La conseyera de Cultura, Política Llingüística y Deporte del Principáu d’Asturies, Vanessa Gutiérrez, presidió esti mediudía l’actu de presentación de les pieces nueves de la Tardoantigüedá que s’incorporaron a la colección permanente del Muséu Arqueolóxicu d’Asturies. En palabres de la conseyera, «nos últimos años esta institución vien aportando nuevos descubrimientos fundamentales pal conocimientu del pasáu d’Asturies, qu’a la vez posibiliten investigaciones rigoroses y fundamentales pa poner lluz sobre periodos tovía desconocíos de la nuestra historia». Por eso, «ye fundamental reconocer el llabor tanto de les persones que lo faen posible como’l papel del Muséu amosando les sos colecciones y el saber que se despriende d’elles al conxuntu de la ciudadanía», indicó.
Na so intervención, Vanessa Gutiérrez punxo en valir tamién los trabayos que se tán realizando pa la ellaboración de la llei nueva d’equipamientos museísticos d’Asturies, destacando dalgunes de les novedaes qu’esta norma va incorporar p’adaptar estos equipamientos a los tiempos nuevos. Por exemplu, la sostenibilidá y la diversidá afítense como principios fundamentales nel desenvolvimientu de les funciones museístiques. Al empar, na norma futura van abordase les innovaciones museográfiques y les realidaes sociales y culturales nueves, amás del desenvolvimientu d’una regulación pa garantizar la coordinación afayadiza ente centros museísticos ente los que s’alcuentra’l Muséu Arqueolóxicu, onde se desenvolvió esti actu.
Na entrega de los elementos arqueolóxicos nuevos, la conseyera destacó’l papel de la educación y la investigación nestos espacios, temática que centra la programación del Día Internacional de los Museos y dientro de la que s’enmarca la llegada d’estes pieces arqueolóxiques de valir patrimonial y históricu enorme que contribuyen a arriquecer l’área de la Tardoantigüedá. Asina, sorrayó l’actividá que s’entama a lo llargo de tol añu destinada a públicos d’edaes estremaes, combinada col «trabayu esmeráu d’años de les nuestres y nuestros investigadores, que malapenes ye reconocíu cuando les sos conclusiones ven la lluz en forma de publicaciones, pero que signifiquen munchos años d’análisis rigorosos y precisos, en necesaria collaboración ente instituciones y persones espertes».
Tremís de Recaredo I (586‐601) atopáu nel Castiellu de Gauzón, en Castrillón
El tremís de Recaredo I apaeció dientro d’un contestu arqueolóxicu datáu ente los sieglos XI y XII, nel trescursu de la escavación d’un espaciu asitiáu nel interior de la plataforma superior del Castiellu de Gauzón. Esta moneda atopóse nel trescursu de les escavaciones arqueolóxiques feches na fortaleza mentada nel añu 2013, ye’l primer tremís de Recaredo que se documenta nuna escavación d’esti tipu y entrególu’l Conceyu de Castrillón al Muséu Arqueolóxicu d’Asturies.
Los vestixos del Castiellu de Gauzón allúguense nel Peñón de Raíces, promontoriu que domina la bocana de la Ría d’Avilés. Les campañes arqueolóxiques identificaron niveles d’ocupación correspondientes a la Tardoantigüedá (sieglos VI‐VII), el Reinu d’Asturies (sieglos VIII‐X), Condal‐tenencial (sieglos X‐XII), Orde de Santiagu (sieglos XIII‐XIV) y un momentu últimu correspondiente a les guerres civiles castellanes de la segunda metá del sieglu XIV.
L’exemplar ye una moneda llamada tremís, tremissis en llatín, que significa terciu. Alcuñóse na ceca de Casaracosta (Caesaraugusta / Zaragoza), una civitas qu’emitió monedes propies dende Leovigildo hasta Aquila. L’estudiu del exemplar permitió determinar que se trata d’una variante nueva de tremís acuñáu en Caesaraugusta non identificada hasta agora. La so particularidá más destacada ye que presenta una «S» retrógada na lleenda del anversu, lo que la convierte nun exemplar inéditu.
