Xixón al día

Autor: xixonaldia

  • Izquierda Xunida considera’l Plan Llave de Vivienda Pública de Moriyón «un negociu, non una política pública»

    Izquierda Xunida considera’l Plan Llave de Vivienda Pública de Moriyón «un negociu, non una política pública»

    El voceru municipal d’Izquierda Xunida nel Conceyu de Xixón, Javier Suárez Llana, calificó esta mañana como “operación netamente privada” el Plan Llave presentáu pola alcaldesa Carmen Moriyón, “col que nun busca garantizar l’accesu a la vivienda sinón asegurar negociu a los promotores privaos per aciu la venta de suelu públicu municipal”.

    Suárez Llana llamenta que “en cuenta d’apostar por polítiques qu’aumenten el parque municipal de vivienda pública, garanticen arriendos afayadizos y contribuyan a baxar precios, Foro opte por vender suelu públicu pa construyir viviendes que van ser vendíes a precios similares a los del mercáu llibre. El Plan Llave de Moriyón nun soluciona’l problema: ye un negociu, non una política pública”.

    “Si se trata de facilitar l’accesu a la vivienda, nun sirve construyir viviendes en cualquier sitiu y so cualquier fórmula”, esplica’l conceyal d’IX, que recuerda que la Conseyería d’Ordenación del Territoriu, Urbanismu y Vivienda ta desenvolviendo un estudiu sobro la situación de la vivienda en Xixón que va sirvir de ferramienta pa planiar les actuaciones en materia de vivienda pública y les zones nes que son necesaries. “¿Por qué se va a promover la construcción de vivienda en suelu públicu en Ciares o El Cotu y non na zona oeste?”, pregunta Suárez Llana, que defende que “les polítiques de vivienda precisen planificación, y la propuesta de Foru escarez d’ella. Tamos una vegada más ante un tresvase de recursos de lo público a lo privao; neso consiste’l plan del gobiernu”.

    Nesti sentíu, el voceru d’IX pregúntase tamién en qué va a reinvertir el Conceyu’l dineru llográu cola venta de suelu públicu, habida cuenta de que la normativa obliga a facelo nel mesmu patrimoniu municipal de suelu o, nesti casu, en vivienda pública. “Lo que preguntamos ye si esto ye una xugada de Monopoly de Moriyón pa consiguir el dineru que nun tien pa mercar los terrenes de PYMAR n’El Natahoyo”.

    Frente a la propuesta de Foro, Suárez Llana defende la necesidá de que’l Conceyu ponga suelu municipal a disposición d’actuaciones públiques p’arriendu afayadizu qu’incidan nel mercáu de la vivienda y contribuyan a baxar los precios. Tamién que “frente a la collaboración públicu-privada, se busquen alternatives de collaboración públicu-comuñal, como ye’l casu de les cooperatives de vivienda, qu’en Xixón sirvieron va décades pa facilitar l’accesu a la vivienda en munchos barrios, o les nueves fórmules de vivienda colaborativa como’l cohousing”.

    El voceru d’IX apuesta por potenciar el papel de la Empresa Municipal de la Vivienda, que “tien de convertise nuna promotora de vivienda pública y nuna ferramienta más eficaz pa movilizar vivienda vacía”.

  • Los edificios públicos asturianos van illuminase de verde como sofitu a la candidatura de la cultura sidrera a Patrimonio Inmaterial de la Humanidad

    Los edificios públicos asturianos van illuminase de verde como sofitu a la candidatura de la cultura sidrera a Patrimonio Inmaterial de la Humanidad

    El Gobiernu d’Asturies va illuminar de verde los principales edificios y equipamientos del Principáu del 2 al 8 d’avientu pa sofitar la candidatura de la cultura sidrera asturiana a Patrimoniu Cultural Inmaterial de la Humanidá de la UNESCO, un xestu simbólicu al qu’inviten a los ayuntamientos, instituciones públiques y privaes, organizaciones y sociedá civil a sumase.

    eEl color verde simboliza tanto los paisaxes d’Asturies como la mazana cola que s’ellabora la bebida identitaria más señalada de la nuestra comunidá autónoma. Tamién la tradicional botella de vidru verde dende la que s’echa la sidra. Amás, representa la esperanza de llograr esti reconocimientu mundial, que va tener un impactu importante pal Principáu.

