Xixón al día

Categoría: Ociu

  • El plan especial de tresporte a los Llagos de Cuadonga algama cifres asemeyaes a les de 2019

    El plan especial de tresporte a los Llagos de Cuadonga algama cifres asemeyaes a les de 2019

    Un total de 240.514 usuarios utilizaron esti añu’l plan especial de tresporte a los Llagos de Cuadonga. La cifra supón, un incrementu de más del 64% respecto a los 145.958 viaxeros que ficieron usu nel mesmu periodu de 2020 y avérase a los niveles de 2019, con 249.001 pasaxeros.

    El pasáu domingu remató l’operativu diariu de llanzaderes al parque nacional, que llogró una notable afluencia de viaxeres mientres los meses del branu. Xunetu (53.606 persones), agostu (117.608 persones) y setiembre (35.850 persones) rexistraron cifres récord na serie hestórica d’esti serviciu qu’impulsa’l Consorciu de Tresportes d’Asturies (CTA).

    A los bonos datos d’esti serviciu, hai que sumar los que, per primer vez, se cunten col plan de tresporte de Cabrales, qu’entamó el 14 de xunetu y remató’l 12 de setiembre. Na so primer edición cuntó con 28.552 viaxeros. 

  • Xixón Sound Festival 2021 confirma artistes nuevos

    Xixón Sound Festival 2021 confirma artistes nuevos

    Mohama Saz, Maika Makovski, Las Malvinas y Los Zigarros xúnense al cartelu de la edición novena de Gijón Sound Festival, que va tener llugar del 19 al 27 de payares en delles sedes de la ciudá.

    L’alcuentru musical, que coincide en feches cola 59 edición del Festival Internacional de Cine de Xixón no que ye’l segundu añu consecutivu de collaboración convirtiéndose na so banda sonora, yá tenía confirmao a Christian Löffler, Depedro presentando “Érase una vez”, James Rhodes, Lorena Álvarez y Negrón presentando “Las manos de Orlac” y Sílvia Pérez Cruz en solitariu presentado “Farsa”.

    El Teatru de Llaboral Ciudá de la Cultura y el Teatro Albéniz van ser les sedes qu’acoyerán los conciertos, distribuyíos dende’l sábadu 20 y hasta’l sábadu 27 de payares n’horariu nocherniegu.

    Entamáu por Divertia Gijón y producíu por Mestizo Producciones, les entraes de Gijón Sound Festival, y tola información sobre feches, sedes y horarios, puen atopase na so páxina web www.gijonsoundfestival.com

    Tolos conciertos van adautase a les normes y protocolos Covid-19 afitaos poles autoridaes sanitaries nel momentu de celebración del eventu.

  • Un colexu con cuasi’l 100% de matriculación na asignatura sigue a estes altures de cursu ensin profesor d’asturianu

    Un colexu con cuasi’l 100% de matriculación na asignatura sigue a estes altures de cursu ensin profesor d’asturianu

    Les consecuencies de la falta d’oficialidá vense cada día- Nel colexu públicu Santiago Apóstol de Mieres, cuasi’l 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana. La escuela lleva impartiendo estes enseñances na Educación Infantil dende hai una montonera años. Lo mesmo asocede col alumnáu d’Educación Primaria qu’escoyó mayoritariamente esta asignatura.

    La dirección del centru demandó a la Conseyería Educación, yá al acabar el cursu pasáu, la necesidá
    de contratar a tiempu completu a un profesor/a de Llingua Asturiana p’atender a tol alumnáu qu’escoyó recibir clases d’esta área. Sicasí, solo contrató a una persona a media xornada. Como consecuencia d’ello lleva ensin recibir clases d’Asturianu tol alumnáu d’EI dende primeros de cursu y va siguir ensin recibiles tou esti cursu si la Conseyería d’Educación nun camuda la so decisión.

    Esta forma d’actuar ye pa SUATEA, que denuncia’l casu «contraria a derechu y atiende esclusivamente a criterios economicistes de recortes nel gastu a costa de los derechos de los padres y madres». Amás, espliquen «Vulnera la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y
    graos, respetando sicasí la voluntariedá del so aprendimientu”.

