Xixón al día

Etiqueta: turismu

  • El Principáu pon en marcha un proyectu piloto pa impulsar la movilidá eléctrica nel sector turísticu

    El Principáu pon en marcha un proyectu piloto pa impulsar la movilidá eléctrica nel sector turísticu

    El Principáu, al traviés de la Fundación Asturiana de la Enerxía (Faen), Otea (Hostelería y Turismu d’Asturies) y l’Asociación Empresarial pal Desenvolvimientu ya Impulsu de la Movilidá Eléctrica (Aedive) roblaron güei un proyectu piloto pa la promoción de la movilidá eléctrica nel sector turísticu, el primeru que se suscribe a nivel nacional entre Aedive, una comunidá autónoma y una asociación hostelera.

    Esta iniciativa figura ente les actividaes de la Mesa pal Fomentu de la Movilidá Eléctrica n’Asturies, impulsada pola Dirección Xeneral d’Enerxía, Minería y Reactivación cola coordinación técnica de Faen y la participación de Aedive. Amás, allíniase colos oxetivos de la Estratexa de Transición Enerxética Xusta d’Asturies.

    Les trés entidaes suscribieron un alcuerdu de collaboración en virtú del cual van instalase 20 puntos de recarga d’accesu públicu n’otros tantos establecimientos hoteleros, que van poder ser utilizaos por particulares y empreses de servicios de movilidá compartida. Amás de contribuyir al impulsu del vehículu eléctricu, van dexar llograr datos reales de funcionamientu que van ser analizaos por Faen pal desenvolvimientu de proyectos futuros.

    Por aciu esti conveniu, va avanzar nos oxetivos de descarbonización de la economía, en concretu, nel sector turísticu, de la que se favorecen iniciatives sostenibles nesti ámbitu económicu.

    Pa desenvolver esti proyectu piloto, Faen va apurrir 45.000 euros destinaos a la instalación de los puntos de recarga d’accesu públicu, los sistemes de monitorización pa llograr información detallada del usu de les infraestructures y la xeneración d’actividaes de concienciación y demostración qu’averen esta tecnoloxía a posibles usuarios, tanto particulares como empreses.

    El conveniu foi robláu pol conseyeru d’Industria, Empléu y Promoción Económica, Enrique Fernández, en calidá de presidente del patronatu de Faen. Per parte de Otea y Aedive participaron los sos presidentes, José Luis Álvarez Almeida y Adriano Mones, respectivamente.

    Fernández valoró esta iniciativa como exemplu de la collaboración públicu-quitada nel marcu de la mesa pal fomentu de la movilidá eléctrica. Tamién sorrayó’l compromisu que’l Gobiernu d’Asturies caltien cola descarbonización, como oportunidá de xeneración d’actividá económica y empléu. “Trátase d’un proyectu enmarcáu na Estratexa Rexonal de Transición Enerxética Xusta que supon non solamente una apuesta por un turismu más sostenible medioambientalmente, sinón tamién el fortalecimientu y afitamientu d’una cadena de valor industrial y de servicios acomuñada a la movilidá eléctrica”, esplicó.

    Esplegue de la tecnoloxía

    Según datos de les asociaciones Anfac y Faconauto, van ser precisos unos 340.000 puntos de recarga d’accesu públicu n’España en 2030 pa dar serviciu al oxetivu de 5 millones de vehículos eléctricos que s’afitó a nivel nacional.

    Aedive plantega qu’un bon ritmu pal esplegue de la infraestructura sería llograr 23.000 el próximu añu (cifra que prácticamente se algamar), 70.000 en 2025 y 255.000 en 2030, con una mayor importancia de los allugamientos y tipoloxía de los mesmos, más que de la cantidá.

    Tocantes a vehículos, n’España les matriculaciones de turismos 100% eléctricos atropen anguaño una medría del 39,8%, con 24.387 unidaes, según datos de Aedive y l’Asociación Nacional de Vendedores de Vehículos. Esta categoría en particular, los automóviles eléctricos puros tipu turismu, ronda’l 5% de cuota de vientes.

    N’Asturies, l’oxetivu de puntos de recarga según Aedive y Faen sería disponer d’unos 500 d’accesu públicu en 2023, 3.200 en 2025 y 5.600 en 2030. Al respective de vehículos, en 2030 l’oxetivu sería cuntar con 110.000 eléctricos (puros y híbridos enchufables).

