Xixón al día

Etiqueta: Uviéu

  • El llaboratoriu de xenética del HUCA, a la vanguardia nel diagnósticu d’enfermedaes hereditaries

    El llaboratoriu de xenética del HUCA, a la vanguardia nel diagnósticu d’enfermedaes hereditaries

    El llaboratoriu de xenética del Hospital Universitariu Central d’Asturies (HUCA) avanzó notablemente na eficacia del so trabayu tres el so treslláu a les nueves instalaciones de La Cadellada. El departamentu asitióse a la vanguardia d’España pol númberu de pruebes que realiza añalmente, la so dificultá y los altos niveles de calidá que consigue.

    Una de les claves d’esti éxitu ye la incorporación de la técnica d’analís conocida como secuenciación masiva de nueva xeneración (NGS). L’alquisición, va cinco años, de los equipos necesarios facilitó l’usu habitual de práctiques que revolucionaron la xenómica, el diagnósticu y la conocencia d’enfermedaes hereditaries, de la que s’avanzó na medicina personalizada y de precisión.

    La incorporación de la secuenciación de nueva xeneración reforzó la posición del HUCA nel diagnósticu xenéticu dientro del Sistema Nacional de Salú (SNS). D’esta manera, permitióse evitar la derivación de munches pruebes a centros esternos y convertir l’hospital en referencia pa comunidaes como Cantabria, Castiella y Llión y Madrid.

    L’hospital ye referencia pa comunidaes como Cantabria, Castiella y Llión y Madrid

    Les pruebes que se soliciten dende fuera d’Asturies de forma más habitual tán rellacionaes con cardiopatíes, enfermedaes neurolóxiques y patoloxíes pediátriques rares. L’HUCA ye centru de referencia nacional en cardiopatíes hereditaries, enfermedaes neuromusculares o nefropediátriques y asítiase en bona posición p’ampliar esta cartera.

    L’actividá del llaboratoriu de xenética incrementóse de manera significativa, especialmente aquelles pruebes más complexes y de mayor costu, ente les que s’atopen toles qu’utilicen la metodoloxía NGS, que pasaron de 2.000 a 4.000 añales. Estes técniques, que permitieron aumentar la capacidá diagnóstica, constitúin amás una midida d’eficiencia, yá que se pasó de pagar de 800 a 900 euros por muestra analizada esternamente a un costu d’ente 200 y 300 por caúna examinada nel HUCA.

    Anguaño, bien pocos hospitales públicos ufierten un catálogu de pruebes xenétiques tan estensu como’l del centru de referencia de la sanidá asturiana, munches de les que llograron l’acreditación de la norma ISO 15189. Anguaño va sumase al conxuntu de pruebes acreditaes la NGS que s’aplica al diagnósticu de cardiopatíes.

    Una técnica en continuu progresu

    El diagnósticu d’enfermedaes xenétiques o hereditaries abórdase de distintes maneres. Antes namás s’estudiaben fragmentos pequeños de dellos xenes rellacionaos con estes patoloxíes, pero agora la NGS permite l’estudiu de cientos de xenes al empar, polo que s’eleva la especificidá y rapidez del diagnósticu.

    Por esta razón, nun mayor númberu de casos puede ufiertase asesoramientu xenéticu a los pacientes y la so redolada. Esto fai posible la realización de diagnósticos predictivos o presintomáticos y diagnósticos xenéticos prenatales o preimplantacionales que prtetenden atayar la tresmisión de la enfermedá nes families.L’usu d’esta metodoloxía potencióse pal abordaxe diagnósticu d’otres patoloxíes ya incorporóse personal especializáu pal so desempeñu.

    Toos estos asuntos van abordase na ‘I Jornada de secuenciación de nueva generación en el HUCA: un antes y un después en la medicina’, que va empezar el próximu vienres, 24 de mayu, a partir de les 9:00 hores, nel salón d’actos del HUCA y que va cuntar con espertos na materia, tanto del ámbitu de llaboratoriu como del clínicu. La doctora Carmen Díaz Ayuso, xefa del Serviciu de Xenética de la Fundación Jiménez Díaz y directora científica del el so institutu d’investigación sanitaria, va ser la encargada d’impartir la conferencia de clausura.

