Un equipu investigador de la Universidá d’Uviéu afayó un conxuntu de güesos fósiles de güe almizcleru, de fai 35.000 años, nuna cueva de Picos d’Europa, lo que  permite documentar per primer vegada la presencia d’esti animal, de la denominada “fauna del mamut”, na Cornisa Cantábrica. La cueva onde se recuperaron los restos ta asitiada nes proximidaes de Tresvisu, en Cantabria, a un quilómetru de la frontera con Asturies. Afayos como esti demuestren que les cueves de la Cornisa Cantábrica entá alluguen infinidá d’ayalgues paleontolóxiques que non solo sosprienden, sinón qu’amás obliguen a reescribir la hestoria de los animales que vivíen nesta rexón mientres la Última Glaciación. Les resultancies del trabayu, que llevó a cabu’l Grupu GEOCANTABRICA, espublizáronse na prestixosa revista “Quaternary Science Reviews”.

Nel estudiu participaron les y los investigadores Montserrat Jiménez Sánchez, catedrática de Xeodinámica Esterna de la de la Universidá d’Uviéu; Diego J. Álvarez Laó, profesor de Paleontoloxía de la Universidá d’Uviéu; Daniel Ballesteros, investigador de la Universidá de Rouen-Normandie/CNRS, Francia; Florent Rivals, profesor d’investigación del ICREA y la Universitat Rovira i Virgili, Tarragona; Pablo Valenzuela xeólogu de TRAGSATEC, Llión; y Adrián Álvarez Vena, investigador predoctoral en Paleontoloxía de la Universidá d’Uviéu. Cuntóse amás cola collaboración de Mario Menéndez Fernández, caderalgu de la UNED, de la Dirección, Oficina Técnica y Guardería del Parque Nacional de los Picos d’Europa, lo mesmo que de la Sociedá Espeleolóxica y Barranquista Escar, del Grupu de Espelología Diañu Burllón y del Tresviso Cave Project.

L’afayu de los restos qu’equí se presenten documentóse en 1986 per parte de dos grupos espeleolóxicos británicos, la Lancaster University Speleological Society y el South Wales Caving Club, qu’esquizaben cueves de los Picos d’Europa. Los restos fueron atribuyíos orixinalmente a una vaca, motivu pol que bautizaron al cuévanu como Cueva de Cabeza de Vaca o Cowshead Cave. Más de 30 años dempués, en 2018, un equipu interdisciplinar de la Universidá d’Uviéu llevó a cabu la recuperación d’estos restos, dientro del marcu del proyectu “Serviciu pa la recuperación y estudiu de restos fósiles de mamíferos atopaos en cueves del Parque Nacional de los Picos d’Europa, 2017-2018”, suscritu ente’l Parque Nacional de los Picos d’Europa y la Fundación Universidá d’Uviéu.

L’estudiu d’estos fósiles llévase a cabu nel Área de Paleontoloxía de la Universidá d’Uviéu, y resultaron ser de dos individuos de güe almizcleru: un machu nuevu d’unos 20 meses d’edá, qu’inclúi un craniu cuasi completu, y otru individuu subadultu d’unos 3-4 años. El craniu constitúi una pieza escepcional, pues los afayos de cranios de güe almizcleru del Pleistocenu correspuenden de normal a individuos adultos, nun se documentando enantes nengún exemplar nuevu de les característiques del topáu nos Picos d’Europa. Por esta razón, pa facer un estudiu comparativu afayadizu d’esti craniu, hubo que trabayar con exemplares modernos, una y bones el güe almizcleru inda sobrevive en ciertes rexones del Árticu. Foi necesario, por tanto, movese al Muséu d’Hestoria Natural de Copenhague, qu’alluga una de les mayores colecciones de cranios de gües almizcleros actuales, procedentes de Groenlandia, con cuasi 300 exemplares, que resultó de gran valor pa realizar l’estudiu comparativu.

 

Les resultancies del estudiu punxeron de manifiestu ciertes diferencies ente l’exemplar de Picos d’Europa y los sos homólogos actuales de Groenlandia: l’espécime de los Picos d’Europa resultó tener un mayor tamañu que’l de los sos equivalentes actuales, amás de presentar peculiaridaes na so morfoloxía y na dentición, que nunca se describieron. La causa de la muerte d’estos animales tuvo bien probablemente en rellación cola cayida accidental por una trampa natural, esto ye, un pozu natural que comunicara verticalmente la cueva col esterior. A partir de la edá envalorada del güe almizcleru más nuevu, pudo deducise qu’esti animal morrió pel hibiernu. L’estudiu del microdesgaste nos sos molares indicó que l’animal alimentábase principalmente de ramillas y fueyes d’árboles y parrotales, probablemente salgares y abedurios, nel momentu que morrió, lo que ye tamién compatible con una dieta iverniza.

Mientres les glaciaciones del Pleistocenu Cimeru, el güe almizcleru estendióse per amplies rexones d’Eurasia y Norteamérica. Na Península Ibérica, la so presencia namás se detectare en dos xacimientos de Girona. L’afayu de Picos d’Europa constitúi, poro, la primer evidencia de la presencia d’esta especie na Cornisa Cantábrica, lo cual define una nueva llende suroccidental na distribución euroasiática d’esta especie y obliga a redibuxar el so mapa de distribución mientres el Pleistocenu.

Na Última Glaciación se documenta la presencia d’otros animales típicos de clima fríu, como mamuts llanudos, renos y rinocerontes llanudos, nel norte de la Península Ibérica. Otros grandes herbívoros, como’l bisonte d’estepa, el venáu xigante y el caballu; y carnívoros como’l llión de los covarones, el lleopardu y la hiena, vivíen daquella na Cornisa Cantábrica, nun paisaxe denomináu “tundra-estepa”, onde la vexetación herbal yera dominante, y los árboles y parrotales yeren escasos. Nesta dómina los glaciares entá ocupaben les cotes altes del Cordal Cantábricu.

Los restos fósiles fueron apurríos al Muséu de Prehestoria y Arqueoloxía de Cantabria, en Sanander, onde’l craniu ta anguaño espuestu al públicu.