El teatru Xovellanos de Xixón acoyó ayeri, dientro del Festival Internacional del Cine de Xixón, la proyección de la película La muyer de Tchaikovski, una obra del director ruso Kirill Serebrennikov. Yera una de les últimes sesiones del día y, anque fuera un domingu dalgo murnio pola lluvia, el teatru enllenóse de xente dispuesto a esfrutar de la cultura cinematográfica. Precisamente, esta película llegaba a la villa marinera de manera prometedora pola so presencia en Cannes esti mesmu añu, cuestionada por ser una película de nacionalidá rusa nun momentu de máxima tensión col país pola guerra n’Ucraína. Una controversia que nun afectó a la obra, tando nes nominaciones a la Palma d’Oru.
La mujer de Tchaikovski, qu’entama de manera lenta pente les cais de Moscú y San Petersburgo, narra la hestoria de Antonina Miliukova, una moza burguesa venida a menos y brillante que se casa nel últimu cuartu del sieglu XIX col famosu compositor Piotr Tchaikovski. Sicasí, esi amor qu’Antonina siente pol músicu tórnase n’obsesión y la traxedía empecipia a llegar a una relación condergada al fracasu.
La cinta rusa tien un puntu fuerte que ye, ensin duda, una fotografía y unos planos bien cuidaos mientres tola proyección que dexa clara la predilección de Serebrennikov pol gustu visual nes sos creaciones. Sicasí, nun ye lo que más destaca. El director ye capaz de facer qu’una hestoria d’amor camude nuna traxedia, una locura, al traviés de la vida y del pensamientu de la protagonista, Antonina Miliukova, un papel fecho a la perfección pola actriz Alyona Mikhailova pese a la complexidá del personaxe, que se vuelve decadente al mesmu tiempu que los minutos pasen na cinta y la relación camuda nuna toxicidá ablucante. Ye nesti intre, nel pasu del tiempu, onde’l director quiciás falla, introduciendo delles escenes que choquen col tonu de la película. Un fallu casi ensin importancia.
Dalgo que sí tien muncha importancia ye la puesta n’escena d’una de les cuestiones más controvertíes na biografía del compositor rusu: la so sexualidá. Quiciás la estratexa d’ataque d’un director de cine exiliáu escontra’l patriotismu qu’invade al gobiernu rusu. «Cómo echo de menos ser el so esclavu, xuguete, propiedá», narraba Tchaikovski nuna de les sos cartes refiriéndose a ún de los sos sirvientes. «Paezme qu’enxamás amara a naide tanto como a él», escribió tamién sobre ún de los sos pupilos alredor de 1880.
La muyer de Tchaikovski ye una traxedia, una historia de desamor, pero ye sobre too una hestoria de sexualidá encubierta nun sieglu y nuna sociedá conservadora. Y qu’ha ser una hestoria reivindicada al traviés del cine.
