La Xira Vibra Mahou de Shinova va volver a Asturies esta fin de selmana y ye que la xixonesa sala Albéniz va acoyer esti vienres 24 de mayu un nuevu conciertu d’esti tour que ta percorriendo’l país y col que Vibra Mahou, la plataforma de música de Mahou Cinco Estrellas, promueve los alcuentros alrodiu al directu. Los intérpretes de temes inolvidables como “La Sonrisa Intacta” o “Te debo una canción”, tán xirando col so últimu trabayu, “El Presente”, col que siguen conquistando al públicu al traviés de les sos melodíes cargaes d’enerxía.
¿Qué supón pa vós el sofitu de la Xira Vibra Mahou?
Ta siendo mui importante pa nós, non yá pola cantidá de feches y ciudaes que sumemos a la xira d’El Presente, sinón tamién pol equipu humanu qu’atopemos en Vibra Mahou, xente a la que-y apasiona la música y cola que conectemos d’una manera instantánea.
¿Cómo foi El Presente Tour 2024 pa vós? ¿Cómo lo compararíeis con tours anteriores?
Anque esta xira acaba d’empezar, podríamos dicir, polo que tamos viviendo en cada conciertu, que too ta siendo muncho más intensu que nunca.
El nome Shinova suxure «Nueva Enerxía». ¿De qué manera creéis que’l grupu apurre esa “nueva enerxía” al mundu de la música?
Apurrimos una forma, la nuesa, d’espresión al traviés de la música. Si esto conecta, anque sía, con una sola persona, para nós ye maraviyosu.
¿Cómo evolucionó’l grupu dende’l so primer discu, «Llatíos” (2009), hasta’l so últimu llanzamientu, ¿”El Presente” (2024)?
Camudemos enforma, como ye normal, y lo qu’empezó siendo un xuegu convirtióse nel nuesu oficiu, pero caltenemos la ilusión y les ganes d’esfrutar intactes.
¿Hai dalgún cantar en «El Presente» que tenga una hestoria especial o un significáu particular pa vós?
Caúna d’elles.
¿Qué podéis cuntanos sobre’l conceptu y la inspiración detrás de «El Presente»?
Queríemos xugar cola polisemia de la palabra» presente”, y a partir d’esa premisa, buscamos un símbolu que representara esi conceptu y que tuviera coherencia col mensaxe de los cantares. Esi símbolu acabó siendo’l diamante de la portada.
¿Cómo foi la collaboración con Iván Ferreiro y cómo creéis que collaboraciones d’esti tipu beneficiar?
Iván foi, y ye, una de les mayores influencies pa Shinova. Cuntar con él nun cantar como Gato Azul, ye un suañu cumplíu.
¿Cuál ye’l futuru de Shinova?
Quédennos, mínimu , dos años de xira per delantre, asina que tamos centraos en tocar, como nun puede ser d’otra manera. Lo qu’asoceda dempués, dempués va asoceder.
¿Cómo veis la escena indie/rock n’España anguaño y qué papel creéis que xuega Shinova nella?
Cada vez ye más difícil atopar les llinies coloraes que delimitan los estilos, y la etiqueta “Indie” quedó abondo desvirtuada respectu al conceptu orixinal. Lo que sí podemos dicir ye que tamos viviendo una dómina mui productiva no que cinca a propuestes artístiques, y nós tenemos la mesma, qu’amás , ye bien identificable. Esto, que n’apariencia ye tan simple, ye un ésitu pa nós.
