Xixón al día

Categoría: Tema del día

  • Muerre a los 96 años el padre Villanueva, dexando “güérfanos” a xeneraciones d’exalumnos del Codema

    Muerre a los 96 años el padre Villanueva, dexando “güérfanos” a xeneraciones d’exalumnos del Codema

    Nes sos vixilancies del pasiellu de bachilleratu del Corazón de María, el padre Villanueva entraba nes aules y cuando atopaba a un grupu ensin profesor, dicía «¡Güérfanos, nunca!». Una fras recordada con ciñu polos miles d’estudiantes que dende los años cincuenta tuvieron embaxo los sos cuidaos. El padre Villanueva, cura claretianu del Colexu Corazón de María de Xixón, morrió esta mañana a los 96 años dexando un fondu pesar na comunidá del Codema, na que yera una persona mui querida.

    La muerte llegó-y na residencia de sacerdotes de la so orde, en Llión, onde foi treslladáu’l pasáu 19 d’avientu tres delles selmanes ingresáu nel Hospital de Cabueñes. El Padre Villanueva, d’orixe navarru, estudió nos seminarios de Beire y Santo Domingo de la Calzada y vivió de neñu en Donostia, nel País Vascu, onde s’aficionó a la música coral. La so ordenación como sacerdote tuvo llugar en Bilbao, onde entamó tamién a ser docente. Al pocu tiempu la orde treslládalu a Xixón, onde’l CODEMA taba en plenu procesu de construcción de les instalaciones que diben a convertilu nun de los colexos más grandes de la ciudá. Na escuela xixonesa foi profesor d’Hestoria del Arte y Lliteratura, con fama d’esixente.

    La muerte llegó-y na residencia de sacerdotes de la so orde, en Llión, tres delles selmanes ingresáu nel Hospital de Cabueñes

    Amás de la so vida como cura y profesor, el padre Villanueva tenía actividaes fuera del centru. Participó na película Jandro, que protagonizó en 1965 Arturo Fernández. Amás foi capellán de la plaza toros y d’una comunidá de monxes de Viesques. A finales de sieglu dexó les clases pa convertise en cuidador del orde nos pasiellos del centru y organizador de les graduaciones hasta los 89 años, en 2011. Nesi mesmu cursu recibió un homenaxe de tola comunidá educativa.

    Ente los alumnos que pasaron peles sos clases o tuvieron embaxo la so vixilancia tuvieron dalgunos de sonadía, como los expresidentes d’Asturies, Antonio Trevín y Francisco Álvarez-Cascos, los actores Roberto Álvarez Ruiz y Sergio Buelga, los deportistes Chechu Rubiera y Nacho Cases, los periodistes Ricardo Rosety, Inaciu Galán y Pachi Poncela o l’escritor y miembru de l’Academia de la Llingua Asturiana, Vicente García Oliva.

    La misa na so alcordanza en Xixón sedrá’l xueves 9 a les 18 hores na Ilesia del Colexu Corazón de María, con entrada pela avenida Pablo Iglesias.

  • Escolares de Xixón bauticen seis nuevos autobuses d’Emtusa

    Escolares de Xixón bauticen seis nuevos autobuses d’Emtusa

    Emtusa presentó esti miércoles seis nuevos autobuses. Los vehículos fueros bautizaos polos ganadores del concursu ‘Un nome pal to autobús’ y del concursu del logo de la Selmana Europea de la Movilidá 2020. Los nomes escoyíos polos escolinos fueron AsturBus, Enrebus, SobreRuedas, EcobusGijón, El Xixón Pro y Relámpago Rojo. Los nuevos autobuses van incorporase a la llínea 4, que conecten El Lauredal col campus de Xixón. Los vehículos, fabricaos por Scania, cumplen colos requisitos más restrictivos en materia d’emisiones contaminantes.

