Categoría: Ociu

¿Cuál ye’l to rincón favoritu de Xixón?

Acércase’l branu y ye momentu d’esfrutar del bon tiempu. Salir a pasiar, tomar unes botelles… Cualquier rincón de Xixón ye un bon llugar, pero hai llugares qu’atraen más qu’otros. Y a ti, ¿cuál ye’l que más te presta?

16/06/2019
Marc Singer, Donovan en ‘V’, nuevu invitáu a la Comic Con de Metrópoli

Marc Singer ye’l postreru actor invitáu a Metrópoli Comic Con. L’intérprete participó en diverses series y películes nos años 80, anque la so popularidá llegó col so papel na película ‘El Señor de las bestias’. Sicasí, Marc Singer llegó a los más alto de la so carrera como protagonista de la serie V en 1983 y na secuela V: La Batalla Final en 1984 nel papel de Mike Donovan, el periodista líder de la resistencia al pie de Jane Badler, qu’encarnaba a Diana, la líder de los visitantes.

L’actor canadiense tamién participó en series emblemátiques de los años 80 como ‘Vacaciones en el mar’, ‘Batman’ y ‘Dallas’. Sicasí, Marc Singer siguió trabayando a lo llargo d’estos años y formó parte del elencu de series como ‘Bella y Bestia’, ‘Arrow’
y ‘Mentes Criminales’.

Ye la primer vegada que Marc Singer visita una convención n’España y nel festival va tener un photocall pa poder fotografiase colos siguidores de la serie. Amás, va participar n’alcuentros y charres colos fans y va formar parte del desfile del domingu col que se cierra’l festival.

El festival Metrópoli va celebrase nel Recintu Ferial Luis Adaro del 28 de xunu al 7 de xunetu. La entrada diaria tien un costu de 4 euros. Amás, hai disponibles abonos pa la Comic Con (del 4 al 7 de xunetu) a un preciu de 16 euros, asina como un pase especial pa los diez dies de festival a un preciu de 28 euros.

12/06/2019
Estopa va dar un conciertu en Xixón n’avientu

Estopa va ufiertar un conciertu en Xixón el 21 d’avientu. Va Ser a les 21:30 nel Palaciu de Deportes de la Guía ‘Presidente Adolfo Suárez’. Los hermanos David y José Muñoz celebren 20 años de trayectoria musical cola so banda Estopa cola publicación d’un nuevu trabayu discográficu, ‘Fuego’. Desque en 1999 publicaren el so primer trabayu nun pararon de collechar ésitos, como’l récord de vientes pa un grupu debutante gracies a los 1.200.000 exemplares vendíos del so primer discu, ‘Estopa’.

‘Fuego’ ye’l primer cantar del décimu álbum d’Estopa. Un nuevu trabayu con cantares tamién totalmente nueves, que va ser el meyor homenaxe posible pa celebrar dos décades de música d’Estopa. ‘Fuego’ ye Estopa n’estáu puru: rock, palmes y desenfadu, la infalible receta cola que va dos décades rescataron la rumba de la mormeyera dende una perspectiva roquera.

Nel so Tour Fuego nun van tocar namás los sos nuevos cantares, sinón que van faer esfrutar al públicu con tolos sos grandes ésitos. Una celebración en toa riegla d’unu de los grupos españoles más importantes de les últimes décades. Les entraes pal conciertu d’Estopa nel Palaciu de Deportes de Xixón yá tán a la vienta. Pueden adquirise al traviés d’internet na páxina web: http://2monkeys.es/conciertos/

11/06/2019
Vuelve la Fiesta del Cine

Les sales asturianes súmense a la Fiesta del Cine. L’eventu, qu’esti añu cumple diez años, va celebrase los díes 3, 4, 5 y 6 de xunu. Les entraes van tar disponibles a un preciu de 2’90 euros. Pa beneficiase d’esta promoción ye necesario acreditase de baldre na páxina web de la Fiesta del Cine. Los menores de 14 años y los mayores de 60 nun necesiten esta inscripción previa.

La Fiesta del Cine va llegar a la totalidá de les sales de cine d’Asturies. Podrán beneficiase de la promoción quienes s’alleguen a los Cines Yelmo de La Calzada. Los precios especiales d’esti eventu tamién van poder esfrutase nes sales d’Intu Asturies (Siero), Los Prados (Uviéu), Odeon Parqueastur (Corvera), Artesiete Nalón (Llangréu) y Caudalia (Mieres).

03/06/2019
Tornen les visites guiaes n’asturianu col ciclu XixónTours

Tornen les visites guiaes n’asturianu de XixónTours. Tres l’ésitu de la iniciativa esti iviernu, la plataforma d’información sobre ociu y turismu VerAsturies y Cuatro Gotes Producciones retomen esti branu’l ciclu de visites guiaes temátiques n’asturianu. XixónTours ye una iniciativa pa dar a conocer Xixón a los propios habitantes del conceyu y a los asturianos en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu.