    Pa resolver les duldes sobre esta iniciativa, les persones interesaes pueden unviar les sos consultes a la dirección de corréu electrónicu conseyeriadecultura@asturias.org.

    La conseyera de Cultura, Política Llingüística y Deporte, Vanessa Gutiérrez, y el director xeneral de Patrimoniu Cultural, Pablo León, van viaxar cola delegación española que coordina’l Ministeriu de Cultura a la ciudá d’Asunción, en Paraguái, pa defender la candidatura asturiana.

    La inclusión de la cultura sidrera asturiana na Llista del Patrimoniu Cultural Inmaterial de la Humanidá de la UNESCO va decidise na 19ª reunión del Comité Intergubernamental pa la Salvaguardia del Patrimoniu Cultural Inmaterial.

  • Iniciativa pol Asturianu reclama a los partíos que reactiven la ponencia d’ellaboración del mandatu-marcu de RTPA

    Iniciativa pol Asturianu reclama a los partíos que reactiven la ponencia d’ellaboración del mandatu-marcu de RTPA

    Iniciativa pol Asturianu reclama a los partíos políticos con representación na Xunta Xeneral la reactivación de la comisión qu’ellabora’l mandatu-marcu de la Radio Televisión del Principáu d’Asturies (RTPA). Coincidiendo cola conmemoración del Día Mundial de la Televisión, l’asociación de reivindicación llingüística fizo llegar a los grupos parllamentarios un documentu con propuestes de calter llingüísticu a incorporar al mandatu-marcu. El documentu, que tien una vixencia de nueve años, fixa los oxetivos xenerales que debe perseguir el serviciu públicu de comunicación audiovisual durante esi periodu.

    El documentu incorpora midíes pa la radio, la televisión y los medios dixitales, amás del ámbitu corporativu. L’asociación considera imprescindible que’l mandatu-marcu recueya la obligación de la RTPA de normalizar les llingües propies. Tamién se proponen otres midíes como que la empresa de capital públicu tenga’l nome corporativu n’asturianu y eonaviego y adaptar el manual d’identida corporativa a les llingües propies. Otru puntu que recueye l’escritu ye la creación d’una dirección encargada de la planificación de los conteníos n’asturianu y eonaviego y vele pola calidá llingüística de los mesmos. D’igual manera, la entidá ve prioritario afitar l’usu preferente de la toponimia tradicional tanto de forma oral como per escrito.

    Iniciativa pol Asturianu apuesta por una medra significativa de la presencia de les llingües propies na primer canal de TPA hasta un porcentaxe nunca inferior al 30% de la programación nos primeros años y del 50% al final de periodu d’aplicación del mandatu-marcu. Esta presencia ha ser continuada y tresversal. Por esti motivu, la organización de reivindicación llingüística considera insuficiente la emisión d’un resume informativu de llunes a vienres de dos minutos. Los informativos son unu de los pegoyos de la televisión autonómica y de la misión de serviciu públicu. Por ello se propón la emisión diaria d’un noticieru nes llingües propies.

    Respecto a la radio, Iniciativa pol Asturianu propón convertir la RPA nuna emisora 100% n’asturianu y eonaviego y que se visibilice la música nestes llingües con un porcentaxe del 50% del total.

    Toes estes propuestes pa trabayar l’ámbitu llingüísticu ampárense en diferentes tipos de llexislación dende la europea (como la Carta Europea de les Llingües) y l’asturiana como l’Estatutu d’Autonomía, la Llei d’Usu y Promoción del Asturianu, la Llei de creación de la RTPA y la de segunda reestructuración del sector público autonómicu.

