Xixón al día

Etiqueta: sucesos

  • Una conductora firida al salise de la vía en Colunga

    Una conductora firida al salise de la vía en Colunga

    Una persona resultó mancada en saliéndose de la vía el vehículu que conducía cuando circulaba al altor del encruz de Carrandi, en Colunga. La muyer, de 46 años d’edá, foi treslladada al Hospital de Les Arriondes con pronósticu reserváu por cuenta de más pruebes y hasta nueva valoración médica. Foi atendida nel llugar del accidente pol equipu d’Atención Primaria de Ribesella y l’ambulancia de soporte vital básicu de la zona.

    L’afectada tuvo que ser escarcelada del interior del turismu que conducía por efectivos de Bomberos d’Asturies. El turismu quedara semientornáu a dos metros de la cuneta de la carretera. Los bomberos inmovilizaron a la muyer asitiándo-y collarín y férula espinal y darréu, con ayuda de la tabla de rescate, sacupar pola parte trasera del vehículu.

    El Centru de Coordinación d’Emerxencies del 112 Asturies recibió l’avisu a les 06.49 hores. Na llamada señalaben qu’un turismu saliérase de la vía y había una persona nel so interior. Amás de pasar l’avisu al SAMU y movilizar a los bomberos, la Sala 112 del SEPA comunicó lo asocedío a la Guardia Civil.

  • Tres mancaos nel choque de dos vehículos en Cuaña

    Tres mancaos nel choque de dos vehículos en Cuaña

    Trés persones resultaron mancaes de diversa considerancia en topetando, en circunstancies que se desconocen, frontolateralmente, un turismu y una furgoneta. Los fechos tuvieron llugar na carretera AS-12, na localidá de Trelles, en Cuaña. La firida de mayor considerancia ye una muyer de 38 años d’edá. Presentaba politrauma de pronósticu reserváu, por cuenta de más pruebes y hasta nueva valoración médica. Foi atendida nel llugar del accidente pol equipu médicu de la UVI-móvil de Xarrio que la treslladó al hospital coañés.

    La muyer, conductora y única ocupante del turismu, tuvo que ser escarcelada por efectivos de Bomberos d’Asturies. Los bomberos sacaron a la muyer, inmovilizada con collarín pol equipu sanitariu, pela parte trasera del vehículu. Los otros dos mancaos, dos varones de 43 y 40 años d’edá, viaxaben na furgoneta implicada nel accidente. Dambos salieron pelos sos propios medios y fueron treslladaos n’ambulancia al mesmu centru hospitalariu con pronósticu leve.

  • Interveníos más de 3 quilos de marihuana, ḥaxís y resina de ḥaxís

    Interveníos más de 3 quilos de marihuana, ḥaxís y resina de ḥaxís

    La Policía Local intervieno más de 3 kilogramos de marihuana, ḥaxís y resina de ḥaxís nun local de la cai Frai Ceferino González. Los fechos asocedieron alredor de les 20.30 hores del sábadu cuando un vecín sollertaba d’un fuerte golor a mariguana que provenía d’un baxu. Amás, señalaba que yera habitual la entrada y salida de xente del mesmu.

    Nel local y cola ayuda d’un perru detector, los axentes atoparon, en distintos llugares, más de trés quilogramos de marihuana dispuesta en trenta tarros y dieciséis bolses de les cualos dalgunes taben nun conxelador, más de 150 cincuenta gramos de ḥaxís y delles bolses con resina de ḥaxís. Tamién s’intervino diversa documentación, un ordenador, dos báscules de precisión, numberosos envases vacíos y dineru fraccionáu por valor de más de mil euros. Delles persones fueron identificaes. Magar una d’elles manifestó que se trataba d’una asociación cannábica colos sos estatutos, nun presentaben, en principiu, nengún tipu de rexistru oficial nin llicencia pa tala actividá que pudiera responder por esa realidá.

  • Dos mancaos al arollar un tren a un coche nun pasu a nivel en Llanes

    Dos mancaos al arollar un tren a un coche nun pasu a nivel en Llanes

    Dos persones, un varón y una muyer, resultaron mancaos nun accidente ferroviariu. Un tren de pasaxeros arolló a un turismu en Belmonte, nel conceyu de Llanes. El varón presentaba un traumatismu craneoencefálicu y un politraumatismu grave y foi evacuáu al Hospital Universitariu Central d’Asturies (HUCA) nel helicópteru medicalizáu. La segunda ferida, una muyer, presentaba un politraumatismu y foi treslladada al HUCA, na UVI-Móvil de Les Arriondes. Por cuenta de más pruebes y una nueva valoración médica’l so pronósticu ye reserváu.

