El Ministeriu de Cultura amplía hasta’l 31 d’ochobre’l plazu de solicitú del Bonu Cultural Xoven. L’oxetivu d’esta ampliación ye fomentar y facilitar la máxima participación
de los mozos nel programa.
Pa solicitar el Bonu Cultural Xoven, les persones que cumplieren o vaigan cumplir 18 años en 2024 han de rexistrase y realizar el procedimientu de solicitú na páxina web
http://www.bonoculturajoven.gob.es. Los mozos nacíos en 2006 pueden realizar la solicitú nel so nome, o bien al traviés d’un representante mayor d’edá, axuntando un modelu de representación robláu per dambes partes.
Una vegada concedíu’l Bonu Cultural Xoven, los beneficiarios tienen un añu para faer
usu de la tarxeta dende la fecha de concesión.
Pela so parte, más de 3.300 empreses culturales ufierten yá los sos servicios y productos
al traviés del programa que’l Ministeriu de Cultura punxo en marcha en 2022. Los oxetivos d’esta iniciativa son, per un llau, promover la fidelización de los mozos como públicu y consumidor cultural y, per otru, ufiertar un respaldu adicional al sector cultural.
Autor: xixonaldia
-
El Ministeriu de Cultura amplía hasta’l 31 d’ochobre’l plazu de solicitú del Bonu Cultural Xoven
-
LLABoral Centru d’Arte inaugura esti miércoles la esposición NVSBLS.
Mañana miércoles 18 de setiembre inaugúrase en LLABoral Centru d’Arte la esposición NVSBLS. Mujeres invisibles en la historia del arte, un proyectu espositivu qu’afaya’l trabayu de diez muyeres artistes que, al igual que munches otres en distintes disciplines, fueron tapecíes y escaecíes nel relatu canónicu hasta que, nos años 70, historiadores como la estadounidense Llinda Nochlin, preguntáronse por qué nun apaecíen nos llibros d’arte.
De magar, les investigaciones al respectu nun fixeron más que crecer. Na última década produciéronse n’España numberoses publicaciones sobro muyeres artistes. Una de les primeres foi Ellas mismas, de la escritora ya historiadora del arte asturiano, Ángeles Caso, publicada en 2016.
NVSBLS asítiase sobro esta idea de recuperación de xenealoxía feminista del arte. Asina, nuna sala de parés desnudes, tan solo habitaes por marcadores de pequeñes dimensiones, el públicu tien de desentrañar les obres al traviés del usu d’una tablet, única manera de (re)afayar el trabayu y a l’artista que s’escuende tres él. Un exerciciu que, gracies a la tecnoloxía, dexa al visitante somorguiase nes obres con un grau de precisión estraordinariu, pudiendo apreciar pincelaes, testures y detalles que nun son perceptibles nuna visita convencional a un centru d’arte.
D’esta miente, con esti xestu, el visitante asimílase a los historiadores del arte, quien, nes últimes décades, tuvieron que cuestionar los grandes manuales clásicos—desiertos de nomes de muyeres—, p’ampliar los sos horizontes historiográficos y documentales nun actu apostáu de nueva busca, col fin de realcontrase con elles y devolveles al llugar que-yos correspuende.
NVSBLS quier contribuyir a esti llabor plantegando una amuesa na que la tecnoloxía ye la ferramienta indispensable p’amosar lo que, otra manera, nun sería visible.
-
La RPA va incorporar el formatu dixital pal añu viniente
El gobiernu d’Asturies va facilitar que la Radio del Principáu d’Asturies (RPA) pueda emitir en formatu de radio dixital (DAB+) a partir del primer semestre de 2025. El director xeneral d’Innovación, Investigación y Tresformamientu Dixital, Iván Aitor Lucas, indicó que dende l’Alministración va empecipiase la tramitación necesaria pa que la radio pública autonómica pueda incorporar esta nueva tecnoloxía qu’apurre mayor calidá de señal y que nel futuru va sustituyir a la Frecuencia Modulada (FM).