    Pa SUATEA «Nun ye comprensible qu’un Gobiernu que va promover la reforma del nuestru Estatutu Autonomía pa que recueya la oficialidá de les nuestres llingües siga actuando activamente contra los derechos llingüísticos de la ciudadanía yá recoyíos na normativa asturiana».

    Dende SUATEA denuncien a la opinión pública «esta forma d’actuar de la Conseyería d’Educación contrariamente al derechu, apoyamos la demanda de l’Asociación de Padres y Madres del Colexu» y, esixen «l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’EI».

  • Asturies amuesa la so gastronomía na feria «Madrid Fusión»

    Asturies amuesa la so gastronomía na feria «Madrid Fusión»

    La conseyera de Cultura presenta les campañes promocionales de les marques de calidá destinaes a hostelería y restauración .

    La conseyera de Cultura, Política Llingüística y Turismu, Berta Piñán, abrió güei na feria Madrid Fusión l’Espaciu Gastronómicu Asturies Paraísu Natural y Alimentos del Paraísu, cola presencia de los restauradores con estrella Michelin. Esta ye la primer vez que’l Gobiernu del Principáu participa con estand propiu a la gran cita internacional de la gastronomía que se celebra en Madrid y en que la so inauguración participó tamién la viceconseyera de Turismu, Graciela Blanco.

    La conseyera valoró la presencia de la comunidá como “la meyor manera de proyectar la fuercia y el potencial de la gastronomía asturiana, nun eventu que se presenta como’l primer congresu global del sector nel mundu”. Piñán insistió na voluntá del Principáu de que la gastronomía sía unu de les exes principales d’Asturies como destín y destacó, ente les acciones próximes d’impulsu turísticu, la celebración na comunidá del congresu internacional Mujeres, Gastronomía y Medio Rural, previstu pa setiembre.

    Mientres la so intervención, previa al actu central de la xornada, la titular de Cultura glosó la relevancia de les dos marques de calidá del Principáu pa hostelería y restauración: Meses d’Asturies y Sidreríes d’Asturies. Dambes arrexunten un bon númberu d’establecimientos con estándares elevaos confirmaos por esixentes auditoríes de serviciu y instalaciones. Amás, la conseyera presentó los audiovisuales realizaos pa la so promoción, trabayos que se sumen a los divulgaos va unes selmanes pa los sellos de calidá d’agospiamientos: Casones Asturianes y Aldea–Asturies Calidá Rural.

    La primer xornada del espaciu asturianu en Madrid Fusión tuvo como principal atractivu la presencia nes cocines de profesionales de la restauración rexonal con estrella Michelin. Los cocineros Nacho y Esther Manzano, de Casa Marcial, y Ricardo Sotres, d’El Retiro, xuntu con Toño Argüelles, d’Argüelles Chocolatier, ellaboraron un menú singular pa los visitantes qu’enllenaron el comedor. El recintu, de 160 metros cuadraos, tien un aforu de 40 persones. L’espaciu d’Asturies tien cubiertes dende va unos díes les reserves pa toles sos actividaes.

     

    Degustación d’alimentos ecolóxicos

    Antes de la xinta de les estrelles Michelin, el pabellón ufiertó una degustación d’alimentos ecolóxicos d’Asturies. La xornada va concluyir con una cata-degustación de los quesos de les denominaciones d’orixe protexíes (DOP) Afuega’l Pitu, Gamonéu, Casín y Cabrales.

    Mañana, el programa va empecipiar con una cata de sidres naturales esplumoses acoyíes a la DOP Sidra d’Asturies y va rematar con una cata-armonizaxe de la Indicación Xeográfica Protexía (IGP) Choscu de Tinéu con vinos DOP Cangas. Ente dambes actividaes, la xinta va tar dedicada a les guisanderas asturianes y el menú va ser ellaboráu por Yvonne Corral, de Casa Telva; Ramona Menéndez, de Casa Belarmino, y Julio Blanco, de la pastelería Pomme Sucre.

