Xixón al día

Categoría: Asturies

  • El 92,54% del estudiantáu aprueba la EBAU de xunu

    El 92,54% del estudiantáu aprueba la EBAU de xunu

    Nueve de cada diez estudiantes que se presentaron a la prueba d’evaluación de bachilleratu para l’accesu a la Universidá (EBAU) n’Asturies na convocatoria de xunu aprobaron. Un total de 3.712 de los 4.125 estudiantes, el 92,54%, llograron la calificación d’aptu. El porcentaxe d’aprobaos foi llixeramente superior nel casu de los homes, un 92,79% ente’l 92,33% de les muyeres.

    La nota media xeneral de la prueba EBAU de xunu foi de 7,055, siendo la de xunu del añu pasáu 6,93. La nota más alta llograda nesta convocatoria foi, como l’añu anterior, de 9,95. El númberu d’estudiantes con nota media igual o superior a 9 ye de 383 persones. Por asignatures de la fase d’accesu, en Llingua Castellana y Lliteratura II el porcentaxe de persones aprobaes asitiase nel 88,26%. La nota media ye de 6,81. En cuanto al Inglés, aprueba’l 73,07% con una nota media de 6,29. Nel casu d’Hestoria d’España hai un 73,29% de persones aprobaes y una nota media de 6,38.

    Les revisiones de los exames van solicitase puramente online los díes 17, 18 y 19 de xunu

    Nes pruebes correspondientes a les materies troncales de modalidá de Bachilleratu, el porcentaxe d’aprobaos en Matemátiques II ye del 64,72 % con una nota media de 5,62. Nel casu de la asignatura de Matemátiques Aplicaes a les Ciencies Sociales II aprobó’l 83,10% con una nota media de 6,55 y en Llatín II, el  61,20% con una nota media de 5,78. El porcentaxe d’aprobaos en Fundamentos del Arte II foi del 88% con una nota media de 7,16. Na fase d’almisión son reseñables les resultancies llograes nes asignatures de Bioloxía, con un 75,23% d’aprobaos y una nota media de 6,36; Física, col 69,88 % y una nota media de 5,95 y en Química’l porcentaxe d’aprobaos ye del 70,36 % con una nota media de 6.

    Coles mesmes, realizáronse les pruebes de la fase d’almisión un total de 400 estudiantes, 210 procedentes de ciclos formativos de grau superior y 190 procedentes de bachilleratu (p’ameyorar la so nota anterior).

    Les revisiones de los exames van solicitase puramente online los díes 17, 18 y 19 de xunu hasta les 14 hores. La nota revisada va publicase’l día 25 de xunu a partir de les 20 hores, pudiendo xenerar el certificáu dixital de resultancies definitivu pa estudiantes con reclamaciones.

  • Firida una conductora al chocar contra un árbol en Siero

    Firida una conductora al chocar contra un árbol en Siero

    Una persona resultó mancada en saliéndose de la vía’l vehículu que conducía y chocar contra un árbol nel AS-17, na rotonda d’accesu dende l’A-66, en Siero. Según los datos facilitaos pol Serviciu d’Atención Médica Urxente (SAMU) la ferida, una muyer de 26 años d’edá, foi sacupada al Hospital Universitariu Central d’Asturies (HUCA), con policontusiones de pronósticu reserváu, por cuenta de más pruebes y hasta nueva valoración médica. Foi atendida nel llugar del accidente pol equipu médicu de la UVI-móvil d’Uviéu que darréu la treslladó al centru hospitalariu.

    La muyer tuvo que ser escarcelada del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Llamorgal. La operación resultó complexa debíu al estáu nel que quedó’l vehículu. N’estabilizándolo pa garantizar la seguridá de los intervinientes los bomberos abrieron-y güecu retirando trés de les pilastres del turismu y parte del techu. Amás, pa lliberala tuvieron que retirar parte del volante, del salpicaderu y del respaldu del coche. Nel turismu viaxaba un varón que salió pelos sos propios medios del coche y resultó ilesu.

