Asistimos día a día na gran mayoría de los medios de comunicación a un constante intentu de culpar a gran parte de la sociedá de los problemes que supón el cambéu climáticu y l’aceleramientu d’esti fenómenu que tien consecuencies irreversibles pal nuesu planeta, ensin nin siquier mentar tola contaminación que producen delles industries y que son los mayores culpables nesti problema climáticu. Sequíes, lluvies extremes y otres delles xeres totalmente inhabituales son les consecuencies d’esti maltratamientu al planeta y qu’acaba produciendo l’abandonu de dellos territorios, siendo una de les causes principales de migración nel mundu.
Sicasí, nun ye la cuestión que tamos viendo na COP26 que se celebró en Glasgow. Y ye que, a la fin, cola mentada reunión, los dirixentes tán dándose cuenta de que la crisis climática produz miseria y probeza, anque nun resalten que los más probes son los que más sufren esti tipu de xeres. Con esto, tamién vemos que los países con menos riqueza, ye dicir, gran parte del continente africanu, son a los que más afecta esta cuestión. África y les economíes de los países africanos dependen de factores que dependen y afecten totalmente al clima mundial y nun tienen nengún tipu de fuercia p’adaptar esta economía a les necesidaes del planeta.
África, amás de la propia probeza que caltien dende la descolonización europea, tien agora otra llucha escontra’l cambéu climáticu na que ella mesma tien poco o nada que facer pa valtiala, dependiendo al cien por cien de les economíes más potentes del mundu. Y esta xera nun ye culpa de la sociedá, como dicíemos, ye culpa de les grandes multinacionales qu’incumplen los protocolos que, reunión tres reunión, los dirixentes firmen con gran ciñu, pero qu’al mes del garabatu, escaecen ensin esmolición.