  • Luis Núñez y los Folganzanes van representar a Asturies en Liet International 2020

    Luis Núñez y los Folganzanes van representar a Asturies en Liet International 2020

    Luis Núñez y los Folganzanes van representar a Asturies en Liet International 2020, col tema Tengo un sitiu pa ti, el 3 y 4 d’abril en Aabenraa. «Ye una oportunidá pa ufiertar la nuesa música, aprender d’otres cultures y establecer nueves sinergies musicales. Lo mesmo que de enseñar a Europa los usos y costumes de la nuesa rexón”, aseguró’l xixonés. El so talentu ta reconocíu dientro y fora de les nueses fronteres. L’añu pasáu Luis Núñez fue unu de los escoyíos pa representar a Asturies nel festival intercélticu de Lorient y en 2015 tuvo presente nel Celtic Connections de Glasgow.

    El festival Liet International 2020 ta consideráu como l’Eurovisión de les llingües minoritaries. La decimotercera edición va celebrase na llocalidá danesa de Aabenraa los díes 3 y 4 d’abril. Nesta competición, promovida dende’l Conseyu d’Europa, van participar 19 intérpretes d’otres naciones, cada unu cantando na so llingua autóctona.

  • ALSA anueva la so imaxe corporativa

    ALSA anueva la so imaxe corporativa

    Alsa ta d’estrenu. La compañía presentó esti xueves nun actu celebráu en Madrid la nueva imaxe de la compañía. La nueva marca supon una evolución significativa nel allugamientu de la compañía: dende una visión tradicional del tresporte, amestada principalmente a los autobuses de llargu percorríu, a una visión multimodal y conectada. El propósitu de la nueva marca ye “averáse a les persones y conectar el mundu d’una manera segura y sostenible”. Con esta evolución Alsa quier faer frente a los retos de nueva movilidá, na qu’apaecieron nuevos actores ayenos al tresporte tradicional.

    El presidente de Alsa, Jorge Cosmen, señaló mientres la presentación que “siempres buscamos ameyorar y siguir innovando pa dar una meyor esperiencia a los nuesos veceros”. «El nuesu negociu enfréntase a un cambéu de dómina y precisamos una marca capaz de maximizar tol potencial”. Según el presidente d’Alsa “nun ye namá un cambéu de logotipu. El nuesu oxetivu va muncho más allá: tratar de que los veceros nos percíban como una compañía innovadora y asina siguir creciendo de forma sostenible”.

    La resultancia foi la reinvención d’una marca icónica, capaz de representar a la compañía en tolos mercaos. Y, coles mesmes, anovar la so espresión gráfica. La primer versión del actual logotipu de la compañía data del añu 1946. Una marca que se caltuvo con actualizaciones a lo llargo de toos estos años, la postrera nel añu 2011.

  • Los trabayadores de supermercaos convoquen ocho díes de fuelga

    Los trabayadores de supermercaos convoquen ocho díes de fuelga

    Unos 12.000 trabayadores de supermercaos tan llamaos a la fuelga n’Asturies. Los paros tan convocaos pa los díes 21, 22, 23, 24, 28 29, 30 y 31 d’avientu, en plenes fiestes navidiegues. La fuelga va afectar a cadenes como MásyMás, Alimerka, Día, El Arco y La Quintana. L’oxetivu de los sindicatos ye llograr que l’Asociación de Supermercaos se siente na mesa negociadora y consiguir un conveniu colectivu que meyore les condiciones de los trabayadores del sector.

    El sindicatu USO reivindicó la xubida automática de nivel salarial a los 3 años, dos díes más de vacaciones y aumentar el permisu por lactancia. «Lleguemos a esta situación pola actitú de la patronal. Llevamos esperando dende febreru a tener una respuesta pela so parte», denuncia Margarita Quintano, de la Federación de Servicios de USO-Asturies.

    L’añu pasáu la patronal aceptó una xubida salarial de 50 euros mensuales y el compromisu d’axustar en 2019 un nuevu conveniu que tuviera meyores salariales y sociales. Nestos meses, la patronal presentó una propuesta de xubida salarial del 1,3%, unos 11,50 euros de media. «Los sindicatos tamos reclamando que los salarios algamen los 14.000 euros añales en 2021», esplica Quintano.