    El miércoles, día de la clausura, van ellaborar el menú de la xinta, dedicáu a los talentos nuevos, Xune Andrade, del Restorán Monte, y Javier Álvarez Farpón, de Casa Farpón, con Jonathan González, de la pastelería Cabo Busto, que va encargase de los postres.

  • Marco Topo aporta a Xixón

    Marco Topo aporta a Xixón

    XIXÓN, 31 de mayu de 2021.- Marco Topo aportó güei a la principal ciudá asturiana y Xixón Turismu, de la mano del conceyal de Promoción Económica, Empléu, Turismu y Comerciu Llocal, Santos Tejón Llaneza, presentólu esta mañana na Casa Conceyu. Esti personaxe va dir asoleyando los secretos de la nuesa ciudá pa los neños y neñes que mos visiten. Nel casu de Xixón, Marco Topo va tar acompangáu de dos de los nuesos personaxes del país: Trasgu y Serena.

     

    Ye un xuegu al que se llega al traviés d’una app y pa xugar en familia. Marco Topo ta pensaú pa que families con neños/es de 5 a 12 años puean realizar visites autoguiaes pelos llugares más renomaos de Xixón, usando’l xuegu y la gamificación p’amosar la so hestoria, patrimoniu y cultura.

     

    El xuegu, que va tar disponible n’español, francés, inglés y portugués, va llevar a la familia hasta’l Puertu Deportivu, Cimavilla, la sablera San Llorienzo, los edificios modernistes, el Muséu del Ferrocarril, l’Acuariu, la Campa Torres, el Muséu del Pueblu d’Asturies, El Molinón, el Parque Isabel la Católica, el Xardín Botánicu o Llaboral Ciudá de la Cultura. Nestos llugares tendrán de superar una serie de pruebes.

     

    “Esta iniciativa surde cola idega de fomentar el turismu familiar, ún de los segmentos más importantes en Xixón y ún de los segmentos estratéxicos afitaos nel nuevu Plan de Marketing de Turismu de Xixón 2021-2024. El turismu familiar representa un 22% del turismu na nuesa ciudá. Anque seya un segmentu maduru, entá tien gran potencial de crecimientu”, comentó Santos Tejón.

     

    Xixón xúnese asina a la rede de destinos de Marco Topo. Les families que yá xueguen con Marco Topo van tener agora una parada nueva na nuesa ciudá. “Tamos seguros qu’esta iniciativa va arriquecer la nuesa ufierta pa los y les más peques, que asina esfrutarán d’un viaxe y una estancia prestosa y didáutica”, sorrayó’l conceyal.

  • Sácame Pola Pinta celebra la so gala final esti domingu

    Sácame Pola Pinta celebra la so gala final esti domingu

    La quinta edición del concursu d’imitadores menores de 18 años Sácame Pola Pinta llega a la final. Esti domingu 30 de mayu a les 20h, el Nuevu Teatru de La Felguera va acoyer la gala na que van participar los 12 finalistes. Les entraes yá tán escosaes dende hai tiempu, pero’l públicu va poder siguir na web del eventu la retresmisión en streaming y incluso votar pola so imitación favorita, convirtiéndose asina nel quintu miembru del xuráu.

    Los Berrones, Eva Tejedor, Marisa Valle Roso, L-R, Grupo Beatriz, Rodrigo Cuevas, Víctor Manuel, Melendi, Warcry, Alexandra in Grey, Alberto & García y Mina Longo, son los distintos artistes que van ser imitaos nesta gala final por rapacinos y rapacines d’ente 7 y 16 años. Una escoyeta que reflexa perbién la diversidá de la música fecha n’Asturies y que promociona con xeitu esta escena, dándola más a conocer ante un públicu de toles edaes.

    El V Sácame Pola Pinta nun ye ayenu a la crisis de la COVID-19 y por esta razón reinventa’l so formatu p’adaptase a la pandemia. D’esta manera, amás de la retresmisión online de la gala final y de permitir al públicu votar per Internet la so imitación favorita, la organización del eventu abre un formulariu na so web pa que tola xente que siga la final puea suscribise y entrar nel sortéu de dellos regalos ente los que s’inclúi una cena, aparatos tecnolóxicos o dellos xuegos de mesa.

