La cría d’osu cantábricu recoyida a finales de mayu na redolada de la corralada de Proaza, conocida como Saba, va reintroducise nel Parque Nacional de los Picos d’Europa nos próximos díes. El principal motivu para devolvela al mediu natural ye que s’aclimate a la so nueva redolada antes de pasar al periodu d’envernía. Los equipos técnicos del Gobiernu asturianu, cántabru y castellanullionés, col sofitu del Ministeriu pa la Transición Ecolóxica, trabayaron de forma conxunta pa la suelta del animal.
La lliberación va facese en condiciones d’estremu precuru y ensin contactu con humanos p’aumentar les posibilidaes d’éxitu de la reintroducción nel mediu natural. D’esta miente, la zona de la suelta escoyóse n’analizando múltiples variables como la disponibilidá d’alimentu y la baxa presencia de persones. Coles mesmes, el so treslláu al núcleu oriental del cordal cantábricu podría contribuyir a conectar la población osera presente nesta área, non mui numberosa, cola del occidente, más estabilizada.
La Guardería de Mediu Natural del Principáu, en collaboración con técnicos especializaos, recoyó a la cría na alredor de la corralada osera de Proaza
La osezna pasó l’últimu mes y mediu nun recintu en semillibertá nel monte de Valsemana, en Llión. Nesti tiempu, siguió recuperando pesu -espérase que supere los 35-40 kilogramos- y muestra un comportamientu d’alerta y busca activa d’alimentu. Nesti sen, presenta condiciones óptimes pa dar en la fase final de tresporte y lliberación nel mediu natural. Estes instalaciones, un espaciu aislláu, ampliu y con un arriquecimientu ambiental afayadizu, facilitaron l’aclimatación del animal.
La Guardería de Mediu Natural del Principáu, en collaboración con técnicos especializaos, recoyó a la cría na alredor de la corralada osera de Proaza. Carecía desnutrición, deshidratación y alteraciones neurolóxiques y foi unviada a un centru veterinariu pa estabilizala. N’esperimentando un leve ameyoramientu, alcordóse’l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d’osos pardos.
Mientres los trés meses que permaneció ellí, tuvo baxu control permanente y especializáu, anque ensin contactu visual colos sos cuidadores, y algamó un desenvolvimientu óptimu, hasta llegar a los 23 kilogramos de pesu. Nesi momentu, el pasáu setiembre, treslladóse al mediu natural.
A partir de güei el Muséu del Ferrocarril d’Asturies va cerrar temporalmente les sos puertes al públicu. Mientres el pieslle van realizase obres de caltenimientu y meyora n’edificios ya instalaciones, especialmente nes cubiertes. La finalidá d’esta actuación ye caltener el fayadizu nivel calidable de les instalaciones y favorecer la meyora de la disponibilidad de la cortil para’l cumplimientu de los fines que-y son propios. La duración de los trabayos estímase n’unos cuatro meses.
El Muséu foi inauguráu’l 22 d’ochobre de 1998, cola presencia del daquella Príncipe d’Asturies, actual rei Felipe VI, y consolidóse como unu de los más relevantes museos de la so especialidá en toa España. Dende la so apertura más de trés cuartos de millón de persones visitaron les sos instalaciones.
La plaza de toros d’El Bibio va acoyer corríes de toros polo menos mientres un añu más. L’equipu de Gobiernu de PSOE y Izquierda Xunida ta acabante de comunicar a Circuitos Taurinos l’anovamientu de la concesión hasta 2020.
Esta decisión motivó les crítiques de Podemos-Equo Xixón. La coalición d’izquierdes llamentó la «hipocresía» del equipu de gobiernu. «Esmoleznos ya indígnanos el pocu respetu que tien el PSOE local pol bienestar animal. Son cobardes cola tauromaquia. Nin se plantega’l referéndum del que faló l’alcaldesa», señaló la conceyala Alba González. La coalición morao y verde presentara una proposición para redirixir los sos usos en sentíos culturales y de participación xuvenil que foi refugada.