Les visites guiaes n’asturianu de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente. Les visites d’esta segunda edición del ciclu XixónTours diseñáronles espertos nes cuestiones trataes en caúna de les temátiques de les mesmes, como Arantza Margolles, Daniel García de la Cuesta ya Inaciu Galán. Nesta ocasión van volver a facese trés rutes temátiques:

Xixón mete mieu. Vienres 14, 21 y 28 a les 22 hores.

Una ruta que va averar a los visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes. Una visita n’horariu nocherniegu pa conocer los sitios más escuros, terroríficos y misteriosos de la hestoria de Xixón.

Escritores n’asturianu en Xixón. Sábadu 22 a les 12 hores.

Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, el conventu de Cimavilla, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Una visita onde lliteratura y hestoria xúntase pa dar a conocer la ciudá.

Muyeres na hestoria de Xixón. Sábadu 8, 15 y 29 a les 12 hores.

La muyer, tapecida siempres na hestoria, apruz nesta visita guiada per Xixón. Una visita a la ciudá onde se falará de muyeres importantes na hestoria de la ciudá. Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González… Too ensin escaecer a los colectivos de muyeres anónimes que tanto marcaron el carácter d’esta villa, como les cigarreres y les pescaderes, nin les tradiciones como la de les comadres. Falaráse del papel de la muyer na sociedá, dende la falta de visibilidá hasta llegar a cuntar con alcaldeses.

Les visites tienen un costu de 6 euros pal públicu xeneral y 3 euros pa menores de 18 años. Ye obligatorio inscribise na páxina web verasturies.com a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu redaccion@verasturies.com

El proyectu xestiónalu VerAsturies.com, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.

03/06/2019
La regata de globos alza’l vuelu

La tercer regata de globos aerostáticos ‘Xixón dende l’aire’ despegó esta mañana del parque d’El Rinconín y enllenó de color el cielu de la ciudá. Los equipos participantes llegaron a les diez y media y poco más tarde entamaron los vuelos. Nesta edición participen 23 pilotos llegaos dende toa España y, inclusive, dende l’estranxeru. Javier Tarno, Juanma Copete, Jorge Iglesias y María Luisa Cabañeru son dalgunos de los inscritos.

El bon tiempu va permitir esfrutar del espectáculu d’esta tercer edición de la regata de globos en Xixón, que se va celebrar hasta esti domingu, 2 de xunu. Peles mañanes, los despegues van realizase dende’l ‘solarón’, mientres que, peles tardes, van facer dende El Rinconín. Sicasí, esta previsión va tar condicionada pola orientación y fuercia del aire. Tamién se va celebrar una ‘Night glow’, el sábadu 1 de xunu nel ‘solarón’.

31/05/2019
Visita guiada pel Xixón lliterariu

Nueva visita guiada solidaria pela ciudá. Turismu Xixón entama un percorríu pel cascu hestóricu de la mano d’escritores qu’escoyeron el barriu como escenariu pa les sos noveles. Atravesando les places más típiques de Cimavilla, dende la plaza’l Marqués, pasando pela Plaza Mayor, la Tabacalera o la Plazuela Xovellanos, vamos escubrir aspeutos del Xixón de la so dómina que van aidanos a comprender un poco más la nuesa hestoria. Los rellatos de Pachín de Melás, José Fernández Barcia, Manuel Vega y Joaquín Alonso Bonet, ente otros, van acompañanos nun paséu nel que Xixón va ser la protagonista auténtica.

‘Xixón lliterariu’ ye la propuesta pa esti mes de xunu que forma parte del ciclu de visites guiaes solidaries que Xixón Turismu entama a lo llargo de 2019. Nesti casu, tolo recaudao va detinase al programa de sofitu a la infancia, adolescencia y families en riesgu de dixebra y pobreza n’ España, xestionáu por Ayuda en Acción.

La visita va realizase tolos sábados del mes (1, 8, 15, 22 y 29 de xunu) a les 12:00h y tien un coste de 5 euros. El puntu d’alcuentru va ser la oficina d’Infoxixón (Fomento). La visita tien una duración aproximada de 2 hores. Ye preciso inscribise previamente llamando al 985 341 771 o escribiendo al corréu lletrónicu: infogijon@gijon.info

30/05/2019
El musical de ‘West Side Story’, en Xixón

La xira del musical de West Side Story va llegar Xixón a finales d’añu. La versión orixinal íntegra cola qu’esti musical míticu debutó nel Winter Garden Theatre(Broadway, 1957) estrenaráse per primer vegada n’Asturies. Hai siete funciones programaes: xueves 28 de payares de magar les 20.30 hores, el vienres 29 y el sábadu 30 a les 18 y les 22 hores, y el domingu 1 d’avientu a les 17 y les 20.30 hores.