L’anunciu realizóse mientres una xornada sobre radio dixital celebrada en Xixón, que cuntó cola participación d’espertos nacionales y asturianos na materia. Asturies conviértese na segunda comunidá autónoma xunto con Baleares qu’apuesta pol DAB+ pa la dixitalización efectiva de la distribución de conteníos llineales radiofónicos.
Na xornada, directivos de RTVE presentaron les primeres emisiones DAB+ (Dixital Audiu Broadcasting) de les canales de Radio Nacional, Radio Clásica, Radio 3 y Radio 5 n’Asturies. Estes emisiones van realizase dende’l centru emisor de Cellnex Telecom de Gamoniteiru. Dende ellí, apúrrese cobertoria a Uviéu y Xixón, colo que yá ye posible escuchar les emisiones de RNE en DAB+ en 13 ciudaes españoles.
El director d’Innovación valoró esta iniciativa como “una meyora importante pal espardimientu radiofónicu y la meyora de la cobertoria informativa pa la ciudadanía”. L’oxetivu ye que RPA tea en condiciones d’emitir en DAB+ a lo llargo de la primer metá de 2025, una vegada rematáu’l procesu técnicu d’adaptación y en cuanto se resuelvan los trámites alministrativos necesarios.
-
El Gobiernu d’Asturies pide al PP “un xestu de responsabilidá” pa evitar qu’Asturies pierda 60 millones de recursos presupuestarios
El Conseyu de Gobiernu solicitó güei al Partíu Popular que llevante’l so vetu al techu de gastu y la sienda de déficit aprobaes el martes pol Conseyu de Ministros. De volver bloquiar estes propuestes, Asturies va perder 60 millones de recursos presupuestarios. “Namás pidimos un xestu de responsabilidá y de compromisu cola nuesa comunidá”, manifestó’l conseyeru de Facienda y voceru del Executivu, Guillermo Peláez.
El Conseyu de Ministros afitó los mesmos llendes que yá plantegara en xunetu y que fueron refugaos nel Congresu polos votos del PP, VOX y Junts, la formación que lidera Carles Puigdemont. Nel casu de les comunidaes autónomes, el techu de déficit afitóse nel 0,1% del Productu Interior Brutu (PIB) pa trés años: 2025, 2026 y 2027.
Esi tope supón más marxe presupuestariu pa toles comunidaes. En concretu, dos décimes más, yá que’l tope actual ye’l 0,1% de superávit. Conforme a los cálculos de Facienda, esa diferencia equival a unos 60 millones más.
La decisión del Executivu central precisa’l refrendo de les Cortes. De lo contrario, van permanecer vixentes les llendes previstes. “Les consecuencies práctiques van ser que nun habrá presupuestos estatales y que, amás, Asturies va sufrir una amenorga importante de recursos. Pa facenos una idea, y agora que ta empezando’l cursu, pensemos na relevancia de cuntar con 60 millones más p’ameyorar la educación pública”, esplicó’l voceru del gobiernu.
Guillermo Peláez tamién alvirtió que’l próximu presupuestu tendrá de tener en cuenta más condicionantes. Per un sitiu, amenórguense los ingresos qu’apurre l’Estáu –la lliquidación de 2022 va menguar unos 240 millones- y, per otru, mengüen los fondos europeos –otros cerca de cien millones menos, correspondientes al Mecanismu de Recuperación y Resiliencia (MRR). En total, son alredor de 400 millones, si-y sumamos los 60 que tán en tema.
“Nesi contestu, disponer de 60 millones más o menos ye una variación bien notable que va incidir tanto sobre la calidá de los servicios públicos como sobre la inversión. Cuando apelamos a la responsabilidá del PP nun pidimos que faiga un favor al Gobiernu del Principáu, sinón a Asturies”, aseguró’l titular de Facienda.
