Izquierda Xunida pidió güei axilidá pa que’l grupu de trabayu sobre les vacunaciones apurra información clara sobro los casos de posible alministración irregular de los fármacos inmunización frente a la COVID19. El diputáu Ovidio Zapico llamentó, esta mañana, na comparecencia del conseyeru de Salú, Pablo Fernández, que, casi un mes dempués, inda nun haya nengún informe al respeutu. «Yo güei pensaba bonalmente que (…) pudiérennos yá dar una respuesta. Güei ye 1 de marzu. Dende’l 5 de febreru al 1 de marzu creo que yera tiempu abondu por que esti grupu de trabayu pudiera apurrir claridá y lluz ante fechu que, anque seyan, y reconocer, afortunadamente, mínimos, nun dexen de tener ciertu componente d’esmolición pal conxuntu de la sociedá y nun hai meyor cuestión que dar lluz a tou esti procesu pa la garantía democrática de la que tantes vegaes falemos mientres estos díes. Polo tanto, encamentaría a l’axilidá».
Pa Zapico, ye imprescindible reforzar el Serviciu de Salú del Principáu d’Asturies (SESPA) pa que pueda xestionar la campaña de vacunación de forma axilosa y ensin necesidá de la so externalización. Frente a los pidimientos de la derecha pa abrir les vacunaciones al sector priváu, la izquierda, enfatizó, «por menos la que yo represento, diz-y que dende’l sistema sanitariu públicu hai garantía abonda pa nun tener qu’allegar agora mesmu a esos mecanismos de collaboración. Y que siga siendo asina, que siga usté faciendo tou lo que tenga que faer por que nun sía necesariu, nesta campaña de vacunación y nesti andanciu, tener que dir dar perres, que ye lo que realmente pretenden, al sistema sanitariu priváu pa garantizar la salú de toos y toes, que se garantiza dende l’esfuerzu colectivu y dende la salú pública».
El coordinador Xeneral de IX Asturies amosóse esmolecíu énte’l ritmu de vacunación que, matizó, nun puede ameyorase pola especulación» de les farmacéutiques y del propiu sistema económicu capitalista. «Los Gobiernos tán, empezando pol español y siguiendo por tolos de la Unión Europea, una vegada más, arrodillados énte les multinacionales farmacéutiques. Y los parlamentos democráticos, y lo gobiernos democráticos tienen que llevantar la voz de forma firme énte esta situación: hai que suprimir les patentes, hai que garantizar la universalización de les vacunes a lo llargo y anchu del planeta porque, si non, mal vamos salir ente qu’estes empreses sigan faciendo negociu a cuenta de la salú y la seguridá de toos».
