Xixón al día

Etiqueta: FSA-PSOE

  • Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    El presidente d’Iniciativa pol Asturianu, Iván Llera, y el vocal de rellaciones institucionales de la organización, Inaciu Galán, aconceyaron esti miércoles con representantes del grupu parllamentariu d’Izquierda Xunida. Dientro del alcuentru, los representantes de la organización de reivindicación llingüística treslladaron a la formación qu’han de ser conscientes de la oportunidá hestórica pa la oficialidá que tenemos ente les manes. Alcontrámonos con una mayoría aritmética pa sacar alantre la reforma estatutaria cola oficialidá y nun podemos desaprovechala, porque nun sabemos si volverá a repitise.

    Anque podemos comprender qu’IX nun tea cómoda teniendo de participar de la toma de decisiones polítiques alloñaes de los sos principios ideolóxicos, pidímos-yos un esfuerciu de xenerosidá y nun dexar pasar esta oportunidá hestórica. La sociedá asturiana nun diba entendelo.  

    IX siempres amosó capacidá de negociar y llegar a alcuerdos nel pasáu, como cuando’l so antecesor políticu aceptó la monarquía pa consiguir una constitución democráctica y más recién, cola so entrada nel Gobiernu d’España, a pesar de les diferencies col partíu mayoritariu, buscando con pragmatismu avances nos sos principios programáticos. Pidimos agora lo mesmo, aplicar esa mesma voluntá d’alcuerdu pa consiguir la oficialidá, un puntu qu’Izquierda Xunida tien ente les sos reivindicaciones hestóriques, y qu’Iniciativa pol Asturianu agradez que llevara siempres por bandera. 

    Les condiciones de la negociación nun son les idónees, pues ta falándose de coses que queden fuera del marcu del Estatutu, pero esta ye la realidá cola que tenemos que trabayar. Ye’l momentu del alcuentru, el diálogu y el pactu, ya Izquierda Xunida nun pue quedar fuera d’él.

    Va una selmana reclamábemos xenerosidá a Foro y güei facemos esti llamáu a Izquierda Xunida pa llograr un alcuerdu sobre la oficialidá. Sabemos que ye un alderique complicáu y nel que toles fuercies tienen que poner del so llau. Esto inclúi tamién a la FSA, el partíu que tien la mayoría parllamentaria, al que-y pidimos un mayor esfuerciu pa xenerar consensu y liderar la reforma estatutaria. El Gobiernu y el presidente Barbón tienen que ser clave en llograr esi alcuerdu de cuatro partíos y 27 diputaos pa cumplir col mandatu constitucional qu’establez la oficialidá pa les llingües propies nel so artículu 3.2. Los demás partíos tán faciendo esfuercios y renunciando a parte de les sos reivindicaciones, y la FSA ha tar al altor tamién y buscar toles víes posibles, incluyendo la posibilidá d’un alcuerdu asimétricu pa la fiscalidá y l’Estatutu.

     

  • Iniciativa pol asturianu reclama a la FSA-PSOE qu’apruebe na Xunta de Portavoces la propuesta p’habilitar xineru pa la oficialidá nel parllamentu asturianu

    Iniciativa pol asturianu reclama a la FSA-PSOE qu’apruebe na Xunta de Portavoces la propuesta p’habilitar xineru pa la oficialidá nel parllamentu asturianu

    Iniciativa pol Asturianu reclama a la FSA-PSOE qu’apruebe na Xunta de Portavoces de mañana na Xunta Xeneral la propuesta p’habilitar xineru nel parllamentu asturianu. Tal como reclamó la organización la selmana pasada facer hábil esti mes na Xunta Xeneral ye la manera de facer posible daveres la reforma estatutaria y la oficialidá.

    “Iniciamos l’añu col compromisu de Barbón d’entamar en 2021 el procesu pa oficializar l’idioma y tamos a 28 d’avientu y tovía nun se sabe nada. Tamos a tres díes de terminar l’añu y nun sabemos nada d’esi compromisu qu’Adrián Barbón adquirió col presidente de l’Academia de la Llingua Asturiana nun conceyu a entamos de xineru de 2021” apuntaron dende la organización.

