Etiqueta: Gobiernu d’Asturies

El Gobiernu d’Asturies aumentó cuasi un 30 % la inversión en caltenimientu de carreteres dende’l 2019

El Gobiernu d’Asturies aumentó un 29,13 % la inversión nel caltenimientu de la rede de carreteres de titularidá autonómica desque empezó esta llexislatura. Al remate del añu 2021, la Dirección Xeneral d’Infraestructures Viaries y Portuaries dedicaría a esti oxetivu 84 millones, frente a los 65 que se destinaron a esti fin nel 2019.

L’esfuerzu del Executivu autonómicu incluye l’apueste pol personal propiu y los centros de trabayu, la renovación de la maquinaria, la meyora de la xestión alministrativa y la medría del porcentaxe d’obres destinaes al caltenimientu.

El personal adscrito a estos llabores y el caltenimientu de los sos centros de trabayu supón un 32 % (27 millones) del total de la inversión. Esta rede ta compuesta por 295 trabayadores que representen el 70 % del personal de la Dirección Xeneral d’Infraestructures Viaries y Portuaries. Los recursos destinaos a anovar la maquinaria cola que trabayen aumentaron un 84 % en malapenes dos años.

Nel capítulu d’inversiones, el Principáu sumó 56 millones nesti exerciciu, bien percima de los 40 millones del 2019 (en concreto, un 40 % más). Nesti epígrafe inclúyense contratos como los de meyora de la señalización vertical y horizontal y de les barreres de seguridá, que supunxeron una inversión conxunta de más de 5 millones.

A estos contratos, toos ellos con calter plurianual, hai qu’añedir el de roces y el de caltenimientu de valles dinámiques o de torsión. Ente les novedaes destaca la realización, pela primer vez, de contratos plurianuales, que dexen ameyorar la planificación de los trabayos y efectuar les roces nel momentu óptimu y de forma conxunta colos medios propios de la Conseyería de Mediu Rural y Cohesión Territorial.

L’últimu informe emitíu pola Asociación Española de la Carretera asitia al Principáu como la comunidá na que más ameyoraron los firmes nes carreteres de titularidá autonómica nos dos últimos años. Amás d’Asturies, namás La Rioxa, Galicia, Comunidá Valenciana, Cantabria y Andalucía ameyoraron los sos rexistros nesti periodu.

Les carreteres que dependen del Gobiernu d’Asturies tamién ameyoraron en cuestiones como la señalización vertical y les barreres de seguridá, según el mesmu informe. Asturies ta tamién perbaxo de la media nacional n’otru de los apartaos qu’encara l’estudiu: el déficit de caltenimientu de carreteres per quilómetru. Esta cifra, que n’España s’asitia ceraca de los 70.000 euros, nel Principáu queda en 61.900.

22/11/2021
Los gobiernos d’Asturies, Galicia, Castiella y Llión y Cantabria soliciten al ministeriu la retirada del borrador de la Estratexa del llobu

Los gobiernos d’Asturies, Galicia, Castiella y Llión y Cantabria unviaron un escritu al presidente de la Comisión Estatal de Patrimoniu Natural y Biodiversidá del Ministeriu para la Transición Ecolóxica y el Retu Demográficu nel que soliciten la retirada del borrador de la Estratexa pa la convivencia de les actividaes del mediu rural col llobu y el so caltenimientu. Les cuatro comunidaes autónomes consideren que’l documentu tien una orientación errónea, cadez de falta de rigor técnicu y científicu y podría vulnerar el réxime competencial establecíu.

El testu ellaboráu pol ministeriu, una vez más ensin el consensu previu colos Executivos autonómicos, realizóse ensin la preceptiva evaluación de les midíes recoyíes na actual estratexa, ensin cuntar con censos actualizaos a nivel nacional y ensin incorporar la documentación técnica facilitada dende les cuatro rexones qu’alluguen más del 95% de los llobos d’España.

Tal que estes comunidaes comunicaron al ministeriu, fráyense otros aspeutos fundamentales, como qu’el mesmu títulu del borrador nun s’adapta a los oxetivos establecíos na Llei del Patrimoniu Natural y de la Biodiversidá pa les estratexes d’especies amenaciaes, o que nun consta l’autoría del documentu, polo que nun se puede acreditar la so solvencia técnica y científica. Amás, nel so conteníu vulnérase’l réxime competencial actual.