  • Siri Hustvedt, Premiu Princesa d’Asturies de les Lletres

    Siri Hustvedt, Premiu Princesa d’Asturies de les Lletres

    La escritora estadounidense Siri Hustvedt (Northfield, Minnesota, EE. UU., 19 de febreru de 1955) foi galardonada col Premiu Princesa d’Asturies de les Lletres 2019, según fixo públicu güei n’Uviéu‘l xuráu encargáu de la so concesión. Novelista, ensayista y poeta, d’oríxenes noruegos, llicenciada n’Hestoria nel St. Olaf College, doctoróse en 1986 en Lliteratura Inglesa pola Universidá de Columbia con una tesis sobre Charres Dickens na que yá apaecen los sos autores de referencia, ente otros, Kierkegaard, Emile Benveniste, Roman Jakobson, Mikhail Bakhtin, Freud, Lacan, Mary Douglas, Ricoeur o Julia Kristeva. Esperta en neurociencia y psicoanálisis, la so primer publicación foi un poema en The Paris Review. En 1982 publicó una colección de poesía, ‘Reading to You’. Conoció a Paul Auster –Premio Príncipe d’Asturies de les Lletres 2006– nuna llectura de poemes en 1981 y casáronse al añu siguiente.

    Estudiosa ya intelectual que s’ocupa de les cuestiones fundamentales de la ética contemporanea y l’epistemoloxía y conocida tamién pola so militancia feminista, contribuyó cola so obra al diálogu interdisciplinariu ente les ciencies y les humanidaes. Publicó ensayos y artículos en revistes académiques y científiques, ente otres en Contemporary Psychoanalysis, Seizure: European Journal of Epilepsy, Neuropsychoanalysis y Clinical Neurophysiology. La so colección de 32 conferencies y artículos pronunciaes y publicaos respectivamente ente 2005 y 2011, Living, Thinking, Looking, 2012 (Vivir, pensar, mirar, 2013) ye una amuesa del so ampliu y fondu aprendizaxe en delles disciplines. Nellos desenvuelve dalgunos de les sos temes preferíes, rellacionaos cola lliteratura, la filosofía, la psicoloxía, el psicoanálisis y les neurociencies.

    Conocida tamién pola so militancia feminista, contribuyó cola so obra al diálogu interdisciplinariu ente les ciencies y les humanidaes

    Traducida a más de trenta idiomes, Hustvedt publicó en 1992 la so primer novela, ‘The Blindfold’ (‘Los güeyos vendaos’) y cola so tercer obra, ‘What I Loved’ (‘Too cuanto amé’, 2003) consiguió sonadía internacional. En 2010 publicó l’ensayu ‘The Shaking Woman or A History of My Nerver’ (‘La muyer trémbole o la hestoria de los mios nervios’, 2010). Bien interesada tamién pola pintura, impartió charres sobro esta tema nel Muséu del Prau y nel Metropolitan Museum of Art de Nueva York y publicó un volume d’ensayu, ‘Mysteries of the Rectangle: Essays on Painting’ (‘Los misterios del rectángulu’, 2005). Otres obres sos son ‘The Enchantment of Lily Dahl’ (‘El conxuru de Lily Dahl’, 1996), ‘The Sorrows of an American’ (‘Escoyía pa un americanu’, 2008), ‘The Summer Without Men’ (‘El branu ensin homes’, 2011), ‘The Blazing World’ (‘Un mundu esllumante’, 2014), ‘Reading to You’, 1983 (‘Lleer pa ti’, 2007), ‘Yonder’ (‘En llontanza’, 1998) y ‘A Plea for Eros’, 1997 (‘Una súplica pa Eros’, 2005). El so últimu ensayu publicáu ye ‘A Woman Looking at Men Looking at Women’, 2016 (‘La muyer que mira a los homes que miren a les muyeres’, 2017).

    Doctora honoris causa pola Universidá Stendhal de Grenoble (2015), en 2004 recibió’l Premiu de los Llibreros de Quebec por Tou cuanto amé y en 2012, el Premiu Internacional Gabarrón de Pensamientu y Humanidaes gracies a el so llabor investigador y les sos idees sobro filosofía, neurociencia y psicoloxía.

    El xuráu tuvo presidíu por Santiago Muñoz Machado ya integráu por Xosé Ballesteros Rey, Xuan Bello Fernández, Blanca Berasátegui Garaizábal, Jordi Gracia García, Lola Larumbe Doral, Antonio Lucas Herrero, Carmen Millán Grajales, Rosa Navarro Durán, Leonardo Padura Fuentes, Pablo Remón Magaña, Laura Revuelta Sanjurjo, Ana Santos Aramburo, Íker Seisdedos García, Diana Sorensen, Juan Villoro y Fernando Rodríguez Lafuente (secretariu).

    Los Premios Princesa d’Asturies tán destinaos a galardonar «el llabor científicu, técnicu, cultural, social y humanitariu realizáu por persones, instituciones, grupos de persones o instituciones nel ámbitu internacional”. Conforme a estos principios, el Premiu Princesa d’Asturies de les Lletres concédese «al llabor de cultivu y perfeccionamientu de la creación lliteraria en tolos sos xéneros».