La moneda muestra nel anversu’l bustu del rei de frente, con paludamentum y una fíbula circular que caltién el mantu. Los rasgos del monarca tán persimplificaos y lleva’l cabellu llargo, un rasgu característicu de los reis visigodos. Esta iconografía introducióla Leovigildo y inspírase na iconografía bizantina.
La lleenda “RECCAREdUS RE” que figura na moneda fai referencia al nome de la ceca onde s’emitió, Cesaracosta, una de les variantes del topónimu Cesaraugusta, qu’evolucionó al Zaragoza actual.
El tremís de Gauzón, que pesa 1,45 gramos, analizóse emplegando la técnica d’espectrometría de fluorescencia de rayos X na Universidá d’Uviéu pa conocer la so composición, investigación que determinó que se fixo con una aleación d’un 74,52 % de oro, un 22,23 % de plata y un 0,96 % de cobre.
Axuar de tumba de la necrópolis de la ilesia de San Pedro de Vigaña, en Belmonte de Miranda
L’axuar procede de la escavación arqueolóxica fecha nel añu 2013 pola catedrática d’Historia Medieval de la Universidá d’Uviéu Margarita Fernández Mier na contorna de la ilesia de Vigaña, nel conceyu de Belmonte de Miranda. Les investigaciones arqueolóxiques realizaes na aldea de Vigaña documenten la ocupación intensa de la necrópolis de San Pedro na Edá Media. Los enterramientos más vieyos remóntense a los sieglos VI y VII d. C.
De los 46 enterramientos escavaos na necrópolis, namás ún, datáu na primer metá del sieglu VII d. C, respuende a la tipoloxía de «enterramiento vestido», onde l’individuu va acompañáu d’un axuar rico, destacando una spatha tipo scramasax, un armamentu escepcional n’Asturies. La presencia d’estos oxetos ornamentales aporta información sobre les diferencies sociales na alta Edá Media, los ritos asociaos al momentu del enterramientu y les conexones de les aldees a nivel supralocal, con accesu a la circulación d’elementos de prestixu.
L’axuar componíase d’una espada de 54 cm de llargor, d’un solo filu tipu scramasax, y funda de madera y piel, de la que se conserven restos de fibra y parte d’un asa en forma de C con anclaxe remachao. Tamién apaeció una febiella de bronce con aguya xunida a trés remaches‐grapa en forma d’omega. Sobre la cabeza del fémur derechu apaeció una febiella de fierro con parte de la so aguya, rellacionada col cintu del que colingaba la espada.
L’axuar complétase con un cuchiellu de fierro con restos del puñu de madera al que s’asociaba una plaquina cruciforme tamién de fierro, un briquet, un punzón biapuntáu de fierro y una pieza de sílex.
Inscripción funeraria romana de Paredes, en Siero
La inscripción funeraria romana atopóse nel trescursu de los trabayos de revisión de los xacimientos del Inventariu Arqueolóxicu del conceyu de Siero a lo llargo del 2020 y 2021, cuando se realizaben prospecciones pa renovar los datos, recabar informaciones nueves y recoyer imáxenes actualizaes de los espacios arqueolóxicos. Nuna d’eses prospecciones, na rodiada del xacimientu de la Villa de Paredes, en Llugones, atopóse esta pieza funeraria. Alcontrábase empotrada nún de los muros d’una construcción destinada a taller, propiedá d’un vecín de San Félix que donó la pieza al Muséu Arqueolóxicu d’Asturies depués de que l’equipu técnicu de la Conseyería de Cultura la sacara con procuru del muru.
La inscripción funeraria correspuende a un epitafiu d’un individuu llamáu Camulo Vigano, muertu a los 22 años de edá, inscritu sobre un bloque d’oxiza ferruxinoso, que se recoyó a partir del recorte d’una basa o capitel, posiblemente procedente de la villa cercana de Paredes, pues la inmediatez a la necrópolis tardorromana del mesmu nome, vinculada cola mesma villa y datada ente los sieglos IV y V d.C., llevó a los investigadores a rellacionalu con ella.
