La Conseyería de Presidencia empezó güei la instalación d’una escultura n’As Figueiras (Castropol) nel espaciu ocupáu ente los años 1938 y 1943 pel campu de concentración de Arnao. La pieza, que supon un costu de 39.600 euros, va sirvir pa dignificar la zona y rindir homenaxe a los miles de persones que penaron nos sos barracones, fundamentalmente muyeres, neñes y neños.

La escultura d’aceru cortén, de 2,5 metros d’altu, 1,5 d’anchu y 2 de fondura, ye obra del artista asturianu Carlos García y representa les figures d’una muyer y una neña de perfil, coyíes de la mano, tres unos barrotes. La creación inclúi alusiones a dalgunos de los elementos más comunes de los campos de concentración, como les muries, los rexistros de presidiarios y l’encierre.

La escampada onde s’alzaben los barracones ye anguaño un área recreativa, próxima a un campu de tiru y a un club aeronáuticu, na qu’un monolitu recuerda la esistencia del campu. La intención del Principáu ye dignificar tol espaciu y reconocelo como llugar de la memoria.

El campu de concentración de Arnáu foi unu de los que más tiempu tuvo en funcionamientu mientres la represión franquista que siguió a la cayida del frente Norte y a la fin de la guerra civil. Allugó tanto a prisioneros de la guerra como a muyeres y neños, dixebraos de los primeres al traviés d’una alambrada. Nesti espaciu, les fuerces de guarnición desempeñaben tamién llabores de vixilancia y defensa de la mariña nun llugar estratéxicu como la ría.

Los mesmos prisioneros fueron obligaos a construyir trés barracones de madera para abargana de 300 persones, en que’l so interior instaláronse lliteres de trés pisos, pa cien persones por galpón.

Cada barracón midía 32 metros de llongura por 10,70 d’anchu y toos taben pintaos de color gris escuru. Ente ellos había una caseta, tamién de madera yun soterrañu destináu a almacén de cebera. Más tarde construyóse otra nave p’allugar a les fuerces de guarnición. Fora d’esi conxuntu allugóse otru barracón dedicáu a enfermería, con capacidá pa 27 cames. Amás, había una casa que s’utilizaba como oficina alministrativa y vivienda d’oficiales, según una garita de guardia, una fonte d’agua potable y, darréu, otru inmueble destináu a cocines.

El campu taba abarganáu con alambre d’espín y una serie de fortificaciones llixeres de campaña pa facilitar la so defensa. En xunu de 1943 llevantóse y desármense los barracones de madera. Anque’l 5 de setiembre de 1939 roblóse la orde de clausurar esti espaciu, ta documentao que siguió funcionando como campu de concentración pa presos gubernativos, yá sol mandu de la Dirección Xeneral de Prisiones.