  • Tsunami Xixón amplía la so duración a trés díes

    Tsunami Xixón amplía la so duración a trés díes

    La banda de punk rock Refused ye’l primer nome confirmáu pa la viniente edición del festival Tsunami Xixón. Los suecos son los encargaos d’abrir el cartel, que var dir conociéndose al completu a lo llargo d’esti mes d’avientu. El festival braniegu tornará con novedaes pasando a tener una duración de trés díes. La edición de 2020 va celebrase del xueves 30 de xunetu al sábadu 1 d’agostu. Tres díes de fiestas cola meyor música.

  • La Cometcon d’Uviéu treslládase a Xixón

    La Cometcon d’Uviéu treslládase a Xixón

    La Cometcon dexa Uviéu y treslládase a Xixón. La octava edición del festival d’ociu alternativu del noroeste d’España va celebrase nel recintu ferial Luis Adaro. El treslláu foi anunciáu ayeri pela organización del certamen ente la «falta de sofitu del equipu de gobiernu» de la capital. «Depués d’aconceyar en trés ocasiones, comunicósenos que nun había dineru pa caltener el conveniu», esplica Héctor Lasheras, director de la Cometcon.

    La organización agradeció al Conceyu de Xixón que punxera a la so disposición un espaciu mayor. «Tamos percontentos col crecimientu qu’esto supón pal nuestru proyectu, con un aforu que va permitir a tol mundu esfrutar de la Cometcon», valoró Daniel Menéndez, presidente de l’asociación qu’entama’l festival. El Conceyu d’Uviéu sofitó con 120.000 euros la cabera edición del certame. La organización destaca qu’esta aportación permitió amenorgar el preciu de la entrada a 2,5 euros, «la más baxa d’España».

    La VII edición de la Cometcon, celebrada en marzu nel palaciu de congresos d’Uviéu, recibió 17.000 visitantes a lo llargo de los trés díes que duró. Cuntó con invitaos como Pantomima Full, Rodrigo Cuevas, Das Gemini, Necromina y Loulogio, ente otros.

  • Nuevu récord na concentración de gases d’efectu invernaderu

    Nuevu récord na concentración de gases d’efectu invernaderu

    El Boletín de la Organización Meteorolóxica Mundial (OMM) sobro los Gases d’Efectu Invernaderu amosó que la concentración media mundial de dióxidu de carbonu algamó les 407,8 partes per millón (ppm) en 2018, en siendo de 405,5 ppm en 2017. Esta medría de CO2 foi bien similar a la de 2016 a 2017 y asitióse xusto percima de la media del últimu deceniu. Pela so parte, les concentraciones de metanu y óxidu nitroso disparáronse y xubieron en mayores cantidaes que mientres los postreros diez años, según les observaciones de la rede de la Vixilancia de l’Atmósfera Global, que cunta con estaciones nes rexones remotes del Árticu, en zones montascoses y n’isles tropicales.

    Dende 1990 hubo una medría del 43 % del forzamientu radioactivu total provocáu polos gases d’efectu invernaderu de llarga duración. Según les cifres proporcionaes pola Alministración Nacional del Océanu y de l’Atmósfera (NOAA) de los Estaos Xuníos que se citen nel Boletín de la OMM, el CO2 contribuyó en casi un 80 % a esa medría. “Nun hai nicios de que se vaiga a dar una desaceleración, y muncho menos un amenorgamientu, de la concentración de los gases d’efectu invernaderu n’atmósfera”, manifestó’l secretariu xeneral de la OMM, Petteri Taalas. Amás, Taalas recuerda que “la última vegada que se dio na Tierra una concentración de CO2 comparable, foi fai ente 3 y 5 millones d’años. N’ese entós, la temperatura yera de 2 a 3 °C más templada y el nivel del mar ente 10 y 20 metros cimeru al actual”.

    Disparidad nes emisiones

    Entiéndse por emisión la cantidá de gas que se llibera a l’atmósfera y por concentración la cantidá que queda nella dempués de les complexes interacciones que tienen llugar ente l’atmósfera, la biosfera, la criosfera y los océanos. Aprosimao una cuarta parte de les emisiones totales son absorbíes polos océanos y otra cuarta parte pola biosfera.

