Xixón al día

Categoría: Asturies

  • L’usu del tresporte públicu n’Asturies aumenta un 22%

    L’usu del tresporte públicu n’Asturies aumenta un 22%

    El tresporte públicu gana viaxeros n’Asturies a bon ritmu gracies al impulsu de la tarxeta CONECTA. Según los datos del Consorciu de Tresportes d’Asturies (CTA), un total de 6.276.127 persones optaron por esta alternativa pa movese mientres los dos primeros dos meses del añu, un 22% más que nel mesmu periodu de 2024. D’ellos, el 86,6% utilizaron la tarxeta que CONECTA, que dexa movese por tola comunidá en tresporte públicu por un máximu de 30 euros al mes.

    El conseyeru de Movilidá, Cooperación Local y Xestión d’Emerxencies, Alejandro Calvo, facilitó güei estos datos na xunta del conseyu d’alministración del CTA, na qu’informó tamién de la crecedera de CONECTA, con 16.656 tarxetes solicitaes ente xineru y febreru y un total 287.268 operatives.

    “Los datos son apolmonantes y constaten la impresionante respuesta de la ciudadanía énte un apueste firme y bien ambiciosa pola movilidá sostenible como ye CONECTA”, aseguró’l conseyeru. “Fuimos pioneros y referentes nel modelu de billete únicu y les cifres reflexen una evolución espectacular, qu’avera cada vez más el tresporte públicu a la población, que lo valora como un serviciu calidable y crucial nos sos día ente día”, añedió. Calvo reafitó’l compromisu del Gobiernu d’Asturies pa siguir trabayando nesa llinia y ameyorar la ufierta y les prestaciones d’esti serviciu.

    Según los datos d’usuarios del tresporte públicu n’Asturies, el ritmu de crecimientu nel últimu añu cuadruplica la media nacional, que l’Institutu de Nacional d’Estadística (INE) asitió nun 4,5% en xineru pal tresporte urbanu. Febreru, últimu mes zarráu nes estadístiques del CTA, rexistró 3.132.175 viaxeros, de los que 2.734.362 validaron los sos trayectos con CONECTA.

    Amás del so apueste por esti serviciu, l’Executivu autonómicu tien en marcha una inversión global de más de 20,5 millones procedentes de fondos europeos p’ameyorar les infraestructures venceyaes al tresporte.

  • La Comisión Europea informa al Gobiernu d’Asturies de que va primar el consumu d’aceru fabricáu na UE

    La Comisión Europea informa al Gobiernu d’Asturies de que va primar el consumu d’aceru fabricáu na UE

    La Comisión Europea va primar el consumu d’aceru producíu na UE y l’usu de productos y subproductos qu’utilicen aceru comuñal, según treslladó esta mañana’l director responsable d’Industries Electrointensives de la DG Grow, Joaquim Nunes de Almeida, a la conseyera de Transición Ecolóxica, Industria y Comerciu, Belarmina Díaz.

    Na xunta, el responsable de la UE informó a Díaz de que la Comisión Europea tien ente les sos prioridaes al curtiu plazu primar les producciones europees y desenvolver la normativa que la sofite. La conseyera, nesti sentíu, treslladó-y la necesidá de que Bruxeles implemente o visibilice con calter d’urxencia les midíes del Clean Industrial Deal presentáu en febreru, y les incluyíes nel Plan del Aceru y los Metales que se van conocer mañana.

    «Creemos que’l problema ta identificáu pola UE, son sensibles a la problemática y tán trabayando en llevar a cabu midíes al curtiu plazu, pero tresllademos la necesidá de qu’eses midíes desenvuélvanse cuanto antes o tengan visibilidá cuanto antes», esplicó la conseyera.

    «La Comisión Europea esplicónos que les midíes recoyíes nel Pactu Llimpiu Industrial respectu al aceru europeo y los productos fechos con aceru europeo ye una de les sos prioridaes pa desenvolver en 2025 y la lexislación que la acompaña. Ye fundamental qu’Europa consuma preferentemente los productos que provengan d’Europa», precisó Díaz.