  • Tito Montero dirixe la segunda parte d’Hotel Asturies mientres el FICX

    Tito Montero dirixe la segunda parte d’Hotel Asturies mientres el FICX

    Siete años dempués del rodaxe d’Hotel Asturies, la productora asturiana De la Piedra vuelve impulsar una película que documente la realidá del momentu del cine asturianu. El nuevu filme, segunda parte del empobináu por Ramón Lluís Bande en 2018, caltien tantu’l dispositivu formal como los oxetivos fundamentales: dexar prindada nel tiempu la presencia asturiana na correspondiente edición del Festival Internacional de Cine de Xixón (FICX), nesti casu’l númberu 62, y convidar a un grupu de cineastes a xenerar una reflexón colectiva abierta a distintes sensibilidaes sobro l’estáu de la cuestión.

    El directores convidaos pol filme, con un ampliu arcu d’edaes, son los cuatro que compiten nes secciones oficiales, númberu inéditu na hestoria del cine asturianu: Pablo Casanueva, con Lluna en Retueyos; Alicia Moncholí y Diego Flórez, con Campolivar y Xuna lluz, respectivamente, en Curtiumetraxes Oficial, y el mesmu Bande, con Retaguardia en Albar. Tamién otros cineastes con presencia n’otres secciones del festival: Álex Galán, con Territory; Maryam Harandi, con La palmera; Sergio Montero, unu de el directores de Trés homes nun pueden despintase so la tapa d’un pucheru; Omar Tuero, con L’escaezu de -yos piedres; Ana G. Argüelles, con Festina Lente, o Manuel García Postigo, con Montiana. Ente horros y chimenees.

    Nesta ocasión, el director del proyectu ye Tito Montero, unu de los cineastes entrevistaos na primer película, que caltuvo dende entós xuna intensa actividá cinematográfica de reflexón sobro’l paisaxe y el territoriu. Nesta edición del certame, el ceador uvieín forma parte del Xuráu Tierres en trance, la competencia internacional na que participó en 2022 col so últimu llargumetraxe, Filos –Premio DAMA al Meyor Guión de Película Española del 60 FICX y Premiu del Públicu a la Distribución na so sección–.

    El dispositivu: la puesta n’abilsu, cineastes énte la cámara

    El rodaxe herieda la forma propuesta por Ramón Lluís Bande na primer parte. El director xixonés esplegó en payares de 2018 un particular dispositivu cinematográficu nuna habitación del Hotel Asturies –icónico establecimientu hoteleru, asitiáu na Plaza Mayor xixonesa, que José Luis Garci yá utilizó como localización en Volver a empezar–. Ellí, nueve directores asturianos que participaben con dalguna película na 56 edición del FICX opinaron, en soledá énte la cámara –lo que Bande denominó como «puesta n’abilsu»–, sobre la posibilidá d’esistencia d’un cine asturianu, los sos retos y característiques.

    Aquel esperimentu zarra un invitáu ayenu a la realidá asturiana, un versu llibre, el cineasta Javier Rebollo. Ye esi final ye’l que toma como puntu de partida’l filme Montero pa esta segunda parte: «Al mio entender, Rebollo ufiertó la idea más coherente sobro la tema: una cinematografía propia namá puede esistir si lo fai frente a otres. O esiste frente al cine español, inclusive frente al otru cine español, o ye cine español. Una afirmación cenciella, d’una contundencia inapellable, na llínea de la reflexón d’Adornu: “l’arte namás ye en relación cola so otru; l’arte ye pleitu contra’l so otru”».

    El dispositivu escurríu por Bande dialogaba, conscientemente humilde dende la diferencia y la distancia, con Room 666 –la película que Win Wenders rodó mientres el Festival de Cannes de 1982 y na que cineastes como Antonioni, Godard, Fassbinder, Herzog, Hellman o Spielberg, qu’esi añu participaben nel certame, esponíen les sos idees sobre l’inciertu futuru del cine tres la eclosión de la televisión y el vídeu–.