Les cuatro comunidaes censuren tamién que’l documentu estigmatice al sector ganaderu con valoraciones ensin rigor que pa nada contribúin a rebaxar les diferencies y avanzar na coexistencia cola especie, y que contradicen los datos técnicos y científicos percanciaos nos planes de xestión d’estes rexones, nes que’l llobu cunta con un estáu de caltenimientu favorable.

Asturies, Galicia y Castiella y Llión y Cantabria yá anunciaron en setiembre la interposición d’un recursu contenciosu-alministrativu contra la orde ministerial que determina la inclusión del llobu nel Llistáu d’Especies Monteses en Réxime de Protección Especial (Lespre) y solicitaron l’establecimientu de midíes cautelares col fin de suspender la eficacia de la norma en tantu resuélvese esti procedimientu.

22/11/2021
El Gobiernu d’Asturies va poner en marcha’l próximu añu un serviciu integral pa muyeres víctimes d’esplotación sexual

L’executivu autonómicu ya dio los primeros pasos nesta dirección el pasáu mes de xunu, cuando punxo en marchar el modelu d’acreditación de víctima de trata con fines d’esplotación sexual o en constestu de prostitución con grave vulnerabilidá, col propósitu de facilitar a estes muyeres l’accesu al IMV.

Nesta ocasión, el Principáu va dedicar el Día Internacional de la Eliminación de la Violencia escontra les Muyeres a la llucha contra la prostitución, la pornografía y la trata. «Reivindicamos un 25-N abolicionista porque nun nos vamos cansar de dicir que les muyeren nin se merquen, nin se venden, nin s’alquilen», esplicó Varela. «Nesti país cómprense muyeres tolos díes, sicasí, tenemos mui pocos datos fiables sobre la esplotación sexual», añedió.

Los datos más fiables sobre trata y prostitución n’Asturies que proporcionen les entidaes especializaes que trabayen con muyeres, como Apramp, la Fundación Amaranta y Médicos del Mundo, que l’añu pasáu atendieron a 1.082 víctimas. Según l’INE, el negociu de la prostitución n’España supón el 0,35% del PIB, lo que representa una cifra cercana a los 4.100 millones. En cuanto a la pornografía, les tecnoloxíes de la información facilitaron la estensión del so consumu a la población adolescente, qu’accede a estos conteníos per primer vez a los 12 años y cuasi 7 de cada 10 de manera frecuente, según l’informe (Des)información sexual: pornografía y adolescencia, de la organización Save the Children.

19/11/2021
El Principáu, la Delegación del Gobiernu y la Guardia Civil refuercen la vixilancia contra la pesca illegal

El Principáu, la Delegación del Gobiernu n’Asturies y la Guardia Civil alcordaron güei reforzar les acciones de vixilancia contra la pesca illegal para protexer el sistema pesqueru tanto nes descargues como nel tresporte y la comercialización. Pa ello, van amontase los controles habituales y va ponese especial atención a l’actividá marisquera.

El director xeneral de Pesca Marítima, Francisco González, y el director del lÁrea d’Agricultura y Pesca de la Delegación del Gobiernu n’Asturies, Enrique Rodríguez Nuño, axuntáronse esta mañana con representantes del Serviciu de Protección de la Naturaleza (Seprona) de la Guardia Civil para coordinar estes acciones hasta final d’añu.

L’oxetivu ye protexer el sector que cumple col sistema de cupos na pesca de la perceba, otros mariscos y pexe, de manera énte la llegada de les fiestes navidiegues. Asina, les partes implicaes alcordaron amontar los controles que davezu se realicen na mariña, nes rules y en carretera, pa comprobar documentación y condiciones de los productos.

Nel ámbitu de les sos competencies, los inspectores del Gobiernu d’Asturies y los de l’Alministración Xeneral del Estáu van trabayar de manera conxunta y van coordinase de forma selmanal nos llabores de vixilancia colos axentes del Seprona.

