Xixón al día

Categoría: Tema del día

  • Asturies protagoniza esta fin de selmana La Vuelta

    Asturies protagoniza esta fin de selmana La Vuelta

    Asturies va ser protagonista de La Vuelta Ciclista a España la próxima fin de selmana. La caravana de la prueba, compuesta por 2.500 persones ente personal d’organización y seguridá, equipos ciclistes y medios de comunicación, va llegar a Asturies el sábadu 7 per Ribedeva. Va percorrer gran parte de la mariña asturiana hasta llegar a Uviéu, la so primer meta asturiana. Tinéu y Pravia van dar la salida a les etapes de los díes 8 y 9. L’altu del Xardón en Cangas y el de La Cubilla, en L.lena, son los dos finales inéditos qu’apurre Asturies a esta edición. Per primer vegada van instalase trés podios asturianos.

    L’equipu de promoción turística de la Conseyería de Cultura, Política Llingüística y Turismu va aprovechar la convocatoria y capacidá de prescripción de la principal prueba ciclista del país p’asitiar la marca Asturies Paraísu Natural ente un públicu fiel y activo, qu’aprecia los valores del deporte y la naturaleza, y que toma La Vuelta como referente de los sos iconos deportivos.

    Asina, el Principáu va instalar puntos d’información turística nes salíes asturianes, y va asitiar material promocional nes metes coles mires d’aumentar la visibilidá de la marca dientro de les retresmisiones televisives. Na edición de 2018, les dos etapes asturianes de La Vuelta fueron siguíes por 5,6 millones de telespectadores.

    Dientro del programa d’acciones previstes pol Gobiernu autonómicu pa promocionar Asturies como destín deportivu, el Principáu acueye tamién esta selmana la visita d’un equipu de la federación alemana d’altu monte Deutscher Alpinverein, la más antigua y numberosa del país xermanu, con barganal d’un millón d’afiliaos, y de los periodistes de Volata, la prestixosa revista especializada en ciclismu con see y club social en Barcelona.
    Coles mesmes, la británica Cyclist Magacín cuntó la selmana pasada col sofitu del Principáu pa realizar dellos itinerarios que van ser oxetu d’un futuru reportaxe p’afayar nueves rutes a los sos llectores.

    Asturies, amás, va tener presencia esta seronda en medios de comunicación especializaos en turismu activu y deporte al campu con espardimientu en Reinu Uníu, Portugal, Alemaña y España, acciones que se suman a la participación esta primavera na copa del mundu de ciclismu BTT al traviés de puntos d’información turística nes principales carreres, y el trabayu nos últimos años con federaciones internacionales de senderismo y cicloturismo pa captar prescriptores especializaos dientro de los oxetivos del Programa de Turismu Sostenible 2020.

  • Alfonso Baragaño, nuevu xerente d’Emulsa

    Alfonso Baragaño, nuevu xerente d’Emulsa

    Alfonso Baragaño, con 16 años d’esperiencia, ye’l nuevu xerente d’EMULSA. El xefe de la área económico financiera y de planificación y control sustitúi nel cargu a Pilar Vázquez que cesa nel cargu por xubilación. Baragaño coordinó los principales proyectos d’innovación y nueves tecnoloxíes enllantaos según los planes estratéxicos y el control de xestión de la empresa municipal. Llicenciáu n’Alministración y Dirección d’Empreses pola Universidá d’Uviéu, como formación complementaria realizó un cursu cimeru en Xestión d’Empreses de Servicios Públicos y un Programa Executivu en Control de Xestión, Estratexa ya Innovación.