    El Centru de Coordinación d’Emerxencies del 112-Asturies recibió l’avisu a les 04.51 hores. Na llamada señalaben qu’un turismu saliérase de la vía y quedara colgáu d’un árbol. Nel so interior, añadieron, había una persona atrapada. La Sala 112 del SEPA movilizó a bomberos del parque de Llamorgal y pasó l’avisu al SAMU qu’unvió los medios yá citaos. Amás informó de lo asocedío a la Guardia Civil. A les 05.38 hores los bomberos comuniquen que la muyer yá s’atopa na UVI-móvil. Rematada la intervención tornaron a la so base a les 06.19 hores.

  • Un trabayador, mancáu en siendo golpeáu por un árbol en Pravia

    Un trabayador, mancáu en siendo golpeáu por un árbol en Pravia

    Un trabayador resultó mancáu en siendo cutíu por un árbol y quedar zarráu na cabina d’una autocargardora de madera en Beifar, Pravia. Según los datos facilitaos pol Serviciu d’Atención Médica Urxente (SAMU) l’afectáu, un varón de 47 años, foi evacuáu al Hospital San Agustín d’Avilés con una quebra de miembru cimeru. Foi atendíu nel llugar del accidente pol equipu d’Atención Primaria de Pravia.

    El mancáu tuvo que ser rescatáu del interior de la cabina por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Pravia. N’asegurando’l vehículu y la carga, los bomberos movieron escontra tras el tueru y lliberaron al afectáu con ayuda de la tabla de rescate.

    El Centru de Coordinación d’Emerxencies del 112 Asturies recibió l’avisu a les 13.26 hores. Na llamada señalaben que taben trabayando nun monte con un autocargador y un árbol travesara la cabina de la máquina. El so conductor recibiera un golpe y nun podía salir.
    Amás de pasar l’avisu al SAMU y movilizar a los bomberos, la sala 112 del SEPA comunicó lo asocedío a l’autoridá llaboral y a la Guardia Civil. A les 14.13 hores, dende l’incidente, los bomberos comuniquen que la persona yá foi sacupada a l’ambulancia. Rematada la intervención retiraron para tornar al so parque a les 14.49 hores.

  • Coxersa duplica la capacidá de la so planta de reciclaxe d’envases

    Coxersa duplica la capacidá de la so planta de reciclaxe d’envases

    El Consorciu pa la Xestión de Residuos Sólidos d’Asturies (Coxersa) remató les obres de modernización y ampliación de la planta de reciclaxe d’envases de Serín. La instalación va poder tratar el doble de material depositao nos contenedores mariellos, hasta algamar les 25.500 tonelaes al añu.

    Esta obra, que s’allargó 15 meses, supunxo una inversión de 4.195.931 euros y foi la primera de les aprobaes pol Gobiernu d’Asturies en marzu del 2018, que, con un presupuestu de más de cinco millones, tienen como oxetivu avanzar na xestión de los residuos. L’aumentu de la capacidá de la planta d’envases, que tenía como tope la xestión de 12.000 tonelaes por añu, garantiza’l tratamientu afayadizu nel futuru.

    «El reciclaxe tien que ser y ye una xera que concierne a tola sociedá»

    La primer fase de los trabayos valió pa aumentar la nave de clasificación d’envases, que’l so desenvolvimientu axudicóse a Iguastur S. L. Na segunda fase, la empresa escoyida, Constructora de Calaf S.A.O., anovóse la maquinaria de selección, que va procesar hasta siete tonelaes por hora. En concreto, adquiriéronse equipos más modernos, que perfeccionen l’automatización de la instalación y ameyoren les condiciones de seguranza de los trabayadores.

    El conseyeru de Mediu Ambiente, Benigno Fernández Fano, destacó qu’esta obra supón un pasu más nel cumplimientu de los oxetivos de reciclaxe qu’afita la normativa comunitaria. «El reciclaxe tien que ser y ye una xera que concierne a tola sociedá, a les alministraciones que ponen los medios técnicos necesarios y a los ciudadanos que realicen un actu fundamental pal mediu ambiente», destacó.

