L’Institutu Xeográficu Nacional (IXCN) reconoció’l topónimu ría del Eo como nome alternativu y col mesmu nivel d’oficialidá y usu qu’el de ría de Ribadeo, col que s’identificaba hasta agora l’estuariu nel que desemboca’l ríu Eo y que separta Galicia y Asturies. Esti reconocimientu produzse tres el pidimientu cursáu pola Conseyería de Cultura, Política Llingüística y Turismu para oficializar esti topónimu.
El IXN comunicó güei al Principáu esta resolución n’efectuando’l procedimientu alministrativu pa oficializar la nueva denominación énte les alministraciones interesaes: el Gobiernu d’Asturies, la Xunta de Galicia y los conceyos de Castropol, Ribadeo y A Veiga. Según la resolución dictada’l pasáu 29 d’ochobre, esta decisión “va suponer la inclusión de dambos topónimos en toles bases de datos xeográfiques producíes poles alministraciones públiques integraes nel Sistema Cartográficu Nacional y, amás, nes de l’Alministración Xeneral del Estáu”.
Otramiente, va encamentase la rotulación conxunta ría de Ribadeo y ría del Eo cuando la escala lo permita o bien l’usu indistintu de cualesquier de dambes formes si lo considera l’Alministración productora de la cartografía.
La oficialización del topónimu ría del Eo da respuesta a una demanda del Gobiernu d’Asturies, que vieno defendiendo esta denominación que tien rexistrada’l so usu en documentos oficiales dende 1871, lo qu’atestigua un considerable grau d’usu nel sieglu XIX. La presencia d’esti topónimu tamién apaez reflexada na cartografía del propiu Institutu Xeográficu Nacional dende 1991 y n’otres documentaciones, como l’acta de desllinde y cuadernu asociáu na llinia llende A Veiga-Ribadeo, dende 1960.