-
L’alcalde de Mieres reclama a Renfe a activar la parada del primer AVE a partir d’ochobre
L’alcalde Mieres, Manuel Ángel Álvarez, reclama a Renfe a activar la parada del primer AVE nel Caudal a partir del mes d’ochobre. “Toa Asturies sofita que’l nuesu territoriu tenga parada del primer y últimu AVE a Madrid. Renfe nun tien escuses pa retrasar una decisión que ye xusta y necesaria”, señaló’l primer edil, que recordó que va meses solicitóse una xunta col presidente de Renfe ensin qu’a día de güei tuviera llugar. Álvarez considera que ye’l momentu, ensin escuses, d’habilitar estes paraes de forma inmediata.
“Esta parada ye la opción más cómoda, rápida y barata pa más de 200.000 asturianos y asturianes”, apuntó l’alcalde, que plantegó que “son unos minutos d’oru pal futuru de les
cuenques”. “Pa captar nueves inversiones tenemos que tar lo meyor conectaos posible con
Madrid y pa ello’l primer AVE a Madrid ye estratéxicu pal mundu de la empresa y les cuenques nun podemos nin queremos quedar al marxe”. -
“Tenemos suelu y los medios llegales, si nun hai vivienda en Xixón la única responsable va ser Moriyón”, señala’l PSOE
El PSOE de Xixón propón la creación de 312 viviendes públiques en suelos residenciales y dotacionales de propiedá municipal. Tal que señaló en rueda de prensa’l conceyal del Grupu Municipal Socialista, Tino Vaquero, el Conceyu dispón d’un ampliu patrimoniu públicu qu’hai que movilizar y sobre’l qu’hai qu’actuar pa poner a disposición de les vecines y vecinos vivienda pública d’arriendu a precios afayadizos y vivienda protexida de preciu llimitáu.
“Coles conocencies que tenemos sobre les propiedaes municipales, la nuesa propuesta d’actuación contempla la construcción de 158 viviendes a construyir en 5 finques residenciales de Ciares-Viesques, Coto-Viesques, Roces y La Camocha, y de 154 viviendes en 4 parceles dotacionales allugaes nel Rik’s, nel Lloredal, en Nuevu Xixón y en Tremañes”, asegura.
La elección de los allugamientos y de suelos nes dotacionales ye frutu d’un analís detalláu de les dotaciones públiques esistentes de cada barriu y la certidume de que pueden ser destinaos a vivienda ensin comprometer otres infraestructures o dotaciones necesaries. “El nuesu conceyu nun puede ser ayenu a esta oportunidá”, añede Vaquero.
Los socialistes tamién estudiaron fórmules pa movilizar esi suelu. El gobiernu local puede actuar como promotor, llogrando financiamientu al traviés del presupuestu municipal o por aciu la vienta de parceles pa la construcción de viviendes unifamiliares de la so propiedá de les que dispon na zona periurbana y rural, o poniendo esos suelos nel mercáu conforme los mecanismos de xestión previstos pa la collaboración públicu-privada (cesión, concursos, cooperatives o’l derechu de superficie). Coles mesmes, puede recurrir pa la so execución a convenios con otres alministraciones públiques y a la execución per parte del sector priváu por aciu la constitución de derechos de superficie sobre les parceles o por aciu enayenadura de suelos residenciales vía concursu condicionada a la construcción de vivienda protexida.
“Trátase, a última hora, de xestionar de forma eficiente los recursos públicos. Tenemos suelu y los medios llegales, si nun hai vivienda en Xixón la única responsable va ser Carmen Moriyón”, añede Vaquero, quien va preguntar mañana nel Plenu pola web de Suelu Públicu del Conceyu yá que nun dispón de tola información del patrimoniu públicu de suelu, un recursu que’l PSOE solicitó’l pasáu mes de xunu pa movilizar parceles col fin de promocionar vivienda pública.
