Los nuevos proyectos cinematográficos de Kela Coto, Ramón Lluís Bande, Celia Viada Caso y Samuel Fernandi resultaron escoyíos nel programa de patrocinios de cineastes asturianos de Llaboral Cinemateca, que promueve la Conseyería de Cultura, Política Llingüística y Turismu. Nesta convocatoria presentáronse un total de 22 trabayos, 14 llargos y 8 curtiumetraxes, tantu de ficción como de non ficción, toos de profesionales y ceadores del Principáu.
Órbita ye’l primer llargumetraxe de la fotógrafa Kela Coto que parte del so últimu trabayu, el curtiu Ampliación del territoriu (2016), y del trabayu espositivu del mesmu nome, nel qu’esquiza conceutos como’l progresu, l’heriedu cultural o’l sentimientu de pertenencia. Coto da un pasu más nel so proyectu y, con una estética retrofuturista, funde’l pasáu y el futuru d’Asturies, con una identidá cultural bien amestada a lo industrial, convidando al espectador a superar l’actual crisis d’identidá y de pensamientu ya imaxinar nuevos futuros.
La música orixinal d’esti proyectu cuerre a cargu del dúo CICADA, que formen la violista Sara Muñiz y el programador José Rilla, y recibió pa la so preproducción una residencia artística en Llaboral Centru d’Arte. Esta propuesta de Kela Coto va recibir 12.317 euros.
¿Cómo rodar una película de 1937 en 2022? Ramón Lluís Bande sigue col so trabayu de recuperación de la memoria histórica en Retaguardia, una pequena hestoria del cine de propaganda (en potencia) del Conseyu d’Asturies y Llión.
Sofitándose en materiales y evidencies de la dómina -fotografies de Constantino Suárez, testos del diariu socialista Meyora o dibuxos de Goico Aguirre, ente otros- y siguiendo les premises del cine de propaganda soviéticu de los años 20 y 30 del sieglu XX, Bande presenta un proyectu de documental esperimental especulativu col que (re)construyir una colección de películes que pudieron rodase na Asturies republicana de 1936 y 1937, imaxinando cómo podría ser esi cine que, magar nunca esistió o nun llegó a los nuesos díes, podría esistir. Esti proyectu va cuntar con un patrociniu de 11.125 euros.
Nel apartáu de curtiumetraxes resultó escoyíu’l nuevu trabayu de Celia Viada Caso que, tres l’ésitu del so primer llargu La Cai de l’Agua, presenta Gregoria, un curtiu que nos somorguia na dimensión rural d’Asturies al traviés de la hestoria de Gregoria, una muyer de 97 años, soltera y ensin descendencia, que cavilga sobre la vieyera, la dignidá del trabayu o la despoblación del mediu rural de la que comparte les sos esperiencies de vida como llabradora o vendedora n’El Fontán d’Uviéu.
Esti proyectu, que llogró un patrociniu de 2.480 euros, foi galardonáu en 2021 col Premiu Nuevos Realizadores Contra la Violencia de Xéneru que concede’l Gobiernu del Principáu nel marcu de Festival Internacional de Cine de Xixón.
El proyectu documental Cartografíes del monte de Samuel Fernandi, con un patrociniu de 2.040 euros, ye’l segundu curtiumetraxe escoyíu nesta convocatoria. Fernandi, que con esti proyectu llogró’l Premiu Asturies Paraísu Natural Filme Commission FICX Pro Lab 2021, convierte’l paisaxe asturianu nun personaxe con identidá propia, que dialoga colos raigaños de la so propia familia.
Alcordances y memoria, individual y colectiva, se superponen nesta película que naz de los testimonios d’Amador y los caminos que percorría nel monte, colos sos trazos y los sos nomes, superponiendo la imaxe física sobro la imaxe fílmica pa crear una suerte de guía de monte que da continuidá al trabayu empecipiáu con Manual de la siega.
El comité de valoración tuvo formao pola periodista y crítica cinematográfica Paula Ruiz, Doctora en Comunicación Social pola Universitat Pompeu Fabra de Barcelona y profesora acomuñada na Universidá de Murcia; Lorena Morín, formó parte del equipu del Festival Internacional de Cine de Les Palmes de Gran Canaria y trabaya na distribución cinematográfica; y Irati Crespo, graduada en Comunicación Audiovisual pola Universidá de Mondragón con amplia esperiencia en programación cinematográfica.