    La conseyera tamién caltuvo un alcuentru de trabayu con responsables de la DG Ener, con quien encetó la necesidá de caltener les polítiques de transición xusta y les ferramientes y programes de sofitu a les rexones que como Asturies tán más afectaes pol procesu de descarbonización. Coles mesmes, tamién s’axuntó con Oriol Escalas, responsable d’industria y enerxía de la Representación Permanente d’España énte la UE.

  • Ñaz la Cátedra de la Cultura Minera

    Ñaz la Cátedra de la Cultura Minera

    La Conseyería de Cultura, Política Llingüística y Deporte y la Universidá d’Uviéu soscribieron güei’l conveniu pa la creación de la Cátedra de la Cultura Minera, un proyectu empobináu a la investigación, evaluación y promoción del heriedu históricu de la minería nel Principáu. La firma foi nel Muséu de la Minería y la Industria d’Asturies (MUMI), cola presencia de la conseyera de Cultura, Política Llingüística y Deporte, Vanessa Gutiérrez, amás del rector de la Universidá d’Uviéu, Ignacio Villaverde.

    La conseyera destacó la relevancia d’esti conveniu pa la preservación de la memoria histórica y el reconocimientu del heriedu mineru n’Asturies: “Preservar y difundir el legáu que la cultura minera sigue imprimiendo al carácter del pueblu asturianu ye fundamental como pilar que ye de la nuestra identidá y de los valores que la sostienen”.

    L’Executivu asturianu y la Universidá d’Uviéu impulsen la Cátedra de la Cultura Minera, que va dirixir el doctor y director del Departamentu d’Historia, Jorge Muñiz Sánchez, como un espaciu de intercambéu de conocimientu científicu cola mira de coordinar estudios, esparder el patrimoniu mineru y xenerar sinerxes con otros grupos d’investigación. Amás, al traviés d’esti proyectu va trabayase na ellaboración d’una propuesta técnica pa que la cultura minera se declare Bien d’Interés Cultural (BIC) de calter inmaterial.

    El conveniu establez una dotación presupuestaria de 60.000 euros, repartida en cuatro anualidaes de 15.000 euros caúna, ente’l 2025 y el 2028. La Universidá d’Uviéu, pela so parte, comprométese a incorporar personal, medios y infraestructures pal desenvolvimientu de les actividaes.

    La Cátedra va tener delles llinies d’actuación, ente les que destaquen la investigación conxunta ente la Universidá y el Principáu, la cooperación pa la obtención de proyectos d’investigación a nivel autonómicu, nacional y internacional, amás de la formación especializada con cursos, xornaes y programes de posgráu. Tamién se va impulsar la difusión cola organización de conferencies, informes y alcuentros nacionales y internacionales de persones espertes na materia.
    La firma d’esti conveniu supón un finxu na protección y espardimientu del heriedu mineru asturianu, afianzando un marcu de collaboración estable pal so estudiu y promoción nel ámbitu científicu y social de la cultura minera asturiana.

  • La cultura asturiana de la gaita va declarase Bien d’Interés Cultural

    La cultura asturiana de la gaita va declarase Bien d’Interés Cultural

    La conseyera de Cultura, Política Llingüística y Deporte, Vanessa Gutiérrez, anunció güei qu’el so departamentu va empecipiar el procesu pa declarar Bien d’Interés Cultural (BIC) de calter inmaterial la cultura asturiana de la gaita. Gutiérrez informó sobre esta decisión mientres la so intervención nos actos del Día Internacional de la Gaita entamaos en Xixón pol Conceyu de la Gaita.

    Nel eventu, Gutiérrez emponderó l’enfotu d’esti colectivu por dinamizar y dar vida al instrumentu musical más representativu d’Asturies. Exemplu d’ello ye l’homenaxe realizáu a la gaitera de Sotrondio Kety García Fernández, a la que la responsable de Cultura dedicó palabres d’agradecimientu: “Esti actu supón un reconocimientu a toles gaiteres que fueron y son exemplu pa tantes nenes que quieren tocar esti instrumentu”.

    De la mesma forma, Gutiérrez valoró l’importante papel de “les bandes, asociaciones y escueles de música tradicional, que vienen salvaguardando la nuesa cultura, dándola a conocer énte les xeneraciones más moces, al tiempu que faen de ponte y reconocen a los y les gaiteres más veteranos que ficieron posible que la nuesa cultura llegara con esta vitalidá hasta güei”.