Uviéu va convertise del 4 al 7 de payares del 2020 na sede del certame de quesos más importante del mundu cola celebración de los World Cheese Awards. La última edición d’esti certame fíxose en Bérgamo. Nesa mesma ciudá italiana, Begoña López, directora xeneral de Desenvolvimientu Rural y Industries Agraries, simbolizó’l vienres nueche la recoyida del testigu del festival cola entrega d’un quesu de Cabrales a la entidá organizadora, Guild of the fine food.
López señaló que la elección del quesu representativo d’Asturies foi perdifícil dau’l gran númberu de variedaes que se producen na comunidá. La directora sorrayó que la celebración d’esti certame supón tanto una oportunidá como una reconocencia al trabayu de los queseros, amás de valir “la industria agroalimentaria”. López felicitó a Bérgamo pola so “magnífica organización” y animó a tolos asistentes a participar nel Asturies Paraísu Natural International Cheese Festival 2020.
La organización del festival va trayer a la comunidá un congresu científicu y gastronómicu y una olimpiada de quesos de monte
Nesta edición, el ganador absolutu foi Roger Creamery, d’Estaos Xuníos, que llogró una puntuación de 100 sobre 100. Asturies tamién formó parte del palmarés con trés gallardones, algamaos pola quesería Rei Silo. Dos oros pal Rei Silo afuega’l pitu Blanco y otru pal quesu Massimo. D’esta manera, la empresa asturiana convirtióse na más premiada de la historia del certame. Nel concursu, participaron unos 3.800 quesos procedentes de tol mundu.
Los World Cheese Awards van cumplir 33 ediciones n’Uviéu. Nesti concursu van participar más de 3.000 quesos y 250 xueces internacionales van encargase de dictaminar cuálos son los meyores. Espérase que más de 10.000 persones asistan al eventu. El certame, qu’incluye tamién una exhibición de productos, va atrayer al Principáu a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu. Amás, l’Asturies Paraísu Natural Internacional Cheese Festival incluye la organización de munches actividaes en tola comunidá nel 2020. Ente elles, un congresu científicu y gastronómicu y una olimpiada de quesos de monte.
Los trabayos pa instalar la pasarela de Nuevo Roces van empezar el llunes. La obra, axudicada a la empresa Media Madera, cuenta con un presupuestu d’execución de 540.000 euros y un plazu d’execución de cuatro meses. La pasarela tien 290 metros de llargor y un anchor útil de 2’4 metros. Va conectar el conocíu como camín de Arbesú, nel llau norte de l’autovía A-8, cola sienda qu’escurre al norte del barriu.
Les secciones o módulos que vuelen sobre l’autovía tienen un mayor llargor, sofitándose sobre un pilar central allugáu na mediana de l’A-8. L’allugamientu, afitáu polos puntos de conexón, implicó la necesidá de solicitar l’autorización de la Demarcación de Carreteres del Estáu, amás del cambéu del allugamientu del panel informativu de l’autovía. La pasarela, concebida para usu piatonal y cicloturista, ta construyida con madera de pinu montés y va sofitase en pilastres de formigón
Los vecinos de Nuevo Roces tan de norabona. Alimerka inauguró esti xueves un nuevu supermercáu, el primeru del barriu. Esta nueva tienda, qu’ocupa casi 5.000 metros cuadraos, cuenta con 90 places d’aparcamientu y supon la creación de 42 puestos de trabayu. Con esta apertura, Alimerka espera ameyorar los servicios de la zona, una y bones los vecinos víense obligaos a movese en coche para poder realizar les sos compres.
