La Sección Cuarta de la Sala III del Tribunal Supremu decidió por unanimidá suspender cautelarmente l’esterramientu de los restos de Francisco Franco Bahamonde. La midida taba prevista pal próximu 10 de xunu a les diez de la mañana. La razón en que fuelga esa decisión ye la d’evitar el perxuiciu que, otra manera, causaría a los recurrentes y, especialmente, a los intereses públicos encarnaos nel Estáu y nes sos instituciones constitucionales, que veríense gravemente afectaos si, desaterraos esos restos, envalorárase’l recursu y fora preciso devolvelos al llugar en que se topen, según la nota informativa facilitada pola Sala.
Categoría: Actualidá
-
La construcción repunta n’Asturies
El conseyeru d’Empléu, Industria y Turismu, Isaac Pola, destacó güei l’importante crecimientu qu’esperimentó’l sector de la construcción n’Asturies dende 2015, con un aumentu del 12,7% d’empreses y del 16,9% del empléu. Pola realizó estes declaraciones na inauguración de la xornada Construcción 4.0., entamada pola conseyería, l’Institutu de Desenvolvimientu Económicu del Principáu (Idepa) y el Centru Européu d’Empreses ya Innovación ( CEEI), xuntu cola Confederación Asturiana de la Construcción – CAC Asprocon, col fin de convertise nun puntu d’alcuentru ente les compañíes y la comunidá innovadora.
El titular d’Empléu animó al sector a «siguir exerciendo como ún de les pilares fundamentales de la economía rexonal, procurando incrementar la competitividá tanto de los contratistes y promotores como de la industria auxiliar».
Mientres la so intervención, venceyó l’ameyoramientu nesti campu cola dixitalización de procesos que, al so xuiciu, «va traer consigo una revolución fonda y cambeos nos modelos de negociu». Nesti sentíu, esplicó que’l Gobiernu d’Asturies diseñó un plan estratéxicu pa favorecer el desenvolvimientu de la comunidá al traviés del texíu granible, col propósitu de facilitar la incorporación de firmes asturianes a la industria 4.0 al traviés de cuatro exes d’actuación: divulgación, asesoramientu, plataforma d’alcuentru y sofitu financieru.
Pola animó al sector a «siguir exerciendo como ún de les pilares fundamentales de la economía rexonal»
L’oxetivu de la iniciativa Asturies Industria 4.0, que s’asitia en llinia cola Estratexa Rexonal d’Especialización Intelixente Asturies RIS 3, pasa por incrementar el llideralgu del Principáu como rexón industrial al traviés de la tecnoloxía. «Por eso resulta fundamental qu’un sector tresversal como’l de la construcción s’incorpore a la carrera pola digitalización», sorrayó’l conseyeru.
Según recordó, el preséu central p’avanzar escontra la digitalización ye l’Asturias Digital Innovation Hub, col que se facilita l’accesu a nuevos mercaos, a cadenes de valor globales y al catálogu d’habilitadores tecnolóxicos, quince en total, que van sofitar la incorporación del texíu empresarial rexonal a la cuarta revolución industrial. Pola convidó a tolos asistentes a la xornada a que consulten con esos habilitadores tecnolóxicos, empreses asturianes capacitaes pa procurar la dixitalización de les empreses, al traviés de la páxina web www.asturiasindustria40.es, y ufiertó el sofitu del Executivu autonómicu y del Grupu Idepa pa llograr que’l sector asturianu de la construcción sía cada vez más competitivu.
Nel actu d’inauguración participaron tamién los directores xenerales d’Innovación y Emprendimiento, Ana Concejo, y del Idepa, Eva Pando, amás del presidente de la Fundación Llaboral de la Construcción, Joel García.
Na xornada presentáronse dellos casos d’éxitu, tanto d’empreses de la construcción que yá empecipiaron el so procesu de dixitalización como per parte de la comunidá habilitadora, qu’amosó’l potencial de la so tecnoloxía nesti sector.