    Los últimos datos públicos disponibles, correspondientes a 2021, indiquen que la comunidá disponía de 224 puntos de recarga d’accesu públicu, 1.542 turismos y 163 motocicletes con etiqueta ambiental cero. Nesti sentíu, Asturies ye una de les comunidaes con mayor desenvolvimientu del vehículu eléctricu.

    Ayudes públiques

    Nes dos primeres ediciones del Programa Moves d’ayuda a la compra de vehículos ecolóxicos nuevos, que cuntaron con 3 millones de presupuestu, concediéronse fondos pa 75 automóviles híbridos enchufables, 156 eléctricos y furgonetes, 30 camiones de gas natural licuado, 19 motociclistes, 9 instalaciones de préstamu de bicicletes y 176 puntos de recarga, ocho d’ellos rápidos.

    Nel marcu del Moves III, abiertu dende va un añu y entá a valir hasta finales de 2023, convocáronse primeramente 8 millones en subvenciones. Nestos momentos yá hai solicitaos 1.016 vehículos, l’equivalente al 70% de los fondos disponibles (unos 3,6 millones), y solicitúes pa la instalación de 749 puntos de recarga, trés vegaes per encima del presupuestu de la llinia.

    Por ello, l’Institutu pa la Diversificación y Aforru de la Enerxía (Idae) amplió n’otros 10,5 millones los fondos asignaos a Asturies, de cuenta que el Moves III dispon yá de 18,5 millones.

  • El turismu de cruceros consolídase en Xixón

    El turismu de cruceros consolídase en Xixón

    El Puertu de Xixón consolídase como destín pal turismu de cruceros. Cola llegada del Borealis, prevista pal 16 d’avientu, seríen 29 los buques de pasaxeros qu’anguaño atracaron n’El Musel. Esto supon una medría del 52% al respective de 2019, l’añu con meyores resultaos pal turismu de cruceros na ciudá.

    El Musel tien capacidá ya infraestructura pa recibir dellos cruceros de forma simultánea. Esta situación diose dos vegaes anguaño, nos meses d’abril y agostu. Al puertu xixonés llegó, principalmente, pasaxe con nacionalidá alemana -12 buques, anque tamién recibió 10 cruceros estadounidenses y 6 británicos y una escala d’un veleru francés, el Club Med2.

    Los touroperadores más especializaos trabayen de manera habitual y coordinada col Puertu de Xixón y tienen una amplia ufierta d’escursiones de mediu día y de día completu, afeches a los distintos perfiles de pasaxeros que visiten Xixón. L’Autoridá Portuaria cuenta con delles carpes que faen les vegaes de terminal. Nelles allúguense los mostradores d’información turística, atendíos por personal de Xixón Turismu. Amás, el conceyu tamién facilita’l serviciu ininterrumpíu d’autobuses lanzadera que conecten col centru de la ciudá.

    D’esta manera, Xixón consolidóse como escala habitual pal turismu de cruceros n’Europa. Les estancies del pasaxe suponen un gran escaparate pa la rexón, de manera que los viaxeros pueden repitir a futuru’l destín con viaxes más llargos y, amás, convertir en prescriptores d’Asturies como destín turísticu nel so país d’orixe.

  • Asturies ta presente na feria World Travel Market de Londres

    Asturies ta presente na feria World Travel Market de Londres

    El Principáu refuerza la so promoción turística internacional con un área esclusiva dientro del pabellón de Turespaña na feria World Travel Market (WTM), que se celebra esta selmana en Londres. L’espaciu d’Asturies ta recibiendo consultes profesionales y detectóse un creciente interés impulsáu pol refuerzu de les conexones aérees directes con distintos destinos europeos.

    Amás, por cuenta de la celebración de la feria, Asturies fortalez la so estratexa d’allugamientu na capital británica con acciones promocionales en dellos medios de comunicación como The Times y el suplementu Check-in, del Daily Mail. Coles mesmes, un centenar de taxis eléctricos londinenses van llevar la imaxe turística del Principáu hasta finales de mes.

    World Travel Market ye una de les principales feries profesionales de turismu a nivel internacional y nesta edición cunta con 700 estands y más de 2.000 espositores d’un centenar de países y rexones.

  • Xixón, finalista pa ser capital europea del turismu intelixente en 2023

    Xixón, finalista pa ser capital europea del turismu intelixente en 2023

    Xixón representa la vanguardia de les práutiques de turismu intelixente nos destinos turísticos europeos. Asina lo considera la Comisión Europea, qu’incluyó a la ciudá asturiana ente los siete finalistes del certame Capital Europea del Turismu Intelixente 2023.