    Nel so discursu, la conseyera afondó na cultura asturiana de la gaita, que s’espandió más allá de les llendes xeográfiques del Principáu gracies, ente otres, al llabor de la emigración, arrexuntada en centros por tol mundu. “Los asturianos y les asturianes nel esterior caltuvieron la nuesa tradición gaitera, arriqueciéndola con matices propios de cada llugar onde s’asitió la nuesa diáspora”, manifestó.

    Nesti sentíu, Gutiérrez punxo en valor la diversidá de la cultura asturiana de la gaita que la conseyería quier declarar BIC. Esti procesu enmárcase dientro de les polítiques del Gobiernu d’Asturies por salvaguardar el patrimoniu autonómicu y, especialmente, l’inmaterial. Esta acción va en llinia cola recién declaración de la cultura sidrera asturiana como patrimoniu mundial pola UNESCO, reconocencia internacional que punxo en valor xuna de les tradiciones más icónicas d’Asturies y refuerza la necesidá de siguir protexendo y promoviendo les manifestaciones que conformen la esencia d’Asturies.

    «Dempués del ésitu de la declaración de la cultura sidrera, siguimos trabayando pa que les nuestres tradiciones más representatives tengan la protección y el reconocimientu que merecen», ha afirmado Vanessa Gutiérrez, que ha puesto el foco en el patrimonio inmaterial “que pola so fraxilidá, merez una atención cuidadosa y decidida”, ha precisado la titular de Cultura.

  • Ordenación del Territoriu destinará 100.000 euros a “rellanzar el movimientu asociativu vecinal n’Asturies»

    Ordenación del Territoriu destinará 100.000 euros a “rellanzar el movimientu asociativu vecinal n’Asturies»

    El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, anunció que la Dirección Xeneral de Participación Ciudadana, Tresparencia, Diversidá Sexual y LGTBI, dependiente del so departamentu, va conceder una ayuda de 100.000 euros a la Confederación Asturiana d’Asociaciones de Vecinos (Cavastur) pa “rellanzar el movimientu asociativu vecinal n’Asturies”.

    Zapico, qu’esta tarde axuntóse col presidente de la Confederación Estatal d’Asociaciones Vecinales (CEAV), Julio Molina, y cola vicepresidenta de la Confederación Asturiana d’Asociaciones de Vecinos (Cavastur), María José Cuervo, destacó qu’esti sofitu va contribuyir tamién a impulsar Cavastur, que nos últimos años enfrentara graves problemes económicos y apenes tenía actividá.

    Nel alcuentru tamién participaron la viceconseyera de Derechos Ciudadanos, Beatriz González y la directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez.

    El conseyeru punxo en valor el “la inxente llabor que nesti país fixeron eses asociaciones de vecinos en cada barriu, en cada pueblu y cada ciudá, naquellos momentos finales de la dictadura y los entamos de la transición”. Un papel que, según señaló, “ye necesario rellanzar agora que tamos viviendo una folada de involución, cuando munchos de los cimientos que creíamos asitiaos de la democracia vense cuestionaos por grupos parlamentarios que ponen en riesgu’l funcionamientu democráticu”.

    Tamién resaltó la relevancia de la participación del movimientu vecinal “na busca de soluciones a otru problema que tenemos agora mesmu nel nuesu país como ye’l del accesu a una vivienda digna”.

    Zapico afirmó qu’el so departamentu trabaya estrechamente con estos colectivos nel desenvolvimientu de dellos proyectos lexislativos qu’agora se tán ellaborando, como la Llei LGTBI y la de participación, y adelantró que la previsión ye que’l testu de la Llei de Participación se zarre esti añu pa empecipiar la so tramitación parlamentaria a principios de 2026.

