L’equipu científicu del Muséu del Xurásicu d’Asturies (MUXA) recuperó esta mañana dos grandes bloques d’arenisca con galeríes d’invertebraos xurásicos nos cantiles de la sablera d’España, en Quintes, Villaviciosa.
La conseyera de Cultura, Política Llingüística y Turismu, Berta Piñán, y l’alcaldesa de Colunga, Sandra Cuesta, tuvieron presentes na recuperación d’estes pieces xuntu al equipu d’investigación del MUJA, formáu polos xeólogos José Carlos García-Ramos y Laura Piñuela. Amás, Teodoro y Gerardo Morréis Costales collaboraron viviegamente nos trabayos de recuperación d’estes pieces.
Les superficies d’estos bloques amuesen múltiples llurigues con forma d’O, trazáu irregular, disposición horizontal a subhorizontal y ornamentación tresversal, producíes por una variedá de crustáceos o de viermes xurásicos. Esti tipu d’estructures conócense col nome de Rhizocorallium y atópense davezu n’ambientes mariniegos y marinos de poca fondura. El so trazáu puede ser rectu, tropezosu o n’espiral.
Anque esta variedá de buelgues orgániques ye relativamente frecuente nel rexistru fósil de distintes edaes, los exemplares de la sablera d’España son una de les meyores amueses conocíes d’esta variedá de traces fósiles a nivel mundial tantu pola so elevada concentración como pol so escelente caltenimientu.
Dambos bloques desprendíos del cantil vienen de la mesma capa perteneciente a la Formación Llastres del Xurásicu Cimeru, tienen una edá averada de 152 millones d’años y amuesen amás na superficie ondulaciones debíes al aguaxe de la dómina qu’afectaba a los sedimentos acumulaos n’antiguu delta.
Na redolada recuperáronse amás buelgues de dinosaurios carnívoros, munches d’elles de pequenes dimensiones, conocíes col nome científicu de Grallator.