    La Capitalidá Europea de Turismu Intelixente ye una forma de premiar a les ciudaes europees con práutiques turístiques destacaes, anovadores y sostenibles y busca fortalecer el desendolcu anovador xenerao pol turismu nes ciudaes europees y la so redolada, aumentar la so prestancia y fortalecer el medru económicu y la creación d’emplegu.

    L’alcaldesa de Xixón, Ana González, y el direutor de Visita Xixón, Daniel Martínez Junquera, van aportar el 9 de payares viniente a Bruxeles pa defender la candidatura y demostrar les práutiques turístiques anovadores de Xixón nes estayes d’accesibilidá, sostenibilidá, dixitalización, padremoñu cultural y creatividá. Ta previsto que’l xuráu faiga públiques les dos Capitales Europees del Turismu Intelixente de 2023 esi día mesmu a hora última de la tarde.

    Xixón enfréntase nesta fase final a Aarhus (Dinamarca), Pafos (Xipre), Porto (Portugal), Donostia (España), Sevilla (España) y Zagreb (Croacia).

    Fortaleces de Xixón

    “Vamos  poner el focu nes personas, el verdaderu atractivu de la ciudá, y vamos amosar al xuráu cómo Xixón pasó de ser eminentemente industrial a una ciudá que supo reinventase, convirtiéndose en referente del turismu de calidá, base d’empreses tecnolóxiques y d’innovación (Parque tecnolóxicu) y de centros d’investigación (Milla del conocimientu)”, esplica l’alcaldesa Ana González. Xixón va sorrayar l’amplia esperiencia de so en programes de calidá, sostenibilidá, accesibilidá y anovación, l’apueste por eventos culturales internacionales, la dixitalización y l’emplegu de les nueves teunoloxíes y la xestión turística y de congresos de la ciudá, ente otros aspeutos.

    Los ganadores del títulu de Capital Europea del Turismu Intelixente 2023 van recibir sofitu en comunicación y desendolcu de marca pa promocionar el destín, una escultura en forma de hashtag xixante pal centru la ciudá, un videu promocional que represente’l destín y práutiques de turismu intelixente y aiciones publicitaries diseñaes dafechu pa elevar el perfil de la ciudá a nivel internacional y aumentar el númberu de visitantes.

    La Capital Europea del Turismu Intelixente ye una iniciativa de la UE, financiada anguaño pol programa COSME, empobináu a promover el turismu intelixente na Xunión Europea premiando ciudaes polos enfoques anovadores n’accesibilidá, dixitalización, sostenibilidá y padremoñu cultural y creatividá. Basada na esperiencia esitosa d’una aición preparatoria propuesta pol Parlamentu Europeu, la iniciativa busca fomentar un desendolcu turísticu novedosu, inclusivu y sostenible, asina como l’espardimientu ya intercambiu de buenes práutiques.

  • L’Ayuntamientu de Xixón encarga un estudiu del impactu de les viviendes d’usu turísticu

    L’Ayuntamientu de Xixón encarga un estudiu del impactu de les viviendes d’usu turísticu

    “Primer informe d’analís sobro l’impautu social y económicu xeneráu poles Viviendes d’Usu Turísticu (VUT) nel conceyu de Xixón. Añu 2022”. Esi ye’l títulu provisional del estudiu que’l Conceyu de Xixón encargó a la Universidá d’Uviéu p’analizar l’impautu de les VUT na ciudá. La entrega del informe ta prevista pa febreru de 2023.

    Santos Tejón Llaneza, concejal de Promoción Económica, Empleo, Turismo y Comercio; Natalia González, concejala de Bienestar Social; y Loli Patón, concejala de Urbanismo, presentaron esti proyeutu nuevu güei na Casa Conceyu. Na presentación tamién s’afayó’l profesor de Socioloxía y responsable del equipu investigador de la Universidá d’Uviéu, Sergio González Begega.

    L’envís xeneral del proyeutu ye la ellaboración d’un documentu d’informe téunicu sobro la situación de les VUT nel conceyu de Xixón, con atención especial nes sos implicaciones sociales y económiques. La finalidá del documentu d’informe téunicu ye orientar llinies posibles d’actuación en materia de política pública municipal. El proyeutu va dar a los téunicos del Ayuntamientu de Xixón un fundamentu empíricu pa orientar les decisiones de xestión de la VUT, respondiendo asina a les perspeutives de crecimientu d’esta ufierta d’agospiu nos años vinientes.