    Ésitu de les conexones en vivo

    Otra de les novedaes d’esta edición son les conexones en vivo que Sácame Pola Pinta lleva faciendo na so cuenta d’Instagram dende’l pasáu 14 de mayu. Tolos díes a les 22h el presentador del eventu, Fernando Valle Roso, conecta en directo pa charrar con un artista imitáu, un miembru del xuráu, un collaborador del eventu, o una personalidá relevante de la cultura asturiana. Estos Instagram Live tán siendo tou un éxitu, axuntando a más de 1.000 persones delantre de la pantalla del teléfonu con cada conexón.

  • Xixón Turismu convida a una nueche estra na ciudá

    Xixón Turismu convida a una nueche estra na ciudá

    La campaña ‘Gijon te merece’, cola que pues reservar 3 nueches d’hotel na ciudá asturiana y pagar namás dos, echó güei a andar. El portal d’ufiertes flash www.buscounchollo.com va asoleyar chollos en Xixón cada 4 díes nes cuatro selmanes vinientes p’agospiate nos meses del branu.

     

    La iniciativa “Gijón Te Merece” son tres nueches d’agospiu con almuerzu incluyíu pa dos persones. Esti paquete va vendese en buscounchollo.com con venta flash (d’última hora) y con una ufierta agresiva (dependiendo de la categoría del agospiu, dende 90 a 210€ la estancia de tres nueches d’agospiu y almuerzu con IVA incluyíu). El o la turista namái pagará dos nueches d’hotel y de la tercera va encargase Xixón Turismu.

    Na promoción participen 42 agospios de la ciudá, dende hoteles de 4 a 1 estrella, apartamentos turísticos, pensiones y el Camping Deva Gijón.

    La campaña ta empobinada dafechu al mercáu nacional y les reserves van poder faese nes cuatro selmanes vinientes y con un valir hasta’l 31 d’ochobre d’esti añu.

    La campaña “Gijón te merece” ye’l resultáu d’un programa de reactivación del sector turísticu na ciudá, al que se-y dio’l preste na mesa de concertación social Gijón Reinicia. Esta propuesta diseñóse col alcuerdu y consensu de tolos axentes sociales y d’entidaes que representen al sector priváu.

  • Desenterrando la hestoria: memoria, represión y llucha n’Asturies del sieglu XX.

    Desenterrando la hestoria: memoria, represión y llucha n’Asturies del sieglu XX.

    Dende Reflexu y Les Ablanes, dos asociaciones de calter cultural de Mieres y Piloña, respectivamente, creyemos que poner en valor el pasáu pa caltener viva la memoria, aldericar, buscar y ufiertar ferramientes de cambéu y tresformación d’esta realidá  social ye un llabor d’urxencia.

    Nestes primeres xornaes sobre la recuperación de la memoria hestórica: por mor de la necesidá de concienciar al rodiu de la represión política n’Asturies nel sieglu XX, de visibilizar y rescatar del escaezu aquella parte de la Hestoria que foi silenciada y apartada de los discursos hexemónicos. Pa ello, punxímonos en contactu con espertes que trataren, dende diferentes ámbitos, esta temática.

    L’oxetivu yera axuntar, per un llau, la parte  académica y/o teórica dende una perspectiva hestórica y, per otru, la parte más  práctica cola fin d’amosar y poner en valor aquelles ferramientes como’l cine, la educación o la lliteratura, claves pa la tresformación social.

    D’esti mou, les xornaes contarán cola participación, per un llau, de Faustino Zapico,  Alberto Vázquez, Heriberto Gutiérrez, Fe Santoveña, Eduardo Abad, Pablo Casanueva y  Luis Felipe Capellín (los díes 9 y 10 d’abril nel Auditoriu Teodoro Cuesta de Mieres). Y, per otru, de Carlos Gonzáez Espina, Ramón Lluis Bande, Irene Faza, José Antonio Longo, Inaciu Galán y Arantxa Margolles (los díes 16 y 17 d’abril na Sala Polivalente de  L’Infiestu, Piloña). Amás, el día 17 habrá un conciertu d’Andrea Joglar, Rodri Joglar, Viti  Redondo y Elías Llano qu’interpretarán tres cancios populares; y podrá esfrutase d’una esposición fotográfica sobre l’Asturies de guerra y de posguerra.