“L’alcaldesa y el so equipu tienen que tomar la iniciativa. Nós tenemos un plan, el Plan 1000V, al traviés del cual llevamos meses proponiendo midíes pa facer frente al problema de la vivienda. Nun tien sentíu tener esos suelos ende, ensin destín dalgunu y ensin saber qué facer con ellos. La ciudá tien necesidá de vivienda y el Conceyu puede facer muncho. El gobiernu del Principáu d’Asturies abrió la vía de la vivienda dotacional nel recintu de Peritos. Otres comunidaes autónomes fixéronlo yá. La vía ta abierta; el Conceyu tien que tomar esi camín y ponese manes a la obra pa executar vivienda pública cola collaboración del sector priváu. Trátase d’echar bien los númberos en cada parcela o llote de parceles, prever un arriendu máximu y afayadizu p’amplies capes de población y xugar cola posibilidá que da la llei nel derechu de superficie de poder estendelu mientres un períodu temporal que va hasta 99 años y onde va haber que prever el períodu d’amortización pal sector priváu y l’evidente beneficiu. Eses viviendes, amás, una vegada termináu’l derechu de superficie, van ser viviendes de titularidá pública”, conclúi Vaqueru.
-
Un total de 46 reses afectaos pola enfermedá hemorráxica epizoótica en 24 esplotaciones
Mediu Rural confirma un total de 46 reses afectaos pola enfermedá hemorráxica epizoótica en 24 esplotaciones. Nesta última remesa analizáronse 49 amueses y resultaron negatives les de cinco animales procedentes de cuatro ganaderíes. Toos estos datos van treslladase agora al Ministeriu d’Agricultura, Pesca y Alimentación pa que consten oficialmente nel rexistru.
La directora xeneral de Ganadería y Sanidá Agraria, Rocío Huerta, repitió que la EHE ye una enfermedá de declaración obligatoria, anque nun afecta al ser humanu. Por tanto, nun s’establez nengún tipu de restricción a les esplotaciones afectaes y tampoco en relación col consumu de productos como la carne o’l lleche. Sicasí, sí s’afiten llimitaciones en cuanto al movimientu d’animales vivos.
Huerta, qu’esta tarde intervieno nuna xornada sobre esta patoloxía entamada por Aseava, aportunó na importancia de realizar los analises a cualesquier animal que presente síntomes compatibles cola EHE, mesmo que na necesidá d’aplicar el tratamientu oportunu.
Les pruebes pa detectar si los animales tán infectaos fixéronse de manera gratuita, yá que tán bonificaes al 100%, y consisten nuna PCR. Estos analises resulten decisivos pa poder optar a les ayudes coles que’l Gobiernu d’Asturies pretende compensar tanto la perda de reses como los tratamientos y procesos de desinsectación que tuvieron qu’encarar les esplotaciones afectaes.
Medio Rural encamienta adoptar midíes de desinsectación n’animales ya instalaciones pa lluchar contra’l mosquitu que tresmite la EHE: empléu d’insecticides y empustes en reses, medios de tresporte ya instalaciones, mesmo que l’usu d’insecticides y llarvicides pal control de posibles zones de cría. Igualmente, aconseya’l tratamientu sintomáticu de los animales enfermos. Amás, recuerda que’l ministeriu yá autorizó una vacuna voluntaria pa prevenir esta enfermedá.
El Principáu, pela so parte, punxo en marcha les midíes de prevención y control oportunes pa garantizar la seguridá de los certames ganaderos y contribuyir a la tranquilidá del sector y de la sociedá polo xeneral. Los servicios veterinarios oficiales de la Dirección Xeneral de Ganadería y Sanidá Agraria van asumir el siguimientu detalláu de la evolución clínica de los animales afectaos en collaboración col veterinariu de la esplotación y los sos responsables.
-
Casi cien mil estudiantes anicien güei n’Asturies el cursu
Un total de 99.906 estudiantes d’Infantil, Primaria, Secundaria (ESO) y Bachilleratu –un 1,6% menos que va un añu- empecipiaron güei n’Asturies el nuevu cursu escolar, nel que s’implanta’l descensu progresivu de la ratio a 23 per aula y la tarifa unificada a 4,5 euros del preciu de los comedores escolares dependientes de l’alministración.
