El profesoráu ta quemáu. Hai quien inclusive echa fumu y asina lo dexaron claro na tarde d’ayeri un grupu de docentes que, dientro de l’Asamblea del Profesoráu del Centru-Oriente, participaron nuna procesión peles cais de Les Arriondes portando a la “profe quemada”, símbolu del creciente malestar del colectivu. Trátase d’una muñeca de 1 metru d’altor que, xubida a un paliu y vistiendo camiseta en defensa de la Educación Pública, convirtióse nel símbolu del creciente malestar nel colectivu docente.
Partieron a les 18:00 hores del parque de La Llera y fueron percorriendo distintes cais de la capital parraguesa hasta acabar frente al Conceyu, na Plaza Venancio Pando. Ente la comitiva hebo delles pandereteres entonando un cantar creáu pal colectivu y dedicáu nesta ocasión a la “profe quemada”, una figura que va siguir dando que falar mientres los próximos meses nos centros educativos asturianos.
“A la profe aplástala la burocracia, los triplicaos y los informes que-y roben el tiempu que precisa dedicar a lo suyo: preparar y dar clase, acompañar al alumnáu”, esplicaron dende l’asamblea, que los sos integrantes yá “fundieron” un barcu na carretera xeneral de L’Infiestu en marzu como protesta ante la Conseyería d’Educación.
La “profe quemada” y el colectivu al que representa piden l’aumentu de les plantiyes, amenorgamientu de ratios y eliminación de medies xornaes”, amás de la equiparación salarial, la implantación d’un únicu cuerpu docente y el fin de la burocratización”. Añeden, amás, la necesidá de cuntar con más recursos materiales y personal pa l’atención a la diversidá.