    Otra manera, Coxersa amplió tamién el depósitu de seguranza de residuos industriales, que garantiza la so capacidá hasta’l 2028. El proyectu consistió nel movimientu de tierres y l’aumentu de la impermeabilización doble con llámines de polietilenu d’alta densidá y magre que garantiza la protección del suelu y del agua soterraño. A esti depósitu lleguen residuos industriales sólidos con componentes peligrosos como ceniza, escoria, basa estabilizao o tierra contaminao, ente otro.

    Coxersa duplica la capacidá de la so planta de reciclaxe d’envases y va poder tratar 25.500 tonelaes al añu.

  • Picos d’Europa va cuntar anguaño con un nuevu plan d’usu y xestión

    Picos d’Europa va cuntar anguaño con un nuevu plan d’usu y xestión

    El nuevu Plan Rector d’Usu y Xestión del Parque Nacional de los Picos d’Europa va aprobase anguaño. Va ser una vegada s’estudien los 461 allegamientos presentaos, 260 procedentes d’Asturies, 155 de Cantabria y 46 de Castiella y Llión. Los órganos de dirección del espaciu protexíu trabayen yá para contestar de forma individual a cada propuesta de cambéu. Una vegada incorporaos los cambeos necesarios, el patronatu va dar en la ratificación del documentu final.

    El plazu d’información pública y audiencia a interesaos del proyectu de nuevu Plan Rector d’Usu y Xestión de Picos d’Europa remató a principios de mayu. Casi’l 80% de los allegamientos presentaos (361) vienen de particulares. A xuiciu de los responsables del espaciu natural esto ye indicativu de la implicación de los ciudadanos y el so interés nes cuestiones rellacionaes cola regulación de los usos y xestión del parque.

    El centenar d’allegamientos restantes surden de distintes entidaes y asociaciones. Ente elles, destaquen les 42 unviaes por organismos deportivos. Les asociaciones conservacionistas presentaron 14, ente que dende les distintes alministraciones locales recibiéronse otres diez.

  • Mancáu por quemadures nel incendiu d’un pisu n’Avilés

    Mancáu por quemadures nel incendiu d’un pisu n’Avilés

    Un home de 36 años resultó mancáu por quemadures la pasada nueche al declarase un incendiu nun pisu d’Avilés. Efectivos de Bomberos del Serviciu d’Emerxencies del Principáu d’Asturies (SEPA), con base nos parques d’Avilés y Pravia, escastaron el fueu na vivienda afectada, asitiada na tercer planta d’un edificiu de 9 plantes del númberu 29 de l’Avenida de la Constitución.

    La quema xamuscó una habitación de la vivienda que resultó afectada pol fumu na so totalidá. Según los datos facilitaos pol Serviciu d’Atención Médica Urxente(SAMU) el mancáu, un varón de 36 años d’edá, foi evacuáu al Hospital Universitariu Central d’Asturies (HUCA), n’Uviéu, con pronósticu reserváu, por cuenta de más pruebes y hasta nueva valoración médica. Foi atendíu nel llugar pol equipu médicu de la UVI-móvil avilesina que darréu lu treslladó al centru hospitalariu. Hasta la zona tamién se movió una ambulancia de soporte vital básicu.

    Los bomberos retiraron parte d’un falsu techu y revisaron el llugar cola cámara d’imaxes térmiques

    El Centru de Coordinación d’Emerxencies del 112 Asturies recibió l’avisu a les 06.40 hores d’esta mañana. Na llamada sollertaben d’una quema na tercer planta d’un edificiu de 9 plantes. Esplicaron que taba quemando un pasiellu y había una persona mancada.

    La Sala 112 del SEPA activó a los bomberos del parque avilesín y otra dotación dende’l parque de Pravia. Amás, pasóse l’avisu al SAMU qu’unvió los medios citaos enantes ya informóse a la Policía Local y Nacional. A les 07.21 hores los bomberos comuniquen que l’incendiu ta escastáu. Pa escastar el fueu, amás d’instalar una llínea d’agua pel interior del inmueble, los bomberos tuvieron que trabayar colos equipos de respiración autónoma. Tamién retiraron parte d’un falsu techu y revisaron el llugar cola cámara d’imaxes térmiques.

    Nes xeres d’estinción participaron nueve efectivos de Bomberos del SEPA que treslladaron al llugar trés autobombas, un vehículu d’altor y unu de mandu. Rematada la intervención, a les 08.25 hores, retiraron del llugar para tornar a les sos respectives bases.