  • Asiegu, en Cabrales, Premiu al Pueblu Exemplar d’Asturies

    Asiegu, en Cabrales, Premiu al Pueblu Exemplar d’Asturies

    L’aldea d’Asiegu, nel Conceyu de Cabrales, foi galardonada col Premiu al Pueblu Exemplar d’Asturies 2019, según fixo públicu esti llunes n’Uviéu’l xuráu encargáu de la so concesión. Con una población de 98 vecinos, el so allugamientu constitúi un privilexáu balcón dende’l que reparar, al sur, los macizos d’altu monte de los Picos d’Europa. Na redolada atópense yacimientos arqueolóxicos como la cueva prehistórica de la Covaciella, lo que certifica que se trata d’una zona poblada dende tiempos bien remotos. A principios del sieglu XX descubriéronse un grupu de catorce hachos dataos ente 1700 y 1500 a.C., conocíes como los ‘hachos de Asiegu’. Anguaño atópense nel Muséu Arqueolóxicu d’Asturies. Amás, nesta aldea alcontróse un enterramientu con dote funeraria, que pol tamañu de los restos foi conocíu como la tumba del ‘xigante d’Asiegu’. Tamién hai nel pueblu restos d’una construcción defensiva, conocida como El Castru, que nel sieglu XVIII yera yá descritu como’l castiellu de Asiegu.

    El llendo y la ganadería fueron, mientres sieglos, la fonte de riqueza tanto d’Asiegu como de tol conceyu de Cabrales y l’ellaboración de quesos p’aprovechar l’escedente llácteo constituyó tamién dende antiguu una traza característica. El barriu de La Caleya constitúi’l núcleu primitivu del pueblu, onde se repara l’arquitectura tradicional asturiana de corte popular, con delles cases de corredor, ente que la conocida como la casa d’El Cuetu de las Abellotas, el barriu más altu d’Asiegu, ye una de les muestres constructives más vieyes que se caltienen y que tien el so orixe nuna posada d’orixe medieval.

    Los vecinos crearon en 1999 l’Asociación Cultural Asiegu XXI pa recuperar la conciencia de comunidá y la iniciativa vecinal perdida pola crisis del mundu rural. Una de les sos primeres acciones foi la recuperación de fotografíes históriques sobro dellos llogros de la comunidá vecinal y la so publicación en calendarios monográficos, por casu, sobro la construcción de la carretera o la escuela. Asiegu XXI impulsó la realización de diversos trabayos comunales, como la meyora de les infraestructures pal llendo, la renovación del tendíu eléctricu y l’allumáu públicu y les trayíes d’agua. Tamién dotó d’usu a l’antigua escuela, rehabilitada pol Conceyu, como centru social pa los vecinos.

    Anguaño, Asiegu cuenta con dos queseríes acoyíes a la DOP Quesu de Cabrales, dellos agospiamientos de turismu rural y l’itinerariu Ruta’l Quesu y la Sidra. Con cuatro fataos d’oveya xalda, Asiegu convirtióse en referencia na recuperación, manexu y promoción d’esta raza autóctona. El pueblu foi’l primer núcleu de población d’Asturies n’instalar una rede interna pa conectar dellos llares a internet y dar cobertoria a la mayada de Tebrandi.

    Esti galardón convocar por primer vegada en 1990, al cumplise’l décimu aniversariu de la Fundación, y tien una naturaleza y calter distintos a los Premios Princesa d’Asturies. La so dotación económica ye de venticinco mil euros. Nesta edición allegaben un total de 26 candidatures.

  • ¿Y si Asturies fuere una república socialista soviética?

    ¿Y si Asturies fuere una república socialista soviética?

    Cataluña aguanta’l 5 d’ochobre, l’exércitu español divídese en dos (un frente asturianu y otru catalán) y tien menos recursos p’acabar coles posiciones mineres n’Asturies, qu’aguanten y resisten. Énte esta resistencia d’Asturies y Cataluña, la fuelga espárdese pente les otres ciudaes españoles. El gobiernu de Lerroux conxela les posiciones nel frente asturianu pa reprimir los disturbios y el gobiernu revolucionariu d’Asturies, al mandu de Belarmino Tomás, viendo que la situación nun se sostién, pide l’ingresu na URSS. Stalin aceuta y el destín d’Asturies cambia pa siempre.