  • La OMS ficha a la Universidá d’Uviéu

    La OMS ficha a la Universidá d’Uviéu

    Ameyorar la capacidá de respuesta de los sistemes sanitarios en situaciones d’emerxencia. Esti ye l’oxetivu principal de la iniciativa Equipos Médicos d’Emerxencia (EMT, poles sos sigles n’inglés), un proyectu de la Organización Mundial de la Salú (OMS), qu’acaba d’escoyer a la Universidá d’Uviéu como institución collaboradora. Esta estratexa tien como fin ameyorar la calidá de los servicios de salú proporcionaos polos equipos médicos d’emerxencia, tantu nacionales ya internacionales, en respuesta a emerxencies sanitaries, mesmo que fortalecer la capacidá de los sistemes de salú pa liderar l’activación y coordinación d’estos equipos y otres capacidaes de respuesta rápida. La capacitación, la definición d’estándares, la garantía calidable y la respuesta énte emerxencies son fundamentales pa llograr estos oxetivos.

    La Universidá d’Uviéu, qu’acaba de ser escoyida institución collaboradora de la OMS nesta iniciativa, comprometer a sofitar la Iniciativa EMT nes siguientes árees, acordies cola so esperiencia y especialización:

    • Promoción y sensibilización sobro la Iniciativa EMT énte partes interesaes.
    • Asesoramientu técnicu nel desenvolvimientu de capacidaes de respuesta rápida.
    • Sofitu a la capacitación y fortalecimientu de EMT al traviés de formación, simulaciones y talleres.
    • Asesoramientu na xestión d’información y xeneración d’evidencia.
    • Sofitu técnicu pa compartir información mientres operaciones de respuesta.

    El Dr. Rafael Castro, profesor titular de Medicina d’Urxencies ya impulsor na Universidá d’Uviéu d’esta iniciativa, destaca que, cola entrada de la Universidá d’Uviéu nesti programa de la OMS, “la institución académica da un saltu cualitativu tocantes a la so internacionalización nel campu de les emerxencies sanitaries, al formar parte d’una rede d’asesoría científica y técnica que nos dexa contribuyir a la meyora de la salú en situación de desastre y asítianos como una institución de referencia nesti campu de conocencia. La Universidá d’Uviéu ye anguaño la única institución española que forma parte d’esta iniciativa”.

  • Cuideiru cunta yá con una unidá de salú bucodental con odontólogu y hixenista

    Cuideiru cunta yá con una unidá de salú bucodental con odontólogu y hixenista

    El conceyu de Cuideiru cunta yá con una unidá de salú bucodental e, que cunta con dos consultes: una d’odontoloxía y otra de hixenista dental. Esti nuevu serviciu del área sanitaria III funciona dende’l pasáu 24 de febreru y evita que la población del conceyu tenga que movese a Pravia.

    L’atención ufiértase a la población tolos martes y unu de cada dos xueves. La cita pídese directamente nel centru de salú y nun se precisa asistencia previa per parte del personal de medicina de familia.

    Esti equipamientu refuerza l’atención de la salú bucodental nesti área sanitaria, con cabecera n’Avilés, qu’agora yá dispón de seis equipos de profesionales, trés d’odontoloxía y trés de hixenistas. Hasta agora, una unidá atendía les zones de salú de Cuideiru, Pravia y Castrillón. Cola nueva apertura, Castrillón va pasar a cuntar con un equipu propiu y otru va atender les zones de Pravia y Cuideiru. Nel casu de Pravia, habrá consulta tolos llunes, miércoles y vienres, mesmo qu’unu de cada dos xueves.

    El nuevu serviciu completa la estructura d’atención bucodental de la área con cabecera n’Avilés, qu’entiende actividaes asistenciales, diagnósticas y terapéutiques, lo mesmo que de promoción de la salú, prevención y educación sanitaria. Concretamente, l’atención bucodental n’atención primaria inclúi:

    • Información, educación para la salú y, nel so casu, ensayamientu en materia d’hixene y salú bucodental.
    • Tratamientu de procesos agudos odontolóxicos (procesos infecciosos y/o inflamatorios qu’afecten al área bucodental, traumatismos oseodentarios, mancaes y mancadures na mucosa oral y patoloxía aguda de l’articulación témporo-mandibular). Inclúi conseyu bucodental, tratamientu farmacolóxicu, exodoncias, exodoncias quirúrxiques, ciruxía menor del cuévanu oral, revisión oral pa la detección precoz de mancadures premalignes y, nel so casu, biopsia de mancadures mucoses.
    • Esploración preventiva del cuévanu oral a muyeres embarazaes, qu’inclúi instrucciones sanitaries en materia de dieta y salú bucodental, ensayamientu n’hixene bucodental y aplicación de flúor.
    • Midíes preventives y asistenciales pa la población infantil: aplicación de flúor, obturaciones y sellaos de fisuras, ente otres actuaciones.
  • L’alcalde de Foro en Colunga impide la presentación d’un documentu por tar escritu n’asturianu