-
Agua de Cuevas facturó un 12% más hasta los 7,8 millones d’euros en 2018
Agua de Cueves facturó 7,8 millones d’euros en 2018, un 12% más que n’exercicios anteriores. La compañía asturiana envasó l’añu pasáu un total de 43,8 millones de llitros d’agua mineral nes sos instalaciones de Felechosa. Na planta envasadora trabayen un total de 16 persones.
Estes resultancies reafiten l’enclín de crecedera d’Agua de Cuevas nos últimos años. L’añu pasáu executóse una inversión de 130.000 euros na planta envasadora col oxetivu principal d’adaptase a les nueves demandes del mercáu d’agües. Esta inversión vien sumase a un proyectu global de modernización del manantial nel que yá s’invirtió más de 1.130.000 euros. «Nos últimos años llevemos a cabu un importante esfuerzu por dotar a Agua de Cuevas del meyor equipamientu pa tar al altor de lo que’l mercáu demanda».
Agua de Cuevas ye líder na canal d’alimentación d’Asturies. Nos últimos años reforzó la so posición nos llineales y desenvolvió una campaña d’acercamientu al consumidor asturianu sol lema ‘N’Asturies curiamos asina’. Esti conceptu reforzóse amás nesti últimu añu con una nueva campaña centrada na ‘Asturoterapia’, un nuevu términu que fai referencia a una forma única de curiase basada na calidá de vida de los asturianos.
Agua de Cuevas forma parte del portfolio d’agües minerales naturales de la corporación Hijos de Rivera. Esta agua asturiano, que naz nel Manantial de Felechosa, en Puertu de San Isidro, se envasa a 800 metros d’altitú. El so baxu conteníu en sodiu conviértela n’ideal pa curiar la salú y practicar deporte.
-
Trés empreses asturianes ganen el Ances Open Innovation
Trés empreses asturianes resultaron ganadores, ente más d’un centenar de participantes, del Ances Open Innovation. Trátase d’un programa que busca crear negocios ente grandes sociedaes tractores y pymes de base tecnolóxica. Les nueves empreses iKnovatio&doShareIT Solutions, SVMAC y Objetiv Creativo fueron escoyíes gracies a les soluciones qu’ufiertaron a los retos llanzaos por Gonvarri, Iberdrola y Liberbank, respectivamente.
Esti programa d’innovación ta entamáu pola Asociación Nacional de Centros Europeos d’Empreses ya Innovación (Ances) so la coordinación de Cristina Fanjul, vicepresidenta d’Ances y directora de CEEI Asturies. La segunda edición cuntó cola participación d’once empreses líderes nos sos sectores: Capsa Food (Central Llechera Asturiana); Central de Reserves; CEU Business School; Enagás; Ferrovial; Gonvarri; Grupu Fuertes (El Pozo); Iberdrola; J. García Carrión; Liberbank y Soltec. Estes sociedaes escoyeron 30 soluciones finalistes pa los oxetivos tecnolóxicos llanzaos d’ente les 110 propuestes presentaes dende toa España.
Ente les escoyíes atopábense 5 pymes asturianes: Altabox, Dois Miller, iKnovatio& doShareIT Solutions, Obetivo Creativo, SVMAC, amás del Institutu d’Investigación Sanitaria del Principáu (ISPA). Finalmente, trés nuevos empreses innovadores del Principáu resultaron ganadores nun actu celebráu güei en Madrid, que cuntó cola presencia de Cristina Fanjul, directora del CEEI Asturies y coordinadora del programa, y del director xeneral de Centru pal Desenvolvimientu Tecnolóxicu Industrial d’España, Javier Ponce.
Los retos que se plantegaron nesta edición taben rellacionaos con enclinos globales de la nueva economía, como dixitalización, industria 4.0, economía circular y enerxíes anovables. Amás, tomaben nuevos modelos de negociu o productos, mesmo que l’aplicación de tecnoloxíes a procesos como la sensórica, la intelixencia artificial, big data o l’internet de les coses.
