Podemos pide baxar el sueldu de los diputaos

Ripa critica que la respuesta del PSOE énte l'arrogancia de Podemos sía "atropar puestos na mesa de la Xunta y espulsar a 60.000 votantes"

0
117
Podemos pide baxar el salariu de los diputaos
Los diputaos de Podemos Lorena Gil, Nuria González, Rafael Palacios y Daniel Ripa. / Podemos

Los diputaos de Podemos treslladaron a la mesa de la Xunta Xeneral dos pidimientos empobinaos al restu de grupos. De primeres, la vinculación de la retribución de los parllamentarios al Salariu Mínimu Interprofesional. «Los miembros del Parlamentu deberíen cobrar menos de 2.000 euros, que ye como vive la mayoría de la xente. Nun podemos ser unos privilexaos». De segundes, l’amenorgamientu nun 30% de la retribución que reciben los Grupos Parlamentarios. «Esperemos que’l cuatripartitu que vimos ayeri vaiga nesa dirección y non na llínea contraria de cobrar más y trabayar menos», afirmó’l secretariu xeneral de la formación morada, Daniel Ripa.

Daniel Ripa criticó que «dempués de pasar trés años diciendo que tenía que llegar a alcuerdos con Podemos, Adrián Barbón votó con PP, Ciudadanos ya Izquierda Xunida pa dexar fuera de la mesa de la Xunta a Podemos«. El secretariu xeneral de la formación aseguró que «cumplimos colo que nos paecía xusto» y llamentó que «la respuesta foi dexar fuera la voz de 60.000 votantes de Podemos». El diputáu criticó qu’esti repartu espeya la «política d’aliances» del futuru presidente del gobiernu. «Cómo pue ser que pa Juan Vázquez Ciudadanos sía un partíu que s’echó en brazos de Vox y p’Adrián Barbón sía un potencial aliáu», reflexionó.

Ripa mostróse dispuestu a falar col PSOE y aseguró que «a menos de diez díes de la investidura «nun tuvimos nengún contactu». «Fuimos capaces de llegar a alcuerdos, como’l presupuestu, que significó rebaxar de la matrícula de les escueles de 0 a 3 y la contratación de 600 médicos. Lo que nun pueden ye pidinos alcuerdos pa xubinos los sueldos”, concluyó.