Asturies lideró’l descensu del paru n’España en xunetu al rexistrar 1.484 persones desemplegaes menos. L’amenorgamientu algamó’l 2,66%, porcentaxe bien cimeru a la media nacional, que s’asitió nel 0,41%. Tocantes a les afiliaciones a la Seguridá Social, alzóse hasta 384.401, la cantidá más alta dende agostu de 2010.
Conforme a los datos publicaos güei pol Ministeriu de Trabayu y Economía Social, Asturies cerró xunetu con 54.333 persones en paru, la cantidá más baxa pa esi mes dende 2008. El paru baxó en dambos sexos (más en muyeres que n’homes), en tolos tramos d’edá y en toles actividaes económiques, especialmente nel sector servicios.
El descensu débese en bona midida a les contrataciones venceyaes al ámbitu turísticu. Asina, produciéronse cayíes del desempléu cimeros a dos díxitos en conceyos como Castropol (11,82%), Cabrales (18,03%), Onís (20,69%) y Somiedu (24,14%). Tamién se rexistraron amenorgamientos bien importantes en Cangues d’Onís (9,69%) y Llanes (7,5%).
Les contrataciones esperimentaron una evolución positiva: crecieron un 7,37% -el porcentaxe más altu de toa España- y trés de cada diez fueron indefiníes. Nesti capítulu, la evolución d’Asturies tamién foi muncho más favorable que la media nacional, que rexistró un retrocesu del 4,11%.
La evolución del últimu añu presenta tamién un saldu favorable: Asturies suma 4.373 persones en paru menos qu’en xunetu de 2022. En relación col entamu de l’anterior llexislatura –esto ye, xunetu de 2019- Asturies tien 11.033 paraes menos. Lo mesmo vien asoceder coles afiliaciones a la Seguridá Social: el Principáu cunta con 11.970 cotizantes más que va cuatro años.