    Iniciativa pol Asturianu reclamó valentía política y altor de mires a la FSA-PSOE. “Barbón, el Gobiernu d’Asturies y la FSA-PSOE tienen una oportunidá d’oru pa demostrar el so compromisu cola llingua asturiana, cola llibertá y col so propiu programa electoral. Nun podemos siguir dexando pasar el tiempu nin dar vueltes”.

    “Ye un momentu clave pa la oficialidá y apostamos pola apertura del mes de xineru na Xunta Xeneral pa trabayar na reforma estatutaria. Ye’l momentu de dar la cara. A esta decisión d’habilitar xineru tendría que sumase un mayor esfuerciu nel lideralgu nel presidente nesti procesu sentando a los partíos a falar na búsqueda de consensos” rematóse dende la organización.

  • Adrián Barbón: “Ye tiempu d’alcuerdos”

    Adrián Barbón: “Ye tiempu d’alcuerdos”

    “Nun ye tiempu d’alderiques partidistes nin d’estratexes de confrontación». Ye la valoración que’l secretariu xeneral de la FSA y presidente del Principáu, Adrián Barbón, realizó al términu de la xunta de la Comisión Executiva Autonómica que tuvo llugar esti xueves de forma telemática. «La ciudadanía reclama la unidá de los partíos pa lluchar contra’l virus y contra les consecuencies del andanciu. Ye tiempu de xunir esfuerzos y buscar alcuerdos», defendió, al tiempu qu’aseguró que «la FSA-PSOE va dar exemplu”.

    Una xunta na que la dirección de la FSA-PSOE sumóse al duelu pol coronavirus. “Sentimos como propiu’l dolor del pueblu asturianu, que demostró tar al altor d’esti retu”, indicó Barbón, quien pidió sumase al homenaxe a les víctimes. Señaló que la Comisión Executiva Autonómica considera “bien interesante” la propuesta de realizar una alcordanza permanente d’esta pandemia, en forma d’escultura, monumentu o símbolu. «Queremos que los asturianos de güei como sobremanera los de la mañana nun escaezan unos fechos que yá camudaron la hestoria de la humanidá”.

    Barbón aprofió que ye “una forma de recordar a los finaos y de nun baxar la guardia”. El secretariu xeneral de los socialistes aportunó na necesidá de usar de mázcara, caltener la distancia de dos metros y llavar les manes davezu. “Asturies tien que tar al altor y faer tou lo posible para evitar rebrotes”, afirmó. Barbón treslladó la reconocencia de la Comisión Executiva Autonómica de la FSA-PSOE a tolos trabayadores de los servicios esenciales que nestes selmanes tuvieron “al pie del cañón” y que la so llabor foi “clave”. Destacó coles mesmes que la pandemia punxo de manifiestu la importancia d’apostar por un sistema sanitariu “sólidu y robustu financiáu colos impuestos”, y dexó claro que l’esfuerzu nesti capítulu nun ye gastu sanitariu sinón “inversión en salú y vida”.

  • Adrián Barbón, en Lugo: «Asturies y Galicia tenemos de trabayar de la mano»

    Adrián Barbón, en Lugo: «Asturies y Galicia tenemos de trabayar de la mano»

    El presidente del Principáu y ecretariu xeneral de la Federación Socialista Asturiana, Adrián Barbón, participó esti llunes nun actu en Llugo entamáu pol PSOE de Galicia nel que tuvo presente’l candidatu a la Xunta, Gonzalo Caballero. Un alcuentru nel que Barbón aludió a la necesidá de qu’Asturies y Galicia trabayen «de la mano» en tolos ámbitos, y en concretu a la de faer frente al retu demográficu. Barbón xulgó especialmente importante qu’esti capítulu sía agora encetáu dende’l Gobiernu central como «una política global, d’estáu», nel marcu de la vicepresidencia qu’encabeza Teresa Ribera.