-
Alejandro Portes, Premiu Princesa de Ciencies Sociales
El sociólogu estadounidense d’orixe cubanu Alejandro Portes foi galardonáu col Premiu Princesa d’Asturies de Ciencies Sociales 2019, según fixo públicu güei n’Uviéu’l xuráu encargáu de la so concesión. Esta candidatura foi propuesta pol Grupu d’Estudios sobro Inmigración y Minoríes Étniques y el Centru d’Estudios ya Investigación en Migraciones de la Universidá Autónoma de Barcelona.
Alejandro Portes (Cuba, 13 d’ochobre de 1944) empezó los sos estudios na Universidá de L’Habana (1959-60) y treslladóse a Buenos Aires, onde se matriculó en Socioloxía na Universidá Católica d’Arxentina. Nacionalizáu estadounidense en 1968, siguió la so formación na de Creighton (EE. UU.) y, en 1970, doctoróse na Universidá de Wisconsin-Madison (EE. UU.). Dende entós foi profesor de les universidaes de Texas (1971-1975), Duke (1975-1980), Johns Hopkins (1980-1996) y Princeton, a la que llegó en 1997 y onde foi, ente 2003 y 2014, catedráticu Howard Harrison y Gabrielle Snyder Beck del Departamentu de Socioloxía. Tamién foi cofundador en 1988 del Centru de Migraciones y Desenvolvimientu de Princeton, que dirixió dende 1999 a 2012. Dende 2011 ye profesor de la Universidá de Miami y dende 2014, eméritu de Princeton. Ye investigador del Centru pa la Investigación y l’Analís de la Migración del University College de Londres. Foi miembru del conseyu asesor del Institutu Max Planck pal Estudiu de la Diversidá Relixoso y Étnico y profesor visitante en delles universidaes europees ya iberoamericanes.
La so actividá investigadora céntrase nos ámbitos de les migraciones internacionales y la socioloxía económica
Consideráu unu de los sociólogos de mayor prestíu internacional, Portes destacó pola so actividá investigadora nos ámbitos de les migraciones internacionales, la socioloxía económica, el desenvolvimientu comparativu, la urbanización de los países en víes de desenvolvimientu y la marginalidad social. Integrante de la nueva socioloxía económica, los sos estudios convirtiéronse nuna referencia pa emponer y entamar la investigación empírica de científicos sociales de too el mundu. El so trabayu de les postreres cuatro décades ayudó a conocer y entender l’adaptación de los inmigrantes nos sos países de destín.
En 1992 empecipió un proyectu al llargu plazu, l’Estudiu llonxitudinal de fíos d’inmigrantes’. Entrevistó a más de 5.000 neños, repitiendo la entrevista na adolescencia. El so diagnósticu foi que la llamada segunda xeneración integrábase bien na sociedá estadounidense, pero tamién detectó un riesgu d’inadaptación nos fíos d’inmigrantes illegales d’escasu nivel educativu. Publicó, con Ruben Rumbaut, esti estudiu en ‘Legacies: The Story of the Inmigrant Second Generation’ (2001), ganador de dellos premios de l’Asociación Americana de Socioloxía. En 2013, col Institutu Universitariu Ortega y Gasset, realizó un analís similar n’España con casi 7.000 entrevistes. Ente otres conclusiones, apuntó que’l 50 % de los fíos d’inmigrantes siéntese español. En 2016 publicó ‘Spanish Legacies: The Coming of Age of the Second Generation’, la segunda parte del estudiu.
En 2008 recibió’l premiu añal que concede l’Academia Americana de les Ciencies
Pertenez a los conseyos editoriales de Revista Española de Socioloxía, Actes de la Recherche en Sciences Sociales, International Migration Review, Revista Mexicana de Socioloxía y Ethnic and Racial Studies. Ye autor d’unos 250 artículos y más de 30 llibros.