Cola apertura d’esta tienda Alimerka estrena’l serviciu Click & Collect. Productos esfrecíos, conxelaos y secos que los veceros van poder recoyer nunes novedoses taquilles con sistema de conxelación y refrigeración. Con esta innovadora infraestructura, la compañía va poder garantizar la frescura de tolos productos adquiríos, una y bones la cadena de fríu siempres ta caltenida. Los veceros van poder usar esti serviciu de forma totalmente gratuita, y recoyer les sos compres nun máximu de cuatro hores dende la realización de los sos pidíos online. Con esti nuevu serviciu, que nel futuru podría estendese a otros establecimientos, la compañía sigue trabayando nel so tresformamientu dixital, que se suma a la recién apaición de la so nueva app.
L’allugamientu de la futura estación intermodal de Xixón torna a tar nel aire. L’alcaldesa de Xixón, Ana González, abrió esti xueves la puerta a un nuevu cambéu d’allugamientu. La primer edil de la Casa Conceyu fizo estes declaraciones a la salida del Conseyu d’Alministración de Xixón al Norte celebráu en Madrid. «Cuando se tenga l’estudiu veráse qué decisiones hai que tomar», aseguro l’alcaldesa en declaraciones recoyíes por Europa Press.
González recordó que yá había proyectu constructivu de la estación intermodal p’allugala en Moreda, «pero’l Gobiernu de Foru camudó’l so allugamientu». La posible vuelta de la estación intermodal a Moreda queda pendiente del estudiu informativu que se ta realizando. Espérase que tea llistu nel primer trimestre del añu próximu.
El candidatu de la coalición PP-Foro a les elecciones del 10 de payares Isidro Martínez Oblanca denunció’l «abandonu» del túnel del Metrotrén. «Esaniciaron la estación de tren por un chamizu impresentable. Xixón ye la única ciudá del mundu con Metro que’l so túnel lleva doce años construyíu y que’l Gobiernu socialista desmantela tres cada intentu d’otru Gobiernu pa ponelo en serviciu». El candidatú tildó de «disparate» el planteamientu del PSOE de «arrenunciar a la centralidad de les estaciones».
El grupu municipal de Podemos-Equo Xixón espera que nun haya más retrasos na construcción de la futura estación intermodal. «Resulta sorprendente que dempués de 17 años inda teamos pendientes d’un estudiu que determine la idoneidad técnica del allugamientu de la estación”, señaló Yolanda Huergo. La vocera de la coalición esplicó que l’allugamientu de la estación ye una pieza «fundamental» pal futuru diseñu de tolos terrenes venceyaos al plan de víes y refugó qu’esti proyectu termine por convertise «nun nuevu Muselón». «Cada vez que damos un pasu gasten miles d’euros, por eso non podemos dexar nin un solu pasu en falsu”, afirmó la vocera.
Una xunta d’investigadores del Centru d’Investigación del Cáncer d’Ontariu y l’Hospital for Sick Children (Toronto, Canadá), l’IDIBAPS de Barcelona y l’Institutu d’Oncoloxía de la Universidá d’Uviéu, consiguieron descifrar rexones previamente inexplorades del xenoma de célules tumorales. Esti analís permitió identificar dos mutaciones estremaes na mesma posición del xenoma, una d’elles presente en leucemia linfática crónica y otros cáncanos, y la otra presente en más del 50% de casos d’un tipu de meduloblastoma.
L’estudiu, qu’espubliza güei la revista Nature, amuesa per primer vegada la relevancia d’estes rexones inexplorades del xenoma na progresión tumoral, gracies al desendolcu de nueva metodoloxía bioinformático. A diferencia de les mutaciones que s’identificaren hasta agora, les dos mutaciones identificaes nestos trabayos afeuten a un xen perpequeñu y que nun codifica una proteína. Sicasí, esti xen, nomáu U1-snRNA, contribúi a la maduración de la mayor parte los xenes espresaos na célula, poro, estes mutaciones orixinen un efeutu cascada qu’afeuta a diversos mecanismos moleculares implicaos n’apaición y progresión del cáncer.
