El presidente del Principáu, Adrián Barbón, defendió güei la dimensión ética de la esperanza, que n’Asturies se fixa, según el Presidente del Gobiernu asturianu, na década del cambéu: “La comunidá ta dispuesta a soterrar les sos traumas: el cayente industrial, l’aislamientu pola falta de comunicaciones y la falta d’arguyu d’identidá”. Na so intervención mientres la inauguración de la XXVIII xunta plenaria de la Fundación Círculu de Montevideo: El renacer de la ética, aportunó en que “toles persones y sociedaes tienen el derechu, y el deber, de pensar que les sos palabres y los sos fechos pueden ameyorar el so mundu”.
Nesti foru d’alderique y reflexón, Barbón abogó pol compromisu éticu continuu de l’acción política, porque “cuando la mentira se normaliza, la democracia enferma”. “Parto del convencimiento de que’l políticu, y en mayor midida quien gobierna, tien el deber de la exemplaridá pública”, sorrayó.
Poro, esplicó que dende la so toma de posesión en 2019 empeñóse en “caltener Asturies alloñada de la política tóxica, como un abellugu políticu énte’l recalentamientu insoportable de la política n’otros llugares d’España”. Asina, recordó que’l diálogu y la busca de consensos fueron los sos faros na pasada llexislatura y dexaron alcordar, ente otres cuestiones, “un planteamientu común sobre’l financiamientu autonómicu ente toles fuerces parlamentaries del que solo se descolgó Vox”. “Tenemos un gobiernu y unes cuantes fuerces polítiques capaces de subordinar los sos intereses de partíu pol bien común”, valoró.