    Nesta edición allegábense un total de 28 candidatures procedentes de 17 países. Este foi’l quintu de los ocho Premios Princesa d’Asturies que se conceden anguaño, en que cumplen el so trixésimu novena edición. Enantes fueron otorgaos el Premiu Princesa d’Asturies de les Artes al dramaturgu británicu Peter Brook, el de Comunicación y Humanidaes al Muséu Nacional del Prau, el de Cooperación Internacional al matemáticu ya inxenieru estadounidense Salman Khan y Khan Academy y el de los Deportes a la esquiadora estadounidense Lindsey Vonn. Nes próximes selmanes van fallase los correspondientes a Ciencies Sociales, Investigación Científica y Técnica y Concordia. Caún de los Premios Princesa d’Asturies ta dotáu con una escultura de Joan Miró, un diploma, una insinia y 50.000 euros.

  • Ataquen a pedraes les sedes de Ciudadanos y Vox n’Uviéu

    Ataquen a pedraes les sedes de Ciudadanos y Vox n’Uviéu

    Una de les ventanes de la sede de Ciudadanos (Cs), na cai Posada Herrera d’Uviéu, apaeció rota esti martes pol impactu d’una piedra. La formación punxo en conocencia de la Policía Nacional. El secretariu d’organización del partíu n’Asturies, Sergio García, condergó estos fechos que califica de «llamentables» porque amuesen, asegura, que «delles persones nun entienden lo que ye la democracia”. García espera que sía «un fechu aislláu» y afirma que «nun nos van a amedranar porque vamos siguir trabayando na campaña tan bien como hasta agora».

    Tamién foi atacada la sede de Vox Asturies, que s’alcuentra xustu nel pisu d’arriba. «VOX Asturies conderga esti tipu d’actos qu’atenten contra la esencia mesma de la democracia y la llibertá d’espresión, y d’escoyer llibremente una opción política. Dende VOX Asturies reclamamos la condena del restu de partíos a esti tipu de fechos delictivos».

  • Llutu sportinguista: morrió Miguel Montes

    Llutu sportinguista: morrió Miguel Montes

    Miguel Montes morrió la pasada madrugada, víctima d’una llarga enfermedá oncolóxica. Ocupara prácticamente tolos posibles cargos deportivos nel Sporting, dende futbolista hasta entrenador del filial y del primer equipu, según los de máximu responsable de Mareo y de la secretaría técnica.

    Miguel Ángel Montes naciera n’Uviéu‘l 28 de febreru de 1939. Como futbolista, defendió los colores del Atlánticu, Revillaxixéu, Hispania, Siero, Sporting, Las Palmas y Real Oviedo. Pol Sporting fichó en 1959 y xugó nuna primer etapa hasta 1961, cuando tuvo que realizar el serviciu militar, tiempu nel que militó na UD Las Palmas. Tornó al añu siguiente para siguir como sportinguista hasta 1969. Foi’l xugador del Sporting qu’intervieno en más partíos en Segunda División, 217. En total, xugó como sportinguista 259 partíos y marcó 68 goles; 224 en Lliga y 35 en Copa.

    Como técnicu entrenó al Xixón Industrial, Avilés, Llangréu, Zamora, Palencia, Lleonesa, Arosa y Endesa de Ponferrada. Dirixió al Sporting Atléticu en 1984, foi director de la Escuela de Fútbol de Mareo en 1986, secretariu técnicu dende 1988 hasta 1990 y entrenador del primer equipu dende finales de la campaña 1996-97 hasta empiezos en 1997-98. Foi-y concedida la insinia d’oru de l’Asociación de Veteranos.

    El funeral de cuerpu presente por Miguel Montes tendra llugar na Ilesia Parroquial del Corazón de María, a les cinco de la tarde de mañana martes y, de siguío, el so treslláu al Tanatoriu de Xixón-Cabueñes, onde los sos restos mortales van ser incineraos. El veloriu ta asitiáu na sala 8 del Tanatoriu Xixón-Cabueñes.

  • Trabe inaugura n’Uviéu una llibrería especializada en lliteratura asturiana

    Trabe inaugura n’Uviéu una llibrería especializada en lliteratura asturiana

    Ediciones Trabe pon llibrería otra vuelta. «Préstanos enforma davos esta noticia y dar al mundu del llibru asturianu y a la sociedá asturiana en xeneral una allegría y una nota d’optimismu: ye posible vivir y trabayar n’Asturies y n’asturianu, ensin aspavientos, pasín a pasu, col llabor diariu y con esperanza, con enfotu», afirma la editorial nuna nota na so páxina web.

    El nuevu espaciu inaugúrase güei de magar les 20 hores na cai Fernando Alonso, 17 – Baxu d’Uviéu. «Depués d’años de crisis y resistencia, Ediciones Trabe reabre la so llibrería, especializada en lliteratura asturiana, d’Asturies y sobre Asturies».