    Dientro d’una investigación sobre un cuartu de sieglu de cine asturianu

    El filme entra tamién dientro de la órbita d’investigación doctoral qu’el mesmu Montero ta desenvolviendo na Universidá d’Uviéu: La construcción del cine asturianu a empiezos del sieglu XXI. L’oxetu d’estudiu son el conxuntu de películes de non ficción producíes n’Asturies nos cinco últimos llustros que compartan llinies d’ataque formal y esmoliciones étiques y estétiques similares o, cuantimenos, identificables y comparables. Cintes que, na so mayoría, trabayen el llinguaxe cinematográficu dende una perspectiva cultural non mercantilizada. Un perfil qu’apunta un enclín posible y que, per otru llau, ye’l que consiguió xenerar un focu atención nos últimos años y, inclusive, reconocencia internacional.

  • Les Caseríes sofita la denuncia de Vega pa parar el sondéu en Paniceres

    Les Caseríes sofita la denuncia de Vega pa parar el sondéu en Paniceres

    L’asamblea de la Federación Rural de Les Caseríes aprobó na tarde d’ayeri un ruegu presentáu polos representantes de Vega nel que s’encamienta al Conceyu de Xixón a actuar énte’l sondéu irregular que se ta realizando nel barriu de Paniceres dende fai mas d’una selmana. El máximu órganu de la entidá qu’arrexunta a les asociaciones rurales del conceyu va reclamar güei, al traviés d’otru escritu de denuncia al consistoriu, una intervención urxente ante unos trabayos que tán nuna parcela que nun cunta con permisu pa esta actividá. Esti sofitu de les asociaciones de vecinos de la zona rural llega una selmana dempués de que la entidá de Vega treslladara de manera oficial al gobiernu municipal una denuncia pola intervención irregular nel barriu de Paniceres.

    El sondéu asitiáu na finca polígonu 70, esquiñona 44 de Xixón pero l’espediente númberu 100326B/2022 del Conceyu de Xixón que recueye l’allugamientu de los sondeos nun ampara la realización d’obra dalguna na parcela 44 del polígonu 70

    L’Asociación de Vecino San Emiliano de Vega recordó na xunta que la perforación de Paniceres ta realizándose a menos de 50 metros de viviendes; nuna zona medioambientalmente bien sensible yá que nesta parcela ta la conocida nel planu del Conceyu de Xixón como fonte Paniceres y como fonte la Llosica na cartografía catastral, bien próxima a la nacencia del regueru que baxa de Paniceres al regueru d’Aroles y que les sos agües acaben nel ríu Piles.

    El colectivu vecinal de Vega estima a l’asamblea y al restu de les asociaciones rurales la so solidaridá y sofitu a esta iniciativa que pretende reforzar la denuncia plantegada pola Asociación de Vecinos San Emiliano de Vega’l pasáu 12 de payares presentada énte la municipalidá.

  • El palaciu de xusticia nuevu de Llangréu va cuntar con 54 empleaos

    El palaciu de xusticia nuevu de Llangréu va cuntar con 54 empleaos

    Nes dependencies del nuevu palaciu de xusticia de Llangréu van trabayar 54 emplegaos xudiciales y va unificar los trés sedes xudiciales del conceyu nun solu edificiu. Los trabayos de construcción de la nueva see xudicial supunxeron una inversión de 7.538.690 euros, cofinanciada con fondos Feder, y les obres enllargáronse mientres trés años.

    El treslláu a les nueves dependencies empecipióse’l pasáu día 11 cola incorporación al inmueble de la sección territorial de la Fiscalía y el xulgáu de primera instancia ya instrucción número 2. El restu d’unidaes dirán camudándose de manera gradiada y la previsión ye que’l procesu remate a partir del 5 d’avientu, según lo alcordao cola sala de gobiernu de la TSXA.

    L’edificiu tien cuatro pisos y 3.362 metros cuadraos. Na planta baxa atópase’l control d’accesu, el rexistru civil, la zona de cuartones y trés sales de vistes, de les qu’una utilízase tamién como sala de bodes y dispón d’accesu independiente dende la cai.

    Nel primer pisu alcuéntrense les oficines de dos xulgaos y los despachos de xueces, y lletraos, según el Serviciu d’Orientación Xurídica (SOJ) y una sala p’abogaos. Na segunda planta atópense’l xulgáu de primera instancia ya instrucción número 2 y el xulgáu de lo penal, dambos con competencia en materia de violencia sobre la muyer. Por esti motivu, esti pisu dispón d’una sala d’espera y sala de toma de declaración, dotada con sistema de grabación, pa víctimes de violencia. Tamién s’atopa nesta planta’l despachu del médicu forense y otru espaciu pa videoconferencias.