    Les charres de Mieres podrán siguise amás en streaming na canal de YouTube del Ayuntamientu de Mieres.

    ¡¡Por mor de la situación sanitaria, qu’obliga a la reducción de los aforos al 30%, la xente  que quiera asistir deberá realizar una reserva con antelación al corréu llectrónicu reflexuablaneru@gmail.com o al númberu de teléfonu 684039896!!

  • El Gobiernu d’Asturies autoriza a la hostelería de temporada a entamar yá la so actividá

    El Gobiernu d’Asturies autoriza a la hostelería de temporada a entamar yá la so actividá

    El períodu de branu, afitáu ente’l 15 de mayu y el 30 de setiembre, adelántase d’esta manera más de dos meses .

    La Comisión d’Urbanismu y Ordenación del Territoriu d’Asturies (CUOTA), dependiente de la Conseyería de Mediu Rural y Cohesión Territorial, autorizó que los servicios de temporada, talos como los establecimientos de comida y bebida allugaos na redolada de les playes, puedan funcionar anguaño de manera escepcional dende’l 1 de marzu, en llugar d’a partir del 15 de mayu como recueye la norma.

    El Gobiernu d’Asturies atiende asina una solicitú de la organización empresarial Otea, Hostelería y Turismu n’Asturies, pa facilitar l’actividá económica d’un sector fuertemente castigáu pola crisis sanitaria.

    El Decretu 93/2013, de 30 d’ochobre, afita la temporada de branu ente’l 15 de mayu y el 30 de setiembre de cada añu. Esta autorización pue ampliase más p’allá de la temporada veraniega, previa solicitú del interesáu y atendiendo a la naturaleza del serviciu ufiertáu, la xustificación de la so demanda y la playa onde s’alluga. Asina, esisten establecimientos de temporada que yá pueden abrir les sos instalaciones.

    Aquellos que nun cunten con dicha autorización y tean interesaos n’empecipiar la temporada antes del 15 de mayu, van poder abrir igual; namás van tener que comunicalo al Serviciu de Xestión y Disciplina Urbanística del Gobiernu d’Asturies col fin d’evitar sanciones. Les comunicaciones van poder ser presentaes en cualquier rexistru públicu, presencial o telemáticu.

  • Suspenden el plan especial de tresporte a Los Llagos en Selmana Santa

    Suspenden el plan especial de tresporte a Los Llagos en Selmana Santa

    El Consorciu de Tresporte d’Asturies (CTA), dependiente de la Conseyería de Mediu Rural y Cohesión Territorial, nun va activar finalmente esta Selmana Santa’l plan especial de tresporte públicu a Los Llagos, previstu de mano pa les xornaes ente’l 27 de marzu al 4 d’abril.

    A la vista de los últimos datos sobre la evolución de la pandemia del coronavirus, analizaos güei nel Conseyu Interterritorial del Sistema Nacional de Salú, el Gobiernu d’Asturies considera conveniente zarrar al tráficu la carretera que da accesu a Los Llagos dende’l Real Sitiu pa contener la movilidá interior y aforrar posibles aglomeraciones. D’esta manera, namás va dexase pasar a los usuarios que dispongan d’autorización.

    Si les condiciones sanitaries dexen, el plan que facilita l’accesu en tresporte públicu a esti enclave protexíu de Los Picos d’Europa va funcionar anguaño les fines de selmana d’abril y mayu, y dende’l llunes 31 de mayu hasta’l domingu 17 d’ochobre, sacante’l 25 de xunetu, Fiesta del Pastor, y el 8 de setiembre, Día d’Asturies, xornaes nes que se va habilitar un operativu especial.

    El Consorciu de Tresportes d’Asturies (CTA) va poder adaptar los horarios y frecuencies habituales de los autobuses que conecten Cangues d’Onís con Cuadonga y Los Llagos, a tenor de los conseyos sanitarios y de les llimitaciones de movilidá, p’adaptalos a la demanda.