Asturies va ser una de les paraes de la Blue Expedition, una travesía marítima integrada na campaña europea de sensibilización pa frenar la invasión de plásticos nos ecosistemes marinos. La espedición, realizada a bordu del barcu muséu ecoactivu Mater, va recalar nel Puertu d’Avilés ente’l xueves y el domingu coles mires d’averar a la ciudadanía la magnitú d’esti problema y los sos efectos nocivos sobre’l mediu ambiente, la salú y l’economía. Tamién promueve acciones individuales y colectives p’amenorgar el so impactu.
La espedición forma parte del proyectu européu Interreg Blue Point, nel que participa’l Gobiernu d’Asturies. La iniciativa moviliza más de 3,3 millones, financiaos con fondos europeos y aportaciones de los socios participantes, y céntrase n’analizar la cadena de valor del plásticu marino ya identificar nueves oportunidaes económiques sostenibles derivaes de la so xestión.
El proyectu promueve la cooperación ente cuatro rexones atlántiques —España, Francia, Irlanda y Portugal—, cola participación d’entidaes públiques, universidaes, centros d’investigación y empreses privaes. Nel nuesu país, lidera la iniciativa la Diputación Foral de Gipuzkoa cola collaboración del Principáu d’Asturies, l’Agrupación de Sociedaes Asturianes de Trabayu Asociáu y Economía Social (Asata), la Sociedá pal Desenvolvimientu Rexonal de Cantabria (Sodercan) y el Centru d’Investigación en Xestión Empresarial, Innovación y Emprendimiento de Corporación Mondragón (Mik).
Tres parar nos puertos de Pasaia y Santander, la llegada del Mater a Avilés va venir acompañada d’un ampliu programa d’actividaes pa tolos públicos: una esposición interactiva, talleres familiares, visites guiaes al barcu, proyecciones, recoyíes de borrafes marines, creaciones artístiques con plásticos reciclaos y alcuentros específicos pa profesionales del sector marítimu. El xueves, 23 d’ochobre, va presentase, a bordu del barcu, el programa completu d’actividaes.
