Mapi Quintana (L.lena, 1976) ye la personificación de la bayura de la escena de jazz asturiana. Con estudios universitarios musicales cursaos nel Conservatoriu d’Ámsterdam, lleva 25 años formando parte de proyectos rellacionaos col jazz, cola música tradicional asturiana y cola improvisación. Amás, ye componente de la banda de Rodrigo Cuevas y de Girls to the Front. Mesmo, defendó la moción de «Música n’asturianu SÍ» nel plenu del Ayuntamientu de Xixón va unes selmanes ente los ataques del partíu políticu VOX.
Mapi Quintana ta tamién acabante de sacar dos discos d’estudiu depués de nueve años ensin asoleyar nenguna producción. La Maramoniz y Música pa tornar páxaros son los títulos d’estes obres qu’axunten hasta 14 pieces que beben de la tradición, del folk y del jazz.
- 9 años ensin espublizar, pero 9 años onde la música siguió más que presente na to vida. ¿Qué te fixó parar y volver con non solo un discu, sinón dos?
La música ye la mi profesión, entós siempre tá presente. Nun tuve pará, dediqueme a facer conciertos con proyectos propios y d’otros músicos, a escribir música y a la docencia. Pa sacar un trabayu discográficu alantre faen falta perres y muncha dedicación. Y yo puse les perres que tenía y el tiempu y la dedicación n’otros proyectos, sobre too de vida personal.
Lo que me fizo volver a grabar ye que tenía los dos últimos trabayos recién estrenaos y quería tenelos documentaos. Asina qu’esti añu, ensin perres pero con munchu puxu, volvíme lloca y decidíme a grabar esi trabayu de los dos últimos años. Fiximos un equipu humanu d’espatarrar de buenu pa llevalo a cabo, montamos un crowdfunding y acabamos sacando los dos discos.
- Con 9 años pel mediu, son munches les coses que quies cuntar y tresmitir. ¿Cuál ye l’envís d’estos trabayos?
La música pa mí ye una canal d’espresión que me ayuda a esteriorizar coses que me pasen: lo cotidiano de la mi vida, les persones que quiero, les perdes… Nesti casu, los dos discos salen de la necesidá d’ avanzar na perda de xente querío. La Maramoniz tá fechu alrodiu d’unos cantares que m’enseñó mio güela María una tarde na so cocina. Güelita morrió en 2020 y arranqué a facer esi repertoriu como alcordanza d’ella y de la so vida. Música Pa Tornar Páxaros ye’l dolor que sentí cuando morrió Elías García y l’avanzar nesi duelu.
- ¿Qué influencia de la esperiencia de vivir nel esterior hai nellos?
N’ Ámsterdam deprendí mucha técnica músical. N’ Asturies ya llevaba munchos años estudiando música y n’Ámsterdam siguí deprendiendo. Deprendí munchu llinguaxe, deprendí a entender cómo funciona la música per dientro, armonía, formes… Tamién deprendí a escuchar meyor y conocí muncha xente que m’enseñó la so música tradicional y otres músiques. Too eso ye lo que traxe de estudiar y vivir nel estranxeru.
- Amás de la to carrera en solitariu, yes componente de la banda de Rodrigo Cuevas, mesmo que de Girls to the Front. ¿Cómo encaxen estos proyectos tan diferentes na to trayectoria?
En GTTF canto los temes soul del repertoriu. Ye un xéneru que llevo esuchando munchos años y col que me topo a gusto. Amás, la banda toa de muyeres ye un fiestón y un empoderamientu fuerte.
La música que tá faciendo Rodrigo Cuevas paezme interesante y tar nos sos conciertos ye una esperiencia vital muy potente. Toi encantá siendo parte d’esi equipu.
Y lo demás ye ser meticulosa cola axenda y llevala bien al día pa no liala coles feches.
- Una de les tos últimes grandes actuaciones (y nun foi enriba del escenariu), foi na defensa de la moción “Música n’asturianu SI” nel Ayuntamientu de Xixón. ¿Cómo vive una persona que dedica a la música esti procesu?
Más que como música, sentíme atacada, acosada y señalada COMO PERSONA por falar la mio llingua materna. Nunca pensé que diba vivir una situación como esa. Ye como del medievu…
Emocionóme que la xente revolvímonos, defendímonos con tolos medios y al final conseguimos frenar aquella barbaridá.
- Esti interés pola música asturiana de raigañu, pero tamién del jazz, ¿d’ónde vien?
Son músiques qu’ apaecieron na mi vida en diferentes momentos vitales y que yeren perfectes pa esos momentos. Agora estes músiques y toles otres que fui topando pel camín son les referencies qu’apaecen cuando escribo ya interpreto música.
- ¿Crees que dende les instituciones se fai una bona apuesta pola música n’asturianu?
Tamos avanzando en polítiques culturales. Tán dándose pasos na dirección acertada pa tener un sector artísticu más sólidu, pero tien que dir muncho más allá de los premios y les sovenciones. Por exemplu, anque ye complexa y difícil de llevar a cabu, “Asturies Cultura en Rede” ye una idea perbona y si se consolida ye un recursu potente a llargu plazu. Pero faen falta más coses: fai falta revisar el sistema de contrataciones, fai falta tar colos artistes tamién cuando tán creando y non sólo premiar el resultáu. Y hai que topar la manera de que tolos ayuntamientos, toos ensin esceición, tengan programación musical profesional.
Y nun podemos pasar por alto que la música tradicional ye sólo una parte de la nuestra cultura. Nun se pue descontestualizar y pretender aprendela ensin saber por exemplu de baille, de dances, d’organoloxía o de la función social de la música.
- La música n’asturianu ta teniendo nestos postreros años un mayor puxu. Sicasí, la gran mayoría son grupos o músicos con cierta trayectoria. ¿Hai falta de xente mozo que faiga música n’asturianu o ye falta d’esa apuesta de les instituciones de la que falábemos?
Yo soi más partidaria de que la música té bien fecha más allá de que té nuna llingua o n’otra o de la edá que tenga la xente que lo fai. La formación y tener dalgo que cuntar ye lo más importante pa facer música, na mio opinión. Si nun hai más xente faciendo música n’asturianu nun creo que seya falta d’apuesta de les instituciones. Obviamente, con fondos pa una formación de calidá y ayudes nos períodos de creación, ye más fácil facer música. Pero quien quiera facer música, va facela con o ensin apoyu insitucional. Poco se fala d’otru tipu d’ apoyu que ye mui importante. Facilitaría la situación de los y les trabayadores del sector artísticu, que les families y la sociedá en xeneral, entiendan ya que los trabayos de creación artística son trabayos dignos que requieren munchos años de formación y qu’apurren dalgo valioso a la sociedá. Que nun somos cuatro mangantes que vivimos del aire.