    L’equipu investigador del proyeutu va tar compuestu pol profesor de la Universidá d’Uviéu Sergio González Begega, coordinador del proyeutu, y Claudia Suárez Arbesú, analista de datos ya investigadora de la Fundación Universidá d’Uviéu. Amás, el proyeutu va cuntar cola participación de los tamién profesores del departamentu de Socioloxía de la Universidá d’Uviéu José Pablo Calleja Jiménez y Arturo Colina Vuelta, como miembros del comité asesor y d’auditoría interna de calidá.

  • El turismu asturianu raspia los cinco millones d’estancies nel 2021 gracies a un aumentu nel segundu semestre hasta niveles prepandemia

    El turismu asturianu raspia los cinco millones d’estancies nel 2021 gracies a un aumentu nel segundu semestre hasta niveles prepandemia

    El sector turísticu asturianu raspió los cinco millones de pernoctaciones nel 2021 gracies a la importante xubida rexistrada nes nueches d’estancia nel segundu semestre del añu, con una crecedera del 7,2 % al respective del mesmu periodu del 2019 y del 41,5 % en comparanza col 2020.

    Los datos divulgaos güei pol Institutu Nacional d’Estadística (INE) sobre agospiamientos estrahoteleros d’avientu, que cierren la estadística anual, reflexen qu’Asturies recibió a 1.800.667 turistes y rexistró 4.963.947 pernoctaciones nel 2021, lo que representa aumentos del 42,4 y 40,5 %, respectivamente, sobre l’exerciciu anterior.

    Estes cifres suponen descensos del 23,6 y del 13,8 % en dambos conceptos al respective del 2019 —últimu añu ensin afecciones de la pandemia—, yá que nun ye pertinente la comparanza cola primer metá del 2020, na que los agospiamientos tuvieron suspendida la so actividá. La comparanza más equilibrada realizaríase considerando’l segundu semestre del 2019 y el del 2021, lo que supondría xubíes nésti últimu periodu del 0,8 % en visitantes y del 7,2 % en pernoctaciones.

    El desglose por segmentos d’agospiamientu ye positivu en toos ellos en comparanza col 2020. Asina, el númberu de viaxeros crez un 49,9 % pa los hoteles, un 23,9 % en campings, un 38,6 % n’apartamentos turísticos y un 27,8 % n’agospiamientos rurales. Pela so parte, les estancies xubieron n’hoteles (51,3 %), campings (26 %), apartamentos turísticos (49,3 %) y nel ámbitu rural (23,6 %).

    Pela so parte, el turismu internacional vuelve manifestar la so recuperación, al crecer un 145,3 % los viaxeros estranxeros y un 127 % les sos pernoctaciones, pa pasar a representar el 10,3 y el 8,6 % del global, frente la so aportación nel 2020, que foi del 6 y del 5,4 %, respectivamente.

    Rexistros d’avientu

    Los datos d’avientu del 2021 superen el récord d’estancies, con un total de 242.293, un 1,7 % más que nel 2019, añu nel que se rexistraron 238.295. Tocantes a los turistes, contabilizáronse 101.421, de cuenta que prácticamente multiplíquense por siete les cifres del 2020.

    En términos d’empléu, avientu cerró con 3.914 persones trabayando nos agospiamientos asturianos, 2.882 percima del mesmu mes del añu anterior.

    “Estos datos manifiesten por que’l procesu de recuperación del sector turísticu ye una realidá y que’l segundu semestre del añu foi escepcional, inclusive percima de niveles prepandemia”, destacó la viceconseyera de Turismu, Graciela Blanco.

    Pa Blanco, anguaño va suponer l’empiezu “de la mayor meyora n’inversión turística en décades”, yá que los fondos europeos Next Generation van implicar un gran impulsu, al movilizar prácticamente 27 millones nel Principáu.

    La viceconseyera reconoció’l trabayu desenvueltu en xunto col sector turísticu asturianu, que consideró “clave” pa encarar la situación xenerada pola pandemia.

  • L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’espaciu d’Asturies na Feria Internacional de Turismu (Fitur), premiáu como Meyor estand de comunidaes autónomes y instituciones, acoyó anguaño 343 reuniones profesionales del sector y favoreció 1.784 contactos comerciales.

    Estes cifres reflexen que la decisión d’aumentar la zona espositiva —un 30 % más amplia que l’añu pasáu— llogró bonos resultaos. Tamién influyó nestos rexistros la capacidá d’atracción del propiu estand, dedicáu al turismu de naturaleza y reflexu del apueste del Principáu pol compromisu medioambiental como exa de la competitividá turística.