    El Centru de Coordinación d’Emerxencies recibió l’avisu a les 12:29 hores. Na llamada indicóse qu’un tren arollara a un turismu. Una vegada na zona, los bomberos escarcelaron a los dos ocupantes del turismu. Tres l’atención y valoración médica, los efectivos escarcelaron al conductor y de siguío a l’acompañante. Pa ello cortáronse y retiráronse les dos puertes delanteres del coche, les pilastres centrales y el techu del vehículu, p’abrir güecu y poder estrayer a dambos mancaos.

  • Deteníos por robar cable y dexar ensin lluz a delles zones de Tremañes

    Deteníos por robar cable y dexar ensin lluz a delles zones de Tremañes

    La Policía Local detuvo ayeri martes a un home y a una muyer por robar cable de les arquetes y dexar sin lluz a delles zones de Tremañes. Los fechos asocedieron sobre les 13.00 hores nes cais Trinchera y Avenida del Transporte. Un vecín sollertó indicando que viera a unes persones sacando cable. Na llamada indicó’l modelu del vehículu que se taba utilizando pa ello.

    El coche foi sosprendíu cuando se disponía a salir del polígonu Mora Garay. Al llegar al altor de la cai Camino de la Iglesia, dos de los ocupantes abandonaron el vehículu. Una muyer, I.D.V. de 49 años y vecina de Siero, quedó nel interior. Los axentes de la Policía Local detuviéronla y a unu de los varones fuxíos, R.L.V. de 48 años d’edá y vecín de Xixón. Amás, investígase la identificación del terceru.

    Nel interior del vehículu portaben diversa ferramienta como alicantes, barra d’uña y un polímetro. Polo menos dieciocho arquetes fueren manipoliaes pa sustraer cable. Por esti motivu, delles zones del barriu de Tremañes quedáronse temporalmente ensin lluz.

  • Un mozu de 26 años muerre nun accidente de tráficu en Candamu

    Un mozu de 26 años muerre nun accidente de tráficu en Candamu

    Un mozu de 26 años d’edá morrió nun accidente de tráficu na carretera AS-237, en Sandiche, nel conceyu de Candamu. Los fechos tuvieron llugar pasaes les ocho de la tarde del llunes. Dos vehículos que topetaron, por causes que se desconocen. Los restos mortales del fináu, conductor d’unu de los vehículos implicaos nel accidente, tuvieron que ser escarcelaos por efectivos de bomberos. La Guardia Civil fíxose cargu de los trámites para proceder al llevantamientu del cadabre.

    El conductor del otru vehículu siniestrado, un varón de 62 años d’edá, resultó ilesu, según los datos facilitaos pol Serviciu d’Atención Médica Urxente (SAMU). L’home foi treslladáu n’ambulancia al centru de salú de Grau, onde foi atendíu.

    El Centru de Coordinación d’Emerxencies del 112 Asturies recibió l’avisu a les 20.21 hores. Na llamada indicaben que dos coches topetaren na citada carretera y el conductor d’unu d’ellos taba atrapáu. La Sala 112 del SEPA movilizó una dotación de bomberos del parque de Grau y paralelamente pasó l’avisu al SAMU ya informó a la Guardia Civil de Tráficu. La cayida d’un árbol que cortaba’l pasu por completu na carretera podría ser la causa del accidente.

  • Incendiu nes instalaciones de Saint-Gobain n’Avilés

    Incendiu nes instalaciones de Saint-Gobain n’Avilés

    Efectivos de bomberos escastaron una quema declarada la pasada nueche, nes instalaciones de la empresa de cristalería Saint-Gobain, n’Avilés. La quema afectó a un fornu onde empezó a amburar la tendalada de vidriu a 1.500 graos y virtiendo por una perforación. Los bomberos, con gran cantidá d’agua, llograron solidificar el material que taba virtiendo y taponar la perforación.

    El Centru de Coordinación d’Emerxencies del 112 Asturies recibió l’avisu a les 23.16 hores d’ayeri llunes. La llamada realizóla’l vixilante de seguridá de la empresa. Indicó que taba quemando una tendalada de vidriu a 1.500 graos. La Sala 112 del SEPA movilizó a efectivos de Bomberos del SEPA de los parques d’Avilés, Llamorgal y Pravia, amás de a la Policía Local y Nacional y al SAMU. Tamién foi necesaria la collaboración de bomberos d’Arcelor Mittal cola so autobomba nodriza. Nun foi hasta cerca de les tres de la madrugada cuando se llogró solidificar con agua’l material que taba virtiendo y asina taponar la perforación.