Dende la primer nota hasta l’últimu suspiru, ‘West Side Story’ ye ún de los musicales más importantes y representativos del teatru universal. La partitura al cargu de Leonard Bernstein y Stephen Sondheim ye unánimemente reconocida como una de los meyores na hestoria de los musicales. El testu d’Arthur Laurens sigue siendo tan conmovedor y actual como’l primer día. Y les coreografíes orixinales de Jerome Robbins ocupen un llugar d’honor na lleenda del baille contemporaneu. De la so mano, la más grande hestoria d’amor toma les cais de Broadway para convertise n’ún de los iconos del teatru musical.

La más grande hestoria d’amor toma les cais de Broadway para convertise n’ún de los iconos del teatru musical

Arthur Laurens tresporta al Romeu y Xulieta de Shakespeare a la ciudá de Nueva York. Dos nuevos namoraos vense atrapaos pol enfrentamientu ente dos bandes caleyeres, los americanos Jets y los puertorriqueños Sharks. La so llucha por sobrevivir nun ambiente d’odiu, violencia y prexuicios tresfórmase nuna de les hestories más emocionantes, desgarradores, belles y relevantes del teatru musical.

Les entraes pa ver el musical de ‘West Side Story’ en Xixón tan yá a la venta a un preciu d’ente 42 y 59 euros. Pueden comprase na recepción de Laboral Ciudad de la Cultura, nel Centru d’Información Turística del Principáu d’Asturiesd’Uviéu, nel Centro Niemeyerd’Avilés, n’entradas.liberbank.es, nel 902 106 601 y red de cajeros Liberbank. Los usuarios del Pasaporte Cultural y socios del Club Cultura Asturiaspueden beneficiase d’un descuentu del 10% aplicable a un máximu de 75 localidaes/función hasta’l 6 de payares.

30/05/2019
Mercáu de muyeres artesanes na Ciudadela de Capua

L’Asociación Cultural D’Aky celebra esti domingu de mayu’l so yá tradicional mercáu de muyeres artesanes na Ciudadela de Capua. L’horariu va ser ininterrumpíu de 11 a 18 hores. Amás de 12 a 13.30 hores va haber un taller gratuitu de «ellaboración d’un cuélebre volador» entamáu pola asociación Desfaciendo Maíz.

Una ventena de puestos van acoyer a muyeres artesanes de toa Asturies con una gran cantidá de productos: xoyes, complementos, bolsos, bixutería en magre poliméricu y vidriu recicláu, sombreros y tocaos, madera, cueru, cordura, puntu y crochet, xuguetes, muebles restauraos y repostería.

L’asociación considera «bien importante visibilizar el trabayu de les muyeres artesanu y empresariu y promover les sos opciones d’empléu». Por ello, reivindiquen la creación d’espacios d’alcuentru «onde les muyeres puedan esponer les sos moliciones y arriquecese mutuamente». Amás, esixen la dinamización de l’actividá comercial de les muyeres artesanes.

L’Asociación Cultura D’AKY ta constituyida por muyeres con una especial sensibilidá escontra la situación de desigualdá de xéneru. Conscientes d’esta realidá, y pa facer más visible’l so trabayu, surde la idea d’entamar esti Mercáu Artesanal de Muyeres onde esponer los sos productos.

24/05/2019
Batalla de los Gallos en Metrópoli

La Red Bull Batalla de los Gallos vuelve a Metrópoli con ‘La última oportunidá‘. Tres l’ésitu del añu pasáu, el 28 de xunu van salir los dos postreros MCs, que van completar la llista de los 16 gallos que se van enfrentar na gran final nacional. Los participantes clasificaos que van dir a esta última oportunidá de Metrópoli en Xixón son: Elekipo, Nielo y Sara Socas, de la semifinal de San Fernando, Cádiz; y Hander, Errecé y NQP, de la semifinal d’Alicante.

A estos participantes sumaránse otros dos por aciu un procesu de votación al traviés de la web de Red Bull Batalla de los Gallos. D’esta manera, van ser ocho los gallos participantes que van dir a ‘La última oportunidá’ de Metrópoli.   Los participantes que queden en primer, segunda y tercer posición en ‘La última oportunidá’ van clasificase para la final nacional, que va tener llugar el 13 de xunetu nel RCDE Stadium de Barcelona.

‘La última oportunidá’ de la Red Bull Batalla de los Gallos va inaugurase nel escenariu principal de Metrópoli’l vienres 28 de xunu a les 21 hores. Versos, improvisación ya inxeniu daránse cita nesta parada, onde l’espectáculu ta aseguráu. Amás, los siguidores que nun puedan esfrutalo en Metrópoli, podrán siguir por streaming na so canal de Youtube y tamién se va siguir en directu al traviés de les redes sociales col #BatallaDeLosGallos.

23/05/2019