19/11/2021
El Gobiernu d’Asturies illuminó d’azul dellos edificios públicos pa conmemorar el Día universal polos derechos de la infancia

El Gobiernu d’Asturies illuminó ayeri d’azul dellos edificios institucionales, incluyíu’l de la Presidencia del Principáu, pa conmemorar el Día universal polos derechos de la infancia, que va celebrase’l sábadu, 20 de payares. La illuminación coincide cola celebración de la Xornada internacional de los derechos de la infancia, entamada pola Conseyería de Derechos Sociales y Bienestar cola collaboración del Institutu Asturianu d’Alministración Pública Adolfo Posada.

A esta iniciativa súmense los conceyos d’Avilés, Bimenes, Cabranes, Candamu, Cangas, Castropol, Colunga, Xixón, Llaviana, L.lena, Llanes, Miranda, Nava, Noreña, Uviéu, Ribeseya, Sariegu, Tinéu y Villaviciosa. Prevése que tolos edificios enciendan les sos lluces a les siete de la tarde.

La Xornada internacional de los derechos de la infancia empecipió cola intervención de la directora del Institutu Asturianu pa l’Atención Integral a la Infancia y a les Families, Marta del Arco. Tamién participaron el fiscal coordinador de menores, Jorge Fernández Caldevilla, y la lletrada del menor, Antonia Fuentes Moreno.

Mientres la xornada analizóse con detalle la Llei orgánica de protección integral a la infancia y l’adolescencia frente a la violencia. Marta del Arco fizo una valoración positiva: «Falamos d’una llei que marca plazos pa terminar cola violencia escontra la infancia en cualesquier de les sos formes y impón plazos concretos a les alministraciones pa que se coordinen, ellaboren estratexes y nel ámbitu d’esta planificación y coordinación desenvuélvanse acciones concretes empobinaes en favor del bienestar de los menores».

19/11/2021
El Centru Niemeyer acueye la final de la XIII edición del Premiu Camaretá al Meyor Cantar

La XIII edición del Premiu «Camaretá al Meyor Cantar» en llingua asturiana o gallego-asturianu, convocáu pola Conseyería de Cultura, Política Llingüística y Turismu, va celebrar la so gala final el 27 de payares próximu a les 22:15 hores, nel Auditoriu del Centru Niemeyer d’Avilés.

El xuráu del premiu, que busca reconocer a la meyor composición en llingua asturiana o gallego-asturianu divulgada mientres l’añu 2020, escoyó na primer fase del certame, celebrada en xunetu, los cuatro cantares finalistes. Estos son: Tomasín, del grupu ¿Aú?, Flacos y ensin peinar, de la Banda de Gaites Camín de Fierro, Veis volver, del dúu L-R y El que conoz a tierra de Carla Armas y Rubén García.

La gala va retresmitila en directo la TPA y va acoyer les actuaciones de los cuatro finalistes. De siguío, mientres la deliberación del xuráu, Rodrigo Cuevas va tener una actuación de 25 minutos na que va interpretar el cantar ganador de la edición pasada, Rambalín, ente otres del so repertoriu. Tres esta actuación, va anunciase’l cantar ganador y va facese entrega d’un troféu a los sos intérpretes. El premiu tien una dotación de 6.000 euros y incluye la realización d’un videoclip, asina como la promoción y divulgación del cantar ganador nos medios de comunicación y nos eventos entamaos o promovíos pol Gobiernu del Principáu d’Asturies.

La entrada a la gala ye llibre y gratuita hasta enllenar l’aforu del auditoriu. Les entraes puen acutase na taquilla del Centru Niemeyer (Avilés), Llaboral Ciudá de la Cultura (Xixón) o’l Centru d’Información Turística del Principáu d’Asturies (Uviéu), y tamién na web del Centru Niemeyer (www.centroniemeyer.es).

19/11/2021
El centru de Recuperación de Fauna Silvestre del Principáu, ubicáu en Sobrescobiu, acueye los sos primeros güéspedes

El centru de Recuperación de Fauna Silvestre del Principáu, ubicáu en Sobrescobiu, acueye los sos primeros güéspedes: un urogallu, un águila culebrera, dos busardos ratoneros, dos curruscupines, un cernícalo, un mochuelo y un halcón peregrín, que yá reciben atención nel equipamientu.

El conseyeru de Mediu Rural y Cohesión Territorial, Alejandro Calvo, acomañáu pol director xeneral del Medio Natural y Planificación Rural, David Villar, y pol alcalde de Sobrescobiu, Marcelino Martínez, visitaron güei les instalaciones, ubicaes nel monte d’utilidá pública Isorno.

