gastronómica d’esti callibre, yá que sidra y quesu sabe a besu”, indicó Guisasola.

    Primer cata

    Na xornada vespertina, el Conseyu Regulador de la DOP Sidra d’Asturies celebró la primer de les cates programaes. Daniel Ruiz, xerente del Conseyu, y Francisco Martínez, propietariu de la bodega Martínez Sopeña Hermanos fueron los encargaos de falar de les bondaes de la sidra natural filtrada y Espumosa DOP Sidra d’Asturies, énte casi mediu centenar d’asistentes. Xunto a ellos tamién participó Pascual Cabaño, xerente de Rey Silo, quien presentó al públicu la variedá de quesos azules de la so propia marca.

  • La DOP Sidra d’Asturies cellebró, un añu más, la so tradicional ‘Experiencia Cosecha’

    La DOP Sidra d’Asturies cellebró, un añu más, la so tradicional ‘Experiencia Cosecha’

    Un añu más, el Conseyu Regulador de la DOP Sidra d’Asturies cellebró’l so tradicional Experiencia Cosecha. Más d’una decena de periodistes de varios medios de comunicación xeneralistes y especializaos en gastronomía pudieron esfrutar d’una actividá guiada col oxetivu de vivir una esperiencia real de la campaña de recoyida de la collecha de la mazana. Una xornada organizada p’afondar nel conocimientu del productu y les sos raíces, y tamién nel sector agrícola ya industrial del que forma parte la DOP d’Asturies.

    Nesta edición, l’emplazamientu escoyíu foi una plantación en La Reguera (Noreña). Blas Alonso y so pá -propietarios del terrenu- guiaron a tolos periodistes asistentes per una pomarada que supera los 15.000 metros cuadraos, y que produz más de 23 tonelaes de mazana al añu. Dambos esplicaron cómo se produz la recoyida de variedad en plantación en semienano, les particularidaes de cada campaña, los momentos de la recoyida según maduración de les mazanes, el so traslláu al llagar y los controles que sobre los mesmos fai’l Conseyu Regulador de la DOP Sidra d’Asturies.

    La Experiencia Cosecha continuó nel llagar Sidra Quelo, en Tiñana. Los hermanos Fanjul, Alberto y Gonzalo esplicaron la recepción de la mazana en mazanu, cómo se fai’l procesu de selección y el so prensáu. La visita remató con una cata del productu y una espicha regada por Sidra DOP y acompañada por productos asturianos.

  • Sidraturismo Asturies homenaxea a les 35 empreses adheríes al Club de Productu

    Sidraturismo Asturies homenaxea a les 35 empreses adheríes al Club de Productu

    Sidraturismo Asturias fizo entrega, esta mañana, de los distintivos qu’acrediten a 35 empreses de la rexón como miembros del Club de Productu Sidraturismo Asturies. L’actu tuvo llugar na Sala de Xuntas de la Universidá Llaboral, y cuntó coles intervenciones d’Ana Soberón, en representación de l’Asociación Clúster de Empresarios de Turismo Rural d’Asturies; el presidente de la DOP Sidra d’Asturies, Guillermo Guisasola; per parte de la Sociedá Pública de Xestión y Promoción Turística y Cultural del Principáu d’Asturies SAU, Graciela Blanco; y el director de Sepinum, Julio Grande.

    Esti proyectu, impulsáu pol Clúster de Turismu Rural y el Conseyu Regulador de la DOP Sidra d’Asturies, tien como oxetivu xuntar al sector sidreru y turísticu al rodiu d’un Club de Productu col fin de promover y difundir la sidra y la cultura sidrera asturiana como recursu turísticu diferenciador. “Güei ye un día importante pa la sidra d’Asturies. A partir d’agora, xunto a les 35 empreses adheríes, vamos impulsar actividaes y programes que-y den valor y visibilidá a la sidra y a Asturies”, destacó Guillermo Guisasola.

    Julio Grande fizo hincapié nel papel que cumple esti caldu na nuestra rexón. “La sidra ye’l productu estrella del catálogu gastronómicu asturianu. Con iniciatives como esta pretendemos sofitar la supervivencia del mediu rural asturianu”. Ana Soberón, pola so parte, agradeció’l compromisu y la implicación de caúna de les empreses adheríes, mientres que Graciela Blanco definió la sidra d’Asturies como “un conxuntu de manifestaciones qu’entendemos indisolubles de la nuestra rexón y un recursu turísticu que nesti proyectu tien más fuercia tovia”.