Infantil y Primaria cunten con 56.263 alumnos y alumnes. En númberos absolutos, son 1.541 menos que l’añu pasáu, lo que supón un descensu del 2,6%. Ye un porcentaxe menor que’l rexistráu nos dos últimos dos cursos, cuando s’asitió inclusive percima del 3%.
Na rede pública contabilícense 39.951 matrícules y les 16.312 restantes, na privada-concertada. Xixón ye’l conceyu con más estudiantes n’Infantil y Primaria, con 14.963; siguíu per Uviéu, con 13.389, y Avilés, con 4.938.
La matrícula de Secundaria y Bachilleratu xube a 43.643 estudiantes, lo que supón un llixeru descensu del 0,29% respectu al cursu anterior. Na enseñanza pública rexistráronse 33.363 matriculaciones, mientres que les 10.280 restantes correspuenden a la privada-concertada. Xixón ye tamién el conceyu con más estudiantes nestes etapes, con 12.059; siguíu por Uviéu, con 10.341, y Avilés, con 3.963.
Per otru llau, el xueves pasáu abríen les sos puertes los primeros centros autonómicos de 0 a 3 años, de la rede de Les Escuelines/As Escolías. En concretu, inauguráronse Los Esguinos, de Trevías (Valdés); As Paxarías, de Bual; Los Pequeníos, de Villayón; Los Indianinos, de Colombres (Ribadeva), y La Brañona, de Panes (Valle Baxu de Peñamellera). En total, sumen 53 neños y neñes matriculaos. Esta cifra podría aumentase nes próximes selmanes, yá que tienen places disponibles que podríen cubrir.
-
Rescaten a un grupu de xente mozo perdíos nuna ruta de monte en Somiedo
El Grupu de Rescate de Bomberos d’Asturies cola collaboración d’axentes de la Guardería de Mediu Natural del Principáu alcontraron, ayeri nueche, ilesos, a un grupu de cinco persones, trés varones y dos muyeres, d’ente 21 y 22 años, desnortiaos nuna ruta de monte en Somiedu. El grupu taba per debaxo de la braña d’El Fuexu. Dende ellí fueron acompañaos polos rescatadores hasta la localidá de Caunéu onde dexaren aparcáu’l so vehículu.
El Centru de Coordinación d’Emerxencies del 112 Asturies recibió l’avisu a les 19.33 hores d’ayeri domingu. Na llamada, realizada polos mesmos afectaos, esplicaben que taben faciendo una ruta circular que salía y terminaba na localidá somedana de Caunéu. Taben baxando y nun atopaben el camín. Unu d’ellos nun podía siguir caminando por esgotamientu. Facilitaben el so allugamientu vía aplicación móvil.
La Sala 112 del SEPA movilizó al Grupu de Rescate que, dada la meteoroloxía, salió pal llugar en dos equipos, unu nel helicópteru medicalizáu del Serviciu d’Emerxencies del Principáu d’Asturies (SEPA) y otros dos efectivos per tierra. Amás informóse a la Guardería de Mediu Natural que tamién unvió a trés axentes al llugar pa collaborar colos rescatadores de bomberos.
La borrina imposibilitó la intervención del equipu aéreu que tornó a base a les 20.24 hores. Los dos efectivos que se movíen per tierra alcontraron a los perdíos a les 22.01 hores. Una hora más tarde, a les 23.11 hores, comunicaron que dexaren a los afectaos en Caunéu y tornaben a la so base en Llamorgal onde llegaron les 00.51 hores d’esta madrugada.
-
Educación inaugura con 53 alumnos les cinco primeres escuelines/escolías
El Gobiernu d’Asturies inauguró güei los cinco primeros centros de 0 a 3 años de la rede autonómica, pública y gratuita de Les Escuelines/As Escolías, que van empezar con un total de 53 neños y neñes matriculaos. La conseyera d’Educación, Lydia Espina, visitó esta mañana los trés que tán allugaes na zona occidental, xunto coles directores xenerales de Centros, Rede 0-3 y Enseñances Profesionales, Cristina Blanco, y d’Infraestructures y Tecnoloxíes Educatives, Julio Vallaure.