    La participación d’Asturies na feria tamién tuvo una repercusión importante nos medios de comunicación, reforzada gracies a la realización nel mesmu estand de más d’un centenar d’entrevistes en distintu formatu a representantes institucionales y empresariales del sector turísticu rexonal.

    Pela so parte, los perfiles de Turismu Asturies llograron unes 300.000 visualizaciones nes distintes redes sociales. La retresmisión de presentaciones nel estand tuvo cuasi 13.500 visualizaciones y les fotografíes de los eventos publicaes en redes superaron les 40.000 visites.

    La edición de Fitur, clausurada apocayá, recuperó les presentaciones y actividaes nel espaciu d’Asturies, qu’acoyó una ventena d’actos. Ente otros, destaquen la mesa redonda sobre la cultura sidrera asturiana y l’espaciu temáticu dedicáu a la Cocina de Paisaxe, onde se celebraron diverses demostraciones gastronómiques.

  • Xixón presenta en FITUR «Xixón Data Lab» una ferramienta pa conocer la ocupación en tiempu real

    Xixón presenta en FITUR «Xixón Data Lab» una ferramienta pa conocer la ocupación en tiempu real

    Conocer con detalle la ocupación hotelera de la ciudá, ver la evolución de reserves pa un momentu concretu, saber el preciu al que s’ufren los cuartos… Toos estos datos van afayase en Gijón Data Lab, una ferramienta creada por Xixón Turismu pal sector d’agospios turísticos de la ciudá. Esta ferramienta estadística, frutu de la colaboración del sector públicu y priváu, va valir p’ameyorar la competitividá de los agospios y la de la ciudá de Xixón.

    La presentación de Gijón Data Lab fíxose güei nel marcu de FITUR y nel actu afayáronse la alcaldesa de la ciudá, Ana González, Berta Piñán, conseyera de Cultura, Política Llingüística y Turismu del Principáu d’Asturies, y el direutor de Xixón Turismu, Daniel Martínez Junquera.

    La alcaldesa destacó que esta ferramienta sal de la estay pública cola colaboración necesaria del sector priváu, una collaboración imprescindible pa faer realidá esta ferramienta. Destacó y agradeció tamién el trabayu del equipu de Xixón Turismu.

    Gijón Data Lab ye un espaciu pa que los agospios intercambien los sos datos y conocer asina la ocupación real. Gracies a esta ferramienta y l’analís de la información dada poles empreses, va prevese la ocupación futura. Un conocimientu de gran valir pa que los agospios puean tomar decisiones como asoleyar campañes de promoción.

    En Gijón Data Lab los agospios van poder:

    • Analizar el so rendimientu y comparalu con los sos cuatro competidores direutos, incluyendo:

    o    Datos d’hotel vs competidores a pasáu (ADR, RevPar, ocupación).

    o    Datos d’hotel vs competidores a futuru (Ocupación y evolución de les reserves).

    o    Comparativa vs competidores, plaza y agospios de la mesma categoría.

    • Monitorizar en tiempu real la ocupación y los precios medios de la plaza, tanto nel momentu actual como con un horizonte temporal de tres meses.
    • Consultar los eventos de la ciudá y venceyalos a la evolución de les sos reserves y la so ocupación.

    Pa la fase de desendolcu, Xixón Turismu cuntó cola colaboración de cinco hoteles de la ciudá. Agora, tolos agospios de la ciudá van poder xunise al proyeutu y beneficiase, de baldre, de la ferramienta.

  • Xixón, premiáu en FITUR pol so llabor nel turismu accesible

    Xixón, premiáu en FITUR pol so llabor nel turismu accesible

    La alcaldesa de Gijón/Xixón, Ana González, recibió esta tarde en FITUR un reconocimiento pol llabor realizáu nos años caberos nel desendolcu del turismu accesible. El presidente de Predif, Francisco Sardón, entregó el distintivu a la rexidora con motivu del 25 aniversariu de la so organización y agradeció-y tol trabayu na defensa del drechu al espardimientu de les persones con capacidá.

    Nel actu tamién tuvieron Berta Piñán, conseyera de Cultura, Política Llingüística y Turismu del Principáu d’Asturias, y Daniel Martínez Junquera, direutor de Xixón Turismu.

    “Éste es uno de los premios más importantes que ha recibido la ciudad de Gijón, porque no se puede decir que queremos una ciudad para las personas, una ciudad amigables y una ciudad para estar, y sin tener una ciudad al alcance de las personas”, reconoció l’alcaldesa.