    Depués del pieslle de les hestóriques Alborá Llibros en Xixón, Paraxuga n’Uviéu, y otres esperiencies con menos percorríu pero tamién destacables como la Llibrería Seronda n’Avilés, Llibrería Ítaca en Xixón, o la propia d’Ediciones Trabe nel barriu de Pumarín, n’Uviéu, Asturies torna a cuntar con una llibrería especializada en llibru n’asturianu.

  • Lindsey Vonn, Premiu Princesa d’Asturies de los Deportes

    Lindsey Vonn, Premiu Princesa d’Asturies de los Deportes

    La esquiadora estadounidense Lindsey Vonn foi galardonada col Premiu Princesa d’Asturies de los Deportes 2019, según fixo públicu güei n’Uviéu‘l xuráu encargáu de la so concesión. Ye la muyer con más victories na hestoria de la Copa del Mundu d’esquí alpín. En 2016, al consiguir el so trunfu númberu 63, superó’l récord qu’ostentaba Annemarie Moser-Pröll dende los años setenta. La so candidatura foi presentada por Theresa Zabell, presidenta de la Fundación Ecomar.

    Lindsey Vonn nació’l 18 d’ochobre de 1984 en Saint Paul (Minnesota, Estaos Xuníos) n’una familia d’esquiadores. Debutó nesti deporte con 7 años y con 9 disputó les sos primeres pruebes internacionales. Con 14 años foi la primer estadounidense en ganar el Troféu Topolino (Italia) y en 2001 consiguió la so primer victoria n’una competición oficial de la Federación Internacional d’Esquí. Na temporada 2004-05 remató en primer posición seis pruebes de la Copa del Mundu y debutó nel Campeonatu del Mundu, pero foi la so incorporación al Proyectu Especial d’Atletes de Red Bull, dirixíu por Robert Trenkwalder, entrenador que cooperaba col equipu estadounidense d’esquí, lo que supunxo una gran progresión na so carrera. L’añu 2009 marcó l’ascensu d’esta al proclamase doble campeona del mundu en descensu y supergigante y revalidar el de campeona na xeneral de la Copa del Mundu.

    El xuráu d’esti Premiu convocáu pola Fundación Princesa d’Asturies tuvo presidíu por Abel Antón Rodrigo ya integráu por Alejandro Blanco Bravo, Vicente del Monte González, marqués de Del Bosque, Miguel Carballeda Piñeiro, María Paz Corominas i Guerin, Alex Corretja Verdegay, Joaquín Folch-Rusiñol Corachán, Ernest Folch i Folch, Juan Ignacio Gallardo Tomé, Joan Llaneras Roselló, Sylvana Mestre Alexandre, Luis Nieto Tortuero, Santiago Nolla Zayas, Edurne Pasabán Lizarribar, Paloma del Río Cañadas, Sitapha Savané Sagna, Alberto Suárez Laso y Patricia García Rodríguez (secretaria).

  • Uviéu acueye esti fin de selmana’l II Seminariu Oficialidá

    Uviéu acueye esti fin de selmana’l II Seminariu Oficialidá

    El rector de la Universidá d’Uviéu, Santiago García Granda, va inaugurar esti vienres n’Uviéu el II Seminariu ‘Oficialidá, el camín constitucional de futuru pal asturianu’. El presidente d’Iniciativa pol Asturianu, Inaciu Galán, y la vocal de voluntariáu de la organización, Sabel Tuñón, presentaron esti martes n’Uviéu el programa completu d’esta segunda edición que se va celebrar los díes vienres 17 de mayu y el sábado 18 de mayu nel Edificiu Hestóricu de la Universidá d’Uviéu.

    El programa inclúi varies meses redondes con representantes políticos de los partíos que tuvieron responsabilidá de gobiernu, con empresarios y profesionales qu’utilicen l’asturianu na so llabor comercial, con trabayadores de los servicios de normalización, con representantes de sindicatos del sistema educativu, y otra mesa con periodistas. Amás, dientro de la primera xornada, va presentase un nuevu documental baxo’l títulu «El valir económicu d’una llingua» sobre diferentes empreses qu’usen l’asturianu nos sos productos o servicios y nel que van falar tamién economistes desplicando los beneficios que supondría la oficialidá de la llingua asturiana.

    El programa del seminariu.
    El programa del seminariu.

    Tamién hai que destacar les ponencies de Leopoldo Tolivar Alas y Víctor Manuel Vázquez Portomeñe, exconseyeru del Gobiernu del PP de Galicia que va aportar una visión interesante sobre’l desarrollu de la oficialidá na comunidá vecina.

    El seminariu va acabar con una semeya colectiva baxo’l lema ‘La sociedá asturiana axúntase pola oficialidá’ nel patiu del Edificiu Hestóricu de la Universidá d’Uviéu nel que representantes de la sociedá asturiana van sofitar la oficialidá del asturianu.