    «Gústame falar de retu demográficu, non de drama demográficu, porque ye un retu y pue ganase», indicó Barbón. El presidente del Principáu destacó’l trabayu que n’Asturies se ta faciendo na materia con iniciatives como la creación d’un comisionáu específicu o una comisión na Xunta Xeneral. «Hai un compromisu claru que tamién s’afigura na orientación de los presupuestos de 2020 que a finales d’avientu aprobó’l parlamentu rexonal».

    Barbón concretó dalgunes de les prioridaes qu’emponen l’acción del gobiernu asturianu a la d’encetar el retu demográficu. Destacó l’apueste pol sostenimientu de los servicios públicos, les polítiques d’empléu y l’impulsu de sectores como’l agroalimentariu y el forestal, les bonificaciones fiscales y el compromisu d’acabar colos problemes de cobertoria. Barbón aplaudió’l «enorme trabayu» que ta realizando’l PSOE de Galicia nestos meses y amosóse «convencíu» de qu’esi llabor va vese recompensáu el 5 d’abril. Resaltó, amás, que la converxencia de gobiernos socialistes, n’Asturies, nel restu de comunidaes y tamién n’España, ye la meyor vacuna pa convertir en «irrelevante» a la estrema derecha.

  • Llamedo: «Podemos parece empeñado en desentenderse del futuro de Asturias»

    Llamedo: «Podemos parece empeñado en desentenderse del futuro de Asturias»

    Gimena Llamedo llamentó esti miércoles l’actitú que Podemos ta amosando «nesta fase decisiva de la negociación presupuestaria«. La secretaria d’Organización de la FSA-PSOE pidió a los sos dirixentes que «en llugar d’enanchar les diferencies al traviés de los medios de comunicación amuesen una voluntá real de diálogu y alcuerdu». «Paez que Podemos s’empeña en desabrise del futuru d’Asturies y opta pol cálculu políticu y el tacticismu», señala. Llamedo recuerda que la FSA-PSOE lleva selmanes pidiendo a Podemos que tresllade les sos prioridaes en distintes árees, como ciencia o conectividad, como s’alcordara na última xunta. Esa información nun llegó entá. «Tán ausentes de la negociación por voluntá propia», remarca, nuna actitú que, al so xuiciu, ye «incoerente».

    Llamedo añadió que «dos nun apauten si unu nun quier» y aprofia que los socialistes «vamos siguir buscando l’alcuerdu». Llamedo destacó que, pese al escasu marxe de que dispon el Gobiernu, fíxose un esfuerzu notable por incluyir nel presupuestu aquelles cuestiones que Podemos treslladó como prioritaries. Ente les midíes más relevantes destaca l’impulsu de l’atención bucodental nel tramu de cero a seis años; qu’el 70% de les families asturianes esfruten de bonificaciones totales o parciales nes escueles de cero a trés años, incluyendo la matrícula gratuita pal tercer fíu y siguientes y l’ampliación de la rede. Tamién s’aceptó’l plan de choque p’amenorgar un 75% la espera en dependencia. «Y too ello al empar qu’aumentamos la capacidá d’inversión, reforzamos l’apueste pola ciencia, comprometemos a un apueste decidíu pola igualdá y contra la violencia de xéneru y garantizamos recursos pa financiar ayudes a les empreses y autónomos y pa combatir el paru xuvenil y de llarga duración», asegura.

    La secretaria d’Organización de la FSA-PSOE aseguró tar sorprendía del «cinismu» de Podemos cuando critica por continuista esti proyectu. Hai que recordar que les cuentes de 2019 fueron apautaes ente dambes fuerces. «Cada vez que la FSA-PSOE da un pasu adelantre, Podemos da un pasu tres», diz Llamedo, que ve na actitú de la formación morada «escuses de mal pagador». Llamedo considera que sería «un grave erru» que Podemos persista nuna estratexa de bloquéu.