    Ésti ye’l presupuestu de partida de ‘Depués d’Ochobre‘, el primer xuegu de rol n’asturianu. La llinia histórica tien pocos cambios a nivel mundial pero sí n’Asturies, que pasa a ser una República Socialista Soviética más. Bombardeada pola Luftwaffe dende 1941 a 1944 y hasta con un desembarcu nazi na playa de Xagó, l’Asturies de 1970, añu nel que s’ambienta’l xuegu tien poco que ver cola que tenemos güei. Mieres ye’l Hollywood socialista y yá nun se llama ‘Mieres del Camín‘ sinón ‘Mieres del Camín a Socialismu‘, como-y pasa a Grau, que ya nun ye Grau sinón Belarminograu. Xixón tien una base de somarinos nucleares y hai una central nuclear en Navelgas. Asturies ta gobernada pol Soviet Cimeru y l’aeropuertu de Ranón ye una base militar. Los vuelos a Asturies van a Llanera, onde ta l’Aeropuertu Internacional Aida de la Fuente – Uviéu’. La cooficialidá ye ente l’asturianu y el rusu. Les revueltes sesentaiochistes se faen al gritu de «soviéticos sí, rusos non», como reaición a que les persones d’esta nacionalidá tienen les meyores posiciones llaborales y polítiques.

    Xixón tien una base de somarinos nucleares, hai una central nuclear en Navelgas y n’Asturies gobierna’l Soviet Cimeru

    Depués d’Ochobre plantega un xuegu nel que los xugadores son axentes del KGB que tienen que descubrir espíes americanos, franceses, británicos y hasta franquistes nes cais y pueblos d’Asturies. Tamién permite que seyan axentes enemigos infiltraos nel suelu soviéticu, exiliaos españoles o miembros de les fuercies especiales soviétiques ‘spetsnaz’.

    El xuegu de rol nun tien el sofitu de nenguna editorial nin sovención. El 5 d’ochobre presnetaráse la campaña de crowdfunding coincidiendo col 85 aniversariu de la Revolución d’Ochobre. Nella, les persones que lu quieran sofitar y mercar, van poder facer donativos y recibilu cuando s’edite, amás d’oxetos y illustraciones de ‘l’Asturies soviética’. Namás d’esta manera’l proyeutu va ser viable.

  • Anulase’l picnic familiar nel Botánicu

    Anulase’l picnic familiar nel Botánicu

    El mal tiempu rexistráu nes últimes hores en Xixón va prollongase nos díes vinientes. L’Axencia Estatal de Meteoroloxía preve una fin de selmana de lluvia y tormentes na ciudá. Por esti motivu, el Xardín Botánicu de Xixón ta acabante d’anunciar la cancelación del picnic familiar previstu pa esti domingu. Les persones que mercaren la so entrada na taquilla’l Botánicu puen pidir la devolución na mesma.

  • Más de 1.700 llibros repartíos nuna selmana

    Más de 1.700 llibros repartíos nuna selmana

    El XXI Programa d’Intercambiu de Llibros de Testu de Xixón apurrió mientres la primer selmana un total de 1.740 llibros a 541 estudiantes, el 81,23% de los cualos vienen de centros educativos públicos. Nesta segunda fase del programa, qu’empecipió’l pasáu 19 d’agostu y va enllargase hasta’l próximu 30 de setiembre, contabilizáronse tamién 618 nuevos llibros de testu.

    Amás, dende’l 19 d’agostu y hasta el 30 de setiembre, puede atopase un Mercadín de Llibros coles mires de recaldar fondos pa collaborar col intercambiu de llibros. La iniciativa tien tamién como oxetivos el fomentu de la llectura y la promoción de la reutilización de llibros, allargando la so vida útil y amenorgando la xeneración de borrafes.

    Nel mercadín puede atopase hasta’l próximu 30 de septiembre literatura bien variada a 1, 2 y 3 euros: llibros infantiles y xuveniles, novela negra, grandes clásicos, ensayos, biografíes, novela histórica y d’aventures, lliteratura n’otros idiomes…

  • Trés menores xueguen a saltar d’una ventana a otra en Pumarín

    Trés menores xueguen a saltar d’una ventana a otra en Pumarín

    9:30 hores de güei, 23 d’agostu. Una vecina da la voz d’alarma: dos neñes de 9 y 5 años y un neñu de 3 que taben solos nun pisu tán saltando d’una ventana a otra na novena planta d’un edificiu de les Torres Sedes de Pumarín.