    Hasta un total de 35 empreses fueron reconocíes nesti actu cola placa acreditativa: Albergue La Yalga, Andolina Tours, Aptos Balcón Real, Casa Carín, La Vieja Pontiga, El Pilpayo, las casonas de Ablanos de Aymar, El Castañiu, Quintes, Mariluz, Xuacu, La Escuela, Cuetu Calter, El Gaitero, las fincas de El Campón y La Barrea, Hostería de Torazo, los llagares Acebal, Herminio, Quelo, Trabanco, Castañón, Cortina, Fran, JR, los apartamentos rurales La Torre y San Félix, Casa de la Montaña, Deporaventura, El Bosque de las Viñas, Gran Hotel Cela, Palacio de Meres, The Old Seaman, La Montaña Mágica y Yeguada Albeitar.

  • La DOP Sidra d’Asturies conquista’l prestixosu Salon Gourmets d’IFEMA, en Madrid

    La DOP Sidra d’Asturies conquista’l prestixosu Salon Gourmets d’IFEMA, en Madrid

    La DOP Sidra d’Asturies tuvo presente, esti llunes, na 34 edición del Salón Gourmets de Madrid. El Conseyu Regulador celebró una preba de sidres naturales espumoses – toes elles cola Denominación d’Orixe Protexida– acompañaes de varios quesos asturianos: los Beyos, Gamonéu y Cabrales; tamién con denominación. L’actu, que cuntó con bastante públicu, causó un gran interés ente los asistentes.
    El Salón Gourmets ta consideráu el mayor eventu dedicáu a los productos delicatesen d’Europa. IFEMA acueye, del 18 al 21 d’ochobre, un intensu programa d’actividaes, ente ellos concursos, degustaciones, presentaciones, show cookings, conferencies, etc.
    L’actu, que se celebró ayeri, enmárcase dientro de les aiciones previes al International Cheese Festival que va celebrase n’Uviéu del 3 al 6 de payares, y en nel que la DOP Sidra d’Asturies va ser el maridaxe oficial del eventu.

  • Mundu Sidreru remata temporada esti xueves con un programa especial con Xosé Ambás

    Mundu Sidreru remata temporada esti xueves con un programa especial con Xosé Ambás

    La tercer temporada remata con una visita al Muséu de la Sidra d’Asturies y la recuperación d’una tradición sidrera con Xosé Ambás y Ramses Ilesies.

    La televisión pública asturiana (TPA) va emitir esti xueves 10 d’avientu a les 23:30 un capítulu especial pa rematar la tercer temporada de Mundu Sidreru, el programa dedicáu a la cultura sidrera, que presenta’l periodista Inaciu Galán. Tres10 capítulos nos que’l programa visitó llagares, dio a conocer l’actualidá de la sidra y elementos de la hestoria y la tradición, l’últimu programa, con unos diez minutos más de duración, va dedicar especial atención a la tradición sidrera dende distintos puntos de vista. 

    El programa, que cunta cola collaboración de la DOP Sidra d’Asturies, ábrese nesti capítulu final con una entrevista col etnógrafu y divulgador de la tradición Xosé Ambás, presentador del esitosu programa Camín de cantares, en TPA.

    Inaciu Galán acércase nesta ocasión el Muséu de la Sidra d’Asturies, un auténticu templu de la cultura sidrera, asitiáu en Nava y que nestos momentos ta peslláu al públicu, pa facer una visita completa cola so guía Delmi Vázquez.

     El momentu más especial del programa va pasar pela más pura tradición sidrera, cola ayuda de Xosé Ambás y Ramses Ilesies, el programa visita un vieyu llagar en desusu dende va más de sesenta años en Tiñana. Ellí, coles dos muyeres que viven na casa y que conocieron el llagar en funcionamientu, vamos ver de cerca’l so testimoniu sobre una tradición poco conocida, la de los “cantares de pisar o mayar”, que s’interpretaben a lo menos nesta zona, nel momentu de la mayanza, cuando se pasaben hores y hores de duru y repetitivu trabayu.

     El programa va tener tamién espaciu pa una nueva receta sidrera del Club de les Guisanderes d’Asturies, que conocen abondo les posibilidaes de la Sidra d’Asturies combinando colos productos asturianos más variaos. 

    El programa va tener tamién un momentu pa falar de la Denominación d’Orixe, posándose nesta ocasión nel llabor de losinspectores del Conseyu Regulador de la Sidra d’Asturies, dientro de los llagares.

    Con esti programa acaba la tercer temporada de Mundu Sidreru, programa producíu por Cuatro Gotes Producciones. Nesta edición pasaron pel espaciu figures como los presentadores Pedro Durán, Ana Francisco, Camilo Sousa o Arantxa Margolles, los cantantes Luis Núñez, Silvia Quesada y Beatriz, el pilotu de rallies Jose Antonio “Cohete” y la escritora Pilar Sánchez Vicente.

