El pasáu viernes 29 de payares, la sala Estilo d’Uviéu enllenóse pa recibir a Depedro. Dientro del ciclu d’alcuentros Vibra Mahou, el proyectu en solitariu de Jairo Zavala deleitó al públicu asistente con un espectáculu d’unes dos hores de duración, nel que presentó el so nuevo trabayu d’estudiu, Un lugar perfecto, ensin dexar de facer un repasu a los sos temes más conocíos.
La nueche entamó, unos minutos pasaes les 9 hores, con Lo que va pasando, primer tema de los nueve qu’interpretó del nuevu álbum. Siguió con Como el viento, Lugar perfecto y Nubes de papel con un públicu yá absolutamente entregáu a la fusión de ritmos que caracteriza al madrileñu.
Un poco enantes de la mitá del show, el grupu asturianu Alberto & García xuníase pa tocar ente’l públicu un popurrí ente La vida es un carnaval y El pescador convirtiendo la sala Estilo nuna folixa cargada de buen rollu y enerxía. La banda continuó repasando canciones vieyes y nueves, xenerando un ambiente íntimu a ratos con Te sigo soñando o Tu mediodía, acompañaos de la virtuosa trompeta de Raúl Marqués, o más rockeru con temes como Noche oscura.
Tres dalgo más d’hora y media de conciertu, Depedro amagaba a despedise cola so personal versión de la Llorona, consiguiendo unu de los momentos de mayor entrega del respetable, que la coreó de principiu a fin. Tres dexar l’escenariu y ensin facese muncho de rogar salieron de nuevu al escenariu pa poner el ramu coles “otres trés” que-y pidíen los asistentes: Niebla, Diciembre y Mañanita.
Con esti conciertu remátase esta temporada del ciclu Directos Vibra Mahou que completaron Carlos Ares y Carlangas.