Ye miembru de l’Academia Americana de les Artes y les Ciencies y de l’Academia Nacional de Ciencies d’Estaos Xuníos. Amás, Portes presidió les asociaciones Sociolóxica Internacional y la Sociolóxica Americana y ye presidente electu de Sociedá Sociolóxica Oriental. Ye doctor honoris causa pola neoyorquina New School for Social Research y poles universidaes de Wisconsin-Madison (EE. UU.) y Xénova (Italia) y profesor honoríficu de les universidaes d’Alicante y de Nueva York Abu Dhabi. En 2008 recibió’l premiu añal que concede l’Academia Americana de les Ciencies.
-
El tabacu causa cada añu más de 2.250 muertes n’Asturies
El tabacu provoca cada añu más de 2.250 muertes n’Asturies. Los más afectaos son los varones, el 69,3% del total, y ye la causa del 17% de tolos fallecimientos que se producen ente la población mayor de 35 años. Amás, nesti grupu d’edá, el tabaquismu ta rellacionáu col 37% de los fallecimientos que se producen por neoplasies, enfermedaes cardiovasculares y respiratories, según los últimos datos del Rexistru de Mortalidá, correspondientes a 2017.
De toles muertes atribuyibles al tabaquismu, el 48% débense a patoloxíes respiratories. Si esta cifra se segrega por sexos, el 35% afectó a muyeres y el 53% a homes. Los tumores de gorgoberu, bronquios y pulmón causaron 618 muertes; y la enfermedá pulmonar obstructiva crónica (EPOC), 216.
Los tumores respiratorios fueron responsables del 33% de los fallecimientos atribuyibles al tabacu n’homes y del 21% en muyeres. Les neoplasies, con 961 fallecimientos, representaron el 42% de fallecimientos atribuyibles al tabaquismu. Les d’orixe respiratoriu en larinxe, gorgoberu, bronquios y pulmón son responsables del 68% del total d’eses muertes. Si s’analiza’l períodu de 1998 a 2017, constátase qu’el 19% del total de fallecimientos n’Asturies ye atribuyible al tabacu. Nesi tiempu, finaron 47.317 persones por esta causa, 2.365 al añu.
El director xeneral de Salú Pública, Antonio Molejón, ufiertó güei estos datos con motivu del Día Mundial ensin Tabacu, que se va celebrar el vienres, y esplicó qu’el so departamentu peracaba un Programa de Prevención y Control del Tabaquismu 2019-2023 que se va presentar llueu. L’oxetivu prioritariu d’esta iniciativa ye la meyora de la salú de la población a partir de trés planteamientos: evitar o retrasar l’entamu del consumu, especialmente en mozos y adolescentes; facilitar l’abandonu del consumu ente la población fumadora y protexer a la non fumadora de la esposición al fumu.
-
Estos son los nuevos billetes de 100 y 200 euros
Los nuevos billetes de 100 y 200 euros, los postreros de la serie Europa, entren güei en circulación. Los billetes incorporen elementos de seguridá nuevos y ameyoraos y pueden comprobase fácilmente col métodu «toque, mire y xire». Na parte cimera de la banda plateada, un holograma con satélite amuesa pequenos símbolos «€» que, al inclinar el billete, muévense alredor del númberu qu’indica’l so valor y apréciense con más claridá so una lluz directo.
La banda plateada tamién amuesa la semeya d’Europa, el motivu arquitectónicu y un símbolu grande. Coles mesmes, los nuevos billetes de 100 y 200 euros incorporen un númberu verde esmeralda ameyoráu. Anque’l númberu verde esmeralda apaez nos demás billetes de la serie Europa, nesta versión ameyorada pueden apreciase tamién símbolos «€» dientro del númberu.
Los nuevos billetes de 100 y 200 euros tienen agora’l mesmu altor que los de 50 euros. D’esta manera son más fáciles de remanar y procesar poles máquines. Tamién van caber meyor nes carteres de los ciudadanos y van tener mayor durabilidad, yá que van tar menos espuestos a la gastadura.