    Nun se preve que les emisiones mundiales algamen el so puntu máximu d’equí a 2030, nin tanto en 2020, si se caltienen les polítiques climátiques y los niveles d’ambición actuales de les contribuciones determinaes a nivel nacional. De les conclusiones preliminares del informe de 2019 sobro la disparidad nes emisiones esprender que les emisiones de gases d’efectu invernaderu siguieron aumentando en 2018. Nel informe United in Science sorrayóse la manifiesta, y cada vegada mayor, distancia ente los oxetivos alcordaos y la realidá.

  • Xixón patrocina una serie documental sobre’l surf

    Xixón patrocina una serie documental sobre’l surf

    Xixón acoyó esti xueves la presentacíon de la serie Caminado sobre las Olas. Ye una serie documental patrocinada por Xixón Turismu y compuesta por 13 episodios de media hora de duración, na que s’entemez el viaxe de los pelegrinos del Camín de Santiago y el viaxe d’un surfista. El protagonista ye Kepa Acero, surfista y viaxeru de sonadía. La serie ye una coproducción ente Surf Channel y RTVE, cola collaboración de R-Grupo Euskaltel.

    Caminando sobre las olas va emitise en Grupo Euskaltel, al que pertenez Telecable; Surf Channel; La2; Canal Internacional de TVE; y TVE a la carta. El patrociniu d’esta serie forma parte de la estratexa nueva de Xixón Turismu pa promocionar la ciudá asturiana como un destín de surf y turismu activu. “Queremos posicionar a Xixón como un destín de surf y de turismu activu y venceyar la imaxe de la ciudá colos valores qu’estes actividaes tresmiten. Xixón tien unes playes con foles de primer nivel”, comentó’l conceyal d’Educación y Cultura, Alberto Ferrao.

    L’alcuerdu de collaboración ente Surf Channel y Xixón Turismu inclúi la producción d’un spot de Xixón con temática de surf y la so emisión en Surf Channel d’avientu a setiembre. Amás va grabase un programa de Surfing Reports dedicáu a Xixón, nel que la surfista xixonesa Lucía Martiño va ser la protagonista. “Ún de los nuesos atractivos mayores ye’l mar, qu’ufre delles oportunidaes pal desendolcu d’actividaes qu’arriquezan la nuesa ufierta turística”, esplicó Ángela Baños, direutora de Xixón Turismu.

  • Francisco Álvarez gana’l Xosefa Xovellanos de Novela n’asturianu

    Francisco Álvarez gana’l Xosefa Xovellanos de Novela n’asturianu

    La obra Los xardinos de la lluna, del escritor Francisco Álvarez, foi la ganadora de la cuarentena edición del Premiu Xosefa Xovellanos de Novela en llingua asturiana. El premiu, convocáu y concedíu pola Conseyería de Cultura, Política Llingüística y Turismu, tien una dotación de 5.000 euros. El xuráu encargáu de valorar les obres, aconceyáu baxo la presidencia del director xeneral de Política Llingüística, Antón García Fernández, tuvo formáu polos escritores y especialistes en lliteratura asturiana Pilar Arnaldo, Paz Fonticiella, Paula Pulgar Alves, José Luis Rendueles y Manuel García Menéndez, ganador de la edición pasada.

    Ente les obres presentaes, el xuráu decidió conceder el premiu a la novela titulada Los xardinos de la lluna, destacando, como consta n’acta, que se trata de “una obra narrativamente sólida, con diálogos mui bien construyíos y descripciones preciosistes, que ye quién a axuntar el tonu llíricu colo social”. El testu presentóse col seudónimu Yuri Sarka.

    Francisco Álvarez González (Xixón, 1970) es periodista, escritor y traductor lliterariu d’italiano. Autor d’una docena de títulos n’asturianu y en castellanu, ganó nel 2015 el Premiu Xosefa Xovellanos cola so primer novela, Lluvia d’agostu, sobre la vida y la muerte del anarquista Buenaventura Durruti, publicada n’asturianu y en castellanu pola editorial Hoja de Lata y que nos meses vinientes va editase n’alemán pol sellu vienés Bahoe Books. La so obra más recién ye’l volume de cuentos Pasaxeres de la nueche (Hoja de Lata, 2019). Ye traductor al castellanu del sardu Marcello Fois y del italianu d’orixe arxelín Amara Lakhous, ente otros narradores.