Esti sábadu Xixón acoyó la manifestación del Arguyu LGTBI+. Tres una multitudiaria manifestación, que tuvo enllena de mensaxes de refugu al pactu ente Carmen Moriyón y VOX, la Plaza Mayor foi’l llugar escoyíu pa la llectura del manifestu. Esti añu lleeron el manifiestu’l periodista Inaciu Galán y l’activista de XEGA, Nanús González. Ufrimos el testu completu del discursu.
MANIFIESTU XEGA 2023
LLEI LGTBI+ ASTURIANA ¡YÁ!
Bones tardes. Bon Arguyu pa toes y toos.
Entamamos pola celebración, porque nestos tiempos que cuerren quieren quitanos l’allegría y la esperanza. Quieren que pensemos que nun se pue facer mas nada, que yá consiguimos muncho, que fuimos mui lloñe… Que nun vos engañen, esixir el cumplimientu de los drechos humanos nunca ye dir mui lloñe.
Molestamos porque tamos removiendo los pilares d’un sistema social que contempla namás la cisheteronorma patriarcal como lo válido. Molestamos porque tamos esixiendo visibilidá y llexitimidá. Tamos esixendo la llibertá pa ser fuera de les caxes binaries y xerárquiques. Eso ye la llibertá.
Tamos percorriendo xuntes un camín hestóricu nel que toles persones equí presentes sois fundamentales. Gracies pola vuesa llucha, enerxía y tiempu invertíos en querer trensformar el mundu a pesar de los problemes.
Y como imaxináis, nun tamos toles que somos y ye fundamental que tengamos eso presente. Poles persones que nun cuenten col sofitu familiar, poles que sienten mieu, poles que sufren o sufrieren violencies, poles que fueren ecluyíes nel trabayu, poles que tuvieren que fuxir de los sos países buscando protección y seguridá atopando equí una doble discriminación y con una llei d’estranxería amordazadora.
Tamién por aquelles persones que viven nes zones rurales, que trabayen nel campu y que carecen esperiencies de discriminación que munches vegaes nun se tienen en cuenta dende los movimientos de les ciudaes. Tamién poles persones con discapacidá, que s’atopen nel centru d’un sistema capacitista y LGTBífobicu. Poles personas asexuales que siguin siendo cuestionaes y patoloxizaes. Tamién por aquelles que tienen que sentir comentarios faltosos nel tresporte públicu, na clas o nel espaciu públicu, por aquelles que decidieren nun nomase de nenguna manera y por aquelles que tán en procesu d’aceptarse, por toes y caúna d’elles y por munches otres, equí tamos
La llucha polos nuesos drechos dase en munchos ámbitos y ún d’ellos ye’l llegal. Asturies ye una de les dos comunidaes autónomes d’España que nun tien una llei LGTBI+ y esto ye absolutamente indignante.
Nun queremos cualesquier llei, nin cualesquier borrador pa salir del pasu. Nun aceptaremos que se xuegue políticamente coles nueses vides. Esiximos al Gobiernu d’Asturies y a la Xunta Xeneral que, tal y como se prometió va años, faiga una llei qu’afite los nuesos drechos. ¿Ye’l momentu afayadizu yá o esperamos otra llexislatura a que vos venga meyor?
Nun escaecemos tampoco de que les persones non binaries fueron escluyíes de la llei estatal aprobada va pocos meses y del borrador presentáu pol Principáu. Hai quien s’empeña en dicir que somos una moda, un inventu reciénn, una aberración. Pero si miramos la hestoria, esistimos dende siempres. Y nun vamos dexar d’esistir y de lluchar pol drechu a la reconocencia y la protección llegal pa toles persones non binaries, de xéneru fluyíu, xéneru queer, axéneru y de cualesquier otra identidá y espresión de xéneru. La diversidá del colectivu nun ye dalgo a esconder, sinón a celebrar con arguyu.
Esti añu, el lema de la manifestación estatal ye “Abrazando la diversidá familiar: iguales en drechos”. Dende XEGA Families tamos presentes y queremos amplificamos la voz de toos esos modelos de families que reivindiquen la importancia del respetu a la identidá, orientación y espresión de les sos fíes o fíos.
Les families han ser espacios de cuidaos y procurar bientar, escucha activa y respetu a les sos criatures. Nun habría ser un espaciu d’odiu, cuestionamientu y soledá. Necesitamos educación en diversidá, formación tamién de les families, de les instituciones y del profesoráu. Necesitamos planes d’acción específicos contra l’acosu LGTBífobicu nes aules. Namás pente medies de la educación y la sensibilización podremos construyir una sociedá na que toles families seyan valoraes y respetaes.
Tamos en momentos mui complicaos. Tamos cansaes, agotaes, pero esti día ye precisamente nel que mos abrazamos y mos cargamos d’esperanza pa siguir. Porque tenemos que siguir lluchando.
Munchos medios de comunicación centráronse en presentar al nuesu colectivu como un enemigu social. Pero esto, compañeres, nun ye nuevo.
Siempres fuimos les vagues y maleantes, las peligroses sociales, les sodomites, les perverses, les pecadores, les enfermes, les invertíes… Fuimos munches coses, pero siempres, y gracies a la xuntanza del movimientu, al trabayu n’equipu, la cooperación y la llucha política, consiguimos tresformar la sociedá y l’imaxinariu colectivu. Y vamos a siguir faciéndolo. ¿Verdá que sí?
Y pa que quede claro: ¡Nun mos vamos comportar! Nun vamos ser dóciles nin a tar callaes énte les inxusticies o énte la instrumentalización política del movimientu. Nun vamos pidir permisu pa esistir. Nun vamos tolerar pactos cola estrema drecha nin a permitir nin un solu retrocesu de los nuesos drechos. Nin en Xixón, nin n’Asturies nin en nenguna parte.
Porque’l nuesu Arguyu ye un arguyu escontra la vergoña, un arguyu escontra la violencia LGTBIfóbica, un arguyu escontra’l silenciu al que mos pretenden someter, un arguyu reivindicativu, interseccional, que protesta, que se mueve y que contrúi, na so propia diversidá, una rede común de reivindicaciones, drechos, y llibertaes.
FELIZ ARGUYU, COMPAÑERES. ¡PUXA L’ARGUYU!