    Una patrulla de la Policía Llocal y una dotación de Bomberos treslládense al llugar onde proceden, nun primer momentu, a salvaguardar la integridá de los menores y a la so identificación. Trátase de dos neñes de 9 y 5 años y un neñu de 3. Taben solos pero, en realizando les averiguaciones oportunes, atopen a la so madre que taba trabayando. A los pocos minutos preséntase na vivienda y queda al cargu de los sos fíos.

    La Policía Llocal analizó les cámares de seguridá de tráficu, que captaron el momentu nel que unu de los menores ta faciendo l’acción.

    De los fechos dará cuenta a la Fiscalía de Menores y a Servicios sociales.

  • El pabellón de Xixón na Feria de Muestres recibió 68.335 visites

    El pabellón de Xixón na Feria de Muestres recibió 68.335 visites

    Nos 16 díes que tuvo abiertu al públicu, ente’l 3 y el 18 d’agostu, el pabellón de Xixón na Feria de Muestres d’Asturies recibió esta edición 68.335 visitantes. Namái l’añu pasáu, que tuvo dedicáu a los hermanos Castro, y el de 2013, que se dedicó al comerciu llocal, recibieron más visitantes. El día de mayor afluencia foi’l sábadu, 12 d’agostu, día que visitaron el pabellón de Xixón 8.241 persones. La esposición instalada anguaño nel pabellón llevó por título ‘Roma y Xixón. Una mirada virtual‘ y tuvo organizada por Divertia y la Fundación Municipal de Cultura.

  • La Feria de Muestres pieslla edición con 724.314 visitantes

    La Feria de Muestres pieslla edición con 724.314 visitantes

    La 63 Feria Internacional de Muestres d’Asturies concluyó esti domingu con un balance final de 724.314 visitantes. Esta cifra constitúi la mayor cifra de la hestoria del certame, superando los meyores datos hasta la fecha, que se produxeren na edición de 2017. Nun comunicáu, la Cámara de Comerciu de Xixón valoró estos bonos datos porque «consoliden l’altu nivel d’aceptación amosáu polos ciudadanos, lo que dexó asitiar a la Fidma como la más visitada d’España».

    Este cifres, destaquen, respuenden tamién al ésitu de los espositores, verdaderos protagonistes de la Feria. Amás de los miles de visitantes asturianos, pol recintu ferial Luis Adaro pasaron numberoses persones procedentes del restu de comunidaes autónomes y d’otros países. L’axenda d’actos institucionales, que tomaron bien distintos ámbitos como l’económicu, empresarial, políticu, social, cultural, formativu, deportivu o científicu, supunxeron tamién otru de los grandes curiosos de la Feria, superando’l centenar los celebraos mientres los 16 díes de duración.

  • Entrada gratis a la Feria si llegues en bici

    Entrada gratis a la Feria si llegues en bici

    La Feria de Muestres celebra esti vienres el Día del Mediu Ambiente. Tou aquel qu’allegue al recintu ferial Luis Adaro en bicicleta va entrar gratuitamente al certame. El Conceyu de Xixón, en collaboración cola Empresa Municipal de Servicios del Mediu Ambiente Urbanu (EMULSA) y l’Empresa Municipal d’Agües (EMA), va habilitar un aparcamientu vixiláu pa bicicletes. Va tar asitiáu al pie de la entrada principal.

    Les bicicletes van ser recibíes nel aparcamientu pol personal a cargu que se va encargar d’aparcales y vixilales ensin que sía necesariu candales. A la recepción del vehículu, va entregase al visitante una ficha que va sirvir tantu d’entrada pa la Feria como pa recoyelo a la fin de la visita. L’aparcamientu va tar abiertu mientres tol día pero, a partir de les 20:30, namás se van poder retirar les bicicletes yá aparcaes.

    L’oxetivu ye buscar un modelu de ciudá más atenta col que les persones y la so seguridá sían la prioridá. L’asociación Asturies con Bici va collaborar instalando un pequeñu stand informativu que se va allugar xuntu al aparcamientu. Encargaránse d’entregar folletos nos que se recordarán delles normes y encamientos como, por casu, circular por siendes, ceres y restu de zones ciclo-piatonales o dar preferencia a les persones que se mueven caminando nes zones espresamente señalizaes.