El centru va acoyer tolos animales silvestres con problemes que recueyan los axentes del Mediu Natural, sobre manera especies protexíes o en peligru d’estinción. Ellí, van evaluar el so estáu y condiciones físiques, van curalos y rehabilitaráse-yos, col fin de reintroducilos nel so hábitat natural.

Les instalaciones cunten con sales de vuelo d’aves rapaces, pa qu’estos animales exerciten los sos músculos enantes del so procesu de lliberación. Tamién tienen quirófanos y llaboratorios que van permitir desarrollar un llabor investigador al traviés de les necropsies que van realizase a los exemplares muertos y que nun llogren recuperase. Esto va permitir reforzar la collaboración col personal científicu del Serida y la Universidá d’Uviéu, que caltien dende fai años, en rellación con especies protexíes.

17/11/2021
El Principáu evalúa la calidá de la cobertura de telefonía móvil n’Asturies a lo llargo de más de 6.300 quilómetros de carretera

La Conseyería de Ciencia, Innovación y Universidá punxo güei en marcha’l programa Drive test, que va midir la calidá de la conectividá de telefonía móvil n’Asturies. Un vehículu ECO, que garantiza les baxes emisiones, va percorrer 6.365 quilómetros a lo llargo de 541 carreteres nacionales, rexonales, comarcales y locales pa conocer la cobertura de la rede de los principales operadores nel Principáu.

L’oxetivu d’esti programa ye conocer con precisión la calidá de les telecomunicaciones na comunidá, sobre manera na zona rural. El procedimientu ye asemeyáu al qu’emplega Google pa mapear el territoriu. Mientres aproximao cuatro meses, un vehículu —o más, según considere la empresa axudicataria— va circular pela rede de carreteres con dispositivos de tolos operadores de telefonía móvil con rede propia y toles tecnoloxíes esistentes: 2G, 3G, 4G y 5G.

La empresa Eurocontrol resultó axudicataria del proyectu promovíu pol organismu Xestión d’Infraestructures Públiques de Telecomunicaciones del Principáu (Xitpa). El vehículu ta dotáu con equipamientu técnicu d’última xeneración, qu’incluye un escáner de radiofrecuencia y terminales móviles.

La evaluación va realizase dende la esperiencia d’un usuariu, esto ye, les midíes y comprobaciones van ser executaes por persones con dispositivos móviles reales. La información va recoyese al traviés d’un software específicu que va facilitar l’análisis al traviés de la representación en soportes cartográficos. Los primeros resultaos, desque se procesen tolos datos, van tenese primero del branu próximu.

En cada localidá pela que pase’l vehículu va midise la cobertura móvil pa llamaes, la velocidá de xubida y baxada de datos y la calidá de los servicios de navegación per internet. Amás, por cada rede d’operador, va comprobase tamién l’accesu a les páxines web qu’ocupen los principales puestos en visites: Google, Facebook, Twitter y Youtube.

El conseyeru de Ciencia, Innovación y Universidá, Borja Sánchez, destacó la importancia de cuntar con un mapa real de la rede de telefonía móvil, «que va dexar conocer sobre’l terrén ónde hai qu’actuar y qué fórmules emplegar p’ameyorar la conectividá, sobre manera nes zones rurales y más alloñaes».

El proyectu enmárcase na Estratexa de Tresformamientu Dixital na que trabaya la Dirección Xeneral d’Innovación, que tien como oxetivu afitar o afaer planes estratéxicos en zones con deficiente cobertura y que les compañíes conozan les necesidaes del territoriu, de cara a asitiase y ufiertar servicios. Amás, va sirvir pa que la ciudadanía conoza la calidá de la conectividá real qu’existe na so zona.

17/11/2021
Escolinos asturianos guarden nuna cápsula del tiempu una carta sobre’l cambéu climáticu pa la población moza del Principáu en 2070

Una cápsula del tiempu guarda dende ayeri en Muniel.los, nel conceyu de Cangas del Narcea, una carta que neñes y neños unvian a los mozos que van vivir nel Principáu dientro de 48 años, y nes que-yos espliquen la so visión de la crisis climática d’anguaño, mesmo que-yos treslladen la so esperanza nel porvenir de la Tierra como planeta habitable.