  • Muerre un home al incendiase la so casa en Llaviana

    Muerre un home al incendiase la so casa en Llaviana

    Un home morrió esti martes nel incendiu d’una vivienda allugada na localidá de La Xerra, nel conceyu de Llaviana. La vivienda, de dos plantes, quedó xamuscada por completu. Foi la policía xudicial quien solicitó la movilización de servicios funerarios para retirar restos mortales del fallecíu.

    El Centru de Coordinación d’Emerxencies del 112-Asturies recibió l’avisu a les 03.52 hores d’esta madrugada. La llamada realizóla un familiar, dende otra localidá, tres ser sollertáu polos vecinos del afectáu. Taba quemando la so vivienda, un inmueble de dos altores. Esplicaben que la vivienda nun tenía cases amiestes y desconocíen si’l so familiar s’atopaba nel interior.

    La Sala 112 del SEPA activó a efectivos de Bomberos del parque de Samartín del Rei Aurelio y del parque de Llamorgal xuntu al xefe de Zona Centro. Cuando la primer dotación llegó al incidente informóse que yera una casa con treme de madera, totalmente incendidada y derruida.

    Los bomberos, a los que darréu se sumaron dotaciones de Proaza y Coballes, tuvieron que trabayar colos equipos de respiración autónoma yá que tuvieron que dir removiendo adulces los escombros para esfrecer y escastar el fueu. Encaloraes les llapaes parte de les dotaciones tornaron a la so base. Nel llugar permanecieron hasta la llegada de la Policía Xudicial, trés efectivos de bomberos del parque de Coballes y el xefe de Zona.

  • Entren en serviciu los accesos al Parque Empresarial d’Avilés

    Entren en serviciu los accesos al Parque Empresarial d’Avilés

    Los accesos al Parque Empresarial del Principáu d’Asturies (PEPA), n’Avilés, tan yá en serviciu. La Conseyería d’Infraestructures abrió esti llunes al tráficu los viales depués d’una inversión de más de 26,5 millones y más d’una década de trabayos. Los conseyeros d’Infraestructures, Benigno Fernández Fano, y Industria, Isaac Pola, visitaron Avilés, en compañía de l’alcaldesa, Mariví Monteserín, y otres autoridaes. Nel actu, reivindicaron la importancia d’una actuación que resuelve tolos movimientos posibles ente’l PEPA, la N-632 y l’AS-392.

    Esta obra supunxo una inversión de más de 26,5 millones y más d’una década de trabayos

    L’enllaz del PEPA tien forma de trompeta, con un vial perimetral de doble calzada na vera sureste, que conecta cola autovía, la variante d’Avilés y la marxe derecha del puertu. La plataforma de los viales resolvióse con siete grandes estructures de tableros mistos con caxón metálicu y llábana cimera de formigón. Amás, en dos d’elles, una sobrevolando l’AS-392 y otra de desembarcu nel polígonu, proyectóse tableru doble. Estos elementos sumen un costu de 17 millones, aproximao un 64% del presupuestu total de les obres.

    La integración correcta de les obres nel mediu ambiente llogróse coles midíes correctores d’impactu ambiental oportunes, como la hidrosema de turries de desmonte y terremplén, cubriendo una superficie de más de 25.000 metros cuadraos y el plantíu d’arbustos. Tamién s’instalaron 2.000 metros de pantalles anti-ruíu.

    La pasarela d’accesu al PEPA va llevar el nome de Daniel Alonso en reconocencia a la so trayectoria empresarial. Con seis décades de vida empresarial, el Grupu Daniel Alonso algamó una espansión significativa per Europa, Asia y América. Con sede n’Avilés, participa en proyectos líderes a nivel mundial y fabrica estructures d’aceru pa la producción d’enerxía anovable. Amás, diseñen y fabriquen equipos y grandes estructures pal sector petroquímicu, enerxéticu, naval, de grandes bienes d’equipu, y el tratamientu integral del aceru. Esta trayectoria yá lu fixo merecedor de la Medaya d’Asturies, nel 2007, y de la del Méritu nel trabayu, nel 2011.

