La Conseyería d’Educación va sovencionar 68 proyectos d’innovación pedagóxica dientro d’una convocatoria d’ayudes pa esti cursu dotada con 300.000 euros. Ente les iniciatives que van recibir sofitu económicu figuren 55 proyectos de centros públicos y 13 de privaos alcordaos.
Estes ayudes formen parte del plan estratéxicu de subvenciones de la conseyería pal periodu 2020-2022 y sirven de refuerzu a otros programes como’l PROA+. Del gastu total autorizáu nel presupuestu autonómicu p’anguaño, 240.000 euros diben destinaos a subvencionar proyectos d’innovación del sistema d’enseñanza públicu y 60.000 pa la rede privada alcordada. A la convocatoria allegaron en total 138 centros, lo que supon un ésitu de participación. Otros 6 proyectos quedaron escluyíos, bien por incumplimientu de les bases o por presentase fora de plazu.
La finalidá de la convocatoria ye fomentar les bones práctiques educatives por aciu l’empléu de metodoloxíes d’enseñanza innovadores, de forma qu’aumente la motivación del alumnáu y amenórguense les tases d’abandonu tempranu y fracasu escolar. Coles mesmes, preténdese que’l profesoráu y les families adquieran conocencies y estratexes p’amontar el porcentaxe d’estudiantes que remata con ésitu la Educación Secundaria Obligatoria (ESO). Esta llinia d’ayudes va caltener nos próximos cursos.
Los proyectos presentaos enceten conteníos de diversa índole como la inclusión, el medioambiente, la comunicación, la robótica o la cohesión ente tradición y modernidá.
Cada centru educativu podía presentar un únicu proyectu y la cuantía máxima subvencionable era de 6.000 euros. El periodu susceptible d’ayuda tomaba les actividaes realizaes ente’l 1 de setiembre de 2022 y el 31 d’agostu de 2023. La percepción d’estes subvenciones ye compatible con otres ayudes pa la mesma finalidá procedentes d’otres alministraciones o d’entidaes públiques o privaes, siempres que la so importe nun supere’l costu de l’actividá.
