El Gobiernu d’Asturies inclúi nel so proyectu de presupuestos para 2023 un ambiciosu plan de restauración patrimonial qu’entiende l’aprobación del primer Plan d’Horros, que va dexar el caltenimientu y recuperación d’estos elementos etnográficos. El mesmu capítulu contempla delles intervenciones nel arte prerrománicu y en distintos bienes d’interés cultural. Les cuentes de la conseyería van algamar 85,6 millones, casi 16 más qu’anguaño.
La conseyera, Berta Piñán, esplicó que’l denomináu Plan d’Horros contempla una batería de midíes que se van aplicar los próximos años, como’l cambéu de la regulación d’estos elementos etnográficos, col fin d’ameyorar el so caltenimientu y rehabilitación. Van definise los nuevos usos a los que podrán dedicase.
Xuntu con otres midíes, el presupuestu preve la redacción del Llibru Blancu del Horru, al que se van destinar 100.000 euros y l’aumentu, hasta 350.000 euros, de les sovenciones a particulares pa la restauración. Caltien les aportaciones a l’Asociación Amigos del Horru y a la Fundación CETEMAS pa siguir col proyectu d’almacén de pieces. Otra de les midíes recoyíes ye la restauración del emblemáticu horru de Vis, n’Amieva, derrumbáu en 2020, pa la que se destinen 40.000 euros. Complementariamente, créanse dos nueves llinies d’ayudes destinaes a particulares y conceyos pa realizar intervenciones en bienes etnográficos nes brañes, pa les que se van acutar 50.000 euros en total.
En total, les cuentes contemplen 1,2 millones pa la restauración patrimonial. El prerrománicu tien asignáu mediu millón pa encarar intervenciones na cripta de Santa Leocadia, Santa María del Naranco, San Pedro de Nora, La Foncalada y el proyectu de sienda piatonal nel Narancu. Coles mesmes, van invertise 300.000 euros p’anovar la esposición permanente dedicada al prerrománicu nel Muséu Arqueolóxicu d’Asturies.
Amás, el presupuestu preve actuaciones de rehabilitación nes ilesies de La Lloraza, San Pedro d’Arroxo, Santa María de Zarréu, Bustiello y nel Monesteriu de Oubona. Tamién va dexar siguir los trabayos empecipiaos en Ponte d’Arcu (Llaviana) y la Torre de Sotu (Ayer).
Otra de les novedaes ye la dotación de 50.000 euros pa la Mesa del Camín Primitivu de Santiago, pues la so creación alcordóse el pasáu xunetu. Esta asociación va constituyise en 2023 y va tar integrada polos conceyos asturianos polos qu’escurre esta ruta, asociaciones xacobees y el mesmu Principáu.
Per otra parte, los fondos europeos Next Generation van dexar otorgar 1,1 millones d’ayudes estraordinaries a la cultura asturiana. Amás, el programa Asturies Cultura en Rede va cuntar con 1.052.000 euros pa llevar los distintos circuitos per tol territoriu.
Camín de Santiago
La Viceconsejería de Turismu cunta 30,3 millones colos que va esplegar inversiones y acciones promocionales p’avanzar nel tresformamientu del sector con una perspectiva equilibrao y sostenible. Esta cantidá supon un máximu históricu.
Con esta dotación llanzaráse una convocatoria de sovenciones pa que los conceyos puedan acometer meyores nos albergues y les rutes del Camín de Santiago. Per otru llau, el proyectu recueye’l creitu necesariu pa desenvolver los planes ordinarios de sostenibilidá turística en Tinéu y Cangues d’Onís.
Coles mesmes, el presupuestu inclúi una ambiciosa campaña promocional, dotada con un millón, p’aprovechar el potencial turísticu de la conexón d’Asturies cola alta velocidá ferroviaria. Otramiente, va dedicar otru millón a impulsar la proyección del turismu industrial.
N’otru orde d’actuaciones, la Dirección Xeneral de Política Llingüística preve ampliar la dotación del programa Falamos, desenvueltu en collaboración cola Federación Asturiana de Conceyos, hasta 131.500 euros.
Deporte
El proyectu recueye una medría del 20% na llínea d’ayudes a los clubes deportivos pa la participación en competiciones d’altu nivel. La convocatoria va cuntar con una dotación de 450.000 euros, de los que 415.000 van ser pa clubes y 35.000 pa los premios a la excelencia deportiva. Amás, la Dirección Xeneral de Deporte va cuntar con 628.000 euros procedentes del Plan de Recuperación, Tresformamientu y Resiliencia pa sofitar acciones destinaes a la promoción de la igualdá y l’inclusión nel deporte.
Otru de los proyectos novedosos de la Conseyería pal añu 2023 ye la ellaboración d’un proyectu de diseñu de la Ruta Transcantábrica pa poner en valor la so riqueza natural y patrimonial, y el so potencial turísticu y deportivu.