  • Asturies busca turistes en Corea del Sur

    Asturies busca turistes en Corea del Sur

    Asturies participó esti fin de selmana na feria de viaxes más importante de Corea del Sur, la Korea World Travel Fair (Kotfa). Esta foi la primer vez que’l Gobiernu del Principáu participó nesti alcuentru con 34 años d’hestoria. Fízolo con un espaciu personalizáu dientro del estand de Turespaña, encargáu d’asitiar la marca España nel país asiáticu.

    Los atractivos principales qu’Asturies promocionó nesti mercáu ye’l so paisaxe y la so naturaleza, amás de les sos rutes vinculaes al Camín de Santiago. Amás, y pola mor del interés d’estos viaxeros pola gastronomía española y les cocines nueves, la ufierta culinaria de la comunidá ye otru de los aspectos que s’amosaron nesta feria na que participaron alredor de 70 países. L’añu pasáu pasaron per ellí unes 70.000 persones.

    El turismu procedente d’esti país asiáticu ayuda a la desestacionalización del sector. Los viaxeros coreanos desplácense fuera de la temporada alta nacional, fundamentalmente d’ochobre a febreru. Amás, disponen d’una capacidá alta de gastu gracies a la medría importante de la so economía nos postreros 30 años. Les sos estancies duren una media de 7 a 10 díes.

    España recibió la visita de 441.826 visitantes d’esta nacionalidá nel 2017. Corea del Sur convirtióse nel tercer mercáu emisor d’Asia, cuasimente empatáu nel segundu puestu con Xapón -442.132 turistes-, según los últimos datos disponibles de la encuesta Frontur. China ta nel primer puestu con 513.725 turistes. Los destinos españoles principales pa esti mercáu son Barcelona, Mallorca y, nos últimos años, el Camín de Santiago.

  • Dos mancaos nun accidente de tráficu en Cuadonga

    Dos mancaos nun accidente de tráficu en Cuadonga

    Dos persones, un varón y una muyer, resultaron mancaos en sufriendo un accidente de tráficu cola moto na que circulaben, topetaron con una barandiella y cayeron por un desnivel, na redolada de Cuadonga, en Cangues d’Onís. El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó al varón al Hospital Universitariu Central d’Asturies (HUCA). La muyer foi evacuada, pola ambulancia de soporte vital básicu de Ribeseya, al Hospital Comarcal de Les Arriondes. Según los datos facilitaos pol Serviciu d’Atención Médica Urxente (SAMU) por cuenta de más pruebes y hasta nueva valoración médica’l pronósticu de dambos ye reserváu.

    El Centru de Coordinación d’Emerxencies recibió l’avisu a les 12:14 hores. Na llamada indicóse qu’había una moto cayida, xubiendo a la Basílica de Cuadonga, y cayeren por un desnivel y nun los víen. Darréu movilizóse al Xefe de Bomberos del SEPA de la Zona Oriental y a seis efectivos de Bomberos del SEPA, con base nel parque de Cangues d’Onís, que se treslladaron col furgón multisocorro y el vehículu primera salida, y al Grupu de Rescate de Bomberos del SEPA, a bordu de l’aeronave medicalizada.

    Hasta nueva valoración médica’l pronósticu de dambos ye reserváu

    Una vegada na zona, los bomberos aportaron hasta los mancaos. Al paecer, por cuenta del choque de la moto contra una barandiella, los dos ocupantes salieron despidíos y cayeron por un desnivel unos 20 metros. Los bomberos utilizaron la camiya nial para portear y sacar del llugar, hasta l’ambulancia al varón. Para ello los efectivos tuvieron qu’utilizar la radial para cortar ún de los barrotes y asina poder sacar hasta la calzada al mancáu. De siguío, n’inmovilizando a la muyer y el collarín, tamién la portearon y sacaron de la zona, cola tabla de rescate.

    La sala del 112 del SEPA informó del sucesu a la Guardia Civil, a la Policía Local y al Serviciu d’Atención Médica Urxente (SAMU) qu’activó l’ambulancia de soporte vital básicu de Ribesella y l’ambulancia y el médicu d’Atención Primaria de Cangues d’Onís.