    Inaciu Galán, presentador y director del programa, mostróse mui satisfechu col resultáu de la temporada, “paezme que volvimos a consiguir poner en valir la importancia de la cultura sidrera p’Asturies y la necesidá d’enfrentar al futuru dende la garantía que supón una denominación d’orixe”.  Sobre’l programa final muéstrase entusiasmáu, “paezme que tamos énte un capítulu únicu, un verdaderu regalu que nos faen Xosé Ambás y Ramses Ilesies, yá que vamos ver de cerca un testimoniu únicu y que poles edaes de les informantes, Gregoria y Nedi, ye difícil d’atopar yá. Ye un homenaxe a les persones que permitieron tresmitir la cultura sidrera hasta güei y dexanos un patrimoniu únicu que dalgún día, más pronto que tarde, sedrá Patrimoniu de la Humanidá”.

  • Les ventes de sidra con denominación marquen récor históricu

    Les ventes de sidra con denominación marquen récor históricu

    La sidra con denominación d’orixe sigue batiendo récord. La venta de botelles cola ‘etiquetina’ de la DOP Sidra d’Asturies aumentaron un 27% al respective de 2018. En concretu, l’añu pasáu apurriéronse un total de 4.791.000 contraetiquetes, frente a les 3.765.000 del añu anterior. Les ventes de sidra natural esplumosa tamién medró un 14% nun añu, algamando la cifra de 174.000 contraetiquetes. Nuna nota de prensa, la DOP Sidra d’Asturies destaca «el creciente interés del consumidor pola sidra con denominación».

    Mientres la campaña de 2019, destináronse 7.783.515 de quilos de mazana asturiana a ellaborar sidra con denominación. Los llitros potencialmente certificables fueron cercanos a los 6.000.000. Especialmente positivos son los resultados de ventes fuera d’Asturies. La sidra natural tradicional con denominación yá se vende nun 11% nel restu d’España y un 2% a nivel internacional.

    «Les resultancies son bien bones. Aprosimao trece de cada cien botelles de sidra natural tien la garantía calidable y orixe qu’otorga’l Conseyu Regulador, y tán ellaboraes puramente con mazana asturiana con tolo qu’esto trai para los interess económicos rexonales. Esta ye la auténtica Sidra d’Asturies», asegura Daniel Ruiz, xerente del Conseyu Regulador Sidra d’Asturies.

    El Conseyu Regulador de la DOP Sidra d’Asturies ta formáu por 33 llagares y 353 cosecheros que disponen de 948 hectareas destinaes a la producción de 76 variedaes de mazana. La DOP Sidra d’Asturies puede atopase nel mercáu en trés variedaes distintes: la sidra natural d’echar, la sidra natural de nueva espresión (penerada) que sirve en copa ensin necesidá de ser echada; y la sidra natural esplumosa. Esta tercer variedá demuestra que la tradición nun ta reñida cola innovación, llogrando que d’un productu tradicional llógrese unu muncho más sofisticáu.

  • La cultura sidrera yá ye candidata a Patrimoniu de la Humanidá

    La cultura sidrera yá ye candidata a Patrimoniu de la Humanidá

    El Gobiernu asturianu unvió al Ministeriu de Cultura la documentación xustificativa de la propuesta de la cultura sidrera asturiana como Patrimoniu Cultural Inmaterial de la Humanidá. El Principáu completa d’esta miente la fase técnica del procesu que desenvolvió a lo llargo del últimu añu’l comité director para la ellaboración de la candidatura. Les conseyeríes d’Educación y Cultura y Desenvolvimientu Rural dirixieron el trabayu, que ta sofitáu pola Denominación d’Orixe Protexida (DOP) Sidra d’Asturies. Nel comité participaron antropólogos, historiadores, especialistes nel mundu de la madera y técnicos de l’Alministración. El documentu condesa la idiosincracia, el simbolismu y la pluralidá de la cultura sidrera.

    Na documentación técnica unviada al Ministeriu de Cultura descríbese refechamente la cultura sidrera asturiana y faise fincapié nos sos elementos constitutivos, les sos traces identitarios y la so especificidá. L’espediente inclúi un vídeu y un dosier fotográficu de gran calidá. El documentu inclúi tol procesu d’ellaboración de la sidra, dende’l plantíu de pumares al embotelláu. Amás, esplícase cómo na cultura sidrera combínase lo comuñal y la folixa.

    Respaldu social y participación popular

    El documentu, que considera la sidra «ún de los principales iconos d’Asturies», incide nel gran respaldu social llográu pola candidatura. Tamién destaca l’intensu procesu de participación ciudadana. Gracies al llabor de 181 embaxadores de la sidra, recoyóse’l sofitu de 17.697 persones. Nes redes sociales habilitaes rexistráronse hasta xunu cerca de 2.000 siguidores.

    A esti respaldu popular súmase’l sofitu de diverses instituciones, como la Universidá d’Uviéu y la Federación Asturiana de Conceyos. La cultura sidrera tamién recibió’l Moscón d’Oru 2019, otorgáu pola Asociación Amigos de Grau.