El dispositivu, que debe ser preservao hasta 2070, colocóse na mañana d’ayeri en Tablizas, la puerta d’entrada a Muniel.los, mientres un actu organizáu pol Gobiernu d’Asturies, nel que tamien participa l’alcaldía de Cangas del Narcea y estudiantes del colexu públicu de La Puela y del IES de Pravia.

El depósitu de la cápsula enmárcase na iniciativa Emerxencia climática escolar de 2019, coincidiendo cola Cumbre Mundial del Clima (COP25) celebrada en Madrid, na que participó alumnáu de dellos centros asturianos, que tresllado la so visión sobre’l problema del cambéu climáticu.

Enantes de sellar la caxa, dos estudiantes lleeron la carta en nome de tola mocedá d’Asturies, embaxo l’encabezamientu A nuesos compañeros y compañeres habitantes del futuru. Amás, la capsula tien tolos escritos del alumnáu de ocho colexos asturianos. Tamién s’incluyó la declaración d’emerxencia climática acordada pol Conseyu de Gobiernu el pasáu vienres, y tamién les proyecciones cilmátiques de 2050 y 2100, col fin de que se compruebe si finalmente se cumplen los pronósticos. A lo último, axuntaronse delles semeyes del actu de colocación y los sos protagonistes.

Al rematar l’actu, se ficieron delles actividaes didáctiques al rodiu del papel que los montes desendolquen nel frenu del cambéu climáticu.

«La importancia de xestos como’l de la declaración d’emerxencia climática sirven pa poner de manifiestu’l compromisu de la sociedá na llucha escontra’l calentamientu global», esplicó la viceconseyera de Mediu Ambiente. «Trátase d’aseguranos de que les xeneraciones futures puedan esfrutar d’un planeta habitable y, como señalen los xóvenes na carta, digno de ser vivío», agregó.

17/11/2021
El Gobiernu d’Asturies garantiza que Valgrande-Payares cunta con dirección técnica y va iniciar la temporada d’esquí con toles midíes de seguridá

La estación de Valgrande-Payares va empecipiar la temporada d’esquí con toles garantíes de seguridá para les persones ususaries. Asina lo aseguró güei la directora xeneral de Deporte, Beatriz Álvarez Mesa, quien esplicó que l’equipamientu ivernizu “cuenta col contratu a valir de responsabilidá técnica o dirección técnica, axudicáu a la empresa Inxeniería y Control d’Obres ya Instalaciones S.L”.

Álvarez señaló que la seguridá de la estación “ye un asuntu demasiao seriu como para nun crear alarma social innecesaria y que rique rigor a la hora d’informar”. La responsable de Deporte indicó que Valgrande-Payares va abrir la temporada’l próximu día 27 “con toles midíes de seguridá necesaries”.

Proyectu de desestacionalización y reconstrucción

En relación col proyectu de reconstrucción de la estación iverniza y de monte de Valgrande-Payares como motor económicu pal valle de L.lena, Álvarez recordó que’l Gobiernu d’Asturies llogró una financiación de 10 millones de los fondos mineros del Institutu de Transición Xusta, organismu que contribúi col 75% de la inversión, ente que’l 25% apúrrelu l’Alministración autonómica.

La directora añedió que’l proyectu inicial dimensionóse y esgazóse depués, adaptándolu a l’actuación oxetu del conveniu y adaptándolu a la financiación disponible.

El proyectu de reconstrucción, que se va executar nuna distribución tresañal (2021-2023), va llicitase a finales d’esti añu o primeros de 2022, tal que s’esplicó na Xunta Xeneral, cola fin d’empezar les obres na primavera del próximu añu al tratase d’un espaciu onde ye complicada cualquier actuación pel iviernu.

Coles mesmes, la directora de Deporte especificó que para la primer fase propónse la execución d’un nuevu sistema de tresporte per cable pa la estación qu’inclúi la telecabina Cuitu Nigru, mesmo que l’acurtiamientu de la telesilla Brañil.lín y el desmontaxe de los telesquíes La Hoya y Arroyo, y de los telesillas Hoya de Cuitu Nigru y Les Patines.

17/11/2021