Asina meyoró la calidá del aire dende que se declaró l’estáu d’alarma

0
518

La evolución de la calidá del aire na zona central d’Asturies ameyoró notablemente dende la declaración del estáu d’alarma. Ye la principal conclusión del análisis realizáu pola Conseyería de Mediu Ambiente y Cambéu Climáticu. El departamentu qu’encabeza Juan Cofiño esaminó los contaminantes venceyaos a les emisiones pola mor del tráficu rodao y de l’actividá industrial. L’estudiu analiza los datos rexistraos nes estaciones allugaes en Xixón, Avilés, Uviéu y les cuenques mineres.

La concentración de dióxidu de nitróxenu (NO2), mui rellacionao col tráficu urbanu, menguó hasta’l 68 % en Xixón, el 62 % en Mieres y el 50 % n’Uviéu, Sama y La Felguera. El nivel promediu cayó de 25-30 µg/m3N (microgramos por metru cúbicu normal) a valores de 8-13 µg/m3N, en Xixón y Uviéu. La mengua mayor rexistróse nes estaciones xixoneses. El descensu nos niveles de NO2 tuvo dos etapes claramente visibles. Asina, producióse un primer amenorgamientu del nivel mediu nes dos primeres selmanes de confinamientu y otra adicional del 30 % nel periodu d’hibernación. Esta segunda baxada coincide col periodu dende’l 30 de marzu al 12 d’abril nel que se suspendió l’actividá económica non esencial.

Mengua de partícules PM10

La concentración de partícules PM10 (de tamañu inferior a 10 micres), lligada a l’actividá industrial y a fenómenos naturales como les mases d’aire saharianu con polvu en suspensión, rebaxóse hasta un 30 % nes estaciones de la rede del Principáu. La mengua de los niveles medios de PM10 mentes la hibernación de la economía al respective de la concentración media anterior al estáu d’alarma foi d’ente un 11 y un 30 % de media. Esta baxada obedez tanto al cese d’actividaes industriales non esenciales como al descensu del tráficu. El descensu foi más visible nes postreres dos selmanes, nes que namás la industria considerada esencial funcionó n’Asturies. Tamién se ve que la calidá del aire ameyoró notablemente dende’l 30 de marzu anque dalgunos grandes centros industriales, como Arcelor o Asturiana de Cinc, nun suspendieron actividaes.

La variación foi distinta na primer fase del confinamientu por cuenta de la llegada d’aire subsaharianu ente’l 18 y el 23 de marzu. Esta masa d’aire traxo partícules en suspensión y dio pie a una medría de la concentración de PM10 na atmósfera. L’aumentu nesi periodu varió ente un 6 % de media nes estaciones de Xixón a un 39 % n’Uviéu, onde les partícules se concentraron más.

La viceconseyera de Mediu Ambiente y Cambéu Climáticu, Nieves Roqueñí, considera qu’estos datos conviden a “cavilgar sobre la necesidá de modificar el modelu de vida habitual, qu’influye directamente na contaminación y indirectamente na salú de la ciudadanía qu’habita en ciudaes enllenes de tráficu”. «Ye menester tomar conciencia de que puen facese munches coses con menos desplazamientos, como’l teletrabayu, lo qu’amenorga notablemente la contaminación”. “Tenemos una gran oportunidá pa empezar un cambéu de modelu”, amestó.