    La tercer planta destinase a les dependencies de la Fiscalía y dispón tamién d’una sala de vistes. Nesti pisu instalóse una sala Gesell, una zona atenta pa les entrevistes a menores, acondicionada pa evitar la so esposición a múltiples interrogatorios. Tratase d’una estructura dixebrada en dos habitaciones separtaes por una paré con un cristal de grandes dimensiones, que fai posible la visión de lo qu’asocede nuna d’elles dende la otra, pero non al revés. Nestes circunstancies, les víctimes empresten declaración con mayor comodidá, nun espaciu más atentu, y evítase la so revictimización.

    L’inmueble ta concebíu como un edificiu de consumu d’enerxía casi nulu. Pa ello, creóse un pozu de lluz nun patiu central, que suministra illuminación natural. El patiu ta cubiertu por un llucernariu acristaláu que pel iviernu va aprovechar l’efectu invernaderu y va minimizar l’usu de calefacción. Amás, cuenta con unos estores móviles pa regular el confort térmicu mientres el branu.

    El palaciu incorpora tamién un aisllamientu térmicu mui potente, ventilación mecánica controlada con caudales amenorgaos, qu’amenorga’l consumu, y una lluz altamente eficiente, con llámpara tipu LED y mecanismos de control intelixente.

  • Podemos denuncia que Divertia contrate actuaciones d’agresores machistes

    Podemos denuncia que Divertia contrate actuaciones d’agresores machistes

    La vocera de Podemos nel Conceyu de Xixón, Olaya Suárez, censuró esti martes la presencia d’un conciertu de Diego ‘El Cigala’ na programación del Teatru Xovellanos pal primer semestre de 2025 que la dirección de Divertia va presentar mañana al conseyu d’alministración d’esta empresa municipal. El cantaor ta nestos momentos en plenu xuiciu penal, acusáu de violencia machista física y psicolóxica contra la so exmuyer, con un pidimientu de 5 años de cárcel per parte de la Fiscalía.

    Olaya Suárez hai aseverado que «nun quepe dixebrar al artista de la obra especialmente cuando falamos de contratación pública», añediendo que «esisten cientos de grandes artistes como por que decida pagase col dineru de la ciudadanía a una persona acusada d’unos fechos pergraves y repulsivos». La conceyala de Podemos esixó al presidente de Divertia, Óliver Suárez, «proveniente d’un partíu negacionista de la violencia machista», que pida «sides por plantegar esta actuación na programación del Xovellanos y que retire la propuesta antes de la so votación nel conseyu d’alministración de Divertia» que va tener llugar el miércoles. De nun ser asina, la vocera de Podemos asegura que la responsabilidá d’esta contratación va facese estensible «a l’alcaldesa, que ye quien ostenta les competencies d’igualdá d’esti gobiernu».

    Amás, Suárez alvirtió que l’actuación yá s’atopa espublizada en prensa y anunciada nel sitiu web de la representación del cantante, polo que se pregunta «hasta qué puntu Divertia ta respetando los sos estatutos y les competencies del so propiu conseyu d’alministración».

  • Llangréu borra l’asturianu de los nuevos vehículos de llimpieza

    Llangréu borra l’asturianu de los nuevos vehículos de llimpieza

    Iniciativa pol Asturianu critica l’ausencia del asturianu na rotulación esterior de la maquinaria nueva de llimpieza del Conceyu de Llangréu. L’equipu de gobiernu presentó a finales d’ochobre na Casa Conceyu les dos nueves cubes de riegu y baldéu adquiríes pola estaya de Servicios Operativos. La serigrafía esterior de los vehículos recueye únicamente la versión en castellanu de la imaxe corporativa municipal y non de forma billingüe como venía asocediendo de manera normal.