En concretu, percorrieron los centros Los Esguinos, de Trevías (Valdés); As Paxarías, de Bual, y Los Pequeníos, de Villayón. Les otres dos escuelines qu’abrieron güei les sos puertes son Los Indianinos, de Colombres (Ribadeva), y La Brañona, de Panes (Valle Baxu de Peñamellera), a les que la conseyera va mover en próximes feches.
Colombres ye la escuelina con más menores matriculaos, con 15 neños y neñes; siguíu de Trevías, con 13; Bual, con 11; Panes, con 10, y Villayón, con 4. Eses cifres podríen ampliase mientres el presente cursu, yá que toos estos centros tienen entá places llibres. La escuelina ribadense dispón de dos unidaes y 31 places, mientres que les otres cuatro consten d’una unidá y 18 places.
Las escolías de Bual y Villayón comparten directora, al igual que les de Panes y Colombres por una cuestión de proximidá xeográfica. La de Trevías va tener la so propia directora. En cuanto al restu del personal, la Dirección Xeneral d’Empléu Públicu contrató a doce técniques d’educación infantil (TEI) pa estos cinco centros autonómicos de 0 a 3 años. En Colombres van trabayar cuatro educadores y nos otros cuatro, dos en cada unu.
Estos cinco que se ponen en marcha construyéronse con cargu a les subvenciones de fondos europeos del Mecanismu de Recuperación y Resiliencia (MRR) otorgaes pola Alministración del pa crear nueves places de 0 a 3 años, concedíes nel exerciciu 2023. En total recibieron ayudes por importe de 640.000 euros.
“Güei ye un día para dar les gracies a muncha xente porque ponemos en marcha la rede pública, autonómica y gratuites de Les Escuelines/As Escolías. Detrás hai meses d’intensu trabayu de tola conseyería y de los conceyos. Güei facemos realidá un proyectu empezamos a suañar fai menos d’un añu”, señaló la conseyera.
Lydia Espina recordó la tramitación alministrativa esplegada, dende la nueva llei al decretu de funcionamientu, el procedimientu d’almisión, l’espediente de creación de centros, la xestión de les subvenciones MRR o les xuntes informatives colos conceyos implicaos. “Tamos construyendo una rede que va redundar na calidá del nuesu sistema educativu ensin dala dulda”, añedió.
Apertura progresiva
En cuanto al restu de escuelines/escolías que componen la primer fase de la rede autonómica, dirán inaugurándose a midida que se vaigan concluyendo les obres. Ta previsto que n’ochobre puedan abrir otros cuatro centros: La Veiga, de Sotu (Sotu’l Barcu); La Cuevona d´Avín, de Benia (Onís); Os Ferreiríos, de Santalla (Santalla d’Ozcos), y Os Esguín, de Santiso d’Abres.
Per otru llau, la conseyera convocó ayeri a una xunta, per primer vegada conxunta, de toles direcciones de les escueles de 0 a 3 que dependen del gobiernu d’Asturies y de los conceyos. L’oxetivu yera presentar el proyectu, el decretu y la tramitación de la llei, que va dexar la integración de les municipales na nueva rede d’Asturies, a partir del próximu añu.
El gobiernu d’Asturies estableció un procedimientu d’almisión únicu, colos mesmos criterios, baremos y calendariu tanto pa les escueles de 0 a 3 años municipales como pa les autonómiques, que tendrán de convivir hasta que se produza la integración nuna única rede. La única diferencia foi’l llugar de presentación de los documentos y de publicación de les llistes.
Tamién el calendariu lectivu de 0 a 3 años ye común. Amás d’estes cinco escueles autonómiques, güei dio empiezu l’actividá nes 76 escueles municipales qu’inda xestionen los conceyos y que van tener la oportunidá d’integrase na rede una vegada que la Xunta Xeneral d’Asturies apruebe la llei correspondiente, que ta en fase de tramitación.