  • Cuatro mancaos al topetar un coche contra una muria en L’Entregu

    Cuatro mancaos al topetar un coche contra una muria en L’Entregu

    Cuatro persones, dos adultos y dos menores, resultaron mancaos leves en topetando’l coche nel que viaxaben contra un pequenu muriu y amburase’l vehículu na zona de carga y descarga d’un centru comercial en L’Entregu, Samartín del Rei Aurelio. Según los datos facilitaos pol Serviciu d’Atención Médica Urxente (SAMU) los cuatro afectaos, una muyer de 40 años d’edá, un varón de 37 y dos menores fueron treslladaos por precuru, con pronósticu leve, al Hospital Valle del Nalón. Fueron atendíos nel llugar del accidente pol equipu médicu de la UVI-móvil de Llangréu.

    Hasta’l llugar tamién se movió una dotación de Bomberes del Serviciu d’Emerxencies del Principáu d’Asturies con base nel parque de Samartín del Rei Aurelio. Los bomberos escastaron les llames del turismu que quedó totalmente xamuscáu. El Centru de Coordinación d’Emerxencies del 112 Asturies recibió l’avisu a les 16.23 hores. Na llamada señalaben qu’había un vehículu quemando. Los sos ocupantes taben fuera y podríen tar afectaos. Amás de movilizar a los bomberos y pasar l’avisu al SAMU, la Sala 112 del SEPA informó de lo asocedío a la Policía Local.  A les 17.13 hores, rematada la intervención los bomberos retiraron para tornar a parque onde llegaron a les 17.25 hores.

  • Dos deteníos por engarrase nun bar de Pumarín

    Dos deteníos por engarrase nun bar de Pumarín

    Dos homes fueron deteniós nel meudía del martes depués d’engarrase nun bar de la cai Cataluña. Los fechos tuvieron llugar alredor de les 14.15 hores. Delles dotaciones de Policía Local personáronse nel chigre, onde alcontraron a una persona na cai, frente al establecimientu, con un fondu corte nel costazu esquierdu y dellos cortes nel llombu.

    El mancáu por arma blanca yera Papa Gore Ndoye, un vieyu conocíu de les fuerces y cuerpos de seguridá de la ciudá. Nacíu en Senegal y de 42 años, esplicó que dientro del llocal alcontrábase un varón que lu atacara con un machete de cocina. A.Y.J, de nacionalidá marroquina y 42 años, alcontrábase solu nel interior del establecimientu. Foi deteníu como presuntu autor d’un delitu de mancadures y foi treslladáu al Hospital de Jove pa ser valoráu polos golpes recibíos.

    Testigos de lo asocedío indicaron a la Policía Local que, tres un fuerte discutiniu, Papa Gore Ndoye pegó-y un puñetazu. A.Y.J. respondió garrando un machete de cocina, que taba na barra del chigre, y atacólu pel costazu. Ndoye tuvo que ser treslladáu al Hospital de Cabueñes. Dambos fueron deteníos y van pasar a disposición xudicial.

  • Rescaten el cadabre d’un pescador que cayó a la mar en Tapia

    Rescaten el cadabre d’un pescador que cayó a la mar en Tapia

    Axentes de la Guardia Civil atoparon esta nueche’l cuerpu ensin vida d’un varón, d’aprosimao 60 años d’edá, nel muelle interior del puertu de Tapia. Efectivos de bomberos rescataron el cadabre. Al paecer, l’home cayó al agua cuando s’alcontraba pescando xunto al faru de la llocalidá.

    Un vecín sollertó a la Guardia Civil, qu’esplicó que los sos vecinos dixéron-y que taben onde’l mirador y sintieron berros de socorru cerque del faru. Depués vieron una llinterna bien potente allumando y de sópitu esta apagóse. Paralelamente la Guardia Civil confirmó que la patrulla movida a la zona viera’l cuerpu ensin vida d’una persona flotando nel muelle.

    La Sala 112 del SEPA movilizó a efectivos de Bomberos del SEPA del parque de Barres ya informó a Centru Rexonal de Coordinación de Salvamentu de Xixón qu’indicó que movilizaría al so helicópteru. A les 22.31 hores los bomberos comuniquen que yá rescataron el cuerpu ensin vida del fináu. Énte la posibilidá de que pudiera haber otru afectáu rastrexóse la zona per tierra y aire.