  • El PSOE tamién s’impon ente los asturianos nel esterior

    El PSOE tamién s’impon ente los asturianos nel esterior

    El PSOE impúnxose tamién nel votu esterior n’Asturies al recibir 2.144 papeletes que sofitaron la so candidatura al Congresu, un 34,3% del total. La coalición de PP-Foru sumó 1.232 papeletes; Xuníes Podemos, 908; Vox, 798; Ciudadanos, 522; Más País, 215 y el Partíu Animalista, 124 votos. Según los datos validaos esta tarde pola xunta electoral, nos comicios del pasáu domingu participaron 6.252 asturianos rexistraos nel censu de residentes ausentes, conocíu como CERA. Nel casu del Senáu, los candidatos del PSOE tamién fueron los que rexistraron el mayor volume de sofitos: Francisco Blanco (2.226 votos), María Fernández (2.258 votos) y Fernando Lastra (1.845 votos).

  • Barbón: «Ye fundamental p’Asturies qu’haya un gobiernu cuanto antes»

    Barbón: «Ye fundamental p’Asturies qu’haya un gobiernu cuanto antes»

    La comisión executiva autonómica de la Federación Socialista Asturiana axuntó esti llunes n’Uviéu pa encetar l’escenariu posterior a les elecciones del 10-P. Un panorama que’l secretariu xeneral y presidente del Principáu, Adrián Barbón, confía en que lleve a un gobiernu estable llideráu por Pedro Sánchez. «Ye fundamental pa España y tamién p’Asturies na midida na que hai cuestiones claves que dependen del trabayu conxuntu col executivu central».

    Barbón fixo una llectura favorable de la resultancia electoral y celebró los datos n’Asturies. Con una participación menor, precisó’l dirixente socialista, el PSOE consiguió amontar el so porcentaxe de votu y caltener los sos trés diputaos y los sos trés senadores. «Seis de los once representantes asturianos nes Cortes Xenerales son socialistes», destacó, añediendo que’l PSOE impúsose en 70 de los 78 conceyos. «Son cifres a poner en valor», aplaudió.

    El secretariu xeneral dexó otros dos mensaxes. Per una parte, amosó’l plenu respaldu de la dirección de la FSA-PSOE al procesu de diálogu qu’abra la executiva federal, con Sánchez al frente, pa formar un nuevu gobiernu que ponga fin al bloquéu. Per otra, cargó con durez contra PP y Ciudadanos, a los que responsabilizó del emburrie de la estrema derecha. «En llugar de tender un gordón sanitariu como se fai nel restu d’Europa, prefirió blanquiar». Barbón dexó claro que los socialistes van caltener una política d’absolutu «refugu y oposición» a una propuesta «contraria a los más elementales principios democráticos».

  • El PSOE gana de nuevu les xenerales n’Asturies y llogra trés diputaos

    El PSOE gana de nuevu les xenerales n’Asturies y llogra trés diputaos

    El PSOE volvió ganar les elecciones xenerales n’Asturies al llograr trés de los siete diputaos y trés de los cuatro escaños al Senáu que se repartíen nel Principáu. Col 100% del votu escrutáu, más del 33% de los asturianos confiaron nel PSOE, un respaldu que supera al llográu nos comicios del pasáu 28 d’abril. La llista que consiguió’l sofitu mayoritariu de los electores d’Asturies ta encabezada pola vicesecretaria xeneral del PSOE Adriana Lastra. Van revalidar amás l’acta de diputada la ministra de Sanidá, Consumu y Bienestar Social en funciones, María Luisa Carcedo, y Roberto García Morréis. Fueron escoyíos senadores socialistes per Asturies Francisco Blanco, María Fernández y Fernando Lastra.

    Ciudadanos queda ensin representación por Asturies, en perdiendo cerque d’un terciu de los sos votantes

    La coalición de PP-Foro meyoró’l so resultáu en más de cinco puntos, lo que-yos permitió sumar un diputáu. Caltienen la representación Xuníes Podemos y Vox, con un diputáu caún. La candidatura lliderada por Sofía Castañón dexó pel camín 19.033 papeletes, pasando del 17,14% al 15,96%. Pela so parte, la formación d’ultraderecha medra unos cuatro puntos, pasando del 11,49% al 15,90%. Queda fuera del Congresu Ignacio Prendes. Ciudadanos perdió cerque d’un terciu de los sos votantes n’Asturies, pasando de 104.688 votos a 36.852.

