La Universidá d’Uviéu descubrió güei una placa, nel Campus d’El Milán, n’alcordanza y homenaxe a les víctimes del franquismu. Esti actu de reconocencia y arreglu de la memoria surdió a propuesta del profesoráu de la Área d’Hestoria Contemporanea y cuntó col respaldu de la Xunta de la Facultá de Filosofía y Lletres. La placa asitióse nel antepar del Edificiu Departamental del Campus d’El Milán pa rindir tributu a les víctimes del franquismu que neses dependencies militares sufrieron ominosos conseyos de guerra tres la ocupación d’Asturies poles tropes del exércitu insurrectu.
El descubrimientu de la placa llevóse a cabu esta mañana nun actu presidíu pol rector de la Universidá d’Uviéu, Ignacio Villaverde, y nel qu’intervinieron el decanu de la Facultá de Filosofía y Lletres, José Antonio Gómez, y la profesora d’Hestoria Contemporanea, Carmen García, que faló en nome de tolos sos colegues.
La profesora esplicó que yá mientres la guerra n’Asturies, tres la ocupación de la zona occidental de la provincia y cuando Uviéu taba conectáu cola zona franquista, empezaron a celebrase conseyos de guerra na capital, dende empiezos del añu 1937. D’esta miente, fueron xulgaos y condergaos a muerte numberosos presos, ente ellos el rector de la Universidá d’Uviéu, Leopoldo García-Alas García-Argüelles. La vista oral de dichos conseyos de guerra celebráronse nel edificiu de l’antigua Diputación Provincial (güei see de la Xunta Xeneral del Principáu), que, inda güei, recordó la profesora, sigue ensin cuntar con una placa recordatoria d’aquellos murnios acontecimientos.
Tres el fin de la guerra n’Asturies, los conseyos de guerra pasaron a celebrase nel cuartel d’El Milán y afectaron a miles de prisioneros con centenares de condenes a la pena capital. Por toes estes razones, los y les profesores de la Área d’Hestoria Contemporanea consideraron la conveniencia de que una cenciella placa remembre aquellos luctuosos sucesos y sirva d’homenaxe a quien fueron condergaos pol exércitu insurrectu. Suscribieron el pidimientu los y les profesores Jorge Muñiz, Francisco Erice, Carmen García, Víctor Rodríguez Infiesta, Jorge Uría, Julio Lisandro Cañón, Luis Benito García y Rubén Vega.