Nestos estudios participaren Lincoln Stein, direutor d’Oncoloxía Adaptativa nel Institutu d’Investigación del Cáncer d’Ontariu, Michael Taylor, del Serviciu Neurociruxía Pediátrica y Bioloxía del Desensolcu y Célules Madre del Hospital for Sick Children de Torontu, Elías Campo, direutor del IDIBAPS, direutor d’Investigación del Hospital Clínic y caderalgu d’Anatomía Patolóxica de la Universidá de Barcelona, y Xose S. Puente, investigador del IUOPA y Caderalgu de Bioquímica y Bioloxía Molecular de la Universidá d’Uviéu.
La llende del xenoma
El cáncer ta causáu pola apaición de mutaciones nunos pocos xenes qu’afeuten a cómo furrula una célula normal, provocando la tresformación tumoral. El tipu mutación determina la evolución del cáncanu y la rempuesta al tratamientu con fármacos específicos, poro la necesidá de conocer les mutaciones que causen esta tresformación.
Durante los caberos 10 años, el Consorciu Internacional de Xenomas del Cáncer (ICGC) vien secuenciando’l xenoma de más de 17.000 cáncanos de los principales tipos de cáncer, col envís d’identificar los xenes mutaos nestos cáncanos. “Llamentablemente, delles rexones del xenoma son tan repetitives y complexes, que quedaben acullá de lo esplorable con les teunoloxíes de les que disponíemos” comenta’l Dr. Xose Puente. “Ye como tratar de completar un rompecabeces d’una semeya d’un cielu azul. La mayor parte les pieces azules podrían encaxar en cualesquier parte del rompecabeces, polo que ye perdifícil de finar”, añade.
Agora, nun sólo fue posible investigar estes rexones, sinon que l’analís de más de 2.500 xenomas tumorales asoleyó la esistencia de dos mutaciones en distintos tipos de cáncanos. Estos resultados abren la posibilidá de que mutaciones n’otres rexones asemeyaes participen n’otros cánceres o n’otres malures xenétiques.
Impauto clínico y funcional
La mutación U1-snRNA identificóse en muestras de leucemia linfática crónica, la leucemia más frecuente nos adultos, asina como’n carcinoma de fégadu. Otra mutación nel mesmu sitiu del xenoma ta presente na casi totalidá de los cáncanos de pacientes adultos con meduloblastoma tipu SHH, asina como n’otros subtipos d’esti grupu de cáncanos cerebrales. La validación funcional y clínica, llevada a cabo polos investigadores del Hospital Clínic-IDIBAPS y la Universidá d’Uviéu, confirmó qu’esta mutación provocaba una cadena d’alteraciones en múltiples xenes, y asociábase a les formes más agresives de la leucemia linfática crónica. “Conseguimos esplicar por qué en un subgrupu de pacientes la enfermedá evoluciona rápidamente y requier de tratamientu, mientres que n’otros pacientes la leucemia ye indolente y nun requier de tratamientu durante bastantes años”, señala el Dr. Elías Campo.
El conocimiento d’estes dos mutaciones representa una nueva oportunidá de tratamientu
Dende’l puntu de vista de l’aplicación clínica, amás de servir como marcador pronóstico en meduloblastoma y leucemia linfática crónica, el conocimiento d’estes dos mutaciones representa una nueva oportunidá de tratamientu.
Sicasí, fármacos qu’afeuten a la maduración del RNA y que tan probándose pa otros cáncanos, podríen ser útiles nel tratamientu d’estos pacientes. Además, esta mutación provoca qu’otros xenes maduren de manera incorreuta, lo que podría facilitar que’l sistema inmune reconociera les célules tumorales mediante los nuevos tratamientos d’inmunoterapia. “Esti estudiu nun sólo ye’l primeru n’identificar mutaciones funcionales nes zones repetitives del xenoma, sinon que pon de manifiestu la relevancia de facer públicos y accesibles tolos estudios xenómicos pa que la comunidá científica pueda re-analizalos a midida que se desendolquen nueves ferramientes d’analís”, conclúi Elías Campo.