    L’alcalde de Foro en Colunga impide la presentación d’un documentu por tar escritu n’asturianu

    Iniciativa pol Asturianu treslladó estos díes el so sofitu públicu a l’asociación vecinal La Llastra depués de que’l Conceyu de Colunga-yos impidiera rexistrar un documentu pol fechu de tar escritu n’asturianu. Na rempuesta recibida, roblada pol alcalde, José Ángel Toyos, de la formación Foro, el consistoriu allega que la documentación nun ta escrita nun idioma oficial y esixe la torna al castellán. El Conceyu argumenta que la Llei de Procedimientu Alministrativu Común recueye que «la llingua de los procedimientos tramitaos pola Alministración Xeneral del Estáu va ser el castellán». Por contra, la citada norma tamién recueye que «nos procedimientos tramitaos poles Alministraciones de les Comunidaes Autónomes y de las Entidades Llocales, l’usu de la llingua va axustase a lo previsto na llexislación autonómica correspondiente».

    Nesi sen, Iniciativa pol Asturianu recuerda que la Llei d’Usu reconoz el drechu de la ciudadanía a presentar documentación n’asturianu nos usos alministrativos. «Tolos ciudadanos tienen derechu a emplegar l’asturianu y a esplicase nelli, de pallabra y per escrito». El presidente de la entida, Iván Llera, asegura que «tamos, de nuevu, ante un casu de discriminación llingüística» y reclama a Foro qu’aclare la so postura sobre la política llingüística y l’idioma.

    Llera recalca que «la oficialidá ye la ferramienta constitucional que va garantizar la plena igualdá de drechos n’Asturies independientemente de la llingua que caún quiera escoyer». Por ello, a puertes d’un nuevu debate sobre la oficialidá de les llingües d’Asturies «reclamamos una postura coherente a Adrián Pumares y la so formación». El cabezaleru d’Iniciativa pol Asturianu apuntó que «resulta llamativo qu’un partíu que lleva la oficialidá nel programa electoral y defende la Llei d’Usu seya’l primeru que vulnere los drechos de los asturfalantes onde gobierna», apunta Llera.

    Iniciativa pol Asturianu reclama una rectificación urxente del alcalde José Ángel Toyos y que’l Conceyu de Colunga almita escritos n’asturianu.

  • Baldomero Vigil-Escalera, fusiláu en Celanova, n’Ourense, en 1939, yá descansa n’Asturies

    Baldomero Vigil-Escalera, fusiláu en Celanova, n’Ourense, en 1939, yá descansa n’Asturies

    La viceconseyera de Derechos Ciudadanos, Beatriz González Prieto, y la directora xeneral de Memoria Democrática, Begoña Collado, participaron güei nel actu d’entrega de los restos de Baldomero Vigil-Escalera Vallina, un mozu xixonés de 19 años qu’asesinaron en 1939 en Celanova (Ourense) y que dende güei descansa nel campusantu municipal de Deva, en Xixón.

    “Esti ye un actu mui importante de xusticia, verdá, arreglu y garantía de non repetición”, aseguró la viceconseyera. González tamién espresó’l so deséu de “cerrar les llargues nueches de piedra que supunxo’l franquismu nel nuestru país, faciendo xusticia a aquellos homes y muyeres que siguen en paradoriu desconocíu, en cunetes y en fueses comunes”.

    “Ye necesario que les persones demócrates dexemos de mirar con lente lo que nos estrema y xunir esfuerzos pa frenar l’ascensu del fascismu”, encamentó, de la qu’espresó’l so deséu de que la historia nun se repita y nun seya necesario devolver más restos a families qu’esperen dende años.