    La organización de reivindicación llingüística afea al equipu de gobiernu que de pasos atrás na normalización social del asturianu. Nun escritu al Conceyu, Iniciativa pol Asturianu recuerda que’l topónimu tradicional Llangréu ye oficial dende xunetu del añu 2005 y que “l’usu de la toponimia oficial y del asturianu nestos vehículos sería una manera de visibilizar la llingua asturiana y de caltener un compromisu de normalización y de cumplimientu de la Llei d’Usu”.

    L’asociación reclama la inclusión de la toponimia oficial nos nuevos vehículos de riegu y baldéu del Conceyu de Llangréu recuperando la presencia y usu normal de la toponimia oficial y del asturianu nos vehículos. Al mesmu tiempu, tamién pide que nun se repita l’escaezu de la presencia del idioma en futures campañes o cartelería de les diferentes conceyalíes del gobiernu llangreanu.

  • Izquierda Xunida entrega’l Premiu Pasionaria a Ana Belén esti xueves na Colexata

    Izquierda Xunida entrega’l Premiu Pasionaria a Ana Belén esti xueves na Colexata

    Izquierda Xunida va apurrir esti xueves el 30 Premiu Pasionaria, otorgáu pela so Área de la Muyer, a l’actriz y cantante Ana Belén nun actu que va tener llugar a les 19:00 hores na Colexata de San Xuan Bautista del Palaciu de Revillaxixéu. El premiu, que foi falláu’l pasáu 3 d’ochobre, reconoz “la so llarga trayectoria de compromisu políticu col feminismu y los derechos humanos”. Les muyeres d’IX Xixón destaquen qu’“Ana Belén nun ye solo una figura icónica na cultura del nuesu país, tamién destacó dende los entamos de la so carrera artística por utilizar la so posición pública p’alzar la voz en defensa de la igualdá y los derechos de les muyeres”.

    Cola concesión del premiu búscase reconocer especialmente’l compromisu de la cantante col derechu a un albuertu y llibre y gratuitu y la so participación en campañes contra la violencia machista y pola igualdá real y efectiva ente muyeres y homes, pero tamién el so trabayu nos escenarios, al llevar el so compromisu feminista a munches de los sos cantares y de los sos papeles tanto’l cine como nel teatru, interpretando a muyeres fuertes y llibres.

    L’actu, públicu y con entrada llibre, va tar conducíu pola periodista xixoniega Paloma Llanos que, tres la intervención de la coordinadora de la Área de la Muyer d’IX, Aridane Cuevas, y la entrega del premiu, va entrevistar a Ana Belén nuna conversación informal. La nota musical pondrála la cantante asturiana Anabel Santiago.

  • Boombastic vende 35.000 abonos nos primeros díes a la venta

    Boombastic vende 35.000 abonos nos primeros díes a la venta

    La llocura por Boombastic sigue y desamarrase ente los fieles ‘bombis’ que se fixeron col so abonu a lo llargo del día. Son 35.000 asistentes los que dende güei yá tienen la so entrada pal próximu Boombastic Asturies que se va celebrar mientres los díes 17, 18 y 19 de xunetu y que promete ser ‘el más grande de toos’.

    Si’l martes, la so primer meyora de cartelu convirtióse nuna de les tendencies del día en redes sociales, güei materializóse con una gran salida a la venta y ye que naide se quier perder a artistes como Residente, Bad Gyal, Nicky Jam, Tiago PZK o Lia Kali. A los primeres headliners de Boombastic 2025, súmense cantantes de la talla d’Alejo, La Joaqui, Khea o Lit Killah y, asina, hasta una ventena de nomes que se confirmaron a lo llargo de la selmana y que conformen l’entamu d’un Boombastic que va ser históricu.

    Dende la dirección del festival apunten que “ye solo’l principiu, yá que queden munchos artistes por desvelar pal que va ser el Boombastic más grande de toos”; l’empiezu d’una temporada llena de sorpreses y novedaes por anunciar. Lo que sí pueden confirmar yá dende la organización ye que Boombastic Asturies va cuntar con seis escenarios temáticos, un pool stage, nueves zones de relax o un espectáculu de drones que podrá esfrutase nel yá míticu recintu de Llamorgal, en Llanera.