Esta investigación ye posible gracies a la financiación de la Fundación bancaria “la Caixa”, CIBERONC y l’Instituto de Salud Carlos III.
Dixebra trabaya yá nel que va ser el so discu númberu catorce. La banda avilesina anunció esti miércoles en Facebook que yá tien compuestes una quincena de temes y grabaes delles maquetes. «Va ser un discu mui especial onde la memoria colectiva, la historia social d’Asturies y l’actualidá entemécense nunes lletres mui trabayaes y centrales nel conceptu d’esti trabayu nuevu», señalen. Pel momentu, desconócense más detalles d’esti nuevu trabayu, como la fecha previsible de publicación o el títulu. «Pasín ente pasu», rematen.
El conseyeru de Desenvolvimientu Rural, Agroganadería y Pesca, Alejandro Calvo, pidió esti llunes al Ministeriu d’Agricultura, Pesca y Alimentación que’l plan estratéxicu d’España nuevu pa la Política Agraria Común (PAC) tenga en cuenta la singularidá territorial d’Asturies y de les sos esplotaciones agroganaderes. Calvo asistió en Madrid a la xunta de la Conferencia Sectorial d’Agricultura y Desenvolvimientu Rural y al Conseyu Consultivu sobre Política Agrícola p’Asuntos Comunitarios. Ellí esixó que s’articulen midíes adaptaes al modelu agrariu del Principáu, sostenible y familiar, y que se refuercen los pagos agroambientales y climáticos.
Nesti sentíu, destacó que la llindiadura tradicional, amás de formar parte de la identidá cultural y económica d’Asturies, ayuda a caltener los hábitats y mengua’l cambéu climáticu. “Por estes razones, les nuestres esplotaciones familiares y la so xestión silvopastoral son grandes sumidorios efectivos de CO2”, valoró. El conseyeru tamién aportunó na necesidá de que la PAC nueva cunte con presupuestu abondu pa sofitar la renta de llabradores y ganaderos, superar desequilibrios históricos ente territorios y empobinar los recursos escontra la xeneración d’empléu y actividá.
Alejandro Calvo señaló qu’una de les prioridaes tien que ser el relevu xeneracional
Amás, señaló qu’una de les prioridaes tien que ser el relevu xeneracional, pa lo que va ser fundamental la meyora de los incentivos pa la incorporación de mocedá al campu. Al so xuiciu, tamién va haber que reforzar el papel de les muyeres nel mundu rural y l’establecimientu de mecanismos de discriminación positiva pa zones de monte y esplotaciones pequeñes. Amás, Calvo defendió la supresión del cobru actual de derechos históricos y la opción d’afitar un tope máximu de 60.000 euros por esplotación.
Otru de los asuntos que propunxo ye l’impulsu de la coordinación ente’l ministeriu y les comunidaes afectaes pola presencia de l’aviespa asiática. Pa Calvo esti ye un “asuntu prioritariu”. El Gobiernu asturianu va doblar el presupuestu destináu anguaño a desaniciar la vespa velutina hasta algamar los 300.000 euros.
Repartu de cuotes pesqueres
El titular de Desenvolvimientu Rural participó na xunta de la Conferencia Sectorial de Pesca, onde esixó un repartu xustu de cuotes. Calvo señaló que comparte les aspiraciones “llexítimes” del sector d’ameyorar la “distribución tan inxusta de cuota de xarda aprobada nel 2014”. Sobre esti asuntu, esixó que na negociación viniente de los repartos de cuotes s’introduzan criterios socioeconómicos y de sostenibilidá. Asturies tien una flota formada por 261 embarcaciones de pesca artesanal y de dimensiones pequeñes, selectiva y respetuosa col mediu ambiente.