    El secretariu xeneral de la FSA y presidente del Gobiernu d’Asturies, Adrián Barbón, destacó que la resultancia d’esti 10 de payares suma la tercer victoria del PSOE d’Asturies no que va d’añu: “Los asturianos dixeron alto y claro que la fuerza político na que confíen ye’l PSOE. Somos la federación que meyor resultancia tuvo”, sorrayó, un sofitu que Adrian Barbón venceyó a “que’l PSOE ye’l partíu que meyor conecta cola sociedá asturiana”.

    El llíder de los socialistes asturianos pidió amás a tolos partíos constitucionales que tengan altor de mires: “Quiero llanzar un mensaxe evidente al conxuntu de partíos: tienen una enorme responsabilidá para desbloquiar la situación”, encamentó Adrián Barbón énte la configuración del arcu parlamentariu que dexen les resultancies de los comicios del 10 de payares.

  • Adrián Barbón, nuevu presidente d’Asturies

    Adrián Barbón, nuevu presidente d’Asturies

    Adrián Barbón foi escoyíu esta mañana nuevu presidente d’Asturies. La candidatura del socialista foi sofitada, en segunda votación, por 22 votos, los de los venti diputaos de la FSA-PSOE y los dos d’Izquierda Xunida. Barbón agradeció’l sofitu de la cámara y de los asturianos y comprometióse a llevar a cabu una «xestión cercana, rigurosa y seria». «Trabayar, trabayar y trabayar: nun conozo otra receta», destacó na Xunta Xeneral. Valoró la «ilusión» del cambéu de ciclu políticu y deseyó «tar al altor de los predecesores»

    Adrián Barbón ye’l novenu presidente d’Asturies na so actual etapa democrática. Asocede asina a Rafael Fernández, el primer presidente, na etapa preautonómica, ente 1978 y 1983. Los siguientes presidentes del Principáu fueron Pedro de Silva, Juan Luis Rodríguez-Vigil, Antonio Trevín, Sergio Marqués, Vicente Álvarez Areces, Francisco Álvarez-Cascos y Javier Fernández.

    Adrián Barbón, nacíu’l 4 de xineru de 1979 en Llaviana. Foi nueve años alcalde de Llaviana, diputáu nel Congresu en 2015 y presidente de ACOM. Dende ochobre de 2017, secretariu xeneral de la Federación Socialista Asturiana (FSA-PSOE).

  • Marcelino Marcos, nuevu presidente de la Xunta Xeneral

    Marcelino Marcos, nuevu presidente de la Xunta Xeneral

    Marcelino Marcos foi escoyíu esti llunes nuevu presidente de la Xunta Xeneral. La candidatura del diputáu socialista, la única presentada, algamó la mayoría abosluta. Marcelino Marcos cuntó colos votos a favor de los venti diputados de la FSA-PSOE, los cuatro de Podemos y los dos d’Izquierda Xunida. La tamién socialista Maria Celia Fernández foi escoyida vicepresidenta primera de la mesa. El vicepresidente segundu va ser el popular Pablo Álvarez-Pire. El diputáu d’Izquierda Xunida, Ovidio Zapico, foi nomáu nuevu secretariu primeru. Armando F. Bartolomé, de Ciudadanos, va ser secretariu segundu.

    D’esta manera, queden fuera de la mesa Podemos y Vox. La formación morada venía defendiendo que la representación nel órganu cimeru de la Xunta Xeneral fuera proporcional a los resultaos electorales. L’alcuerdu algamáu ente la FSA-PSOE ya IX y ente’l PP y C’s déxalos ensin presencia. «La mesa de la Xunta Xeneral ye agora menos plural que con Javier Fernández. La FSA-PSOE, PP, C’s ya IX repartiéronse la mesa dexando fuera a Podemos y a los sos 60.000 votantes», escribió la formación morada en Twitter.Tampoco nun va tar Vox. La formación d’ultraderecha entra per primer vegada na Xunta Xeneral con dos representantes: Ignacio Blanco y Sara Álvarez.

    La Xunta Xeneral quedó constituyida esti llunes. D’esta manera entama la XI llexislatura nel Parlamentu asturianu. Al actu asistió la vicesecretaria xeneral del PSOE, Adriana Lastra.