    Xixón Turismu lleva trabayando más de 20 años n’accesibilidad. En 2014 punxo en marcha’l Programa d’Accesibilidá Turística, que buscaba tener información actualizada sobro l’accesibilidá de los recursos y establecimientos turísticos de Xixón; afitar a Xixón como un destín turísticu accesible pa toles persones; y ufrir a los turistes con discapacidá y necesidaes especiales y a les empreses turístiques información detallada sobro’l gráu d’accesibilidá de los establecimientos turísticos de Xixón y ferramientes teunolóxiques que faciliten l’accesibilidá.

    Tola información sobro’l programa, les empreses y la ufierta accesible de Xixón ta en: www.gijon.es/es/turismo/destino-accesible, www.gijonturismoprofesional.es y www.tur4all.com/destinations/gijon-xixon.

    Collaboración con Predif

    Xixón Turismu realizó, tamién en 2014 y en collaboración con Predif, el primer diagnósticu d’accesibilidá d’establecimientos y servicios turísticos de Xixón. Esti diagnósticu repítese cadañu y concédese’l distintivu TUR4all a les empresas qu’amuesen un gráu d’accesibilidá aceptable. Ente les actividaes distinguíes atópense agospios, museos y recursos turísticos, restoranes, tresportes, Teatru Xovellanos, Oficina de Turismu, Playa de Poniente, Palaciu de Congresos.

    Arriendes d’ello, en 2016 desendolcáronse 4 rutes d’interés turísticu accesibles y diseñóse un planu de turismu accesible pa informar sobro esos itinerarios peatonales accesibles. Un añu dempués, diseñáronse 4 esperiencies turístiques accesibles pa esfrutar en Xixón: Gijón sabe a mar; Gijón cultura y naturaleza; Gijón Rural; Gijón Urbano. Son propuestes de turismu accesible que promueven recursos adaptaos: agospios, restauración, paseos y rutes, museos, playa, actividaes d’espardimientu…

  • El Principáu promueve un conveniu pa fomentar y garantizar el turismu accesible ya inclusivu n’Asturies

    El Principáu promueve un conveniu pa fomentar y garantizar el turismu accesible ya inclusivu n’Asturies

    El Gobiernu d’Asturies y la Confederación de Persones con Discapacidá Física y Orgánica del Principáu (Cocemfe) roblaron güei un conveniu de collaboración col que se van crear cinco rutes d’accesu universal y que supon un pasu importante nel allugamientu del Principáu como destín turísticu accesible ya inclusivu.

    En virtú del alcuerdu promovido pola Conseyería de Cultura, Política Llingüística y Turismu, al traviés de la Sociedá Pública de Xestión y Promoción Turística y Cultural, el Principáu va destinar 30.000 euros a la promoción del turismu inclusivu, una collaboración que naz coles mires de caltenese al llargu plazu.

    El conveniu contempla’l desenvolvimientu, per parte del equipu técnicu de Cocemfe, de les cinco rutes d’accesu universal pol territoriu para consolidar Asturies como un destín turísticu accesible. La viceconseyera de Turismu, Graciela Blanco, adelantró nel actu de la firma qu’estes rutes, “una vegada auditadas y comprobaos los servicios y el grau d’accesibilidá”, van dar opciones para visitar Avilés, Xixón y Uviéu y dos enclaves de la zona rural.

    Blanco señaló que, amás del sofitu económicu, el Principáu comprométese a crear una guía turística dixital qu’esplique y detalle los itinerarios y a incorporar la información a les canales del portal d’internet TurismoAsturias y a les redes sociales.

    La viceconseyera enmarcó esta actuación na estratexa de Turismu del Principáu 2020-2030, que’l so oxetivu ye liderar el desenvolvimientu del turismu sostenible ya inclusivu na comunidá autónoma. Coles mesmes, manifestó que “la voluntá ye arreyar a les empreses por mediu d’una ufierta d’establecimientos turísticos accesibles y una formación específica de los profesionales nesti ámbitu que redunde nuna ventaya competitiva p’Asturies y el so texíu empresarial”.

    L’alcuerdu de collaboración ente Turismu y Cocemfe tien como finalidá la promoción d’un turismu inclusivu que garantice la igualdá d’oportunidaes pa desenvolver esta actividá d’una manera segura, cómoda y autónoma, y procurar el máximu beneficiu pa los turistes con diversidá funcional