    Pela so parte, Begoña Collado sorrayó la importancia del trabayu collaborativu ente alministraciones pa facer xusticia a les families de les víctimes y dar cumplimientu a les lleis de memoria democrática autonómica y estatal.

    L’actu celebráu foi posible dempués de desaterrar, a finales del 2022, la fuesa común del campusantu de San Breixo, na que Baldomero Vigil-Escalera foi soterráu xuntu con otros seis asturianos. Los restos de dos d’ellos: Abelardo Suárez, de 28 años, y Marcelino Fernández, de 22, fueron apurríos en Celanova en xunu del 2023.

    Queden entá pendientes d’entrega los restos d’otros cuatro asturianos: Guillermo de Diego, un xofer de 25 años de Mieres, que vivía en Veriña; Alfonso Moreno Gayo, conductor tamién de 27 años de Salamanca, que vivía en Xixón; Belarmino Álvarez García, mineru de 29 años de Sama, que vivía n’Uviéu, y Mariano Blanco González, llitógrafu de 36 años de Xixón, que vivía n’Uviéu.

    El trabayu del Comité de Memoria de Celanova, asina como la investigación del grupu Histagra de la Universidá de Santiago y el médicu antropólogu forense que dirixó la exhumación, Fernando Serrulla, fixeron posible la entrega de los restos de Baldomero Vigil-Escalera.

    Baldomero Vigil-Escalera Vallina foi prindáu n’ochobre de 1937 y treslladáu al campu de concentración de Camposancos, n’A Guarda (Pontevedra). En xunetu de 1938 foi sometíu a un conseyu de guerra del que salió condergáu a muerte. En xineru de 1939 treslladáronlu a la prisión de Celanova, onde foi asesináu’l 22 de setiembre xunto colos otros seis asturianos citaos enantes.

    Celanova va celebrar el próximu 23 marzu l’actu d’inauguración d’un memorial dedicáu a les víctimes de la represión franquista soterraes nel campusantu parroquial de San Breixo ente 1936 y 1943.

  • El Hospital Valle del Nalón incorpora la prueba de l’amniocentesis pa evitar que les muyeres se desplacen a otros centros

    El Hospital Valle del Nalón incorpora la prueba de l’amniocentesis pa evitar que les muyeres se desplacen a otros centros

    El Serviciu de Xinecoloxía y Obstetricia del Hospital Valle del Nalón incorporó a la so cartera de prestaciones la prueba de l’amniocentesis, un procedimientu invasivu que n’ocasiones se debe realizar mientres l’embaranzu pa detectar trestornos xenéticos, defectos y otres afecciones nel fetu. Con esta midida, evítase que les muyeres del área sanitaria VIII tengan que movese a otros centros, de la que se facilita’l siguimientu del embaranzu per parte del mesmu personal.

    Les pruebes prenatales non invasives que se practiquen anguaño pa determinar anomalíes xenétiques nel fetu amenorgaron el númberu de amniocentesis. Na contorna del Nalón realícense una media de 20 al añu. Dende que l’hospital punxo en marcha esta nueva prestación, nel últimu trimestre del 2024, yá s’efectuaron cinco amniocentesis.

    Esta ampliación de les prestaciones reflexa’l compromisu del equipu de Xinecoloxía col bienestar de les muyeres del área sanitaria, qu’inclúi tamién l’atención nel hospital a les xestantes qu’han d’atayar el so embaranzu por un diagnósticu adversu. Hasta agora practicáronse cuatro albuertos por esta causa.

    El serviciu foi incorporando acciones y técniques de manera constante. Por casu, l’añu pasáu empezó’l programa Piel con piel, que dexa que nes nacencies per aciu cesárea’l recién nacíu permaneza colos sos proxenitores mientres el períodu nel que la madre tien que tar monitorizada tres de la intervención. Un espaciu habilitáu na unidá de partos dexó que diez families se beneficiaron hasta agora d’esta iniciativa.

    Pela so parte, el programa de llactancia materna que desenvuelve’l centru llogró una escelente respuesta. Asina, l’entamu precoz nel paritoriu produzse en más del 90% de los partos vaxinales. Amás, nel momentu de l’alta, el 67% de los naciellos sigue con esti tipu d’alimentación de manera esclusiva.