El billete de 100 euros ye la tercer denominación más usada depués de los de 50 y 20 euros. La demanda de billetes de 100 y 200 euros ta aumentando, a una tasa añal del 7,6 % y del 8,6 %, respectivamente. Los billetes de 100 y 200 euros de la primer serie, al igual que les demás denominaciones, van siguir siendo de cursu llegal, van siguir utilizándose xuntu colos de la primer serie y van dise retirando pasu ente pasu de la circulación.
-
Más pelegrinos nel Camín de Santiago per Asturies
Un total de 2.821 pelegrinos percorrió los itinerarios asturianos del Camín de Santiago nel primer cuatrimestre del añu. Esta cifra supón un aumentu del 12 % al respective del mesmu periodu del 2018, según los datos espublizaos pola Oficina del Pelegrín de Santiago de Compostela.
La declaración d’estes rutes como Patrimoniu de la Humanidá pola Unesco favoreció dende’l 2015 una medría del 24,8 % de los usuarios que, nel casu del Camín Primitivu, algama’l 31,1 %. L’añu pasáu, 34.078 pelegrinos pasaron pelos itinerarios asturianos, que son ún de los productos de cabecera del Programa de Turismu Sostenible del Principáu.
La Conseyería d’Empléu, Industria y Turismu entamó esta selmana’l viaxe al Principáu d’un representante de l’axencia norteamericana Your way adventures. L’oxetivu ye que la empresa incorpore al so catálogu los itinerarios asturianos, amás de la conexón ente’l Camín Francés y el Primitivu. Anguaño, l’axencia ufierta yá viaxes de 7 o 16 díes pel camín francés y el portugués. Esta iniciativa enmárcase nos alcuerdos algamaos con dellos operadores internacionales na feria Fair way, celebrada en Santiago de Compostela en febreru.
-
Abierta la matrícula pa los cursos d’asturianu a distancia de Iniciativa
Yá ta abierta la matrícula pa la nueva convocatoria de cursos d’asturianu a distancia qu’entama Iniciativa pol Asturianu. Los cursos tienen dos niveles: básicu y avanzáu. Van tener una duración de 36 hores llectives y van celebrase dende’l 11 de xunu a finales de xunetu, o más alantre dependiendo de los díes festivos de cada conceyu y de les circunstancies de cada cursu.
El nivel inicial de los cursos d’asturianu a distancia ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu. El nivel avanzáu ta empobináu a persones con una conocencia más fonda del idioma, que yá ficieren dalgún cursu enantes.
La matrícula pa los cursos d’asturianu a distancia pueden facese na propia páxina web de la organización (www.iniciativapolasturianu.org) . El plazu d’inscripción acaba’l vienres 7 de xunu. El cursu va entamar el martes 11 de xunu. Los cursos a distancia tienen un llímite de 50 places, 25 por nivel, ampliable en función del total de matrícules. El preciu de la inscripción ye de 60 euros, 50 pa socios d’Iniciativa pol Asturianu.
-
Duro Felguera tresllada la so sede de Madrid a Xixón
Duro Felguera tresllada la so sede de Madrid a Xixón. Según informa ‘Expansión’, la compañía yá comunicó a los sos emplegaos la decisión de pesllar les oficines centrales asitiaes na capital d’España. La so actividá treslladarase a la sede central del Parque Científicu Tecnolóxicu de la Xixón.
Esta decisión afecta a más d’un centenar de trabayadores. El treslláu de les oficines de Madrid a Xixón enmárcase dientro d’un procesu d’aforru de costos. La inxeniería asturiana vien atravesando dellos problemes económicos. L’añu pasáu la compañía vióse obligada a vender la so sede corporativa y un edificiu d’oficines en Las Rozas a la firma británica Signal Capital. Una operación con un valor que s’estima nunos 30 millones d’euros.